Read kirikeni Maịnkarama Oloko 22 Bible Online

Maịnkarama Oloko 22 - kirikeni bible

Maịnkarama Oloko 22

¹“Nemikase ị́ juo Izrẹlḅọ nambulo anịkanịka anana iri fa aḅẹ ḅẹḅẹ, ò ḍikitọrụsin ma; ori ọkị mun ọ̀ pịrị.

²Nemikase ọ̀ nyanaḅọ ḅe anga nyọ mị opuma ḅọlọmẹ anịkanịka ị́ nyanaḅọ nemikẹ ḅẹḅẹ, anịọkụma ori ọkịso ị́ya warị mun. Ọ̀ nyanaḅọ ḅe ọ̀ ḍọkịma ḅomẹ ḅẹḅẹ, ò se ọ̀ pịrị.

³Anị gbọrị ḅara nwọ mị-ẹ ị́ ḅọrọ yepụra asụn bin sọnị, anị ḅọrọ ḅịtẹ-o anịkanịka ḅẹyeḅẹye sọnị anị ị́ juo Izrẹlḅọ ḅe ḅara faye mị.

⁴“Nemikase ị́ juo Izrẹlḅọ yepụra asụn anịkanịka nambulo ḅịkịmẹ ḅẹḅẹ, ò ḍikitọrụsin ma; ḅarachụa ọ̀ pịrị ọ̀ nama ḅe dekichịẹma.

⁵“Eremeni owuapụ ḅụchụaye chụa ẹkẹ, owuapụ pịkị eremeni ḅụchụaye chụa ẹkẹ; Nyanaḅọ ọ́mịna Tamụnọ Ḅe ọkọ simeye mịẹ apụma ọ̀ taraka se ini wẹrịmamẹ.

⁶“Ị́ nemikase eje ọgọnọ anịkanịka kiri ọgọnọ feni warị ọrịmẹ se nyengi wu ḅe anịa ḅie anyị anịkanịka tọkụ jụaḅẹ ḅẹḅẹ, nyengi wu ḅe ò kunsoma.

⁷Ị́ ineda feni awọma kunsoḅịa, ọkụma nyengi wu ḅe wẹrịso ò so, mịẹse ị́ ḅọlọ pịkị lọkọlọkọ ḍumo nyanaḅịa ọkụ.

⁸“Ị́ nemikase ịwọ warị namamẹ ḅẹḅẹ, ọrị na ḅara gbanaye ị́ nwọse ochu mị aka ḅụ chụa kelemamẹ. Anịsịkị ị́rị́ ḅarị mịẹkẹ tomoniḅọ nemikase sokoro koro fịmẹ ḅẹḅẹ.

⁹“Ị́ya irumịẹ chịnmgbọlụ ozuma ḅie jịn kịrị chịnmgbọlụ ḍipima; ị́ nemikase ọkọ mịẹ ọkụma irumịẹ chịnmgbọlụma na pịkị ísí chịnmgbọlụma chụaye ma na ị́ ḅarị fị ẹkẹ.

¹⁰“Owoi nambulo na yepụra asụn na kpọ gboloma se ozu fịrịnwẹngị ma.

¹¹“Wulu na lọkọ-ḅịtẹ na se gbin gboloma ḅụchụaye chụa ma.

¹²“Ị́ya ḅụchụaye inein-a ịkọlị ma ḅụ ḍiki Ịsaka se gbin chụa.

¹³“Nemikase owuḅọ eremenitọkụ sime se ọḅụkọ ọ̀ ḅarị á sime ḍọkịkẹ ḅẹḅẹ.

¹⁴Ori anịẹrẹchị iruoaye ḍuko arịa ọgọnọ gbana ma, na ini ḅo sime sịkị árị owuḅọ nemi ḅọrọsam.

¹⁵“Ọkọ simeye pakamẹ ḅẹḅẹ, tọkụma yi apụma ini se mọnọye gbẹịn ḅịtẹ ḅụ pulo mị lase ọnwẹịnye mị, anị tọkụ ma ma árị owuḅọ nemikẹ nwọḅẹye ḍiepakụmaye mị, se mun ḅẹrẹkọn warị mị ḅie ama tịḅịdapụ ma ḍieḅịa.

¹⁶Tọkụ ma ḍawu ḅe nwọse ini ḅẹḅịa, ‘Ị̀ya tọkụ ma à nwọse ḅe ḅọ ḅe pịrịmẹ na ini sime, ọkụma mịọkụ ọ̀ ḅarị á ḅikẹ.

¹⁷Ori iruoaye ḍuko arịa ọgọnọ gbanasam, ọ̀ nwọḅẹ aḅẹ na árị owuḅọ nemi ḅọrọsam ini ḅo sime sịkị. Ọkụma mịn mị ḍiepakụmamẹ na ị̀ya tọkụ ma ma árị owuḅọ nemikẹ ori á sime sịkị; mọnọye gbẹịn ḅịtẹ mị ḅụ ọnwẹịn pulo ma ọ́ nwọ ḍiki!’

¹⁸Anịsịkị ama tịḅịdapụ ma deḅọ ḅe ọkị se ò fomuḅịa.

¹⁹Ini pịkị oloko se ori ọlọ se seleḅa pẹkẹrẹ-a sọnọasi ọ̀ nwọ gbẹịn se tọkụ ma ḍawu ḅe pịrịḅịa, anịatịḅị ori Izrẹl eremeni tọkụ ḅụgereremamẹ. Anịtẹịn anga, á pa pịkị tarọ sọ ọ̀ pịrịḅịa, ngịsị ori árị na kan ẹkẹ oria ḍumo ene mamgba ḅụ.

²⁰“Ọkụma nemikase ò ḍukoye mị kọkọmaye-ẹ, pịkịna se anị ḍiepakụmaḅịaye ofori-ẹ na tọkụ ma anịsịkị ma árị owuḅọ nemikẹ nwọḅẹye mị, anị-ẹ ḅẹḅẹ,

²¹ini tọkụ ma ọkị paka ḍawu ḅe oria warị ḅọkọ munḅịa se anịju árịa ama owuapụma á gbin ḅaaḅịa. Á ḅụgereremaye mịẹmẹ mịna sẹ mị ḅie, anị ma árị owuḅọ simeka sime ogbo mun owuḅọ nemimẹ, anị ḍawu ḅe warị ḅie á simearịogbo. Mịn ḅara mị ḅụ ọ́ mị siye mị dachịẹmaḅịa ọ́mịna ogboku.

²²“Nemikase jụmḅọ ta na gboloma àrị ogbo ini kunḅọ omi-ẹ ḅẹḅẹ, ini mamapụ ma ini nwọ ḅaaḅịa. Mịn ḅara mị ḅụ ọ́ mị siye mị dachịẹmaḅịa ọ́mịna ogboku.

²³“Nemikase ama mị ḅie jịn owuḅọ ọlọsa eremeni tọkụ na gboloma àrị ogbo ini kun owuḅọ omi-ẹ ḅẹḅẹ.

²⁴Ama mị ḅie ómine ini ọkị paka se ini mamapụ ma gbin ḅaa. Tọkụ ma gose fịḅịaye anị árị oloku se ḅarachụa ḅikẹ, ama mị ḅie árị omi-ẹ, ini á pụkọ naaḅịa nwọḅẹ sọnị. Owuḅọ ḅe gose fịḅịaye anị jụmḅọ ọlọsa eremeni tọkụ ori na gbolomamẹ. Mịn ḅara mị ḅụ ọ́ mị siye mị dachịẹmaḅịa ọ́mịna ogboku.

²⁵“Nemikase owuḅọ paka mun sẹ mị ḅie eremeni tọkụ furumẹ kụrọ ḅaraḅụ anị jụmḅọ ọlọsa ḅọ ma. Anị owuḅọ ḅe kẹngẹ anị ini ḅaaḅịaye-ẹ;

²⁶eremeni tọkụ ma gbọrịye sọnị ini se á mịẹ ẹkẹ, anịatịḅị á ḅaa gbẹịn si mịẹkẹ. Mịn ḅẹrẹ mị na, gbọrịḅọ owu se jụmḅọ paka se nini ḅụ nụḅọ ḅaa mị na gbọrịye-ẹ.

²⁷Owuḅọ ḅe ini ọlọsa eremeni tọkụ ma furumẹ kụrọ ḅaraḅụ sẹ mị ḅie, árị oloku ḅarachụa ḅimẹ nwọḅẹ sọnị, ḅarachụa á pịrịḅịaḅọ ofori-ẹ.

²⁸“Nemikase owuḅọ ḅe ini ọlọka eremeni tọkụ furumẹ kụrọ ḅaraḅụ.

²⁹Ori ereya igbiki seleḅa pẹkẹrẹ-a mesi oyi fịnjịma se tọkụ ma ḍawu ḅe gbẹịn se á ḅo tarọ sọḅịa, anịatịḅị ọ̀ kụrọ ḅara se árị ọlọ se árị na gbolomamẹ. Ngịsị ori árị na kan ẹkẹ oria ḍumo ene mamgba ḅụ.

³⁰“Gbọrị owuḅọ sọnị ḍawu ḅe ḅụgereremama anị ḍawu ḅe oria eremeni ma ḅie gbọrịḅọ na gboloma ḅụ.