Read kirikeni Luk 7 Bible Online

Luk 7 - kirikeni bible

Luk 7

¹Jizọs Ḅe mà ọkwẹịnma kọn tomonima pịrịso sịkị, Ò so Kapanịọm mun mẹ.

²Anịnyọ gbọrị Rom owunitịḅịnịḅọ ọ̀ ḅụ yela fịrịnwẹngịḅọ nwọ nyanamẹ; ḅe ḅọ ḅe obi se fị-ẹtọn-aḅẹ.

³Ḅe owunitịḅịnịḅọ ḅe Jizọs Ḅe gbolomaye nwọ naa sịkị, ò Juapụma ḅụ da sẹnịapụ fịrịmamẹ, mun Ọ̀ chịn se Ò ḅo oria fịrịnwẹngịḅọ ḅe nwọ gwọḅịa ḅara.

⁴Ini Jizọs Ḅe damaḅo se iḅiọkụ se Ọ̀ tẹkẹmẹ, “Ḅe ḅọ ḅe kọkọmaye ḅụ ị́ ḅara ḅarachụa ḅimẹ.

⁵Ọ̀ mịna tomonima ḅẹlẹmamẹ, ori mị ḅara na mịna tẹkẹwarị mị nwọ nama wa pịrịye-ẹ.”

⁶Anị Jizọs Ḅe ini na mun ye-ẹ. Ọ̀ warị mị na ma sasaka simeogbo owunitịḅịnịḅọ ḅe oria ikiapụ fịrịmamẹ na ini ḍuko Ọ̀ pịrị, “Sẹnịḅọ, ị́ ḅụfụkamama. Ị́rị́ ị̀ya warị ḅo mị ị̀ gbẹịnkẹ,

⁷ḅara na ị́ damaḅo mị ị̀ gbẹịnmẹ nwọ ḅẹ koroma à pịkị nwọ nyana ị̀ ḅụ pịrịkẹ. Ị́rị́ pa tọn ị̀ya fịrịnwẹngịḅọ ḅe ọ̀ ḅụ iḅiḅịa.

⁸Ị̀rị̀ sọnị, ini ị̀ se ị̀ nẹngị owunitịḅịnị chuku koroma ḅọ-ẹ, à pịkị ị̀ chuku ḅie sime owuni nyana waraḅẹ. À tọn mị ḅọ pịrị, ‘Mun!’ ọ̀ pịkị mun mẹ. À tọn ísíḅọ pịrị, ‘Ḅo!’ ọ̀ pịkị ḅomẹ. À pịkị tọn ị̀ya omoniḅọ pịrị, ‘Mun mịn mị mịẹ!’ ori anị mịẹmẹ.”

⁹Jizọs Ḅe Ọ̀ ḅụgbiripumẹ Ọ̀ mịn mị naa sịkị; Ò vinpịkị nwọse Ò ḍuko sime tomonikpo mị ḅẹmẹ, “Ma à nwọ sime ḅereni ọrịkẹ, à ḍuko ọ́ pịrịaḅẹ, Izrẹl mị ḅie sọnị!”

¹⁰Okunwẹngịapụma vinpịkị owunitịḅịnịḅọ ḅe warị nwọ mun mẹ, se oria fịrịnwẹngịḅọ ḅe ḍọkị ọrịmẹ ḅụ iḅisa ḅọ ḅaraḅụ.

¹¹Boka kala sịkị ḅọrọ seso, Jizọs Ḅe Nein nwọ chịn gbọrị ama mun mẹ, Oria ọḅụḍukoapụma na ḅaka tomonikpo na Ọ̀ ḅụ sọ se mun mẹ.

¹²Ò mun ama mị ḅe onu ḅọkọ mị la kirikiri, ḍụẹịn igbe pụra apụ sụngụma pakaḅo Ori na bịamamẹ. Fịḅọ ḅe nyengiḅọ ngẹrị yi tọkụ-ẹ, deḅọfịsa eremeniḅọ-ẹ, ama mị ḅie wẹrị pakaḅo ḅaka tomonikpo pịkị árị na omi-ẹ.

¹³Nyanaḅọ Ḅe árị ọrị sịkị Ori opuma á ḍikitịḅịfoinmẹ, se Ọ̀ nwọse á ḅẹmẹ, “Owuma.”

¹⁴Anị Ọ̀ nwẹngị saḅa mun ḅara se fịḅọ igbe mị lamaye-ẹ, se anị deki apụma dachịẹmẹ. Jizọs Ḅe nwọ ḅẹmẹ, “Asẹmẹnịḅọ! À nwọse ị́ ḅẹmẹ, Sịsẹ!”

¹⁵Fịḅọ ḅe sịsẹ se sakị ọkwẹịnmẹ, se Jizọs Ḅe ọ̀ ḅọrọma nyọngọrọma pịrịmẹ.

¹⁶Ḅalafa tomoniḅọ goyegoye ḅie sọ ḅeinmẹ, se ini Tamụnọ Ḅe tokonimẹ. “Opu ịkịankoroḅọ mịna ogboku pakaḅosam!” ini nwọ ḅẹmẹ; “Tamụnọ Ḅe ò ḅo oria tomonima ḍụaḅọrọma-ẹ ḅosam!”

¹⁷Mịn, Jizọs Ḅe gboloma ḅẹrẹ mị wasama mun sẹ mị mgba kelemamẹ, pịkị anị kelema à nyọma na.

¹⁸Jọn ọḅụḍukoapụma mayema gbolomaye mamgba nwọ ḍuko ọ̀ pịrị sịkị, ori inia ḅie mama apụ chịn ọḅụ pịrịmẹ,

¹⁹se ini seni Nyanaḅọ Ḅe fịrịmamẹ na ini Ò gbela, “Jọn ḅe ḅẹrẹ ḅẹ ḅoaḅẹ nwọ ḅẹ ḅọ ḅe ị́rị́ mụnọ, se wa tọrụ se jịnḅọ ḍiki-ao?”

²⁰Ini ḅo Jizọs Ḅe lasịkị, ini nwọ ḅẹmẹ, “Mengisara Jọn ḅe wa se fịrịmamẹ, ị́ gbela, ọ̀ ḅẹrẹ ḅẹ ḅoaḅẹ nwọ ḅẹ ḅọ ḅe ị́rị́ mụnọ, se wa tọrụ se jịnḅọ ḍiki-ao?”

²¹Anị gbọrị sịkị ḅụ Jizọs Ḅe tọn apụ nwọ gwọmẹ inia obima ḅụ, fin-fin obima na, sitẹmẹ desin se pịkị tọn-a tọrụmgbọlụpụn apụ na nwọ gwọmẹ.

²²Ọ̀ Jọn okunwẹngịapụma pẹkẹrẹmẹ, “Ó vinpịkị mun se ómine ọrịsayema na, ọ́ naasaye ma na ḍuko Jọn ḅe pịrị: na tọrụmgbọlụpụn apụma ineda ye ọrịsam, ikeliapụma ineda nwẹngịaḅẹ, ḅụkan obi kọn apụma mịẹfịafịamaḅẹ, ḅeri iniki apụma ineda ye naa aḅẹ, fịapụma ini fịḅụ nwọ sịsẹma se ḍumomasam, pịkị Iḅi Ḅẹrẹ mị nwọ ḍuko igwein apụma pịrịaḅẹ.

²³Ị̀ ḅụ mama kuḅie nyanaka apụma nyana ḅieḅẹlẹ la ọkụ ḍiki!”

²⁴Jọn okunwẹngịapụma so sịkị, Jizọs Ḅe sakị Jọn ḅe gbolomaye nwọ ḍuko tomonikpo mị pịrịmẹ: “Ọ́ paka piri ele mị ḅie Jọn ḅe damamun sịkị, cheye ọ́ nwọ ọrịḅịa ẹrẹchị ó mun? Fọrụ jikearị gbọrị osuein ḅara?

²⁵Ọ́ paka mun che ḍiki-e mun? Lọkọ-a ḅịtẹ ḅiri ḅiriḅọ mụnọ? Kọkọmaye-ẹ anị ḅara nwọse ye ḅiri se alati kọn àrị apụma, amanyanapụ warịma ḅie ini omi-ẹ!

²⁶Ó ḍuko ọkọmụ, cheye ọ́ pakamun nwọ ḍiki-e mun? Ịkịankoroḅọ mụnọ? Iin kọkọmaye-ẹ, à ḍuko ọ́ pịrịaḅẹ na iḅiọkụ se ịkịankoroḅọ nẹngịḅọ ọ́ nwọ ọrịmẹ.

²⁷Anịatịḅị Jọn ḅe anị fịafịa ḍiri mị ḅẹrẹ ḅẹ ḅọ ḅe-ẹ: ‘Ḅe ị̀ya okunwẹngịḅọ ḅe-ẹ, Tamụnọ Ḅe nwọ ḅẹmẹ àrị ị̀ya okunwẹngịḅọ ḅe se ị́ tọrọkọ fịrịmaḅịa se ori ateli mị nwọ finji ị́ pịrịḅịa.’

²⁸À ḍuko ọ́ pịrịaḅẹ,” Jizọs Ḅe nwọse chụa ọkwẹịnmẹ, “Jọn ḅe ori opusọtẹịn ini yisa ḅọ goyegoye nẹngịmẹ. Ọkụma Tamụnọ Amanyanakiri mị ḅie sime bokatẹịnḅọ ḅe opusọtẹịn ọ̀ nẹngịmẹ.”

²⁹Tomoni mamgba Ọ̀ naamẹ; anịtẹịn anga amaochoapụma sọ Ò ḍukoye naamẹ; ini mị ḅịpịpoki ḅụ Tamụnọ Ḅe ḅiarị karakaraye mị mịẹapụ ma-ẹ, Jọn ḅe pịkị mengi se ini sarasam.

³⁰Ọkụma Farisiapụma na Oloko ḍieapụma na Tamụnọ Ḅe ḅi na ini sime nwọḅẹ ḅara mị nwọ sịkịmẹ, se ḍụkụkẹ, Jọn ḅe mengi seni ini sara.

³¹“Mịọkụ, cheye à nwọ seni mị ḅụọ ḅe apụma nwọ otoma ḅe? Ini che kịkẹ?

³²Fẹchiri ḅie sime awọmẹnị simeọkụ mị ini simeọkụ-ẹ. Gbọrị kpo ḅụ simeapụ oloku jịn kpo ḅụ simeapụ pịrịmẹ, ‘Wa ereya akwa farị ọ́ pịrịmẹ, ọkụma ọ́ sẹkị ḍụkụkẹ! Wa ḍụẹịn ḍipi nime chu ọ́ pịrịmẹ, ọkụma ómine owu ḍụkụkẹ!’

³³Jọn Mengisaraḅọ ḅe ḅomẹ, ò ḅuru se ḅụḅamamẹ se pịkị iru ḅukẹ, ọ́ nwọ ḅẹmẹ, ‘Sitẹmẹ ò ḅie omi-ẹ!’

³⁴Tomoniḅọ Tọkụ Ḅe ḅomẹ, se yefị pịkị ḅumẹ, ọ́ nwọ ḅẹmẹ, ‘Ḅe ḅọ ḅe ḍiki! Ori opu fịye fịḅọ-ẹ pịkị iruḅu ḅọ-ẹ, taksị ochoapụ na ini depakụmapụ na ikiaḅọ-ẹ!’

³⁵Anị simeọkụ simeọkụ sọnị, Tamụnọ Ḅe nemi mị, anị kọkọmaye sọ anị ḅereni ọkị apụma pịrịmẹ.”

³⁶Gbọrị Farisiḅọ Jizọs Ḅe chịnmẹ, ori na yefịḅịa ẹrẹchị, Jizọs Ḅe oria warị mun se kpọnjị sime yefịmẹ.

³⁷Gbọrị eremeniḅọ anị ama mị ḅie simemẹ, árị siḅọ-ẹ. Á naamẹ na Jizọs Ḅe Farisiḅọ ḅe warị yefịaḅẹ, anị árị alabasta olo ololo nwọ ọkị ḅo ye-ẹ, kụnụ olo ḅie ḅein waraḅẹ

³⁸se Jizọs Ḅe ọḅụju chịẹ simemẹ, Ọ̀ ḅụọ chuku ḅụ owuaḅẹ, pịkị árịa owu mengima se Ọ̀ ḅụọma pisimaḅẹ. Anịsịkị á tịḅị inime nwọse Ọ̀ ḅụọma gurosinmẹ, ḅịpị se àrị nọnjụ, se kụnụ olo mị se arịa ḅụ saramẹ.

³⁹Jizọs Ḅe chịn Farisiḅọ ḅe mịn mị ọrị sịkị, ọ̀ nwọse ọ̀ ḅụ ḅẹmẹ, “Ḅe tomoniḅọ ḅe nemikase kọkọma ịkịankoroḅọ ọkụma, mgbọkụ ḅara se Ọ̀ lamarị eremeniḅọ ma ḅe sime ḅara Ọ̀ nwọ nemisam, mgbọkụ á kọn-arị si ḍumo mị Ọ̀ nwọ nemisam!”

⁴⁰Jizọs Ḅe nwọse ọ̀ pẹkẹrẹmẹ, “Saịmọn, à ḍuko ị́ pịrịḅịa ye à nwọ nyana waraḅẹ.” Ọ̀ nwọ ḅẹmẹ, “Yeḍieḅọ, ḍuko ọkọmụ.”

⁴¹Jizọs Ḅe sakị nwọ ḅẹmẹ, “Mama owuapụ omi-ẹ igbiki se nweni ḅọlọ ḅọlọḅọ ḅara sa ọlọ apụ, gbọrịḅọ ọ̀ ḅara seleḅa ẹndẹ sọnọasi fịnjị sa nwọ ọlọmẹ, ísíḅọ ḅe seleḅa mesi oyi fịnjị sa nwọ ọlọmẹ.

⁴²Inia ḅụ ineda gbẹịnḅọ ofori-ẹ, anị ori inimgba sama nwọ wọlọma sinye-ẹ. Inia ḅụ tụḅọ ọ̀ ḅẹlẹmatẹịn ḅe?”

⁴³“À koroma ḅara,” Saịmọn ḅe pẹkẹrẹmẹ, “Ọ̀ ḅakatẹịnye ḅụ ḅarasin pịrịḅọ ḅe-ẹ.” Jizọs Ḅe nwọ ḅẹmẹ, “Ị́ pẹkẹrẹ ḅara mị karakaramẹ.”

⁴⁴Anịsịkị Ọ̀ tọrụ pịkị eremeniḅọ ma da se nwọse Saịmọn ḅe ḅẹmẹ, “Ma eremeniḅọ ma ị́ árị ọrị? Àrị ị́ya warị nwọ ḅomẹ, se ḅụọ sịkịrịḅịa mengi ị́ se ị̀ pịrịkẹ, ọkụma árị á tọrụmgbọlụ owu mengima nwọse ị̀ ḅụọma sịkịrịsam, se á tịḅị inime se àrị gurosinsam.

⁴⁵Ị́ ị̀ ḅịpị nọnjụ se ị̀ ọkị warị ḅie chukẹ, ọkụma árị ma á ḅarasinkẹ ḅịpị se ị̀ ḅụọma nọnjụ ḅụ à ḅo sịkị ngịsị.

⁴⁶Ma ị́ pịkị pulo pakụma ḅo se ị̀ tịḅị ọmbịkẹ, ọkụma á kụnụ olo nwọ seni ị̀ ḅụọma sara ḅilemasam.

⁴⁷Anịọkụma à ḍuko ị́ pịrịaḅẹ, á ḍiepakụma opu ḅẹlẹma mị pịkị ḍieḅelemasam na árịa tọn-a sima ḅụ ini ḅarasin á pịrịsam. Ọkụma ini kalaye ḅụ ḅarasin pịrịḅọ goyegoye pịkị kala ḅẹlẹma kẹngẹ ḍiepakụmamẹ.”

⁴⁸Anịsịkị Jizọs Ḅe nwọ seni eremeniḅọ ma ḅẹmẹ, “Ị́ya sima ḅụ ini ḅarasin ị́ pịrịsam.”

⁴⁹Dẹbụl ọgọnọ sime ísíapụma sakị nwọse inia ḅụ ma ḅẹmẹ, “Ḅe ḅọ ḅe tụḅọ, se sima ḅụḅarasin nweni pịrị-ao?”

⁵⁰Ọkụma Jizọs Ḅe nwọse eremeniḅọ ma ḅẹmẹ, “Ị́ya ḅereni ị́ ḍụaḅọrọmasam, deinma ḅụ so.”