Read kirikeni Maịnkarama Oloko 16 Bible Online

Maịnkarama Oloko 16 - kirikeni bible

Maịnkarama Oloko 16

¹“Ómine osi se Nyanaḅọ ọ́mịna Tamụnọ Ḅe pịrị anị Saḅaḅọrọ Alalị nwọ fị ọ̀ pịrịḅụ Abib akalụ mị ḅie; anị akalụ mị ḅie ḍin ḅụ anị ori ómine ọkị pakụmaḅoye-ẹ Ijipt mị ḅie ḅụ.

²Ó mun anị gbọrị tẹkẹ nyọ mị ḅụ ọ́mịna ananama anịkanịka nambuloma ḅie gbọrị wu ḅaa se Saḅaḅọrọ fịye mị mịẹ se osi seni Nyanaḅọ ọ́mịna Tamụnọ Ḅe pịrị.

³Ọ́ mịn fịye mị fịḅịa sịkị fịturu sumaye sọka fịturu ọ́ nwọse anị fị. Sọnọma ḍin ọ́ nwọse fịturu sumaye sọka fịturu mị fịḅịa, anị Ijipt mị ḅie ọ́ pakasoḅịa sịkị ḅụ ó be ḅara mị. Ọ́ mịn fịturu mị fị—ini nwọse anị chịnḅịa tọrụsiọrị fịturu—anịẹrẹchị ọ́ lasịkị lasịkị Ijipt mị ḅie ọ́ pakaso ene mị ọ́ nwọse ḅiekoromaḅịa, anị tọrụsiọrị nyọ mị.

⁴Ọ́mịna ama mị ḅie gbọrịḅọ sọnị nụḅọ warị ḅie fịturu sumaye se wẹrị ẹkẹ ọkịmun sọnọma ḍin nwọ laḅịa, se anị tatarị ḍin mị ḅụ ini ḅaa nama ḅe anị gbọrị ḍin ḅụ ini nwọ pẹị sinḅịa.

⁵“Anị gbọrị tẹkẹ nyọ mị ḅụ ọ́ Saḅaḅọrọ fịye namama ḅa—ọ́ jịn anga ḅụ anị mịẹ ẹkẹ Nyanaḅọ ọ́mịna Tamụnọ Ḅe se ọ́ pịrịḅịa ama mị ḅie-ẹ. Sasoḅiri ḅụ ịrụa mị sọ-a sịkị ómine anị mịẹ, anị ómine Ijipt mị ḅie pakaso ene mị sịkị mị.

⁷Ọ́ nama mị su se pẹị anị gbọrị tẹkẹ nyọ mị ḅụ; se eneḅa dede ḅie ó so ama mị mun.

⁸Kirikọn sonio-a ḍin ma ḅie fịturu sumaye sọka fịturu ọ́ nwọ fịḅịa, sọnọma ḍin karama ene mị ḅụ ó ḅo koḅirima Nyanaḅọ ọ́mịna Tamụnọ Ḅe tẹkẹḅịa, ọ́ pịkị anị ene mị ḅụ gbọrị fịrị sọ nwẹngị ẹkẹ.

⁹“Ọ́mịna mgbọlụ-a fịaye pẹlẹ sịkị mị ḅụ sakị sọnọma fẹnịanga ọ́ nwọ kịẹn,

¹⁰se Soku sịkị Alalị mị fị, se osi seni Nyanaḅọ ọ́mịna Tamụnọ Ḅe pịrị, anị mịẹpụkọtarị agba seḅo ọ̀ pịrị ḅụ ò seni ọ́ pịrịsa ḅẹlẹma la-ọkụ.

¹¹Ó ḅieḅẹlẹ, Nyanaḅọ Ḅe tọrụkuḅu, ómine na ọ́mịna awọma na, ọ́mịna fịrịnwẹngịapụma na, pịkị Agbamịẹapụma na, igoniapụma na, ḍapụ na nyengiapụ na fịsa awọma na, pịkị deapụ fịsa eremeni ma na, anị ọ́mịna amama ḅie anga apụma. Anị gbọrị tẹkẹ nyọ mị ḅụ ọ́ mịn mị mịẹ.

¹²Ómine ọrị na ma olokoma ómine àrị kokomẹ; ó se ḅieḅaramama na ómine omoniapụsọ simemẹ Ijipt mị ḅie.

¹³“Ọ́mịna ịpịamgba mamgba ọ́ nwọ pịsịrị pịkị irumịẹ chịnmgbọlụ mamgba pọnjị sara sosa ḅẹḅẹ, sọnọma ḍin ọ́ nwọse Okponga Ma Alalị Mị fị.

¹⁴Ḅieḅẹlẹ ḅụ ómine na ọ́mịna awọma na, ọ́mịna fịrịnwẹngịapụma na, pịkị Agbamịẹapụma na, igoniapụma na, ḍapụ na nyengiapụ na fịsa awọma na, pịkị deapụ fịsa eremeni ma na, anị ọ́mịna amama ḅie anga apụma na alalị mị fị.

¹⁵Ọ́ sọnọma ḍin se mị alalị mị fị se osi seni Nyanaḅọ ọ́mịna Tamụnọ Ḅe pịrị anị gbọrị tẹkẹ nyọ mị ḅụ. Ó ḅieḅẹlẹ, anịatịḅị Nyanaḅọ Ḅe ori ọ́ ḅẹlẹmasam ọ́mịna sokuḅo ayema ḅụ na pịkị ọ́mịna fịrịma ḅụ na.

¹⁶“Ọ́mịna sẹ mị ḅie sime owuapụ mamgba kụra ḅụ tẹrẹ-a sịkị nwọse ḅo anị gbọrị tẹkẹ nyọ mị ḅụ Nyanaḅọ Ḅe tẹkẹḅịa: Saḅaḅọrọ Alalị sịkị mị na, Soku sịkị Alalị mị na, pịkị Okponga Ma Alalị sịkị mị na. Owuḅọ goyegoye ḍiepịrịye se ḅoḅịa

¹⁷anị ori inedaḅịa ḅara, Nyanaḅọ ọ́mịna Tamụnọ Ḅe se ọ̀ pịrịsa ḅẹlẹma la-ọkụ mị ḅụ.

¹⁸“Nyanaḅọ ọ́mịna Tamụnọ Ḅe se ọ́ pịrị ama goyegoye ḅie ọ́ ḅẹrẹkọn apụ na pịkị jịn tịḅịda fịrịnwẹngịapụ na nwọ tọn. Mịna apụma anị ḅẹrẹkọn se tomonima pịrịḅịaye-ẹ aḍụa oforika ḅaraḅụ.

¹⁹Ini karakaraka ḅẹrẹkọn ẹkẹ anịkanịka aḍụa ḍọkị ẹkẹ inia ḅẹrẹkọn mị ḅụ; ini pịkị ọḅụfị ẹkẹ, anịatịḅị ḍiepịrịaye yenemi pịkị kọkọma tomonima tọrụmgbọlụma pụnma-pụnmamẹ, pịkị àrị gose ini kuraka ḅẹrẹ pẹlẹpẹlẹmẹ.

²⁰Sịkịmamgba ọ́ karakaraye mị ḅụ sime, pịkị karakaraye mị kẹngẹ nwọ ḍuko nwẹngị gbaso, mịẹse ọ́ ḍumo Nyanaḅọ ọ́mịna Tamụnọ Ḅe se ọ́ pịrịarị ama mị ọkị nyanaḅịa ọkụ, pịkị anịa ḅie anga ma munḅịa.

²¹“Ómine agbamịẹ ẹbẹ mịẹ Nyanaḅọ ọ́mịna Tamụnọ Ḅe pịrị sịkị omi-ẹ ḅẹḅẹ, anịa anga sịkị ḅụ ọ́ chịn ḍipima se elekima mịẹkoroma eremeni oru Ashera mị pịrị ma.

²²Ọ́ pịkị ḍụparị chịẹma se oru mịẹ tẹkẹma; Nyanaḅọ Ḅe ọ̀ taraka se àrị wẹrịmamẹ.