Read kirikeni Maịnkarama Oloko 13 Bible Online

Maịnkarama Oloko 13 - kirikeni bible

Maịnkarama Oloko 13

¹“Ịkịankoroḅọ anịkanịka ḍawọpuḅọ ineda ḅụgbiripumaye anịkanịka elekima ḍukoḅịa,

²se ọ́ dairima mun jịn sịkị ma ọ́ tẹkẹka oruma tẹkẹ pịkị fịrịnwẹngị àrị pịrịḅịa. Ini ḍukoye mị kọkọma mịẹmẹ ḅẹ sọnị,

³ḅifie ini pịrị ma. Nyanaḅọ ọ́mịna Tamụnọ Ḅe iniaḅụ ḅọrọ ómine elekima ḍikiaḅẹ, se ḍiepakụma nwọfa ọ́ kọkọma ọ́mịna kuḅie mgba seni Nyanaḅọ Ḅe ḅẹlẹma otuḅo.

⁴Nyanaḅọ Ḅe ḍukonwẹngị se ori osi, ọ̀ ḅịpịpoki se oria olokoma koko, ọ̀ tẹkẹ se ọ̀ ḅụ kuḅie se ḅụgbana gbẹịnḅọ nwọ sọ ọ̀ pịrị.

⁵Ọkụma ọ́ nyana ḅereni Nyanaḅọ Ḅe pịrịma nwọse ọ́ ḅẹ ḍawọpuḅọ anịkanịka ọkọ sime ịkịankoroḅọ goyegoye ọ́ ḅaa, anịatịḅị Nyanaḅọ Ḅe anị Ijipt mị ḅie ọ́ pẹkẹrẹ pakụmaḅoḅọ ḅe-ẹ, ómine omoniapụ sọ sime nyọ mị. Ọkọ sime ḅọ anị si ḅọ-ẹ, pịkị nụḅọ pịkị Nyanaḅọ Ḅe tọn se ọ́ pịrị na ọ́ kọn nwọḅẹ ḍumo mị ḅụ ọ́ dairima ḍọkịaḅẹ. Ómine ini ḅaa, mịẹse ọ́mịna ḅie ọkọ sime si sime-ẹka ọkụ.

⁶“Ị́ mbire anịkanịka ị́ya owutọkụ anịkanịka ị́ya eremenitọkụ anịkanịka ị́ ḅẹlẹma ị́ tama anịkanịka ị́rị́ na kpekitẹịn ikiaḅọ ineda ḅọịma ị́ mịẹkụrọma se ị́ mun jịn oru ma tẹkẹḅịa, anị jịn sịkị ómine na ọ́mịna olomu-a ḍapụma na ngịsị ma tẹkẹka oru ma.

⁷Iniaḅụ gbọrịḅọ ineda ị́ mịẹkụrọma se ị́ mun ị́rị́ na kpekima anga apụma oru ma anịkanịka ḅọlọ nyọ ḅụ sime apụma oru ma tẹkẹḅịa.

⁸Ọkụma ngịsị ḅereni ọ̀ pịrịma; ngịsị ò pokima. Ò ḍikitịḅịfoinma pịkị ò ḍikiḅụgererema, pịkị ò se ḅọịma.

⁹Ọ̀ ḅaa! Ị́rị́ tatarị imgbele se ò gbin, se ye nweni mamgba imgbele se ò gbin.

¹⁰Ò gbin ḅaa! Ori ị́ dairima ḍọkịmẹ Nyanaḅọ ọ́mịna Tamụnọ Ḅe ḅụ, anị Ijipt mị ḅie ọ́ ḅọrọma pakụmaḅoḅọ ḅe, ómine omoniapụsọ sime nyọ mị.

¹¹Anịsịkị bebe Izrẹlapụ mamgba pakaye mị naa, se ḅalafaḅịa, se gbọrịḅọ sọnị ḅarị ọkọ sime simịẹ ẹkẹ.

¹²“Nyanaḅọ ọ́mịna Tamụnọ Ḅe se ọ́ pịrị amama ḅie ómine anga arịogbo, ọ́ naaḅịa na

¹³ọ́mịna sẹ mị ḅie yeḅụ ofori dapụ inia ama ḅie apụ dairima se ini mun jịn sịkị ma ọ́ tẹkẹka oru ma tẹkẹsam.

¹⁴Ó nemikase ọkọ sime iriaḅa naamẹ ḅẹḅẹ ómine iḅiọkụma anị ḍọkị nemi; se nemikase kọkọmaye-ẹ na nwọ sime si mịẹmẹ ḅẹḅẹ,

¹⁵anịọkụma anị ama mị ḅie sime apụ mamgba ọ́ ḅaasin pịkị inia nama mamgba na. Ómine okorona okorona anị ama mị famasin.

¹⁶Anịa ḅie anga apụma nyana aye mamgba ọ́ nwọ ọkịḅo ama ogbo sara tunduruma. Anịsịkị ómine ama mị na anịa ḅie simeye goyegoye nwọ dọkịma se agbamịẹ Nyanaḅọ ọ́mịna Tamụnọ Ḅe pịrị. Anị kan saraḅụ sime gbasoḅịa, ini ḅarị jịn sịkị se anị nama ẹkẹ.

¹⁷Ini gulugulumaḅịaye goyegoye ómine ọfọịn ọkị ma, anịsịkị Nyanaḅọ Ḅe sọnị pịkị oria opu ịganị mị ḅụ vinpịkị se ḍikitịḅịfoin nyana ọ́ pịrịḅịa. Ori ó ḍikitịḅịfoin pịkị mịẹse ó suḅịa kịẹnḅịpị ḅụ, ò yeḅereni ọ́mịna olomu-aḍapụma pịrịsa ḅaraḅụ,

¹⁸ọ́ ḅọrọ nemikase mịmgba à chụa ọ́ pịrịsa oria olokoma kokomẹ, pịkị ò ḅiḅara mịẹmẹ ḅẹḅẹ.