Read kirikeni Maịnkarama Oloko 28 Bible Online

Maịnkarama Oloko 28 - kirikeni bible

Maịnkarama Oloko 28

¹“Ó nemikase mịmgba à chụa se ọ́ pịrịarị Nyanaḅọ ọ́mịna Tamụnọ Ḅe oloko mamgba koko pịkị ọ̀ ḅịpịpokimẹ ḅẹḅẹ, ori ọ́ mịẹse ómine opusọtẹịn sẹkiri sime sẹ mamgba nẹngịḅịa.

²Nyanaḅọ ọ́mịna Tamụnọ Ḅe ḅịpị ọ́ nwọ poki anịsịkị ma ḅẹlẹma mamgba sime ọ́ pịrịḅịa:

³“Nyanaḅọ Ḅe ori ọ́mịna amama na ọ́mịna ozuma na ḅẹlẹmaḅịa.

⁴“Nyanaḅọ Ḅe tọn-a awọmẹnị ḅẹlẹma se ọ́ pịrịḅịa, tọn-a chịnmgbọlụ na, pịkị tọn-a nambulo na anana na.

⁵“Nyanaḅọ Ḅe ọ́mịna fịayemgbọlụ ma ḅẹlẹmaḅịa pịkị ómine àrị se mịẹḅịa fịayema na.

⁶“Nyanaḅọ Ḅe ọ́ mịẹye goyegoye ḅẹlẹmaḅịa.

⁷“Nyanaḅọ Ḅe ori ómine na tarakapụma nẹngịmaḅịa ini owu se ọ́ pakasịkị ḅụ. Gbọrị nyọ ḅụ ini ḅọrọḅo owu se ọ́ pakaḅịa, ọkụma ini ọ́ ḅụ kịrịkịrị pẹkẹrẹ ḅụ mangịsoḅịa.

⁸“Nyanaḅọ ọ́mịna Tamụnọ Ḅe ọ́ ḅara fịrịma ḅẹlẹmaḅịa, pịkị ọ́mịna fịye koko nyọma ḅie ḅụ mgbọlụ fịaye se ḅeinmaḅịa. Ò se ọ́ pịrịarị ama mị ḅie ori ọ́ ḅẹlẹmaḅịa.

⁹“Ó nemikase Nyanaḅọ ọ́mịna Tamụnọ Ḅe ḅịpịpoki se ọ̀ tọn ọ́ pịrịye goyegoye nwọ mịẹmẹ ḅẹḅẹ, ori ó se oria tomoni nwọ mịẹḅịa, anị ọ̀ wẹrị yeḅereni ọ́ pịrịsa ḅaraḅụ.

¹⁰Anịsịkị bebe sẹkiri sime apụ mamgba ọrịḅịa na Nyanaḅọ Ḅe ori ọ́ sẹlẹ se oria tomoni nwọ mịẹsam, ini pịkị ó ḍikiḅalafaḅịa.

¹¹Nyanaḅọ Ḅe ọ̀ tọn-a awọmẹnị na, tọn-a nambulo na, pịkị tọn-a chịnmgbọlụ na se ọ́ pịrịḅịa, ò ḅereni ọ́mịna olomu-aḍapụma pịrị na ò se ọ́ pịrịḅịa nwọḅẹ ama mị ḅie ḅụ.

¹²Soḅie oria ngọ koko warị mị ḅie ḅụ ọ̀ wẹrị ene koroma ọ́ pịrịḅịa sịkị sịkị ḅụ se ọ́mịna ḅara fịrịma ḅẹlẹmaḅịa, mịẹse ó yese tọn-a sẹ ḅọlọḅịa ọkụ, ọkụma ómine gbọrị apụ ḅara sọnị ó ye ḅọlọ ẹkẹ.

¹³Nyanaḅọ ọ́mịna Tamụnọ Ḅe ori ó se tọrọkọ dapụ mịẹḅịa sẹma ogboku ḅụ, ómine ọḅụ dapụ sọ ẹkẹ; sịkịmamgba mịẹye ómine na iḅiḅịa, ngịsị ọ́ ḅịkị ẹkẹ mịẹye ḅụ, ó nemikase kuḅie se ḅụgbana gbẹịn ḅara se mịmgba à chụa ọ́ pịrịarị oria oloko mamgba kokomẹ ḅẹḅẹ.

¹⁴Ngịsị ómine àrị kan ẹkẹ ḅịpịpokika ḅaraḅụ, anịkanịka jịn-a oru ma tẹkẹ pịkị fịrịnwẹngị àrị pịrị mị ọ́ mịẹma.

¹⁵“Ọkụma ó nemikase Nyanaḅọ ọ́mịna Tamụnọ Ḅe ḅịpịpokikẹ pịkị kuḅie se ḅụgbana gbẹịn ḅara se mịmgba à chụa ọ́ pịrịarị oria oloko mamgba kokokẹ ḅẹḅẹ, ma siaye mamgba ọ́mịna ḅụ pakaḅịa:

¹⁶“Nyanaḅọ Ḅe ọ́mịna amama na ozuma na ò worinime se àrị pịrịḅịa.

¹⁷“Nyanaḅọ Ḅe ọ́mịna fịayemgbọlụ ma na, ómine àrị se mịẹḅịa fịayema na ò worinime se àrị pịrịḅịa.

¹⁸“Nyanaḅọ Ḅe ò worinime se ọ́ pịrịḅịa anị boka awọ na, boka fịaye na, boka nambulo na, pịkị boka anana na se ọ́ pịrị ḅụ.

¹⁹“Nyanaḅọ Ḅe ò worinime se ọ́ mịẹye mịẹye pịrịḅịa.

²⁰“Ó nemikase siye mịẹ pịkị Nyanaḅọ Ḅe sịkịmẹ ḅẹḅẹ, galagala na, ḅịpịogbosọka na, ḅụfụka na ọ̀ nwọse ḅo ọ́ pịrịḅịa, ọ́ nyana se mịẹye mịẹye ḅụ, ọkịmun ò be okorona okorona ọ́ ḅaa sin sịkị laḅịa.

²¹Obi ḅaraḅara ọ̀ nwọse ọ́ fịrịmaḅịa ọkịmun ómine ọkị anga-ẹmun-arị ama mị ḅie gbọrịḅọ sọnị ọ́mịna ḅụ ḅarị kọnka sịkị laḅịa.

²²Nyanaḅọ Ḅe ama nwẹngị obi ma na, foin obi na pịkị ọfịrị na ọ̀ nwọse ó gbinḅịa; ò ḅuruḅaa na fịye ḅaa fọrụ na se ọ́mịna chịnmgbọlụma fịrịmaḅịa. Ma ḅụfụka ma ómine na sime mun ọ́ fị sịkị laḅịa.

²³Ene koro ẹkẹ, se ọ́mịna kiri mị pịkị ikulele kụrọ ọkụ kụrọḅịa.

²⁴Ene koro nakaraka, Nyanaḅọ Ḅe fọn irisi na onwun irisi na ọ̀ nwọ sara nweni ọ́ fịfamaḅịa.

²⁵“Nyanaḅọ Ḅe ọ̀ mịẹ sarasarama ómine na tarakapụma pịrị se ini ọ́ nẹngịmaḅịa. Gbọrị nyọ ḅụ ó mun owu se ini pakaḅịa, ọkụma kịrịkịrị pẹkẹrẹ ḅụ ómine inia ḅụ mangị soḅịa, se bebe sẹkiri sime apụ mamgba ọ́mịna ḅụ pakaye mị ọrị se ḅalafaḅịa.

²⁶Ọ́ fịsa ḅẹḅẹ fenima na piri ḅie namama na ḅo ọ́mịna oju mịnị ma pẹịḅịa, àrị desinḅịaḅọ ofori-ẹ.

²⁷Nyanaḅọ Ḅe ori ọpọpọlị obi se ọ́ sẹịnmaḅịa, anị ò se Ijipt apụma mịẹ ọkụ mị. Ọ̀ mịẹḅịa ịnọ ọ́mịna ojuma ḅụ saraḅịa, ọ́mịna oju kiri sara se ọ́ pịsịḅịa, ọkụma àrị gwọ nyana ẹkẹ.

²⁸Nyanaḅọ Ḅe ọ̀ mịẹḅịa ọ́ nọmụḅịa; ọ̀ pịkị tọrụmgbọlụ pụn obi se ó gbin se ọ́mịna koroma ma galagalamaḅịa.

²⁹Enekaka fịafịa ogbo anị tọrụmgbọlụ pụnḅọ ḅara ọ́ nwọse nyọ ḅuḅuroma ḅọrọḅịaye-ẹ, ọ́ pịkị ineda ateli ọrị ẹkẹ. Ọ́ mịẹse ómine na iḅiḅịaye ofori-ẹ. Sịkịmamgba ini ọ́ pụnda se kụrọ ḅara se ọ́mịna ayema ọkịḅịa se ḅarachụa ọ́ pịrịḅịa gbọrịḅọ sọnị ofori-ẹ.

³⁰“Ị́ eremeni tọkụ ọlọḅịa-ọkụma jụmḅọ anị á simeḅịaye-ẹ. Ị́ warị namaḅịa-ọkụma ḅie ị́ anga ẹkẹ. Iru-mịẹ chịnmgbọlụ ozu ị́ nwọ ḍipiḅịa-ọkụma anịa chịnmgbọlụma ị́ fị ẹkẹ.

³¹Ini ị́ tọrọkọ ị́ya nambulo ḅe kẹnị famaḅịa, ọkụma nama mị ngịsị ị́ ḅịpị la-ẹkẹ. Ị́ tọrụ se gegema ḍikiarịogbo ini ị́ya yepụra asụnma fọnọ soḅịa, ini ḅarị pịkị àrị se ḅo ị́ pịrị ẹkẹ. Ị́ya ananama ini se ị́rị́ na tarakapụma pịrịḅịa, se ḅarachụa ị́ pịrịḅịa gbọrịḅọ sọnị ofori-ẹ.

³²Ọ́mịna owuapụ awọma na eremeni awọma na igoniapụ ini ọkị soḅịa, omoniapụ ḅaraḅụ ó gegema tọrụ se ini ḍikiarịogbo. Ene ḅa ene ḅa ene ọ́ papa ọ́mịna tọrụmgbọlụma fụkama ọ́mịna awọma inia vinpịkị ḅo mị ḍikiḅịa, ọkụma ọ́ kụrọ nyana ẹkẹ kikichụa anị pịrị.

³³Jịn sẹ apụ ọ́mịna chịnmgbọlụ mamgba tan ọkị soḅịa, anị ọ́ tọrụsiọrị ḍipiaye ma, inia ḅaraḅie gbọrịye sọnị ọ́ nyana ẹkẹ, sịkịmamgba ómine pụnda na siḅara se ómine na anga sikima.

³⁴Ọ́mịna tọrụsiọrị ma mịẹse ọ́ nọmụḅịa.

³⁵Nyanaḅọ Ḅe gwọḅịa ọkụ ofori, ḅịaḅịaka pịkị fụkarị ịnọ ma se ọ́mịna ḅụọma ḅụ saraḅịa; ọpọpọlị ma ọ́mịna tịḅị ḅụ chụa ḅo ọ́mịna ḅụọ chuku mamgba laḅịa.

³⁶“Nyanaḅọ Ḅe ori ómine na ọ́mịna amanyanaḅọ ḅe na ọkịmun jịn ama ḅie koromaḅịa, anị jịn sịkị ómine anịkanịka ọ́mịna olomu-aḍapụma sọnị ma angaka nyọ mị; anịju ḅụ ini chịn na ḍụparị na se mịẹ oru ma anị ọ́ fịrịnwẹngị pịrịḅịaye-ẹ.

³⁷Nyanaḅọ Ḅe ori ọ́ galagalama mun chuḅịa sẹma ḅie, ọ́mịna ḅụ pakaye mị anị iniaḅụ gbiripumaḅịa; ini ó se ḍẹrịye mịẹ pịkị ó ḍikisimaḅịa.

³⁸“Ọ́ tọn-a chịnmgbọlụ ḍipiḅịa, ọkụma boka fịaye anị ó sokuḅịaye-ẹ, anịatịḅị igurube ma àrị ọ́mịna chịnmgbọlụma fịḅịa.

³⁹Ómine irumịẹ chịnmgbọlụ ozuma ḍipi se anịa ḅie fịrịnwẹngịḅịa, ọkụma arịa tụmgbakị elelenda ma ó kpokponima ẹkẹ anịkanịka arịa ḅụ ḅo ere iru sọnị ó ḅu ẹkẹ, anịatịḅị yefịfị ịsọn ozuma fịḅaaḅịa.

⁴⁰Oliv chịn ọ́mịna ama mị ḅie nyọ goyegoye ḅụ pakaḅịa, ọkụma ómine oliv pulo nyana ẹkẹ, anịatịḅị oliv ma arịa mgbọlụma kpọka ḅụ sara famaḅịa.

⁴¹Ómine owuapụ awọ na eremeni awọ na yiḅịa, ọkụma ómine ini nyana ọkị ẹkẹ, anịatịḅị ọmụ ḅie ini ini kun soḅịa ikoliapụ ḅaraḅụ.

⁴²Ọ́mịna chịn mamgba na fịayema na ḍọkọḍọkọ feni awọ àrị fịfị ḅaaḅịa.

⁴³“Ọ́mịna ama ḅie anga igoniapụma kụrọ nyanarị sịkị, ómine ọ́mịna kụrọ fa aḅẹ.

⁴⁴Ini igbiki nyana se ọ́ ḅọlọḅịa, ọkụma ómine nyana se ini ḅọlọḅịaye ngịsị ofori-ẹ. Ini tọrọkọ dapụ sọ ọ́ pịrịḅịa, ọkụma ómine ọḅụ dapụ sọḅịa.

⁴⁵“Ma ḅụḅalaḅala mamgba ḅo ọ́mịna ọgọnọ gbanaḅịa, àrị pịkị ómine na sime ọkịmun ini ọ́ ḅaasosịkị laḅịa, anịatịḅị Nyanaḅọ ọ́mịna Tamụnọ Ḅe ḅịpị ó pokikẹ, ọ̀ chụa se ọ́ pịrị olokoma sọnị ọ́ pịkị kokokẹ.

⁴⁶Àrị elekima sọ Tamụnọ ḅẹrẹkọn mị pịrịḅịa ọ́mịna ḅụḅụ ọkịmun ḅụọ ḅụọ la.

⁴⁷Nyanaḅọ Ḅe ori ọ́ ḅẹlẹmamẹ ḅọkọḅọkọ ḅụ, ọkụma ó ḅieḅẹlẹ ḅụ na kuḅie lokoloko ḅụ na fịrịnwẹngị ọ̀ pịrị ḍụkụkẹ.

⁴⁸Anịẹrẹchị, Nyanaḅọ Ḅe se ọ́ fịrịmaḅịa tarakapụma anị ọ́ fịrịnwẹngị pịrịḅịaye-ẹ. Ḅuru ọ́ tarịḅịa, ọ́mịna pụkọ samịnaḅịa, ọ́ pịkị papaḅụ sinḅịa, ọ́ nyanaye ofori ḅaraḅụ. Nyanaḅọ Ḅe ò siḅara se ómine pụnda se ḅụḅalaḅala se ọ́ pịrịḅịa ọkịmun ọ́ fịso sịkị la.

⁴⁹Nyanaḅọ Ḅe sẹkiri mị ḅie kuluma nyọ mị ḅụ ọ̀ gbọrị sẹ fịrịmaḅo ọ́ dapakaḅịa, inia ama ọkwẹịn sọ ọ́ naakẹ. Ini igo ḅara se vuma fin ḅo ọ́mịna ọgọnọ chịẹḅịa.

⁵⁰Ini ye abala ẹkẹ, pịkị ḍikitịḅịfoin nyana gbọrịḅọ sọnị pịrị ẹkẹ, anị ḅọrọ asẹmẹnịḅọ anịkanịka olomuḅọ sọnị.

⁵¹Ini ọ́mịna namama pẹị pịkị ọ́mịna chịnmgbọlụma na fịḅịa, se ó ḅuruḅaa ḅie sime fịḅịa. Ini fị kọma ọ́ pịrịḅịa gbọrịye sọnị ofori-ẹ, anị ḅọrọ mgbọlụ fịaye-o, ere iru-o, oliv pulo-o, nambulo-o, anịkanịka anana sọnị, ọ́ pịkị fịḅịa.

⁵²Nyanaḅọ ọ́mịna Tamụnọ Ḅe se ọ́ pịrịarị amama ḅie sime ama goyegoye ini owu se àrị pakaḅịa, se àrị gele kụrọ onu ma, anị ó se ḅiekpọmaye ma àrị ḅịkịḅịa.

⁵³“Ómine na tarakapụma ọ́mịna amama gbẹịnmachịẹarị sịkị ḅụ, ó fịye ḅụḅalaḅala nyana so ọkụma, Nyanaḅọ ọ́mịna Tamụnọ Ḅe se ọ́ pịrị awọma ọ́ sakị nwọ pẹịḅịa.

⁵⁴Ọ́mịna ḅie yelatẹịn osi nyana furo ḅie owuḅọ ḅe sọnị, ini ama mị gbẹịnmachịẹarị sịkị ḅụ, oria awọma ḅụ dapụ ọ̀ nwọ pẹịḅịa fịye gose. Ọ̀ pịkị ịmụkụ ḅụ gbọrịye sọnị se numbireowu ḅe pịrị ẹkẹ, anịkanịka tarọ ma anị ọ̀ ḅẹlẹmaḅọ ma anịkanịka oria awọma ḅụ kọn apụma.

⁵⁵

⁵⁶Ọ́mịna ḅie yelatẹịn osi nyana furo ḅie eremeniḅọ ma sọnị, anị ngọ kọn pịkị ḅụọ ngịsị nụngọ lalakaḅọ ma, ini ama mị gbẹịnmachịẹarị sịkị mị ḅụ, arịa awọma ḅie dapụ á nwọ pẹịḅịa, ḅuru keke ma na, árị ịwọ ma yitọkụ mị na pịkị nyengi mị na á ḅọịma nwọ pẹịḅịa. Árị na àrị ḍiaḅịa gbọrịḅọ sọnị ofori-ẹ, anị ḅọrọ á ḅẹlẹma deḅọ ḅe anịkanịka arịa awọma ḅie gbọrịḅọ sọnị á pịrị ẹkẹ.

⁵⁷

⁵⁸“Ó nemikase kuḅie se ḅụgbana gbẹịn ḅara se mị ḍiri mị ḅie gịẹịn koroma Tamụnọ Ḅe oria ḍieaye ma kokokẹ pịkị Nyanaḅọ ọ́mịna Tamụnọ ḅe oria ḅụgbiripuma pịkị boma nyana ẹrẹ mị osikẹ ḅẹḅẹ,

⁵⁹gwọḅịa ọkụ ofori obi ma na pịkị ḅalafama ama nwẹngị obi ma na ọ̀ nwọse ómine na ọ́mịna awọma na gbinḅịa, se àrị dachịẹmaḅịaye ofori-ẹ.

⁶⁰Ọ̀ pịkị Ijipt mị ḅie ómine ọrị ḅọrọsa ḅalafama obi mamgba se ọ́ gbinḅịa, se ngịsị ọ́ ḅụ iḅi ẹkẹ.

⁶¹Ọ̀ pịkị obi tọrụ kịrịkịrị mamgba se ó gbinḅịa, pịkị mị Tamụnọ olokoma na ḍieaye ma na ḍiri mị ḅie ẹrẹ goka ama nwẹngị obi ma na se ó gbinḅịa se ọ́ pịkị fịfamaḅịa.

⁶²Sotọrụ ḅụ lolia ma ḅaka ọkụ ó ḅo ọkọ ḅakasam nwọḅẹ sọnị, ọ́mịna ḅie boka apụ kẹngẹ anị kọnḅịaye-ẹ, anịatịḅị Nyanaḅọ ọ́mịna Tamụnọ Ḅe ḅịpị ó pokikẹ.

⁶³Anị nwọ Nyanaḅọ Ḅe ḅụḅẹlẹ se ori ọ́ mịẹse ọ́ lọkọlọkọ pịkị su ọkụ mị anị anị pịkị ọ̀ ḅụḅẹlẹ se ori ọ́ ḅaafama pịkị ọ́mịna aye mamgba simafamaḅịa ọkụ mị-ẹ. Ómine ọkị anga-ẹmun-arị ama mị ḅie ḅụ, ori okorona okorona ó bura pakụmaḅịa.

⁶⁴“Nyanaḅọ Ḅe ori ọ́ galagalama sẹ mamgba ḅie chuḅịa, sẹkiri mị ḅie kuluma ḅụ gbọrị anga ḅụ ọkịmun ísí anga la, se anịju ini chịn na ḍụparị na se mịẹ oru ma anị ọ́ fịrịnwẹngị pịrịḅịaye-ẹ, anị ómine na pịkị ọ́mịna olomu-aḍapụma na jịn sịkị ma tẹkẹka oru ma.

⁶⁵Ó dein nyanaḅịa gbọrị anga sọnị ofori-ẹ, mị re ọ́mịna nyọ-ẹ nwọḅẹ anga ngịsị sime ẹkẹ, Nyanaḅọ Ḅe ọ̀ mịẹḅịa ómine opu kuḅie chịẹ-chịẹ-chịẹ nyana, tọrụ se ḍikiḅịaye nyanaka na pịkị tẹmẹtaịntaịn na ḅụ simeḅịa.

⁶⁶Ọ́mịna ḍumo sịkịmamgba faḅie sọḅịa. Ḍin na enekaka na ḅụ ḅalafa ó ḅiesọ ḅeinḅịa, ọ́ pịkị sịkịmamgba fị ḍikiḅalafaḅịa.

⁶⁷Dede ḅie ḅụ, ọ́ nwọḅẹḅịa, ‘Mịn ḅọrọ saso ọkụma!’ Ọ́ pịkị saso ḅiriḅụ nwọḅẹḅịa, ‘Mịn ḅọrọ dede ọkụma!’ Pịkị ómine ọrịye ọrịye ọ́ ḅalafamaḅịa.

⁶⁸Nyanaḅọ Ḅe ori onwoin arụ ma ḅie ó se pịkịma Ijipt fịrịmaḅịa, ọ́ ḅarị anịju mun-ẹkẹ ọ̀ nwọ ḅẹmẹ ḅẹsọnị. Anịju ḅụ ómine ọ́ ḅụ se omoniapụ mịẹse ómine na tarakapụma dẹrịḅịa, ọkụma ọ́ fẹ ḍụkụḅịaḅọ ofori-ẹ.”