Read kirikeni Maịnkarama Oloko 23 Bible Online

Maịnkarama Oloko 23 - kirikeni bible

Maịnkarama Oloko 23

¹“Ini posa owuḅọ anịkanịka ini ḅụpẹlẹsinsaḅọ goyegoye Nyanaḅọ Ḅe tomonima ḅie nụḅọ sime ẹkẹ.

²“Tịḅịtọnka ḅaraḅụ ini yiḅọ anịkanịka ọkọsimeḅọ furo ḅie pakaḅọ goyegoye, ọkị mun oyi karama ḅụọ la sọnị, Nyanaḅọ Ḅe tomonima ḅie nụḅọ sime ẹkẹ.

³“Gbọrị Amọnḅọ anịkanịka Moab ḅọ anịkanịka inia furo ḅie apụma sọnị ọkị mun oyi karama ḅụọ la—Nyanaḅọ Ḅe tomonima ḅie ini sime ẹkẹ.

⁴Ini fịye na mengi na se ọ́ pịrị ḍụkụkẹ ómine Ijipt mị ḅie pakasoarị sịkị, ini pịkị Belam, Bida yaḅe ọkọmẹ, Pitọ Mẹsopotemịa ḅie sime opuama mị ḅie na ò ḅo worinime se ọ́ pịrị.

⁵Ọkụma Nyanaḅọ ọ́mịna Tamụnọ Ḅe ò Belam ḅe poki ḍụkụkẹ, anịnakaraka ò worinime mị pịkị se ḅẹlẹma mịẹmẹ, anịatịḅị ori ọ́ ḅẹlẹmamẹ.

⁶Ọ́ sẹ ḅụ sime mun laḅiri laḅiri, ngịsị gbọrịye ḅụ sọnị ọ́ ḅarachụa ma sẹma pịrịma anịkanịka ini mịẹse ye ini na lọkọlọkọ.

⁷“Idọm apụma ómine ini ḍikisimama; ini ọ́mịna mịnapụ-ẹ. Ijipt apụma sọnị ómine ini ḍikisimama anịatịḅị gbọrị sịkị, inia ama ḅie ómine angamẹ.

⁸Tẹrẹ karama ḅụọ mị ḅụ sakị inia furo ḅie apụma, ini Nyanaḅọ Ḅe tomonima ḅụ sọ simeḅịa.

⁹“Ó ḅo ọmụ sịkịḅụ pikesimesa ḅẹḅẹ, ọ́ mịẹse ọ́ tẹmẹ anga ḅụ fịafịa ẹka ye goyegoye ḅụ ọḅụsin.

¹⁰Nemikase ḍin ḅie ḍawọju ereḍikiaye owuḅọ ḅụ sarase ọ̀ fịafịakẹ ḅẹḅẹ, ini pikesime nyọ ḅụ, ọ̀ ḅụsikima.

¹¹Sasoḅiri ḅụ ori ọ̀ ḅụ sịkịrịḅịa, se ịrụa binsa ḅẹḅẹ ò vinpịkị somun ini pikesime nyọ ḅie sọḅịa.

¹²“Ó pikesime nyọ mị ḅụ ọ́ pakaso pọchuku munḅịa anga ọ́ nwọ nyana, anị pọchuku ọ́ tarị sịkị ó munḅịa anga.

¹³Ọ́ chịn deki chụa mun anị ó se fịrịnwẹngịḅịaye ḅaraḅụ, mịẹse ọ́ ḅụlọ jikemẹ ḅẹḅẹ, ómine ineda anị se kiri soku pịkị anị gbẹịnḅịa ọkụ.

¹⁴Ó pikesime nyọ mị ọ́ nwọ mịẹfịafịama, anịatịḅị Nyanaḅọ ọ́mịna Tamụnọ Ḅe ori ó mine na omi-ẹ, ọ́ pịkị ó ḍikiḍikiḅịa, se ọ̀ mịẹ sarasarama ọ́ pịrịḅịa ómine ómine na tarakapụma nẹngịmaḅịa. Ọ́ ḅụgbẹịnkaye mịẹma Nyanaḅọ Ḅe ḅofa ó se sarakoroma.

¹⁵“Nemikase omoniḅọ ọ̀ nyanaḅọ ḅe anịkanịka ọ̀ nyanaḅọ ma ḅụ mangịso ḅo ị́ ḅara ịnyasọmẹ ḅẹḅẹ, ò de ọ̀ nyanaḅọ ḅe fịrịmama.

¹⁶Ọ́mịna amama ḅie ọ̀ ḅụḅẹlẹ ama goyegoye ḅie ori ineda anịa ḅie angaḅịa, ọ́ pịkị si anga ḅara se ori na angama.

¹⁷“Izrẹlḅọ ḅụ, anị ḅọrọ owuḅọ anịkanịka eremeniḅọ sọnị ḅo Oputẹkẹwarị mị ḅie sẹfịḅọ sọḅịaḅọ ofori-ẹ.

¹⁸Pịkị, anị mị ḅụ nyana ḅo igbiki anịkanịka obiri dẹrị ḅụ ḅo igbiki sọnị Nyanaḅọ ọ́mịna Tamụnọ Ḅe warị ḅie sọḅo ma, anị se nụḅọ ḅereniye mịẹ ḅeinma ḅaraḅụ. Nyanaḅọ Ḅe Oputẹkẹwarị mị ḅie sẹfị apụma ọ̀ taraka se ini wẹrịmamẹ.

¹⁹“Igbiki anịkanịka fịye anịkanịka ḅẹyeḅẹye sọnị, ị́ nwọse ị́ juo Izrẹlḅọ ḅọlọmẹ ḅẹḅẹ, ò se gbana ị́ pịrịḅịa sọye ḅi ma.

²⁰Ị́ ineda ị́ se igoniḅọ ḅọlọye ḅụ sọye ḅiḅịa, ọkụma ị́ se ị́ juo Izrẹlḅọ ḅọlọye mị ḅụkẹ. Ọ́ mịn oloko mị koko, se Nyanaḅọ ọ́mịna Tamụnọ Ḅe ó mun ọkị anga-ẹmun-arị ama mị ḅie ọ́ ḅẹlẹmaḅịa ọ́ mịẹye mịẹye ḅụ.

²¹“Ị́ yeḅereni ị́ Nyana Tamụnọ Ḅe pịrịmẹ ḅẹḅẹ, ị́ ḅereniye mị mịẹka ḅara se anị wẹrịsoma; Nyanaḅọ Ḅe ori ị́ ọlọḅịa ị́ ḅereniye mị gose, pịkị siye-ẹ anị mịẹka mị.

²²Yeḅereni Nyanaḅọ Ḅe pịrịka mị sikẹ,

²³ọkụma ị́rị́ ngẹrị ḅarana ḅereniye omi-ẹ ḅẹḅẹ, ọrị na ị́ anị mịẹmẹ.

²⁴“Jụmḅọ irumịẹ chịnmgbọlụ ozu kiri ḅie ị́ nwẹngị ḅọrọarị sịkị, tụmgbakị elelenda mamgba ị́ fịḅịa ị́ ḅiḅara ḅiḅara, ọkụma gbọrịye sọnị se ye ḅie chụa deki so ma.

²⁵Jụmḅọ ịpịamgba ozu kiri ị́ nwẹngị ḅọrọarị sịkị, ị́ kaịn ịpịamgba mamgba ị́ ineda fịḅịa, ọkụma ị́ ozu ḅie chịnmgbọlụ pẹlẹ agiji se gbọrị ịpịamgba sọnị pẹlẹ ẹkẹ.