Read kirikeni Maịnkarama Oloko 24 Bible Online

Maịnkarama Oloko 24 - kirikeni bible

Maịnkarama Oloko 24

¹“Nemikase owuḅọ eremeniḅọ sime se ọḅụkọ ọ̀ ḅarị á ḅikẹ ḅẹḅẹ, anịatịḅị ori á ḅụ ọ̀ ḅụḅẹlẹkaye ọrịmẹ gose. Anịẹrẹchị ini kansam nwọḅẹ ḍiri gịẹịn á pịrị se oria warị ḅie á depakụmamẹ.

²Á nemikase jịn owuḅọ sime,

³se ori pịkị ḅarị á sime ḅikẹ, se ini kansam nwọḅẹ ḍiri gịẹịn á pịrị, se oria warị ḅie á depakụmamẹ ḅẹḅẹ. Anịkanịka nemikase maịn karama á simeḅọ ḅe fịmẹ nwọḅẹ ọkụma.

⁴Tatarị á simeḅọ ḅe ngịsị ọ̀ ḅarị á sime ẹkẹ, anị mịẹọkụ mịẹọkụ sọnị; ori á se pụlasaḅọ nwọ kịẹnmaḅịa. Ò nemikase kpoto á simemẹ ḅẹḅẹ, anị Nyanaḅọ Ḅe ịganịmaḅịa. Nwọ sime opu simịẹye ọ́ mịẹma, Nyanaḅọ ọ́mịna Tamụnọ Ḅe se ọ́ pịrịarị ama mị ḅie.

⁵“Owuḅọ ịwọma eresimemẹ ḅẹḅẹ, ini ò se owuni fịrị ḅie chu ẹkẹ anịkanịka ama fịrị ḅie sọ; gbọrị kụra ini nwọ wẹrịso ọ̀ pịrịḅịa fịrị munka ḅaraḅụ, mịẹse ori ama ḅie sime seni tarọ ma ḅieḅẹlẹmaḅịa ọkụ.

⁶“Ị́ yese tomoniḅọ ḅọlọmẹ ḅẹḅẹ, oria fịaye gbẹịn ḍụparịma ọ̀ nwọse ị́ ḅarachụa ẹkẹ. Mịn mị mịẹḅịa, fịye mịẹ fị ḅọkọ ḅarị ḅụfụkamaye sọ furo mị pịrị ẹkẹ.

⁷“Ò juo Izrẹlḅọ kun ọkị omoniḅọ mịẹḅọ anịkanịka ò se omoniḅọ ḅaraḅụ dẹrịḅọ goyegoye ini ọ̀ ḅaaḅịa. Mịn ḅara mị ḅụ ọ́ mị siye mị dachịẹmaḅịa ọ́mịna ogboku.

⁸“Ḅalafama ojukiri obi ọ́ nwọ kọn àrị sịkị, Livaị agbamịẹapụma se ọ́ ḅẹ ḅara mị ọ́ nwọ mị-ẹ; à ḍuko ini pịrịsaye ma ọ́ nwọ ḍuko nwẹngị.

⁹Nyanaḅọ ọ́mịna Tamụnọ Ḅe se Miriam ma mịẹye mị ọ́ nwọse ḅiekoroma Ijipt mị ḅie ọ́ pakaḅoarị sịkịḅụ.

¹⁰“Ị́ yese ị́rị́ na kpekima angaḅọ ḅọlọmẹ ḅẹḅẹ, ḅarana sọ oria warị ḅie mun ò se ị́ ḅarachụaḅịa ḅụchụaye mị sin ọkị ma;

¹¹nụngọ ḅọkọ chịẹ koru se ye ori ḅarana anị ọkịḅo ị́ pịrị.

¹²Nemikase igweinḅọ-ẹ ḅẹḅẹ, anị se ị́ ḅara wẹrị ene ḅaama ma;

¹³saso ḅiri lasịkị lasịkị anị se mun ọ̀ pịrị, mịẹse ori anị se chụa mọnọḅịa ọkụ. Anịsịkị anị ò ḅieḅẹlẹmaḅịa, se ị́ Nyana Tamụnọ Ḅe pịkị ị́ ḍiki ḅieḅẹlẹḅịa.

¹⁴“Igwein pịkị mịẹḅịa ọkụ ofori ọkọ fịrịnwẹngịapụ inumama, anị ḅọrọ ị́ juo Izrẹlapụ anịkanịka igoniapụ, ọ́mịna amama ḅie gbọrị nyọ ḅụ anga apụ sọnị.

¹⁵Eneḅeneḅene otuka ma binka simeogbo ini nwẹngị fịrị mị ḅe gbẹịnye mị se ini pịrị, igbiki mị inia ḅụpalịmamẹ, ini pịkị anị kịẹnsam anị ọkịḅịa ẹrẹchị. Ị́ ini gbẹịnkẹ ḅẹḅẹ, ini ị́ se owu Nyanaḅọ Ḅe pịrịḅịa se ị́ si mịẹḅọ sọḅịa.

¹⁶“Awọmẹnị ma mịẹ sima ẹrẹchị ini yi apụma ini nwọ ḅaa ẹkẹ, ini pịkị awọmẹnịma ḅaa ẹkẹ ini yi apụma mịẹ sima gose; tomoniḅọ mị mịẹ sima ḅụ kẹngẹ anị nụḅọ ḅọrọ fịḅịaye-ẹ.

¹⁷“Kikichụa igoniapụ na, ḍapụ na nyengiapụ na fịsa awọmẹnịma pịrịma ini lalama ayema ḅụ; pịkị deḅọ koroma fị eremeniḅọ ma arịa ḅụchụaye mị ọkịma á ḅọlọye mị ḅe onyechịẹ gose.

¹⁸Ó se ḅiekoroma na ómine omoniapụ sọ simemẹ Ijipt mị ḅie, se Nyanaḅọ ọ́mịna Tamụnọ Ḅe mịẹse ómine ọ́ ḅụ nyanamẹ; anị à gose mị oloko mị chụa ọ́ pịrịye-ẹ.

¹⁹“Ọ́mịna fịayemgbọlụ ma ọ́ nwọ koḅiri sịkị ḅụ ọ́ pẹlẹ ọ́ ḅaragbarịaye ma, ọ́ ḅarị pịkị mun àrị ọkị ma, ye àrị sime igoniapụ na, ḍapụ na nyengiapụ na fịsa awọmẹnịma na pịkị deapụ koroma fịsa eremeni ma na nwọ pịrị, mịẹse Nyanaḅọ ọ́mịna Tamụnọ Ḅe ọ́ ḅẹlẹmaḅịa ọkụ ọ́ mịẹye mịẹye ḅụ.

²⁰Ọ́mịna oliv ma ọ́ nwọ tan-ẹ so, kọn ayema ọ́ ḅarị pịkịma mun àrị tan ọkịma, àrị sime igoniapụma na, ḍapụ na nyengiapụ na fịsa awọmẹnịma na pịkịna deapụ koroma fịsa eremeni ma na nwọ pịrị; mịẹsosịkị Nyanaḅọ ọ́mịna Tamụnọ Ḅe ọ́ mịẹye goyegoye ḅụ ọ́ ḅẹlẹmaḅịa ọkụ.

²¹Ọ́ gbọrị sịkị se ọ́mịna irumịẹ tụmgbakị elelenda ma tan koḅirisa ḅẹḅẹ, ọ́ ḅarị pịkịma mun mama sịkị karama ozuma ḅie sọ ma: irumịẹ tụmgbakị elelenda ma ḅụ kọn ayema àrị sime igoniapụma na ḍapụ na nyengiapụ na fịsa awọmẹnịma na pịkị deapụ koroma fịsa eremeni ma pịrịmẹ.

²²Ngịsị ó se ḅieḅarama ma na ómine omoniapụ sọ simemẹ Ijipt mị ḅie; anị à gose mị oloko mị chụa ọ́ pịrịye-ẹ.”