Read kirikeni Maịnkarama Oloko 1 Bible Online

Maịnkarama Oloko 1 - kirikeni bible

Maịnkarama Oloko 1

¹Mịn Moziz ḅe ḍuko Izrẹlapụma pịrịaye ma-ẹ, ini onwun ele mị ḅie sime sịkị ḅụ, anị Jọdan Tọrụ mị ḅụ ịrụapakapaka nyọ daọrụ ḅụ. Jọdan Pẹsịkiri mị ḅie ini simemẹ Sọf mị na kpekima, Peran mị na ísí amama na ogboku ḅụ, anị Tọfẹl mị na, Leban mị na, Hazirọt mị na, pịkị Dizahab mị na.

²(Oyi gbọrị ḍin fịnjị anị nwọ lamẹ Saịnaị Tụndụ mị ḅụ ọkịmun Kedẹsh Banea mị la, anị Idọm chịngị mị ọgọnọ ḅụ wẹrị ḅọrọ ọkụma.)

³Ini Ijipt mị ḅie pakaso kụra mesi karama kụra mị ḅie oyi gbọrị akalụ fịnjị mị ḅie ngei ene mị ḅụ, anị Moziz ḅe Nyanaḅọ Ḅe tọn ọ̀ pịrị na ò ḍuko Izrẹlapụma pịrị nwọḅẹye goyegoye nwọ ḍuko se ini pịrịye-ẹ.

⁴Anị Nyanaḅọ Ḅe Saịhọn Amọraị amanyanaḅọ Hẹshbọn mị ḅie ḅẹrẹtọn àrị ḅọ ḅe na, pịkị Ọg Bashan amanyanaḅọ anị Ashtarọt mị na Edreị mị na ḍikiḍikiarịḅọ ḅe na nwọ nẹngịma sosịkị.

⁵Anị tomonima Jọdan mị ḅụ ịrụapakapaka nyọ Moab pẹkẹrẹ mị ḅie simearịogbo Moziz ḅe sakị Tamụnọ Ḅe na olokoma na oria ḍieaye ma na nwọ pufinji ini pịrịye-ẹ. Ọ̀ nwọ ḅẹmẹ,

⁶“Wa Saịnaị Tụndụ mị ḅụ sime sịkị, Nyanaḅọ mịna Tamụnọ Ḅe nwọse wa ḅẹmẹ, ‘Mịn tụndụ mị ḅụ ó sime ḅọlọ sịkị lasam.

⁷Ó pike sime ayema ọ́ nwọ kansin se sakị nwẹngị tọrọkọ mun. Ó so Amọraị apụ chịngị ọgọnọ sẹ mị na pịkị anị kelema koro iri mamgba na nwọ mun, somun Jọdan Pẹsịkiri mị ḅie na, chịngị ọgọnọ sẹ mị na, pịkị iderima nyọ ḅụ sime amama na, chuku da iri ma na, pịkị ọkịmun Mẹditirenia tọrụ aka mị la. Ó Kenan ama mị mun pịkị somun Lẹbanọn Tụndụ ma sọnị nwọ la pịkị ọkịmun Yufretis opu Tọrụ mị la.

⁸Mịn bebe ama mị mgba, anị Ị̀rị̀, Nyanaḅọ Ḅe, ḅereni ọ́mịna ḅieju-aḍapụ Ebraham ḅe na, Aịzịk ḅe na pịkị Jekọb ḅe na, pịkị inia furo ḅie apụma na pịrịye mị-ẹ. Ó mun anị ọkị anga.’ ”

⁹Moziz ḅe pịkị nwọse tomonima ḅẹmẹ, “Wa Saịnaị Tụndụ mị ḅụ sime sịkị, à ḍuko ọ́ pịrịmẹ na, ‘Ngẹrị tịḅịnịḅọ sọ ọ́ pịrị fịrị mị iku ị̀ nẹngịmẹ. Àrị ineda ngẹrị anị nwẹngị ẹkẹ.

¹⁰Nyanaḅọ ọ́mịna Tamụnọ Ḅe, ori ọ́ mịẹse ó sotọrụ ḅụ lolia ḅaka ọkụ ḅakasam kịẹnḅịpị ḅụ.

¹¹Ye Nyanaḅọ ọ́mịna opu ḍapụma Tamụnọ Ḅe mịẹse ó kiri-a mẹndẹ oyiasi fịnjị nwọse sutẹịn pịkị mịẹse mịẹye ọ́mịna ḅarasọ, ò ḅerenisa ḅaraḅụ!

¹²Ọkụma nde ị̀rị̀ ngẹrị ọ́mịna ḅẹrẹkọn iku fịrị mị dekinwẹngịḅịa ọkụ?

¹³Ó yenemi, yekaịnḅo, pịkị tọrụkirila owuapụ nwọ sẹlẹḅo sẹ sẹ ḅụ, àrị ini se ó ḍikiḍikiḅịa apụ nwọ mịẹḅịa.’

¹⁴Ọ́ pịkị ḅerenimẹ na ọkọ mịẹ na iḅimẹ.

¹⁵Anịẹrẹchị ọ́mịna sẹma ḅie ọ́ sẹlẹḅo yenemi pịkị tọrụkirila owuapụma, à nwọ ọkị seni ọ́mịna tịḅịnị nwọ mịẹmẹ. Inia ḅie dapụ kịnị-a mẹndẹ oyiasi fịnjị nwọ ḍikiḍikimẹ, dapụ kịnị-a sọnọasi ḍikiḍikimẹ, dapụ mesi oyi fịnjị, dapụ pịkị oyi apụ ḍikiḍikimẹ. À pịkị jịn tịḅịnị tọn koromamẹ bebe sẹ sẹ mamgba ḅieḅụ.

¹⁶“Anịsịkị ḅụ à nwọse ini ḅẹmẹ, ‘Ọ́mịna tomonima ogboku sime ịgbanịaye ma ọ́ nwọ poki. Ịgbanịaye paka sịkị goyegoye, ọ́ karakara ḅẹrẹ nwọ kọn, anị ḅọrọ ọ́mịna ama apụma ogboku ḅụ anịkanịka ómine na anga igoniapụma ogboku ḅụ sọnị.

¹⁷Ọ́ ḅẹrẹkọnpẹlẹḅịa sịkị ọ́ gbọrịḅọ sọnị tọrụ iḅifẹma; gbọrị ḅara ọ́ nwọse ḅẹrẹkọn ḅẹḅọ ḅẹḅọ pịrị, nụḅọ la-ọkụ la-ọkụ sọnị. Ọ́ gbọrịḅọ sọnị ḍikiḅalafama, anịatịḅị ọ́mịna ḅẹrẹkọn ḅịpị mị Tamụnọ Ḅe ḅụ anị ḅomẹ. Nemikase ọ́ nẹngịma ḅẹrẹ omi-ẹ ḅẹḅẹ, ó seḅo ị̀ pịrị, àrị anị kọnḅịa.’

¹⁸Anịsịkị mị ḅụ ọ́ mịẹḅịa jịn aye layelaye à ḍuko ọ́ pịrịmẹ.

¹⁹“Nyanaḅọ mịna Tamụnọ Ḅe tọn wa pịrịye mị wa nwọ mịẹmẹ. Wa Saịnaị Tụndụ mị wẹrịso se anị ḍụḅa pịkị ḅalafama onwun ele mị toluḅọrọmẹ Amọraị chịngị ọgọnọ sẹ mị mun ateli mị ḅụ. Wa ḅo Kedẹsh Banea mị lasịkị,

²⁰à nwọ ḅẹmẹ, ‘Mịọkụ ó ḅo Amọraị chịngị ọgọnọ sẹ mị lasam anị Nyanaḅọ mịna Tamụnọ, mịna olomu-aḍapụma Tamụnọ Ḅe, se wa pịrịarịye mị. Ḍiki, anị anị-ẹ. Ó mun anị ọkị anga ọ̀ tọn sa ḅaraḅụ. Ómine ọḅụdama ọ́ pịkị ḅalafama.’

²¹

²²“Ọkụma ómine ị̀ damaḅomẹ se nwọse ị̀ ḅẹmẹ, ‘Ye wa nweni se tatarị fịrịma ini mun ama mị ẹnyẹ, mịẹse wa ḅọrọ na iḅitẹịn ateli ini ineda nwọ ḍuko wa pịrịḅịa ọkụ pịkị anịanga opuamama sime ọkụ mị na.’

²³“Ọkọ mịẹ gbẹịnmẹ, anịẹrẹchị oyimaịn apụ fịnjị à nwọ sẹlẹmẹ, sẹ gbọrịḅọ gbọrịḅọ.

²⁴Ini chịngị ọgọnọ sẹ mị ḅie sọmun Ẹshkọl Pẹsịkiri mị la se anị ẹnyẹ kelemamẹ.

²⁵Anịju ḅụ ini ḍọkịḅo chịnmgbọlụ ini nwọ ọkịḅo wa pịrị, se ḍuko wa pịrịmẹ na Nyanaḅọ mịna Tamụnọ Ḅe se wa pịrịarị ama mị opuma fịye pakụma amakiri-ẹ.” Moziz ḅe pịkị nwọse Izrẹlapụma ḅẹmẹ:

²⁶“Ọkụma ómine ininachịn Nyanaḅọ ọ́mịna Tamụnọ Ḅe pịrịmẹ, anịẹrẹchị ama mị ḅie ọ́ sọ ẹkẹ.

²⁷Ó mukumukuma ọkwẹịn jụḅọ jụḅọ pịrịmẹ se nwọ ḅẹmẹ: ‘Nyanaḅọ Ḅe ọ̀ wa ḍikiḅieḅumẹ. Ori Ijipt mị ḅie wa ọkị pakụmaḅomẹ pa wa daḅọrọma mịna Amọraị apụma pịrị, se ini wa ḅaaḅịa ẹrẹchị.

²⁸Nde wa gose anịju munḅịaye? Mịna ḅalafaḅẹ. Wa fịrịma mun apụma ḍuko wa pịrịmẹ na nweni ma ini nangwọtẹịn pịkị kụrọtẹịn wa nẹngịmẹ, na ini anga opuamama ḅe onu ma àrị gele mun so lamẹ. Anịju ḅụ ini godoro apụ ọrịmẹ!’

²⁹“Ọkụma à nwọ ḅẹmẹ, ‘Ini apụma ómine ini ḍikiḅalafama.

³⁰Nyanaḅọ ọ́mịna Tamụnọ Ḅe tọrọkọda ọ́ pịrịḅịa, ọ̀ pịkị ọmụ mị gbin ọ́ pịrịḅịa, anị Ijipt mị ḅie ọ̀ mịẹse ómine ọrị ọkụ mị

³¹pịkị onwun ele mị ḅie ḅụ na. Ọ̀ wẹrị anịju ngịsị deinma ọ́ ḅọrọmaḅo mịanga la-ọkụ ómine ọrịsam, anị ḍaḅọ oria tọkụ deki ọkụ mị.’

³²Ọkụma àrị ọkọ se ọ́ ḅẹmẹ nwọḅẹ sọnị, ọ́ pa kuḅie se Nyanaḅọ Ḅe ḅụgbana ḍụkụkẹ,

³³ori tatarị mun ó pike sime ịnyọsaraḅịa nyọ ḍọkị ọ́ wẹrịma-wẹrịmamẹ nwọḅẹ sọnị. Ateli mị se ó ḍieḅịa ẹrẹchị, ḍin ḅụ chịẹ sime fịnị ḅẹlẹ ḅie ọ̀ wẹrị tọrọkọ ịsụn ọ́ pịrịmẹ se enekaka ḅụ chịẹ sime oḅuto ḅie ọ̀ wẹrị tọrọkọ ịsụn ọ́ pịrịmẹ.

³⁴“Nyanaḅọ Ḅe ó sua ma ḅọrọ àrị ḅẹrẹ ma ọ̀ naamẹ se ḅụosọ nyanamẹ, anịẹrẹchị ọ̀ pịkị ḍuko kụrọmamẹ na,

³⁵‘Ómine mị si ḅụọ apụma ḅụ gbọrịḅọ sọnị à ḅereni ọ́mịna opu ḍa apụma pịrị fịye pakụma ama mị ḅie sọ ẹkẹ.

³⁶Kelẹb Jẹfunẹ yaḅe kẹngẹ anị sọḅịaye-ẹ. Ị̀ ḅụ ḅereni nyana ḅụ ò simemẹ, ò mun ḍiki kelema ama mị àrị anị seni ori na ò furo apụma na pịrịḅịa.’

³⁷Ómine kẹngẹ gose Nyanaḅọ Ḅe pịkị ḅụosọ nyana ị̀ pịrị se nwọ ḅẹmẹ, ‘Ị́rị́, Moziz ḅe sọnị, ama mị ḅie ị́ sọ ẹkẹ.

³⁸Ọkụma Jọsụwa ḅarachụa ị́ pịrịarịḅọ ḅe kuḅie kụrọma, anị Nọn yaḅe. Ọ̀ tọrọkọda Izrẹlapụma pịrị se ini mun ama mị ọkị se angaḅịa.’

³⁹“Anịsịkị Nyanaḅọ Ḅe nwọse mine mgba ḅẹmẹ, ‘Ọ́mịna awọma, anị ngịsị boka se ma iḅiye na siye na nemika apụma anị ama mị ḅie sọḅịaye-ẹ—anị ómine na taraka apụma kun soḅịa ọ́ nwọḅẹ awọma. Ama mị à se ini pịrịḅịa, se ini anịa ḅie angaḅịa.

⁴⁰Ọkụma ómine ma ó vinpịkị so mun onwun ele mị ḅie sọ se Akaba Ẹgẹdẹ mị ḅe ateli mị damun.’

⁴¹“Ọ́ nwọse ị̀ pẹkẹrẹmẹ, ‘Moziz, wa si mịẹsam Nyanaḅọ Ḅe ḅụ. Ọkụma mịọkụ wa mun owu pakaḅịa, Nyanaḅọ mịna Tamụnọ Ḅe tọn wa pịrị ḅaraḅụ.’ Anị ọ́mịna ḅụ ḅọḅọ ḅụkarakaramaye-ẹ, ọmụ mị gbinḅịa ẹrẹchị, ọ́ nwọ chịnmẹ na owu se chịngị ọgọnọ sẹ mị paka mị sarasaraye sọḅịa.

⁴²“Ọkụma Nyanaḅọ Ḅe nwọse ị̀ ḅẹmẹ, ‘Inia ḅeri jine na ini mun owu pakama anịatịḅị àrị iniaḅụ sime ẹkẹ, ini na taraka apụma ini ini nẹngịmaḅịa.’

⁴³Nyanaḅọ Ḅe ḍukoye mị à nwọ ḍuko ọ́ pịrịmẹ, ọkụma ó pokikẹ gbọrị sịkịsọ. Ómine ininachịn ọ̀ pịrị se ọ́mịna opuamịẹye ḅụ so ọmụ mị mun mẹ chịngị ọgọnọ sẹ mị ḅie.

⁴⁴Se Amọraị apụ chịngịma ọgọnọ anga apụma akama kpo chụa ọkụ se kan pakaḅo ómine na bịamamẹ. Ini ómine na pịrị-a nweni ọkịmun Họma mị la se anị Idọm chịngị ọgọnọ sẹ mị ḅie ọ́ nẹngịmamẹ.

⁴⁵Anịẹrẹchị ómine owu se ḅarachụa ḅimẹ Nyanaḅọ Ḅe ḅaraḅụ ọkụma ò ḅifie ọ́ pịrịkẹ, ọ̀ pịkị tọrụpịkị ó ḍikikẹ.

⁴⁶“Anịẹrẹchị, wa Kedẹsh mị ḅie sime mun ḅọlọ sịkị lasịkị,