Read kirikeni Maịnkarama Oloko 17 Bible Online

Maịnkarama Oloko 17 - kirikeni bible

Maịnkarama Oloko 17

¹“Ḅẹḅẹye ḅụ sime nambulo anịkanịka anana ó seni agbamịẹ Nyanaḅọ ọ́mịna Tamụnọ Ḅe pịrị ma; Nyanaḅọ Ḅe ọ̀ taraka se anị wẹrịmamẹ.

²“Nemikase ọ́ naamẹ na ọ́mịna amama ḅụ gbọrị ama ḅie, anị ḅọrọ owuḅọ anịkanịka eremeniḅọ, Nyanaḅọ Ḅe ḅụ simịẹsam pịkị oria ọḅọkụ mị kanmẹ

³anị jịn-a oru ma anịkanịka ịrụa mị anịkanịka akalụ mị anịkanịka lolia ma tẹkẹ pịkị fịrịnwẹngị àrị pịrịmẹ ḅẹḅẹ, anị Nyanaḅọ Ḅe chụa oloko mị na tụḅụrụ ḅaraḅụ.

⁴Ọ́ ḅọrọ ọkọ sime ḅẹrẹ naamẹ ḅẹḅẹ, anịọkụma ómine iḅiọkụ anị ḍọkịnemi. Na kọkọmaye-ẹ, nwọ sime siye Izrẹl mị ḅie pakasam nwọ ḅẹḅẹ,

⁵anịọkụma ómine anịḅọ mị ọkị ama mị ḅie paka se nụḅọ gbin ḅaa.

⁶Anị-ẹ nwọḅẹ sọnị mama apụ anịkanịka tẹrẹ apụ onyechịẹ nụḅọ ḅarasima sịkị re anị ini nụḅọ ḅaaḅịaye-ẹ; ini nụḅọ ḅaa ẹkẹ gbọrịḅọ kẹngẹ onyechịẹmẹ ḅẹḅẹ.

⁷Onyechịẹ apụma anị tatarị imgbele ma se nụḅọ gbinḅịaye-ẹ, anịsịkị kirikọn apụma sọnị pịkị imgbele se nụḅọ gbinḅịa, mị ḅara mị anị ó se mị siye mị dachịẹmaḅịa ọkụ-ẹ ọ́mịna ogboku.

⁸“Sosi da ḅẹrẹ, amakuḅu ḅẹrẹkọn apụma opuma inia ḅụfụkamaḅịa, ọkọ sime da ḅẹrẹ anị ngọ gbolomaye ḅụ tọrụkụnka ḅara se karakara ḅẹrẹ mị kọn, pịkịna yese oju ḅụ jụmḅọ lama, anịkanịka ninikọn na nemika ḅụ tomoniḅọ ḅaa mị na ogboku ḅụ sime kịrịye gboloma ḅẹrẹ ma. Ọkọ sime ḅẹrẹ pakamẹ ḅẹḅẹ, ó se anị gbọrị tẹkẹ nyọ Nyanaḅọ ọ́mịna Tamụnọ Ḅe sẹlẹọkị anga mị mun,

⁹agbamịẹ apụma na pịkị anị sịkị mị ḅụ ḅẹrẹkọn fịrịkiri ḅụ simeḅọ ḅe na tọrọkọ mun, se ye ini ḅẹrẹ mị kọn.

¹⁰Ini anị anị ḅẹrẹ mị pẹlẹḅịaye-ẹ, ini se ọ́ ḅẹ ḅara mị anị ọ́ pịkị mịẹḅịa ọkụ-ẹ.

¹¹Inia ḅẹrẹkọn ḅịpị mị nwọ ọkị, pịkị ini seni anị kọnpẹlẹ ḅara mị nwọse anị mịẹ fama.

¹²Dadama ḅẹrẹkọn fịrịkiri mị ḅụ simeḅọ ḅe anịkanịka agbamịẹḅọ ḅe ḅịpịpokikaḅọ goyegoye ini nụḅọ ḅaaḅịa; mị ḅara mị ḅụ ó siye mị sinḅịa Izrẹl mị ḅie.

¹³Anị naaḅọ naaḅọ ḅalafaḅịa, se gbọrịḅọ sọnị ḅarị dadama mun ọkọ simeye nwọ mịẹ ẹkẹ.

¹⁴“Ó mun Nyanaḅọ ọ́mịna Tamụnọ Ḅe se ọ́ pịrị-ẹmun-arị ama mị ọkị se ama ḅie angasa ḅẹḅẹ, anịsịkị mị ọ́ nwọ ḅẹḅịaye-ẹ na ó kelema koro sẹma amanyanapụ nyana ḅara mị ómine sọnị anị ọkọ sime ọ́ pịrị.

¹⁵Ómine ọrị na Nyanaḅọ Ḅe sẹlẹọkịḅọ ọ́ nwọse amanyanaḅọ mịẹmẹ. Ọ́mịna sẹ mị ḅie ḅọ anị ó se amanyanaḅọ kunḅịaye-ẹ; ó jịn sẹ ḅọ seni ọ́mịna amanyanaḅọ mịẹma.

¹⁶Amanyanaḅọ ḅe ọ̀ tọn-a asụn nyana ọ̀ ḅụ pịrị ẹkẹ, ọ̀ pịkị nweni se Ijipt mị fịrịma ẹkẹ na ini mun asụn fẹ, anịatịḅị Nyanaḅọ Ḅe nwọ ḅẹmẹ na oria tomonima ini ḅarị vinpịkị so Ijipt mị mun-ẹkẹ.

¹⁷Amanyanaḅọ ḅe ọ̀ tọn-a ere sime ẹkẹ, anịatịḅị mịn mị anị ọ̀ mịẹse ọ̀ Nyanaḅọ Ḅe ḅụ vinpịkịḅịa, ọ̀ pịkị seleḅa na, goli na, ngọ na nyana ọ̀ ḅụ pịrị ẹkẹ.

¹⁸Ò ḅo amanyanaḅọ sọsa ḅẹḅẹ, Tamụnọ Ḅe olokoma na ḍawọye ma na ḅe ḍiri, ini tatarịye mị ḅie gịẹịn pakụmaḅo se agbamịẹ apụma koko koromaye mị ọ̀ nwọ nyanaḅịa.

¹⁹Ọ̀ mịn ḍiri mị seni kpekima koroma, se oria ḍumo ene mamgba ḅụ anị goḅịa, mịẹse ori osi seni Nyanaḅọ Ḅe pịrị pịkị ḅereni nyana ḅara se anịa ḅie chụa koroma oloko goyegoye koko pịkị mịẹḅịa ọkụ.

²⁰Mịn mị mịẹse ori ọ̀ ḅụ se yechịntẹịn ò juo Izrẹlapụma nẹngị ẹkẹ, ọ̀ pịkị gbọrị ẹmbẹ ḅụ sọnị Nyanaḅọ Ḅe olokoma kan ẹkẹ. Anịsịkị ori amada mun tọn-a kụra laḅịa, se ò furo apụma pịkị Izrẹl mị da mun tọn-a ḅụọ nwọ laḅịa.