Read kirikeni Maịnkarama Oloko 21 Bible Online

Maịnkarama Oloko 21 - kirikeni bible

Maịnkarama Oloko 21

¹“Nemikase Nyanaḅọ ọ́mịna Tamụnọ Ḅe se ọ́ pịrịarị ama ḅie ini ozu ḅie nini ḅụ tomoniḅọ ḅaamẹ, se ọ̀ ḅaa ḅọ tịḅịtọnkẹ ḅẹḅẹ.

²Ama sẹnịapụma na ḅẹrẹkọn apụma na ini mun ini ḍụẹịn mị ọrị nyọ mị ḅụ sakị tọn mun anị na kpekitẹịn amama ḅụ gbọrịye gbọrịye laḅịa.

³Anịsịkị ḍụẹịn mị na kpekitẹịn ama apụma gbọrị ayamburama ịrọrọ nambulo nwọ sẹlẹ ọkịḅịa, anị ma ini se jịn sịkị fịrịnwẹngịka wu.

⁴Ini ò se mun ngịsị samịna ẹka ideri mengi na kpeki anga nwọ munḅịa, anị jịn sịkị ma ini pịkị yeḍipika kiri ḅụ, se anịju ḅụ nama ḅe kọngọ anyịmaḅịa.

⁵Livaị ọrụ agbamịẹapụma sọnị ini munḅịa, anịatịḅị amafiema ḅẹrẹ goyegoye ini ma oloko mị sime ḅara ḍiki se anị kọnḅịa. Nyanaḅọ ọ́mịna Tamụnọ Ḅe ini sẹlẹọkịmẹ fịrịnwẹngị ọ̀ pịrị pịkị ḅẹlẹma se nweni pịrịḅịa ẹrẹchị oria ẹrẹ ḅụ.

⁶Anịsịkị ini ninikọn ḅụ ḅaaḅọ ḅe ini nwọ ọrị nyọ mị na kpekitẹịn ama mị ḅie tịḅịnị mamgba ḅo inia ḅarama sịkịrị ịrọrọ nambulo ḅe ọgọnọ sara

⁷se nwọḅẹḅịa, ‘Mine tomoniḅọ ḅe ḅaakẹ, ọ̀ ḅaaḅọ sọnị wa pịkị nemikẹ.

⁸Nyanaḅọ, siḅụ-ḅarasin ị́ya tomoni Izrẹlapụma pịrị, anị ị́rị́ Ijipt mị ḅie ḅọrọma pakụmaḅo apụma. Siḅụ-ḅarasin wa pịrị se mịẹye oforiḅọ nini ḅụ nwọ ḅaa mị se mine ọlọma.’

⁹Se Nyanaḅọ Ḅe ḅi ḅara mịẹ ḅụ, ini ḅarị se ómine ọlọ ẹkẹ na ómine nini mị kọnmẹ.

¹⁰“Nyanaḅọ ọ́mịna Tamụnọ Ḅe ọmụḅaraiḅi se ọ́ pịrị se ó nweni kunsomẹ ḅẹḅẹ,

¹¹ómine ineda inia ḅie ḍikitọrụgbẹịn eremeniḅọ ọrị se á sime ḅiḅịa.

¹²Árị ọkị se ị́ya ama mun, se árị anịanga á tịḅịsẹịn, á ḅaratụmgbalị inime ma pẹlẹ,

¹³pịkị árịa ḅịtẹma ḍinmaḅịa. Gbọrị akalụ á nwọse ị́ya ama ḅie sime ḍụẹịn ḍin ḍawu na nyọngọrọ na pịrịḅịa; anị mị ḅọrọsa ḅẹḅẹ, ị́ ineda á simeḅịa.

¹⁴Ọḅụkọ, ị́ ḅarị á ḅikẹ ḅẹḅẹ, á ḅụḅarasin á so. Ị́ nwọ kụrọḅara se á mịẹse árị ị́rị́ na nemiamẹ nwọḅẹ sịkị, á se omoniḅọ mịẹ ma pịkị á dẹrịma.

¹⁵“Nemikase gbọrị owuḅọ mama ere simemẹ se ini mama apụma owuapụ awọ yi ọ̀ pịrịmẹ, ọkụma tatarị tọkụ ḅe ọ̀ ḅẹlẹmatẹịn eremeniḅọ ma ò yikẹ ḅẹḅẹ.

¹⁶Oria ngọ ọ̀ nwọ ḍieḅịa sịkị tatarị tọkụ ḅe lalama ḍiekiriye mị ori anị se ọ̀ ḅẹlẹmatẹịn eremeniḅọ ma yayo ḅe pịrị ẹkẹ.

¹⁷Oria ngọma ḅụ mama kiri ọ̀ nwọse tatarị tọkụ ḅe pịrịḅịa, ọ̀ ḅẹlẹmatẹịn eremeniḅọ ma yayo ḅe orikẹ nwọḅẹ sọnị, owuḅọ goyegoye oria tatarị tọkụ ḅe kiri nemi se ọ̀ lalama ḍiekiriye mị nwọse ọ̀ pịrị.

¹⁸“Nemikase tomoniḅọ ininachịn pịkị nyana ḅerenika tọkụ yimẹ, ḍaḅọ na nyengiḅọ na ḅịpịpokika tọkụ, ini fomuḅara se ọ̀ pịrị ọkụ pịrị ọkụ sọnị.

¹⁹Ḍawu ḅe na nyọngọrọma na ini ori ọkị se ama sẹnịapụma tọrọkọ mun se ḅẹrẹkọn ọ̀ pịrịḅịa.

²⁰Ini nwọse ini ḅẹḅịa, ‘Mịna tọkụ ḅe ininachịn pịkị nyana ḅerenika tọkụ-ẹ, ọ̀ pịkị mịna ḅịpịpoki ḍụkụkẹ; ori igbiki guluguluma pịkị opu iruḅuḅọ-ẹ.’

²¹Anịsịkị ama mị ḅie apụma ḍụparị se ò gbin ḅaaḅịa, mịn ḅara mị anị ó se mị siye mị dachịẹmaḅịa ọkụ-ẹ ọ́mịna ogboku ḅụ. Izrẹl mị ḅie simeḅọ goyegoye pakaye mị naa se ḅalafaḅịa.

²²“Nemikase tomoniḅọ mịẹsiye ẹrẹchị ini ọ̀ ḅaamẹ se oria oju mị chịn ọgọnọ sololo simemẹ ḅẹḅẹ,

²³anị anịju sime mun ḍin anịaḅụ ḅọrọ ẹkẹ. Anị gbọrị ene mị ḅụ ini anị ḍipiḅịa, anịatịḅị fịsa oju chịn ọgọnọ sololo sime mị anị Tamụnọ Ḅe worinime ọkịḅo ama pịrịpịrịmẹ. Ọ́ ḍụẹịn mị ḍipi, mịẹsosịkị Nyanaḅọ ọ́mịna Tamụnọ Ḅe se ọ́ pịrịarị ama mị ọ́ nwọ pụlama ẹka ḅara.