Read kirikeni Maịnkarama Oloko 2 Bible Online

Maịnkarama Oloko 2 - kirikeni bible

Maịnkarama Oloko 2

¹wa anịa kuluma vinpịkị so onwun ele mị ḅie sọmunmẹ, anị Akaba Ẹgẹdẹ mị mun ateli mị, anị Nyanaḅọ Ḅe tọn sa ḅaraḅụ, wa pịkị tọn-a sịkị famamẹ onwun ele mị ḅie gelegelema ḅọrọmẹ Idọm chịngị ọgọnọ sẹ mị ḅie ḅụ.

²“Anị Nyanaḅọ Ḅe nwọse ị̀ ḅẹye-ẹ

³na wa sịkịfama àrị chịngịma ọgọnọ ḅụ gelegele lasa ḅara iḅisam anịẹrẹchị wa ḅo so ọgọnọju daọrụ mị mun.

⁴Ọ̀ nwọse ị̀ ḅẹmẹ na à mayema se ó ḅeri jine, ‘Mịọkụ ó ḅo so Idọm chịngị ọgọnọ sẹ mị ḅie toluḅọrọ ḅi àrị sịkị anị ómine na sasa mịnapụma nyọ mị, Isọ furo apụma. Ini ó ḍikiḅalafaḅịa,

⁵ọkụma ómine owu se ini pakama, anịatịḅị inia ama mị ḅụ ịsụn na finji na ḅụ gbọrị kuḅu kẹngẹ laye sọnị à se ọ́ pịrị ẹkẹ. Idọm mị à se Isọ furo apụma pịrịsam.

⁶Ómine ineda inia ḅara fịye na mengi na fẹḅịa.’

⁷“Nyanaḅọ ọ́mịna Tamụnọ Ḅe, ọ́ mịẹye goyegoye ḅụ ómine ḅẹlẹma ọkụ ọ́ nwọse ḅiekoroma. Ori ó ḍikiḍikimẹ mị opu onwun ele mị ḅie ó gelegelema ḅọrọarị sịkị. Ori ómine na omi-ẹ ma kụra mesi ma ḅieḅụ, se ọ́ ḅụpalịmaye goyegoye ọ́ pịkị nyanasam.

⁸“Wa anị Elat na Iziọngiba na amama mun ateli mị ḅụ ḅụọsin se so Fị Tọrụ mị mun mẹ, wa anịju ḅụ anda kanama ọgọnọju ḅụ ịrụapakapaka nyọ daọrụ mị ḅụ so Moab mị damunmẹ.

⁹Nyanaḅọ Ḅe nwọse ị̀ ḅẹmẹ, ‘Moab apụma ọ́ ḅụfụka se ini pịrịma, anị Lọt furo apụma, anịkanịka owu se ini pakama. Anịatịḅị Ar opuama mị à se ini pịrịsam, inia ama mị ḅụ, gbọrị pẹkẹrẹ kẹngẹ sọnị à se ọ́ pịrị ẹkẹ.’”

¹⁰(Opuma godoro apụ sẹ anị Imim nwọ chịn apụma, ḅọrọsa sịkịḅụ Ar mị ḅie angamẹ. Anakim apụma gele ọkụ anị ini sọnị ini gele ọkụ-ẹ, anị pịkị jịn opuma godoro apụ sẹ.

¹¹Anakim apụma sime ọkụ ini pịkị nwọse ini chịnmẹ Rifeim; ọkụma Moab apụma nwọse ini chịnmẹ Imim.

¹²Horaị apụma sọnị ḅọrọsa sịkịḅụ Idọm mị ḅie ini angamẹ, ọkụma Isọ furo apụma ini depakụmamẹ, se inia sẹ mị kansin, se ini anị ọkị angamẹ, anị Izrẹlapụma, Nyanaḅọ Ḅe se ini pịrị ama mị ḅie ḅụ ini na tarakapụma desin ọkụ simemẹ.)

¹³“Anịsịkị wa Zirẹd Tọrụ mị saḅamẹ, Nyanaḅọ Ḅe wa ḅẹ ḅaraḅụ.

¹⁴Mịn anị wa Kedẹsh Banea mị ḅie ḅụ ḅụọsin maịnfa kụra mesi ḅọrọ sịkị mị-ẹ. Anị ḅụọ mị ḅụ ọmụ mị gbin owuapụ mamgba ini fị sosam, anị Nyanaḅọ Ḅe ḍuko na ọ̀ mịẹḅịa ḅẹye mị-ẹ.

¹⁵Nyanaḅọ Ḅe sakị ini dapaka nweni ori inimgba ḅaafama sịkị lamẹ.

¹⁶“Inimgba fị fama sịkị,

¹⁷Nyanaḅọ Ḅe nwọse wa ḅẹmẹ,

¹⁸‘Mịmgba Ar ateli mị ḅụ ọ́ ḅọrọmun Moab pẹkẹrẹ mị toluḅọrọsoḅịa.

¹⁹Anịsịkị ó mun Amọn apụ ama mị na kpekisa ḅẹḅẹ, anị Lọt furo apụma. Ọ́ ḅụfụka se ini pịrịma ọ́ pịkị owu se ini pakama, anịatịḅị à se ini pịrịsa ama mị ḅụ, gbọrị pẹkẹrẹ kẹngẹ sọnị à se ọ́ pịrị ẹkẹ.’”

²⁰(Mịn pẹkẹrẹ mị sọnị ini pịkị nwọse anị chịnmẹ Rifeim apụ ama, anị anịju ḅụ anga ḅọrọsa apụma ẹrẹ mị-ẹ; Amọn apụma nwọse ini chịnmẹ Zamzụmịm.

²¹Anakim apụma gele ọkụ anị ini sọnị gele ọkụ-ẹ. Ini opuma ḅakamẹ, pịkị opu sẹ-ẹ. Ọkụma Nyanaḅọ Ḅe ini ḅaasinmẹ, anịẹrẹchị Amọn apụma inia ama mị ọkị se anịa ḅie angamẹ.

²²Nyanaḅọ Ḅe mị gbọrị ḅara mị mịẹ seni Idọm apụma pịrịmẹ, anị Isọ furo apụma, anị chịngị ọgọnọ sẹ mị ḅie anga apụma. Ò Horaị apụma ḅaasinmẹ, anịẹrẹchị Idọm apụma inia ama mị ọkị se anịa ḅie angamẹ, anị mịọkụ sọnị ini pa anga nyọ mị-ẹ.

²³Mẹditirenia tọrụaka mị ḅụ sime ama mị Krit chọ mị ḅie apụma anịa ḅie angamẹ. Ini Avim apụma ḅaasinmẹ, anị jokoma ama mị nyana apụma, se inia ama mị mgba nwọ ọkịmẹ ọkịmun Gaza opuama mị lamẹ anị chukuda ọrụ mị.)

²⁴“Wa Moab mị ḅie toluḅọrọ so sịkị, Nyanaḅọ Ḅe nwọse wa ḅẹmẹ, ‘Mịọkụ, ọ́ sakị mun Anọn Tọrụ mị saḅa. Saịhọn, Amọraị amanyanaḅọ Hẹshbọnḅọ ḅe na oria ama mị na à se ọ́ pịrịaḅẹ. Ómine owu se ọ̀ paka se oria ama mị ọkị anga.

²⁵Mịọkụ sakị tọrọkọmun à mịẹḅịa sẹ sẹma ḅie tomoni mamgba ó ḍikiḅalafa. Ọ́mịna ẹrẹ naaḅọ goyegoye ḅalafa ḅụ ḅụgeregereḅịa.’

²⁶“Anịsịkị Kẹdemọt onwun ele mị ḅụ àrị okumun-apụ se Saịhọn Hẹshbọn amanyanaḅọ ḅe fịrịmamẹ, deinma mịẹ ọkwẹịn ḅụ:

²⁷‘Ye wa ị́ya sẹ mị ḅie ḅụ toluḅọrọ. Wa gonogonoma ateli mị ḍuko nwẹngịḅịa, wa pelele jịn anga da ẹkẹ.

²⁸Wa fịḅịa fịye na wa ḅuḅịa mengi na wa gbẹịnḅịa. Ị́ya sẹ mị ḅie toluḅọrọ kẹngẹ anị wa ḅiye-ẹ,

²⁹ọkịmun wa Jọdan Tọrụ mị saḅamun Nyanaḅọ mịna Tamụnọ Ḅe se wa pịrịarị ama mị ḅie sọ sịkị la. Isọ furo apụ, Idọm mị ḅie anga apụma na, Moab apụ, Ar mị ḅie anga apụma na, ini ḅereni wa pịrị se wa inia sẹ ḅie wẹrị toluḅọrọmẹ.’

³⁰“Ọkụma Saịhọn Hẹshbọn Amanyanaḅọ ḅe ọ̀ ḍụkụkẹ wa oria sẹ mị ḅie toluḅọrọ. Nyanaḅọ ọ́mịna Tamụnọ Ḅe ọ̀ mịẹse ori ininachịn pịkị yeḅerenikaḅọ nwọ sọmẹ, mịẹse wa ọ̀ nẹngịma se oria nyọ mị nwọ ọkịḅịa ọkụ, anị wa nwọ mịọkụ sime anga mị.

³¹“Anịsịkị Nyanaḅọ Ḅe nwọse ị̀ ḅẹmẹ, ‘Ḍiki, Amanyanaḅọ Saịhọn ḅe na oria ama mị na à mịẹse ini ḅarachụa nyanaka apụ sọsam ị̀ tọrụkuḅu ḅụ; oria ama mị ọkị se anga.’

³²Saịhọn ḅe na oria tomonima na ḅo mine na ọmụgbinmẹ Jehaz ama mị na kpeki nyọ ḅụ,

³³ọkụma Nyanaḅọ mịna Tamụnọ Ḅe ò se wa pịrị seni wa ọ̀ ḅaamẹ, oria owuapụ awọma na, pịkị oria tomoni mamgba na.

³⁴Anị gbọrị sịkị mị ḅụ wa oria ama goyegoye ọkị pịkị àrị kansinmẹ, se tomoniḅọ goyegoye ḅaasinmẹ, owuapụma na, eremeni ma na, pịkị awọmẹnịma na. Gbọrịḅọ sọnị wa kọnmakẹ.

³⁵Wa inia namama ọkị se pịkị amama kan kọsịmamẹ.

³⁶Nyanaḅọ mịna Tamụnọ Ḅe mịẹse wa Aroa ḅụ sakị Anọn Pẹsịkiri mị aka ḅụ sime ama mamgba ọkịmẹ pịkị anị pẹsịkiri mị ḅie ogboku sime opuama mị na, pịkị ọkịmun Giledị mị la. Kele mịna ḅarada onu nyana kụrọ ama ngịsị ofori-ẹ.

³⁷Ọkụma Amọn apụma pẹkẹrẹ wa ḅụkpekimakẹ anịkanịka Jabọk Tọrụ mị aka ma sọnị anịkanịka chịngị ọgọnọ sẹ mị amama sọnị, pịkị Nyanaḅọ mịna Tamụnọ Ḅe tọn wa pịrị na wa munma-ẹ nwọḅẹ jịn amama sọnị.