Read kirikeni Maịnkarama Oloko 27 Bible Online

Maịnkarama Oloko 27 - kirikeni bible

Maịnkarama Oloko 27

¹Anịsịkị Moziz ḅe na Izrẹl tịḅịnịma na, nwọse tomonima ḅẹmẹ, “Mịmgba à chụa ọ́ pịrịarị oloko mamgba ọ́ nwọ koko.

²Ọ́ Jọdan Tọrụ mị saḅamun Nyanaḅọ ọ́mịna Tamụnọ Ḅe se ọ́ pịrịarị ama mị ḅie sọsa ḅẹḅẹ, ḍụḅaḍụḅa ḍụparị ọ́ nwọse chịẹma koroma, yese àrị sikiri gbẹịn,

³se ma oloko mamgba se arịa ọgọnọ gịẹịn pịkị ḍawọ ayema na. Nyanaḅọ ọ́mịna Tamụnọ Ḅe ḅereni ọ́mịna olomu-aḍapụma pịrị na ò se ọ́ pịrịḅịa nwọḅẹ lọkọlọkọ pịkị fịye pakụma ama mị ḅie sọsa ḅẹḅẹ,

⁴se Jọdan mị ḅụ ísí pẹkẹrẹ ḅụ ó simearịogbo ọ́ ma ḍụparịma se Ebal Tụndụ mị ọgọnọ ḅụ chịẹma koroma, se yese àrị sikiri gbẹịn, anị mịmgba à tọn ọ́ pịrịarịye ḅaraḅụ.

⁵Ikulele gwaka ḍụparị ọ́ nwọ seni anịnyọ agbamịẹ ẹbẹ pike koroma,

⁶anịatịḅị wolika ḍụparị anị ó se agbamịẹ ẹbẹ pike Nyanaḅọ ọ́mịna Tamụnọ Ḅe pịrịḅịaye-ẹ. Anịa ọgọnọ ḅụ anị dọkịma agbama ọ́ nwọ mịẹ se Nyanaḅọ ọ́mịna Tamụnọ Ḅe pịrịḅịaye-ẹ,

⁷ọ́ pịkị anịju ḅụ gboloma agba nwọ mịẹ, ọ́ pịkị agbamịẹ ḍiepịrịayema fịḅịa se Nyanaḅọ ọ́mịna Tamụnọ Ḅe tọrụkuḅu ḅieḅẹlẹḅịa.

⁸Ó yese sikirisa ḍụparịma ḅụ ó ḅelema Tamụnọ Ḅe oloko mamgba gịẹịn koroma.”

⁹Anịsịkị Moziz ḅe na, Livaị agbamịẹapụma na, nwọse Izrẹlapụ mamgba ḅẹmẹ, “Ó poki, ómine Izrẹlapụ, ọ́ yawụma sime ị̀ poki. Mịmgba ó ḅo Nyanaḅọ ọ́mịna Tamụnọ Ḅe oria tomoni sọsam;

¹⁰anịẹrẹchị ómine ọ̀ ḅịpịpoki se oria oloko mamgba koko anị mịmgba à chụa ọ́ pịrịarị ayema.”

¹¹Se Moziz ḅe nwọse Izrẹlapụma ḅẹmẹ,

¹²“Ọ́ Jọdan mị saḅa ḅọrọ se ini ḅẹlẹma se tomonima pịrịḅịa sịkị, mịna furoma Gẹrizim Tụndụ mị ọgọnọ ḅụ chịẹḅịa: Simiọnị na, Livaị na, Juda na, Ịsaka na, Josẹf na, pịkị Bẹnjamin na.

¹³Mịna sẹma pịkị Ebal Tụndụ mị ọgọnọ ḅụ chịẹḅịa ini worinime ma se tomonima pịrịḅịa sịkị: Rubẹnị na Gadị na, Asha na, Zẹbụlọnị na, Danị na, pịkị Naftalaị na.

¹⁴Livaị apụma gele pụkọ se ma ọkwẹịnma kọn se Izrẹlapụma pịrịḅịa:

¹⁵“ ‘Tamụnọ worinime sime ḍụparị, chịn, anịkanịka ikulele se oru mịẹ se ḅọịma anị tẹkẹḅọ goyegoye nwọ pịrị; Nyanaḅọ Ḅe orutẹkẹ mị ọ̀ taraka se anị wẹrịmamẹ.’ “Nweni mamgba pẹkẹrẹ se nwọ ḅẹḅịa, ‘Amẹn!’

¹⁶“ ‘Tamụnọ worinime sime ḍaḅọ anịkanịka nyengiḅọ osika ḅọ goyegoye nwọ pịrị.’ “Nweni mamgba pẹkẹrẹ se nwọ ḅẹḅịa, ‘Amẹn!’

¹⁷“ ‘Tamụnọ worinime sime nụḅọ na kpekima angaḅọ kiri elekima sin ḅọ goyegoye pịrị.’ “Nweni mamgba pẹkẹrẹ se nwọ ḅẹḅịa, ‘Amẹn!’

¹⁸“ ‘Tamụnọ worinime sime tọrụmgbọlụ pụnḅọ dairimaḅọ goyegoye nwọ pịrị.’ “Nweni mamgba pẹkẹrẹ se nwọ ḅẹḅịa, ‘Amẹn!’

¹⁹“ ‘Tamụnọ worinime sime igoniapụma na, ḍapụ na nyengiapụ na fịsa awọmẹnịma na, pịkị deapụ koroma fịsa eremeni ma na, ini inuma se inia karakaraye se ini pịrịkaḅọ goyegoye nwọ pịrị.’ “Nweni mamgba pẹkẹrẹ se nwọ ḅẹḅịa, ‘Amẹn!’

²⁰“ ‘Tamụnọ worinime sime nụḅọ ḍaḅọ ḅụgereremaḅọ goyegoye nwọ pịrị anị ḍawu ḅe eremeni ma ḅie gbọrịḅọ na gboloma ḅụ.’ “Nweni mamgba pẹkẹrẹ se nwọ ḅẹḅịa, ‘Amẹn!’

²¹“ ‘Tamụnọ worinime sime nama na gbolomaḅọ goyegoye nwọ pịrị.’ “Nweni mamgba pẹkẹrẹ se nwọ ḅẹḅịa, ‘Amẹn!’

²²“ ‘Tamụnọ worinime sime nụmbụrarọ anịkanịka ori na pẹkẹrẹ mịna sọḅọ ma na gbolomaḅọ goyegoye nwọ pịrị.’ “Nweni mamgba pẹkẹrẹ se nwọ ḅẹḅịa, ‘Amẹn!’

²³“ ‘Tamụnọ worinime sime tarọ nyengima na gbolomaḅọ goyegoye nwọ pịrị.’ “Nweni mamgba pẹkẹrẹ se nwọ ḅẹḅịa, ‘Amẹn!’

²⁴“ ‘Tamụnọ worinime sime ḅọịma ninikọnḅọ goyegoye nwọ pịrị.’ “Nweni mamgba pẹkẹrẹ se nwọ ḅẹḅịa, ‘Amẹn!’

²⁵“ ‘Tamụnọ worinime sime ḅẹrẹnemikaḅọ ḅaaḅịa ẹrẹchị igbiki daọkịḅọ goyegoye nwọ pịrị.’ “Nweni mamgba pẹkẹrẹ se nwọ ḅẹḅịa, ‘Amẹn!’

²⁶“ ‘Tamụnọ worinime sime bebe Tamụnọ oloko mamgba na ḍieaye ma na kokokaḅọ goyegoye nwọ pịrị.’ “Nweni mamgba pẹkẹrẹ se nwọ ḅẹḅịa, ‘Amẹn!’