Read kirikeni Maịnkarama Oloko 3 Bible Online

Maịnkarama Oloko 3 - kirikeni bible

Maịnkarama Oloko 3

¹“Jịnye, wa so ọgọnọju daọrụ anị Bashan pẹkẹrẹ mị mun mẹ, se Ọg, Bashan Amanyanaḅọ ḅe oria tomonima na ḅo mine na ọmụgbinmẹ Edreị ama mị na kpeki nyọ ḅụ.

²Ọkụma Nyanaḅọ Ḅe nwọse ị̀ ḅẹmẹ, ‘Ò ḍikiḅalafama. Àrị ori na, oria tomonima na, pịkị oria sẹ mị mgba nwọse ị́ pịrịḅịa. Ị́ se Saịhọn Amọraị amanyanaḅọ Hẹshbọn mị ḅie ḅẹrẹtọn simeḅọ ḅe mịẹ ọkụ nwọse ọ̀ mịẹ.’

³“Anịẹrẹchị Nyanaḅọ Ḅe Amanyanaḅọ Ọg ḅe na oria tomonima na nwọse wa pịrị se wa inimgba ḅaafamamẹ.

⁴Anị gbọrị sịkị mị ḅụ wa oria ama mamgba ọkịmẹ—arịaḅụ wa ọkị kọnma gbọrị ama sọnị ofori-ẹ. Arịmgba ama tesi wa nwọ ọkịmẹ—bebe Agọb sẹ mị mgba, anị amanyana Ọg Beshanḅọ ḅe ḅẹrẹtọn sime nyọ mị.

⁵Ma ama mamgba ini gele onu se àrị gbori kelemamẹ, oria onu ḅọkọ ma na, se onu ḅọkọ ma ịkasịḅịa mgbẹsẹ ikulele àrị nwọ nyanamẹ, pịkị onu nyanaka tọn-a kala ama sọnị omi-ẹ.

⁶Wa ama mamgba kanmẹ, se owuapụma na, eremeni ma na pịkị awọmẹnịma na ḅaasinmẹ, anị Saịhọn Hẹshbọn amanyanaḅọ ḅe amama ḅie wa mịẹ ọkụ-ẹ.

⁷Wa namama ọkị se amama kan kọsịmamẹ.

⁸“Anịsịkị mị ḅụ wa ini mama Amọraị amanyanapụma ḅara Jọdan Tọrụ mị ḅụ ịrụapakapaka nyọ daọrụ mị ḅụ sime ama mị ọkịmẹ, Anọn Tọrụ mị ḅụ sakịmun Hamọn Tụndụ mị la.

⁹(Saịdọn apụma nwọse Hamọn Tụndụ mị chịnmẹ Siriọn, ọkụma Amọraị apụma nwọse anị chịnmẹ Sina.)

¹⁰Ọg, Bashan Amanyanaḅọ ḅe sẹ mị mgba wa ọkịmẹ: tịḅị ọgọnọ finjima tụndụ mị ọgọnọ ḅụ sime opuamama na, Giledị na Bashan na sẹma na, pịkị ịrụapakapaka nyọ daọrụ mị ḅụ ọkịmun Saleka mị na Edreị mị na la.”

¹¹(Amanyanaḅọ Ọg ḅe anị Rifeim apụma inia kuluma amanyanaḅọ-ẹ. Oria ḍụẹịn igbe mị ikulele ini nwọse anị mịẹmẹ, anịa ịsụn mị inein-a kuḅu-ẹ, finji mị mama kuḅu na pẹkẹrẹ na-ẹ, ini se anịsịkị yetọn ḅaraḅụ. Mịọkụ sọnị Raba Amọn apụ opuama mị ḅie anị pa omi-ẹ.)

¹²“Wa ama mị ọkị nyana sịkị, Rubẹnị na Gadị na sẹ apụma Aroa ama mị ọgọnọju daọrụ mị Anọn Tọrụ mị na kpeki nyọ mị na pịkị Giledị chịngị ọgọnọ sẹ mị ḅụ pẹkẹrẹ na, pịkị anịa amama na, à se ini pịrịmẹ.

¹³Manasẹ sẹ mị ḅụ gbọrị pẹkẹrẹ, Giledị mị ḅụ kọn nyọ mị na pịkị Bashan mị mgba na, Ọg ḅe ḅẹrẹtọn sime nyọ mị, anị bebe Agọb sẹ mị mgba à se ini pịrịmẹ.” (Bashan mị tatarị ḅụ Rifeim apụ ama ini nwọse anị nemimẹ.

¹⁴Jea, Manasẹ sẹḅọ ḅe, bebe Agọb pẹkẹrẹ mị mgba nwọ ọkịmẹ, anị Bashan mị-ẹ, ọkịmun Gẹshọ mị na Meaka mị na eke mị la. Kala amama ò seni ọ̀ ḅụ korumẹ, anịẹrẹchị mịọkụ sọnị Jea kala ama anị ini se pa àrị chịn arịye-ẹ.)

¹⁵“Giledị mị à se Meka Manasẹ sẹḅọ ḅe pịrịmẹ.

¹⁶Giledị mị ḅụ ọkịmun Anọn Tọrụ mị la à se Rubẹnị na Gadị na sẹma pịrịmẹ. Tọrụ mị ḅụ ogboku mị anị inia chuku daọrụ mị eke mị-ẹ, se ọgọnọju daọrụ mị anịa eke anị Jabọk Tọrụ mị ḅụ gbọrị pẹkẹrẹ eke mị-ẹ Amọn apụma pịrịmẹ.

¹⁷Ịrụasọsọ nyọ daọrụ mị ḅụ inia pẹkẹrẹ mị wasama mun Jọdan Tọrụ mị lamẹ, Galili Ḍapa ọgọnọju daọrụ mị ḅụ ọkịmun Fị Tọrụ mị chuku daọrụ la pịkị somun Pisga Tụndụ mị chuku ịrụapakapaka nyọ daọrụ lamẹ.

¹⁸“Anị gbọrị sịkị ḅụ, à ma ma tọn ini pịrịmẹ: ‘Nyanaḅọ mịna Tamụnọ Ḅe mịn ama mị se ọ́ pịrịmẹ Jọdan mị ḅụ ịrụapakapaka nyọ daọrụ mị, ómine anị ọkị angaḅịa ẹrẹchị. Mịọkụ ọ́mịna owunima ọ́ nwọ karakarama se ini fịrịma ini Jọdan mị saḅa se ini tatarị ísí Izrẹl sẹma tọrọkọda, ḅarachụa ini pịrị se ini inia amama ọkị angaḅịa ọkụ.

¹⁹Ọ́mịna erema na, awọmẹnịma na, pịkị namama na kẹngẹ mị à se ọ́ pịrị ama mị ḅie simeḅịaye-ẹ—à nemimẹ na ọ́ tọn-a nama nyanamẹ.

²⁰Ọ́ ḅarachụa ọ́mịna juo Izrẹlapụma pịrị se ini sọnị mun Nyanaḅọ Ḅe se ini pịrịarị ama mị ọkị, Jọdan mị ḅụ ịrụasọsọ nyọ mị se Nyanaḅọ Ḅe deinma seni ini pịrị se ini anịa ḅie anga sịkị la, anị ọ̀ mịẹ ọ́ pịrịsa ọkụ mị. Anị ḅọrọsosa ḅẹḅẹ ómine ineda vinpịkị mị à se ọ́ pịrị ama mị ḅoḅịa.’

²¹“Anịsịkị à nwọse Jọsụwa ḅe ḅẹmẹ: ‘Ị́ Nyana Tamụnọ Ḅe se ini mama amanyana apụma mịẹye ị́ ọrịsam, Saịhọn ḅe na Ọg ḅe na; ómine owu se paka amanyanaḅọ goyegoye gbọrị ḅara mị ó se nụḅọ mịẹḅịa ọkụ-ẹ.

²²Ini ḍikiḅalafama, anịatịḅị ị́ Nyana Tamụnọ Ḅe owu mị sọ ị́ pịrịḅịa.’

²³“Anịsịkị mị ḅụ à tẹmẹ laḅara se tẹkẹmẹ,

²⁴‘Yei Kụrọmamgba Nyana Tamụnọ, à nemimẹ na ị́ mịẹḅịa opu ḅụgbiripuma ayema ḅe sakị mị kẹngẹ mị ị́ se ị̀ ḍiesaye-ẹ. So mị ḅie na sẹkiri ḅie na ị́ nwẹngị opu kụrọ fịrịma ineda nwọ nwẹngịḅịa oru ngịsị ofori-ẹ!

²⁵Nyanaḅọ, ye à pa Jọdan Tọrụ mị saḅakoro, se tọrụ seni ísí pẹkẹrẹ ḅụ lọkọlọkọ fịye pakụma amakiri mị ọkị, anị ḍikitọrụgbẹịn chịngị ọgọnọ sẹ mị na pịkị Lẹbanọn Tụndụ ma na.

²⁶“Ọkụma ọ́mịna tịḅị gose Nyanaḅọ Ḅe ori ịganị nyanamẹ ị̀ ḅụ, anịẹrẹchị ngịsị ori ị̀ poki ḍụkụkẹ. Anịnakaraka, ọ̀ nwọse ị̀ ḅẹmẹ, ‘Iḅisam! Mịn mị ngịsị ḅarị ḅịpị se anị gbolomama!

²⁷Tanjị mun Pisga Tụndụ mị ḅịpị okolo la se ọgọnọju daọrụ mị na, chuku daọrụ mị na, ịrụapakapaka nyọ daọrụ mị na ịrụasọsọ nyọ mị na nwọ ḍiki. Ị́ ọrịye goyegoye iḅiọkụ kweinma anị ḍiki, anịatịḅị Jọdan mị ngịsị ị́ saḅa mun la-ẹkẹ.

²⁸Jọsụwa ḅe ọ̀ mịẹḅịaye nwọ ḍuko ọ̀ pịrị, se ò kuḅie kụrọma pịkị ịnyọ se ọ̀ pịrị, anịatịḅị ori tịḅịda tomonima pịrị ini se saḅamun ị́ nwọ ọrị ama mị ọkị se angaḅịa.’

²⁹“Anịẹrẹchị pẹsịkiri mị ḅie wa simemẹ Bẹt Piọ ama mị saḅamanga ḅụ.”