Read kirikeni Maịnkarama Oloko 19 Bible Online

Maịnkarama Oloko 19 - kirikeni bible

Maịnkarama Oloko 19

¹“Nyanaḅọ ọ́mịna Tamụnọ Ḅe ò se ọ́ pịrịarị ama mị nyana apụma ọ̀ nwọ ḅaafama se inia opuamama na warịma na ọkị se ọ́ pịrị se ómine angasa ḅẹḅẹ,

²nyọ mị ó se tẹrẹ-a pẹkẹrẹ pu, be mun laḅịa opuama ọ́ nwọse gbọrị pẹkẹrẹ gbọrị pẹkẹrẹ ḅụ wẹrị. Anịsịkị nweniḅaaḅọ omi-ẹ ḅẹḅẹ nụḅọ ineda mangị mun arịaḅụ gbọrịye ḅie sọ ḅọịḅịa ịnyasọ ḅaraḅụ.

⁴Nemikase tomoniḅọ ḅe bẹkẹma ḅaraḅụ ori na ḅẹrẹ nyanakaḅọ ḅaamẹ ḅẹḅẹ, ori ineda mangị mun ma opuamama ḅụ gbọrịye ḅie sọḅịa, ḅara ḅarị ọ̀ laka ḅaraḅụ.

⁵Se otomaḅaraḅụ, mama apụ piri sọmun fịnị pẹlẹ gbin arịogbo apala mị tịḅị, ọlọ anga mị ḅụ pọkọ mun ísíḅọ ḅe ḅaa ọkụma, ori ineda mangị mun àrị tẹrẹ-a opuamama ḅụ gbọrịye ḅie sọḅịa, ye ọ̀ laka ḅaraḅụ.

⁶Nemikase gbọrị ama kẹngẹ ọkụma, somun anị la mị opuma ḅọlọḅịa, se fịḅọ ḅe tịḅị sowu ḅiḅịa mịnaḅọ ḅe ineda ò kun se ịganị ḅụ mịẹye oforiḅọ ḅe ḅaaḅịa. Ọḅụkọso mị ò ḅo nemiye-ẹ na ọ̀ ḅaa ḅọ ḅe ọ̀ ḅẹrẹ nemikẹ.

⁷Anị à gose ọ́ ḅẹye-ẹ na ọ́ tẹrẹ-a opuama sikima koroma-ẹ.

⁸“Nyanaḅọ ọ́mịna Tamụnọ Ḅe ọ́mịna pẹkẹrẹ mị mịẹ ḍụḅama sa ḅẹḅẹ, anị ò ḍuko ọ́mịna olomu-aḍapụma pịrị na ọ̀ mịẹḅịa nwọḅẹ ḅara mị, pịkị ò ḅereni ọ́ pịrị ama mị mgba se ọ́ pịrịsa ḅẹḅẹ,

⁹ọ́ pịkị jịn tẹrẹ-a opuama nwọ sẹlẹ sikima. (Mịn ama mị ò se ọ́ pịrịḅịa nemikase mịmgba à tọn ọ́ pịrịye goyegoye ọ́ nwọ mịẹmẹ, ọ́ pịkị Nyanaḅọ ọ́mịna Tamụnọ Ḅe ḅẹlẹmamẹ, se ò se ó tetemayema sime ḅara se ḍumo kọnmẹ ḅẹḅẹ.)

¹⁰Ọ́ mịn mị mịẹ, mịẹse siye mịẹka apụma fịẹka ḅara pịkị mịẹse Nyanaḅọ Ḅe se ọ́ pịrịarị ama mị ḅie ḅụ ómine ini ḅaamẹ nwọḅẹ ḅẹrẹḅarasi ọ́ nwọ nyana-ẹka ḅara.

¹¹“Ọkụma nemikase tomoniḅọ nemima ori na tarakaḅọ ninimẹ se mangị mun àrị opuamama ḅụ gbọrịye ḅie ịnyasọmẹ ḅẹḅẹ.

¹²Ọkọ simeye-ẹ ḅẹḅẹ, oria ama sẹnịapụma ini ọ̀ fịrịma ḅo se ò seni ọ̀ kọn nini mị gose sowuḅiḅịa mịnaḅọ ḅe pịrị, se ori ọ̀ ḅaa.

¹³Ó ḍikitịḅịfoin nyana ọ̀ pịrịma. Ọ́ mịẹse ninikọn mị Izrẹl mị ḅie fa, mịẹse yemamgba ómine na iḅiḅịa ḅara.

¹⁴“Nyanaḅọ ọ́mịna Tamụnọ Ḅe nwọse ọ́ pịrịarị ama mị ḅie ḅụ, ị́rị́ na kpekima angaḅọ ḅe oria kiri ḅụ ḅọlọsa sịkị ngịsị ini se ekechụa elekima ma sinma.

¹⁵“Ngẹrịḅọ chịẹ onye kẹngẹ ḅụ ọ́ ḅọrọ ḅẹrẹsipẹlẹ tomoniḅọ pịrịma; iderimatẹịn-tẹịn mamapụ onyechịẹḅịa se ḍiepakụma na ḅẹrẹ tomoniḅọ ḅe ḅarasimẹ.

¹⁶Nemikase gbọrịḅọ siye se jụmḅọ mịẹḅịa ẹrẹchị ḅẹrẹ se nụḅọ tịḅị gbanamẹ ḅẹḅẹ,

¹⁷ini mamapụ ma so anị gbọrị tẹkẹ nyọ mị munḅịa se agbamịẹapụma na ḅẹrẹkọn apụma na, anị nwọ anịsịkị ḅụ fịrịkiri ḅụ sime apụma ḅẹrẹkọn ini pịrịḅịa.

¹⁸Ḅẹrẹkọn apụma iḅiọkụma ḅẹrẹ mị ḅie ḍọkịḍikiḅịa se nemikase ọ̀ papa ḅẹrẹ se ò juo Izrẹlḅọ ḅe tịḅị ọgọnọ gbanamẹ ḅẹḅẹ,

¹⁹nwọ sime ò yemị seni pụnụmaḅọ ḅe pịrị fomuḅara mị ini nwọse iruokọnḅọ ḅe pịrịḅịa. Mịn ḅara ḅụ mị siye mị ama mị ḅie faḅịaye-ẹ.

²⁰Anịsịkị pakaye mị naaḅọ naaḅọ ḅalafaḅịa se gbọrịḅọ sọnị ḅarị ọkọ sime siye mịẹ ẹkẹ.

²¹Ọkọ sime-a ḅẹrẹ ma ḅụ ngịsị ó ḍikitịḅịfoin nyana ma; fomuḅara mị simeḅịa ọkụ anị ḍumo na ḍumo na-ẹ, tọrụmgbọlụ na tọrụmgbọlụ na-ẹ, aka na aka na-ẹ, ḅara na ḅara na-ẹ, pịkị ḅụọ na ḅụọ na-ẹ.