Read kirikeni Maịnkarama Oloko 25 Bible Online

Maịnkarama Oloko 25 - kirikeni bible

Maịnkarama Oloko 25

¹Moziz ḅe pịkị ḍuko Izrẹlapụma pịrịmẹ: “Nemikase mama Izrẹlapụ so ḅẹrẹkọn warị mun mẹ, se ḅẹrẹ gbọrịḅọ ḅara iḅi se ísí ḅọ ḅe ḅẹrẹ ọ̀ ḅara simẹ nwọ ḅẹḅẹ.

²Nemikase ḅẹrẹ ḅarasiḅọ ḅe fomu ini nwọ ḅẹḅẹ, ḅẹrẹkọnḅọ ḅe kụrọ pịrịḅịa se ini ori iḅo se ò fomuḅịa. Ọ̀ mịẹ si mị la-ọkụ ḅe fomuḅara anị ini se ọ̀ pịrịye-ẹ.

³Ini ineda fomuye ḅara mesi se ò fomuḅịa, ọkụma anị ọkọ nẹngị ẹkẹ; anị ḅara nẹngịmẹ ḅẹḅẹ anị ò se ama ogbo papaye mịẹḅịa.”

⁴Moziz ḅe pịkị ḍuko Izrẹlapụma pịrịmẹ: “Nambulo ḅe ḅịpị fịna ma ị́ ò se ịpịamgba pịsịrịarị sịkị.”

⁵Moziz ḅe pịkị ḍuko Izrẹlapụma pịrịmẹ: “Nemikase mama mịnapụ anga gbolomamẹ, se inia ḅụ gbọrịḅọ tọkụ yika ḅaraḅụ fịmẹ ḅẹḅẹ, numbireowu ḅe anị tarọ ma sime se deḅọ sọ á pịrịḅịaye-ẹ furo mị ḅie, árị ateli ogbo owuḅọ sime ẹkẹ.

⁶Ini tatarị yiḅịa owutọkụ ḅe sime fịḅọ ḅe pịrịmẹ, mịẹse ò furo mị faẹka ḅara Izrẹl mị ḅie.

⁷Nemikase fịḅọ ḅe numbireowu ḅe á sime ḍụkụkẹ ḅẹḅẹ, á so ama mị ḅe tịḅịdapụ ma ḍọkịma mun se nwọse ini ḅẹḅịa, ‘Ị̀ deḅe numbireowu ḅe sime ọ̀ pịrị fịrị mị ọ̀ nwẹngị ḍụkụkẹ; ọ̀ ḍụkụkẹ numbireowu ḅe Izrẹl mị ḅie awọ nyana.’

⁸Anịsịkị ama tịḅịdapụ ma ọ̀ chịn se ọkwẹịnkọn ọ̀ pịrịḅịa. Ò nemikase pa á sime ḍụkụkẹ ḅẹḅẹ,

⁹numbireowu fịḅọ ḅe tarọ ma ama tịḅịdapụ ma tọrọkọ nwẹngị ọ̀ damamun ọ̀ ḅụọ ḍiki-akpaka ma ḅụ gbọrị ḅụọ sin, se fụla se ọ̀ tọrụ sara se nwọ ḅẹḅịa, ‘Mịn furo pakụma nụḅọ mịnaḅọ pịrị ḍụkụkaḅọ ḅe ḅụ pakapakaye-ẹ.’

¹⁰Ò furo mị Izrẹl mị ḅie ini nwọse anị chịnḅịa, ‘ini ḅụọ ḅụ ḍiki-akpaka sin ḅọ furo.’ ”

¹¹Moziz ḅe pịkị ḍuko Izrẹlapụma pịrịmẹ: “Nemikase mama owuapụ owusọarị ogbo, gbọrịḅọ ta ḅarachụa dewu ḅe pịrị ḅụ ísíḅọ ḅe owuapụ ojuma ọlọ jineaḅẹ ḅẹḅẹ,

¹²ómine á ḍikitịḅịfoin ma; á ḅara mị ọ́ pẹlẹsin.”

¹³Moziz ḅe pịkị ḍuko Izrẹlapụma pịrịmẹ: “Nweni inuma ma iku yetọnye ị́ nwọse yetọn àrị sịkị.

¹⁵Kọkọma pịkị karakara iku yetọnye mị na pịkị yetọnye mị na nwọse àrị tọn, mịẹse ị́ Nyana Tamụnọ Ḅe se ị́ pịrịarị ama mị ḅie ị́ya enema ḅọlọḅịa ọkụ.

¹⁶Nyanaḅọ Ḅe taraka se nweni inuma apụ na, karakaraye mịẹka apụ na wẹrịmamẹ.”

¹⁷Moziz ḅe pịkị ḍuko Izrẹlapụma pịrịmẹ: “Ijipt mị ḅie ọ́ pakaḅoarị sịkị Amalẹk apụma se ọ́ mịẹye mị ọ́ nwọse ḅiekoroma.

¹⁸Ini Tamụnọ ḍikiḅalafakẹ nwọḅẹ ẹrẹchị, ini ọḅụ owu se ọ̀ pakamẹ, ịnyọ ọ́ ḅụ fa pịkị ọ́ ḅụ lọkọsa sịkị ḅụ, se ọḅụju ḅụ ḅụlọkọ ḅụ sara sime apụ mamgba ḅaafamamẹ.

¹⁹Anịẹrẹchị, Nyanaḅọ ọ́mịna Tamụnọ Ḅe ama mị se ọ́ pịrị pịkị mịẹse ọ́ gbori kelema ómine na tarakapụma ḅara ḅie gbọrịye sọnị ọ́ lakẹ ḅẹḅẹ, ómine ọrị na Amalẹk apụ mamgba ómine ini ḅaafamamẹ, mịẹse gbọrịḅọ sọnị ḅarị ini se ḅiekoroma ẹka ḅara. Ó se ḅieḅarama ma!