Read kirikeni Maịnkarama Oloko 20 Bible Online

Maịnkarama Oloko 20 - kirikeni bible

Maịnkarama Oloko 20

¹“Ó mun ómine na tarakapụ na ọmụgbinḅịa sịkị owuni kporokporo na asụnma na pịkị ḅaka ọ́ nẹngị owuni na ọrịmẹ ḅẹḅẹ, ómine ini ḍikiḅalafama. Nyanaḅọ ọ́mịna Tamụnọ Ḅe, anị Ijipt mị ḅie ọ́ ḅọrọma pakụmaḅọ ḅe ori ómine na omi-ẹ.

²Ma ọ́ sakị owu mị sọka simeogbo, gbọrị agbamịẹḅọ pakaḅo se nwọse ọmụgbin apụma ḅẹḅịa,

³‘Izrẹl owuapụ, ó poki! Mịmgba ó mun ọmụgbin-ẹmuaḅẹ. Ómine na tarakapụma ómine ini ḍikiḅalafama, ọ́ pịkị kuḅie lọkọmama, anịkanịka ḅụgeregere nyanama.

⁴Nyanaḅọ ọ́mịna Tamụnọ Ḅe ómine na mun aḅẹ, ọ̀ pịkị ọmụḅaraiḅi se ọ́ pịrịḅịa.’

⁵“Ọmụtịḅịnị ma nwọse tomonima ḅẹḅịa, ‘Mịanga ịwọma warị nama so se ma anị mịẹfịafịamakaḅọ omi? Nemikase ọkọ sime ḅọ omi-ẹ ḅẹḅẹ, ye ò vinpịkị so ama mun. Anị ofori se, nemikase ọmụ mị ḅie ọ̀ fịmẹ ḅẹḅẹ, jụmḅọ anị oria warị mị mịẹfịafịamaḅịaye-ẹ.

⁶Mịanga ọ́mịna ḅie irumịẹ chịnmgbọlụ ozu ḍipi se ma kaịnka ḅọ omi? Nemikase ọkọ simeḅọ omi-ẹ ḅẹḅẹ, ye ò vinpịkị so ama mun. Anị ofori se, nemikase ọmụ mị ḅie ọ̀ fịmẹ ḅẹḅẹ, jụmḅọ anị oria ere iru mị ḅuḅịaye-ẹ.

⁷Mịanga eremeniḅọ ọlọ se simeḅịaḅọ omi? Nemikase ọkọ simeḅọ omi-ẹ ḅẹḅẹ, ye ò vinpịkị so ama mun. Anị ofori se, nemikase ọmụ mị ḅie ọ̀ fịmẹ ḅẹḅẹ, jụmḅọ anị ori ọlọ simeḅịa eremeniḅọ ma simeḅịaye-ẹ.’

⁸“Ọmụtịḅịnị ma pịkị nwọse tomonima ḅẹḅịa, ‘Mịanga ḅalafa ḅụ kuḅie lọkọsaḅọ omi? Nemikase ọkọ simeḅọ omi-ẹ ḅẹḅẹ, ye ò vinpịkị so ama mun. Anị ofori ọkụma ọ̀ jịn apụ tẹmẹ ḅaa lọkọmaḅịa.’

⁹Ọmụtịḅịnị ma ọkwẹịn ọmụogbo mị pịrịso sịkị, iniḅo kpo kpo ḅụ tịḅịdaḅịa apụma nwọ sẹlẹḅịa.

¹⁰“Ó mun owu se pakarị opuama goyegoye, ọ́ tatarị ẹmbẹ se ama apụma pịrị, ini ḅara dekichịẹma ọ́ pịrị.

¹¹Ini nemikase ama mị anịa ḅọkọ ma finji se ḅara dekichịẹmamẹ ḅẹḅẹ, inimgba ini ọ́mịna omoniapụ sọḅịa pịkị ọ́ tọn ini pịrị kụrọ-a fịrịma nwẹngị ọ́ pịrịḅịa.

¹²Ọkụma anị opuama mị ḅe apụma nemikase ḅara dekichịẹma ẹkẹ ọkụma ómine na ọmụgbin ḅimẹ ḅẹḅẹ, ọ́mịna ọmụogbo ọ́ nwọse anị ḍẹkị kelema.

¹³Anịsịkị, Nyanaḅọ ọ́mịna Tamụnọ Ḅe mịẹse ómine opuama mị ọkịsa ḅẹḅẹ anịa ḅie sime owuḅọ goyegoye ọ́ ḅaafama.

¹⁴Opuama mị ḅie sime eremeni ma na, awọmẹnịma na, namama na pịkị jịn aye na, ómine ineda ọkịḅịa. Ómine na tarakapụma nyanaye goyegoye ómine ineda ọkị se warị angaḅịa. Nyanaḅọ Ḅe se ọ́ pịrịmẹ.

¹⁵Anị ó se ómine ọkị angaḅịa ama mị na sasa opuamama mịẹḅịa ọkụ-ẹ.

¹⁶“Ọkụma Nyanaḅọ ọ́mịna Tamụnọ Ḅe se ọ́ pịrịarị amama ḅie sime opuamama ọ́ nwọ ọkịsa ḅẹḅẹ, nweni mamgba ọ́ ḅaafama.

¹⁷Tomoni mamgba ọ́ ḅaasin: Hitaị apụma na, Amọraị apụma na, Kenan apụma na, Pẹrizaị apụma na, Hivaị apụma na, pịkị Jebus apụma na anị Nyanaḅọ Ḅe tọn ọ́ pịrị na ọ́ mị-ẹ nwọḅẹ ḅara mị.

¹⁸Ómine ini ḅaa, mịẹse ini ọ́ mịẹse ọ́ Nyanaḅọ Ḅe ḅụ si mịẹapụ sọ ẹka ḅara, anị inia oru ma tẹkẹ ḅụ mịẹmịẹ ḅụngụngụmaye ma ini nwọse ó telima ẹka ḅara.

¹⁹“Ómine opuama ọkị ḍọkịarị sịkị, anịa chịnmgbọlụ chụa chụa chịnma ọ́ pẹlẹ gbin ma, anị ọmụ mị mun ḅọlọ sịkị la sọnị. Ọ́ chịnmgbọlụma fị, ọkụma chịnma ọ́ pẹlẹ ma; chịnma àrị ómine na ḅẹrẹnyanakẹ.

²⁰Ísí-a chịnma ómine ineda àrị pẹlẹ gbinḅịa se àrị seni ama mị onu mị tanjịḅịa gele aye aka kọnḅịa, ọkịmun ómine opuama mị ọkị sịkị la.