Read kirikeni Maịnkarama Oloko 11 Bible Online

Maịnkarama Oloko 11 - kirikeni bible

Maịnkarama Oloko 11

¹“Nyanaḅọ ọ́mịna Tamụnọ Ḅe ọ́ nwọ ḅẹlẹma, pịkị sịkịmamgba oria olokoma koko.

²Mịmgba Nyanaḅọ Ḅe ḅụ ọ́ ḍawọsaye ma ọ́ nwọse ḅiekoroma. Ómine ma-ẹ, ómine awọma kẹ, mịn nemi mị nyanasa apụma. Nyanaḅọ Ḅe oria opu mị na, oria kụrọ mị na, oria ịnyọ mị na,

³pịkị oria ḅụgbiripuma fịrịma na ómine ọrịmẹ. Ò se Ijipt amanyanaḅọ ḅe na pịkị oria bebe sẹ mị mgba na mịẹaye ma ómine ọrịmẹ.

⁴Nyanaḅọ Ḅe gbọtụma Ijipt apụ ọmụogbo mị na inia asụnma na pịkị kirinwẹngị arụ ma na ọfịnsin ọkụ ómine ọrịmẹ, anị ini se Awụwụ Tọrụ mị ḅie simbi ḅaa ọkụ mị ini ó ḍukoarị sịkị ḅụ.

⁵Nyanaḅọ Ḅe onwun ele mị ḅie mịẹ ọ́ pịrịye ó nemimẹ, ma ó ḅo mịanga laka sịkị ḅụ.

⁶Ò seni Detan ḅe na Abaịram ḅe na mịẹye mị ọ́ nwọse ḅiekoroma, Ẹlaịab awọma, anị Rubẹnị sẹ mị ḅie apụma. Nweni mamgba tọrụkuḅu ḅụ kiri mị finji se ini chama mịnịmẹ, inia furoma na, inia ikowarịma na, pịkị inia fịrịnwẹngịapụma na, namama na ini na.

⁷Iin, ómine anị dada ma Nyanaḅọ Ḅe nwẹngị opu-a fịrị mamgba nwọ ọrị apụma-ẹ.

⁸“Mịmgba à se ọ́ pịrịsa oloko mamgba ómine àrị koko. Anịsịkị re mị ómine ineda tọrụ mị saḅa se ó mun-arị ama mị ọkị nyanaḅịaye-ẹ.

⁹Anịsịkị re mị anị Nyanaḅọ Ḅe ḅereni ọ́mịna olomu-a ḍapụma inia furo apụma na pịrị lọkọlọkọ pịkị fịye pakụma ama mị ḅie ómine anga mun ḅọlọ sịkị laḅịaye-ẹ.

¹⁰Ómine ọkị nyana-ẹmun-arị ama mị Ijipt mị sime ọkụ sime ama kẹ, anị ọ́ tatarị anga sime nyọ mị. Anịju ḅụ ọ́ chịnmgbọlụ ḍipimẹ, ómine pịkị ḅarana ozukiri ma sokumẹ ọrụrụ ḅụ;

¹¹ọkụma mịọkụ ó munsọ-ẹmuarị ama mị anị tụndụ na pẹsịkiri na ama-ẹ, ene mengi anịa kiri mị lọkọlọkọmasa ama-ẹ.

¹²Nyanaḅọ ọ́mịna Tamụnọ Ḅe anị ḅarana mị ama ḍikiḍiki pịkị anị korukoruye-ẹ bebe kụra mị ḅie mgba.

¹³“Anịẹrẹchị, mịmgba à se ọ́ pịrịsa oloko mamgba ómine àrị koko, ọ́ Nyanaḅọ ọ́mịna Tamụnọ Ḅe ḅẹlẹma pịkị ọ́mịna kuḅie mgba se fịrịnwẹngị ọ́ pịrị.

¹⁴Ó nemikase ọkọ mịẹ ọkụma, fọngụ sịkị na pịkị oḅoku sịkị na ḅụ, ori ene koroma ọ́mịna amakiri mị ọgọnọ saraḅịa, anịa sịkị ḅụ, tatarị ene mị na ọḅụkọnma ene mị na, mịẹse fịayemgbọlụ na, ere iru na, pịkị oliv pulo na ọ́ nwọ nyanaḅịa ọkụ,

¹⁵anịsịkị osuein pakaḅo ọ́mịna namama pịrịḅịa. Se ó ḅi fịaye mamgba ọ́ nwọ nyanaḅịa.

¹⁶Ó ḅerenima ini Nyanaḅọ Ḅe ḅụ ọ́ dairima mun jịn-a oru ma tẹkẹ se fịrịnwẹngịarị pịrị.

¹⁷Ó nemikase ọkọ mịẹ ọkụma, Nyanaḅọ Ḅe ọ́mịna ḅụ ori ịganị nyanaḅịa. Ori ene mị ọlọchịẹmaḅịa, se ọ́mịna kirima opuma samịnaḅịa, anị pịkị ḅarị ineda fịaye pakụmaḅo ẹkẹ. Anịsịkị anịju ḅụ ọ́ ḅọlọka se fịḅịa, ò seni ọ́ pịrịarị amakiri mị iḅiye-ẹ nwọḅẹ sọnị.

¹⁸“Ọ́ ma olokoma se ḅiekoroma, se ye àrị pịkị ọ́ ḅụḅẹlẹ aye nwọsọ. Ómine àrị seni ọ́ ḅarakọngọ ma ḅụ kpọ, pịkị àrị seni ọ́ fụḅara ogbo ḅụ oḅolo, mịẹse ómine àrị se ḅiekoromaḅịa ọkụ.

¹⁹Ómine àrị seni ọ́mịna awọma telima. Ọ́ warị ḅie sime sịkị na, ọ́ pịkị ye mun sịkị na, arịa ḅẹrẹ ọ́ nwọ ḍuko ómine ịnyọsararị sịkị na, pịkị ọ́ fịrịnwẹngịarị sịkị sọnị.

²⁰Ọ́mịna warị ḅọkọ ma na, pịkị ọ́mịna nụngọ ḅọkọ ma na ḅụ ómine àrị gịẹịn.

²¹Anịsịkị re anị ómine na ọ́mịna awọma na Nyanaḅọ Ḅe ḅereni ọ́mịna olomu-a ḍapụma pịrị ama mị ḅie ómine anga mun ḅọlọ sịkị laḅịaye-ẹ. So mị nwọ sẹkiri mị ọgọnọju ḅụ sime mun laḅiri laḅiri anị ómine sọnị pịkị anị ama mị ḅie ḅụ anga mun laḅịa ọkụ-ẹ.

²²“Ó kuḅie se ḅụgbana gbẹịn ḅara seni à se ọ́ pịrịsa oloko mamgba nwọ koko: Nyanaḅọ ọ́mịna Tamụnọ Ḅe ọ́ nwọ ḅẹlẹma, ọ̀ tọn ọ́ pịrịye goyegoye ọ́ nwọ mịẹ pịkị ọ̀ ḅụ ḅereni nyana.

²³Anịsịkị ọ́ nwẹngị sọmun-arị sịkị arịa sẹma ḅie sime apụma depakụmaḅịa, se opusọ pịkị kụrọ ọ́ nẹngị apụ ama mị ọ́ nwọ ọkị angaḅịa.

²⁴Ọ́mịna ḅụọ la kiri mamgba sime ọ́ pịrịḅịa. Ọ́mịna nyọ mị wasama mun onwun ele mị ḅụ chuku daọrụ mị ḅụ sakị mun Lẹbanọn Tụndụ ma laḅịa ọgọnọju daọrụ ḅụ, pịkị ịrụapakapaka nyọ daọrụ ḅụ Yufretis Tọrụ mị ḅụ ọkịmun Mẹditirenia Tọrụ mị laḅịa anị ịrụa mị tumatuma nyọ daọrụ ḅụ.

²⁵Nyanaḅọ ọ́mịna Tamụnọ Ḅe mịẹse ini ó ḍikiḅalafaḅịa, ómine anị ama mị ḅie mun anga mun anga ḅụ, se gbọrịḅọ sọnị pịkị ineda ó kiki-ẹkẹ, ò ḅereni ọ́ pịrịsa ḅaraḅụ.

²⁶“Mịmgba ọ́ sẹlẹọkịḅịaye à nwọse ọ́ tọrọkọ koroma aḅẹ, ḅẹlẹma na worinime na ḅụ—

²⁷ḅẹlẹma-ẹ, ó nemikase ḅịpịpoki ḅụ Nyanaḅọ ọ́mịna Tamụnọ Ḅe olokoma kokomẹ ḅẹḅẹ, anị mịmgba à se ọ́ pịrịsaye ma;

²⁸ọkụma worinime-ẹ, ó nemikase ḅịpịpokika ḅụ ma olokoma kokokẹ se pịkị se jịn-a oru ma damamunmẹ ḅẹḅẹ anị jịn sịkị ḅụ ma ọ́ tẹkẹkaye ma.

²⁹Nyanaḅọ Ḅe ómine ọkịḅo se ó mun angaḅịa ama mị ḅie sọsa ḅẹḅẹ; Gẹrizim Tụndụ mị ḅụ oria ḅẹlẹma mị ọ́ nwọ oloku pakụma, pịkị Ebal Tụndụ mị ḅụ worinime mị oloku pakụma.

³⁰(Mịna mama tụndụma Jọdan Tọrụ mị ḅụ ịrụa mị tumatuma nyọ daọrụ ḅụ àrị omi-ẹ, anị Kenan apụma ḅụ Jọdan Pẹsịkiri ma ḅie ḅụ anga apụma pẹkẹrẹ ḅụ. Ini ma ịrụa mị tumatuma nyọ damẹ, Morẹ mị anịa osiḅụ sime ejema na kpeki nyọ mị, anị Gilgalị ama mị na kpeki nyọ mị.)

³¹Ọ́ Jọdan Tọrụ mị saḅa Nyanaḅọ ọ́mịna Tamụnọ Ḅe se ọ́ pịrịarị ama mị ọkị anga-ẹmun-aḅẹ. Ómine anị ọkị angasa ḅẹḅẹ,

³²ómine ọrị na mịmgba à se ọ́ pịrịarị oloko mamgba ó kokomẹ.