Read kirikeni Maịnkarama Oloko 29 Bible Online

Maịnkarama Oloko 29 - kirikeni bible

Maịnkarama Oloko 29

¹Ma anị Nyanaḅọ Ḅe tọn Moziz ḅe pịrị na ori Izrẹlapụma na fị nwọḅẹ ọḅọkụ mị-ẹ Moab ama mị ḅie; anị se Saịnaị Tụndụ mị ḅụ Nyanaḅọ Ḅe ini na fịsa ọḅọkụ mị ḅụ chụaye-ẹ.

²Moziz ḅe Izrẹlapụ mamgba chịn koḅirima se nwọse ini ḅẹmẹ, “Nyanaḅọ Ḅe se Ijipt amanyanaḅọ ḅe na, oria fịrịnwẹngịapụma na, pịkị bebe oria sẹ mị mgba na mịẹye ọ́ ḅarana ọrịsam.

³Ḅalafama obi ma ómine ọrịmẹ, ḅụgbiripuma fịrịma na, pịkị opu ḅụbuama ayema na, anị Nyanaḅọ Ḅe mịẹaye ma.

⁴Ọkụma ọkịḅo mịmgba la sọnị ma Nyanaḅọ Ḅe ma ò ḅereni ọ́ pịrịkẹ ómine ọrịsa ayema ḅụ ó yekaịnḅo, anịkanịka tọrụmgbọlụ se ye ọrị anịkanịka ḅeri se ye na.

⁵Kụra mesi na gbasịye Nyanaḅọ Ḅe nwọse ó se onwun ele mị ḅie nwẹngị mẹ, ọkụma ọ́mịna ḅụchụayema na ḍiki-akpaka ma na ngịsị kankẹ.

⁶Ó fịturu fịkẹ, ọ́ pịkị ere iru anịkanịka biya ḅukẹ, ọkụma Nyanaḅọ Ḅe ọ́ ḅụpalịmaye mamgba nyana karama ọ́ pịrịmẹ, se yese ó ḍie na ori anị ọ́mịna Tamụnọ Ḅe-ẹ.

⁷Wa ḅo mịanga lasịkị Saịhọn Hẹshbọn amanyanaḅọ ḅe na Ọg, Bashan amanyanaḅọ ḅe na ḅo owu se wa pakamẹ, ọkụma wa ini nẹngịmamẹ,

⁸inia ama mị ọkị, se anị ḍie seni Rubẹnị na Gadị na furu ma pịrịmẹ, pịkị Manasẹ furo mị ḅụ gbọrị pẹkẹrẹ na.

⁹Ó kuḅie se ḅụgbana gbẹịn ḅara se mị ọḅọkụ mị ḅe ọkwẹịn mamgba nwọ koko, mịẹse ọ́ mịẹye goyegoye ómine na iḅiḅịa ọkụ.

¹⁰“Mịmgba Nyanaḅọ ọ́mịna Tamụnọ Ḅe tọrụkuḅu ọ́ chịẹ waraḅẹ—ọ́mịna tịḅịnịma na pịkị fịrịnwẹngịapụma na, ọ́mịna owuapụma na,

¹¹eremeni ma na, pịkị awọmẹnịma na, pịkị ọ́mịna ḅie anga igoniapụma na, anị chịn pẹlẹ pịkị mengi ḍu ọ́ pịrịarị apụma na.

¹²Mịanga ọ́ Nyanaḅọ ọ́mịna Tamụnọ Ḅe na ọḅọkụ fị-ẹmuaḅẹ mịmgba pịkị anịḅe mịẹmịẹaye ma daọkị-ẹmun-aḅẹ,

¹³mịẹse Nyanaḅọ Ḅe ómine oria tomoni-ẹ nwọḅẹye mị mịẹkụrọma mịmgba, pịkị ori ọ́mịna Tamụnọ-ẹ nwọḅẹye mị na, anị ọ̀ wẹrị yeḅereni ómine na pịkị ọ́mịna olomu-aḍapụ Ebraham ḅe na, Aịzịk ḅe na, pịkị Jekọb ḅe na pịrịsa ḅaraḅụ.

¹⁴Nyanaḅọ Ḅe ómine na fịarị ọḅọkụ mị na anịa mịẹmịẹaye ma na sime ómine ngẹrị pịrịkẹ.

¹⁵Ori anị se mine mgba na fịaḅẹ anị mịanga nwọ mịmgba ọ̀ tọrụkuḅu ḅụ chịẹ àrị apụma na pịkị mịna furo ḅie pakaḅoḅịa apụ mamgba na.

¹⁶“Ijipt mị ḅie ḍumo mine na sime ọkụ ó nemimẹ, wa pịkị jịn sẹma ḅie toluḅọrọarị sịkị ḅụ anị mine na sime ọkụ na.

¹⁷Ini chịn na, ḍụparị na, seleḅa na, pịkị goli na se mịẹ ḅụngụngụ ma oru ma ómine ọrịsam.

¹⁸Ómine ọrị na gbọrịḅọ sọnị, anị owuḅọ, eremeniḅọ, furo, sẹ, mine mịmgba mịanga chịẹ àrị apụma ḅie vinpịkị mun jịn-a sẹ oru ma tẹkẹkẹ. Mịn mị kuno sẹnịḅo akụ pịkị nweni ḅaaḅaa chịn kịkẹḅịa.

¹⁹Ómine ọrị na gbọrịḅọ sọnị ómine mịmgba mịanga mị ọḅọkụ mị ọkwẹịnma naa apụma ḅie somun nụḅọ kuḅie tọn nwẹngị kọnkẹ, pịkị koromama na ye ori na iḅiḅịa ori ininachịn sọnị. Anị mị ómine mgba ḅaafamaḅịa, iḅiapụ na siapụ na gbọrị fị nwọ kọnḅịa.

²⁰Ọkọ simeye mịẹḅọ ḅe Nyanaḅọ Ḅe ò siḅụ-ḅarasin ọ̀ pịrị ẹkẹ. Anịnakaraka Nyanaḅọ Ḅe oria ịganị fịnịḅẹlẹ mị anị kọrị ọ̀ dapakaḅịa, se mị ḍiri mị ḅie gịẹịn koroma ḅụḅalaḅala mamgba oria ọgọnọ gbanaḅịa, ọkịmun Nyanaḅọ Ḅe okorona okorona ọ̀ ḅaasinḅịa sịkị laḅịa.

²¹Nyanaḅọ Ḅe ò se elekima mịẹse Izrẹl sẹ mamgba pịrịḅịa, pịkị ḅụḅalaḅala se ọ̀ pịrịḅịa, mị Nyanaḅọ Ḅe ọḅọkụ ḍiri mị ḅie, ọḅọkụ mị ḅe worinime ma gịẹịn koromasa ḅaraḅụ.

²²“Ḅo ḅịa ḅụọma ḅụ ọ́mịna awọma na pịkị ḅọlọ amama ḅie ḅoḅịa igoniapụma na Nyanaḅọ Ḅe se ḅo ọ́mịna ama mị ọgọnọ gbanaḅịa ḅụḅalaḅala ma na tọrụsiọrị ma na nwọ ọrịḅịa.

²³Ozu ma àrị fịye pakụmaka ḅara se papa simeḅịa ḍụparị fịnị na, fụn na anị gbẹịnḅịa; tomoniḅọ ḍipi se pakaḅịaye ofori-ẹ, papa osuein sọnị anịju paka ẹkẹ. Ọ́mịna ama mị anị Sọdọm na Gomọra na opuamama sime ọkụ simeḅịa, anị Adma mị na Zẹboịm mị na amama, anị Nyanaḅọ Ḅe kụrọ ịganị kọn sịkị ḅụ ọ̀ fama amama.

²⁴Anịsịkị bebe tomonikiri mị mgba gbelaḅịa, ‘Nde Nyanaḅọ Ḅe gose nwọse inia ama mị mịẹye? Cheye ẹrẹchị ọ̀ nwọ sime kụrọ ịganị kọn?’

²⁵Pẹkẹrẹ ḅịpị anị, ‘Nyanaḅọ Ḅe oria tomonima na ori na fị ọḅọkụ mị ini anị kanmẹ, anị inia olomu-aḍapụma Tamụnọ Ḅe, Ijipt mị ḅie ini ọkịpakụmaḅo sịkịḅụ.

²⁶Ini jịn-a oru ma tẹkẹmẹ, pịkị fịrịnwẹngị àrị pịrịmẹ anị jịn sịkị ma ini nemikaye ma, anị Nyanaḅọ Ḅe oloko chụa ini pịrị na ini tẹkẹ ma-ẹ nwọḅẹ oru ma.

²⁷Anịẹrẹchị Nyanaḅọ Ḅe oria tomonima ḅụ ori ịganị nyanamẹ, se mị ḍiri mị ḅie gịẹịn koroma ḅụḅalaḅalama aye mamgba ọkịḅo inia ama mị ọgọnọ gbanamẹ.

²⁸Nyanaḅọ Ḅe ọ̀ kụrọma ịganịmẹ, se oria opu ịganị mị ḅụ inia ama mị ḅie ori ini burasin se ini se jịn ama ḅie gbin chumẹ, anị mịmgba ini sime nyọ mị-ẹ.’

²⁹“Nyanaḅọ mịna Tamụnọ Ḅe se ḅọịma koroma aye omi-ẹ; ọkụma oria Oloko ma ọ̀ mịẹḅelemasam, mine na mịna awọma na pịkị àrị koko gbasoḅịa.”