Read kirikeni Maịnkarama Oloko 18 Bible Online

Maịnkarama Oloko 18 - kirikeni bible

Maịnkarama Oloko 18

¹“Livaị agbamịẹ sẹ mị anị ḍiekiriye nyana ẹkẹ Izrẹl ama mị ḅie kirima ḅụ; anịnakaraka agbamịẹ ḍiepịrịayema na pịkị ini se agbamịẹ Nyanaḅọ Ḅe pịrị jịn aye na anị ini fịfịḅịaye-ẹ.

²Ini gbọrị kiri sọnị nyana ẹkẹ, anị ísí-a sẹma nyana ọkụ mị; Nyanaḅọ Ḅe agbamịẹapụ sọ mị anị inia ḍiekiriye mị-ẹ, anị Nyanaḅọ Ḅe yeḅereni ini pịrịsa ḅaraḅụ.

³“Ini se agbamịẹaye ma ḅọrọ nambulo-ẹ anịkanịka anana-ẹ ḅẹḅẹ, aba mị na, ḅapuko mị na, pịkị okuru akpa mị na sime agbamịẹapụma pịrịmẹ.

⁴Anị ḅọrọ mgbọlụ-a fịaye ḅụ tatarị ḍiekiriye ḅụ na, ere-iru ḅụ, oliv pulo ḅụ, pịkị ọ́mịna tatarị anana oju ichuka ma ḅụ sọnị, tatarị ḍiekiriye mị sime agbamịẹapụma pịrịmẹ.

⁵Ọ́mịna sẹ mamgba ḅie Nyanaḅọ Ḅe Livaị sẹ mị sẹlẹ ọkịmẹ na ini agbamịẹapụ fịrịnwẹngị ọ̀ pịrị gbasoḅịa.

⁶“Livaị sẹ ḅọ goyegoye Izrẹl mị ḅie nụḅọ paka ama paka ama sọnị ori ineda agbamịẹḅọ ḅaraḅụ mun anị gbọrị tẹkẹ nyọ mị ḅụ

⁷ísí Livaị apụma ḅụ sọse fịrịnwẹngị ọ̀ Nyana Tamụnọ Ḅe pịrịḅịa ori ọkọ ḅimẹ ḅẹḅẹ.

⁸Ísí agbamịẹapụma ọkị fịye la-ọkụ la-ọkụ anị ori sọnị ọkịḅịaye-ẹ, oria mịnapụ se ọ̀ sẹịnmaye goyegoye ọ̀ pịkị ineda ọkịḅịa.

⁹“Ó ḅo Nyanaḅọ ọ́mịna Tamụnọ Ḅe se ọ́ pịrịarị ama mị lasa ḅẹḅẹ, anịju ḅụ sime sẹma arịa ḅụngụngụma siamịẹye ma ómine àrị ḍama.

¹⁰Ọ́mịna awọma ó se fịnị ḅie agbamịẹ ma ọ́mịna agbamịẹ ẹbẹ ma ọgọnọ ḅụ; ọ́ pịkị ḅereni ọ́mịna tomonima pịrịma ini ḅịrịkọn ḍawọ, anịkanịka pakaḅịa iḅiaye na siaye na gbela nemi

¹¹anịkanịka ḍiri se tomoniḅọ mịẹ, pịkị ḅereni ini pịrịma ini fịsapụ tẹmẹ chịn yegbela.

¹²Nyanaḅọ ọ́mịna Tamụnọ Ḅe ma ḅụngụngụ ma siamịẹye ma mịẹmịẹ apụma ọ̀ taraka se ini wẹrịmamẹ, anị ò gose arịa sẹma depakụmarịye-ẹ ama mị ḅie ó tolusọmun-arị sịkị.

¹³Ómine okorona okorona Nyanaḅọ Ḅe ḅụ ḅereni nyana.”

¹⁴Anịsịkị mị Moziz ḅe nwọse ini ḅẹmẹ, “Ómine ọkị anga-ẹmun-arị ama mị ḅie, tomonima ḅịrịapụ ḅara yegbela na pịkị ịkịan wakị ye ḍọkịapụ na ḍuko ini pịrịye anị ini ḍuko nwẹngị nwẹngịye-ẹ, ọkụma Nyanaḅọ ọ́mịna Tamụnọ Ḅe ọ̀ ḍụkụkẹ ómine ọkọ simeye mị-ẹ.

¹⁵Anịnakaraka, ori ị̀ kịkẹ gbọrị ịkịankoroḅọ ọ̀ nwọse ọ́mịna ḅieḅụ ọ́ fịrịmaḅịa, ọ́ pịkị ọ̀ ḅịpịpoki.

¹⁶“Saịnaị Tụndụ mị nyọ ḅụ ó ḅo koḅirima ene mị, ọ́ tẹkẹmẹ na Nyanaḅọ Ḅe ọ̀ ḅarị ọkwẹịn se ọ́ naa ma, ọ́ pịkị ḅarị jịn sịkị se oria opu ḅalafama tọrụkuḅu mị ọrị ma, anịatịḅị ọ́ ḅalafamẹ na ọ́ fịḅịa.

¹⁷Anịẹrẹchị Nyanaḅọ Ḅe nwọse ị̀ ḅẹmẹ, ‘Ini nemi nyanaye ḅisam.

¹⁸Àrị ị́ kịkẹ gbọrị ịkịankoroḅọ se ini fịrịmaḅịa inia ḅieḅụ; àrị ò ḍukoḅịaye ḍuko ọ̀ pịrịḅịa, ọ̀ pịkị à tọn ọ̀ pịrịye goyegoye nwọ ḍuko ini pịrịḅịa.

¹⁹Ori ị̀ ẹrẹ ḅụ wẹrị ọkwẹịnḅịa, à pịkị fomuḅara se nụḅọ pịrịḅịa ọ̀ ḅịpịpoki ḍụkụkaḅọ goyegoye.

²⁰Ọkụma dadama ị̀rị̀ tọn ọ̀ pịrịkaye ị̀ ẹrẹ ḅụ nwọ ḍuko ịkịankoroḅọ goyegoye, ọ̀ fịḅịa, anị pịkị jịn-a oru ma ẹrẹ ḅụ wẹrị ọkwẹịnkọn ịkịankoroḅọ goyegoye sọnị fịḅịa ọkụ-ẹ.’

²¹“Ómine ineda ó kuḅie ḅụ nwọ ḅẹḅịa, nde wa mịẹse nemiḅịa ọkụ nemikase ịkịankoroḅọ ḅe Nyanaḅọ Ḅe fịrịmaka oku nwọ ḍuko ọkụma.

²²Nemikase ịkịankoroḅọ Nyanaḅọ Ḅe ẹrẹ ḅụ ọkwẹịnkọnmẹ se ò ḍukoye mị ḅo kọkọmaye sọkẹ ḅẹḅẹ, anịọkụma Nyanaḅọ Ḅe fịrịma okukẹ. Ori ịkịankoroḅọ ḅe ọ̀ ḅarakuḅu ọkwẹịn anị ọ̀ kọnye-ẹ, ómine ò ḍikiḅalafama.