Read kirikeni Maịnkarama Oloko 30 Bible Online

Maịnkarama Oloko 30 - kirikeni bible

Maịnkarama Oloko 30

¹Moziz ḅe pịkị ḍuko Izrẹlapụma pịrịmẹ: “Ḅẹlẹma na worinime na à nwọse ọ́ tọrọkọ koromasam mịọkụ ómine ọ́ ḅụḅẹlẹye sẹlẹọkị. Nyanaḅọ ọ́mịna Tamụnọ Ḅe ọ́ galagalama sẹịn se ómine angaḅịa sẹma ḅie ḅụ maye mamgba ọ́ ḅụ pakasa ḅẹḅẹ, anịsịkị mị à se koroma ọ́ pịrịarị ayema ḅụ ọ́ sẹlẹọkịye mị ọ́ nwọse ḅiekoromaḅịaye-ẹ.

²Nemikase ómine na ọ́mịna awọma na vinpịkị Nyanaḅọ Ḅe ḍọkịmaḅo se ọ́mịna kuḅie mgba se oria olokoma kokomẹ ḅẹḅẹ, anị mịmgba à chụa ọ́ pịrịarịye ma,

³anịsịkị Nyanaḅọ ọ́mịna Tamụnọ Ḅe ò ḍikiḅụgerere nyana ọ́ pịrịḅịa. Ori ọ́ galagalama mun koroma sẹma ḅie ḅụ ori ómine ọkị pakụmaḅoḅịa, ọ̀ pịkị ọ́ mịẹse ọ́ lọkọlọkọḅịa.

⁴Ọ́ ḅọrọ galagala mun sẹkiri mị ḅie ḅọlọtẹịn iri ma lamẹ ḅẹ sọnị Nyanaḅọ ọ́mịna Tamụnọ Ḅe ori ómine koḅiri pịkịmaḅoḅịa,

⁵mịẹse ọ́ vinpịkị mun ọ́mịna olomu-aḍapụma anga ḅọrọsa ama mị ọkị angaḅịa ọkụ. Ori ọ́ mịẹse ọ́ lọkọlọkọtẹịn pịkị sutẹịn ọ́mịna olomu-aḍapụma nẹngịḅịa.

⁶Nyanaḅọ ọ́mịna Tamụnọ Ḅe ḅịpịpoki kuḅiemgbọlụ ọ́ nwọse ómine na ọ́mịna awọma na pịrịḅịa, mịẹse ọ́mịna kuḅie mgba na ọ́ tẹmẹ mgba na se ọ̀ ḅẹlẹmaḅịa ọkụ, mịẹsosịkị ama mị ḅie ómine anga mamunḅịa ọkụ.

⁷Ma worinime mamgba ori àrị pịkị ómine na tarakapụma daḅịa, anị ó ḍikiḅieḅu pịkị ómine pụndarị apụma,

⁸se ọ́ pịkịna ọ̀ ḅịpịpoki pịkị oria olokoma kokoḅịa, anị mịmgba à chụa ọ́ pịrịarị ayema.

⁹Nyanaḅọ Ḅe ori ọ́ mịẹse ọ́ lọkọlọkọḅịa ọ́mịna mịẹaye mamgba ḅụ; ọ́ tọn-a awọ nyanaḅịa pịkị tọn-a nama na, ọ́mịna ozuma pịkị ḅakama fịaye pakụmaḅịa. Ọ̀ mịẹse ọ́ lọkọlọkọ mị ò ḅieḅẹlẹmaḅịa anị ori ọ́mịna olomu-aḍapụma mịẹ lọkọlọkọ ḅi ḅara mị,

¹⁰ọkụma ómine ọ̀ ḅịpịpoki pịkị oria olokoma kokoḅịa anị mị oria yeḍie ḍiri mị ḅie gịẹịn koroma ayema. Ómine ó kuḅie mgba na tẹmẹ mgba na se vinpịkị Nyanaḅọ ọ́mịna Tamụnọ Ḅe ḍọkịmaḅo.”

¹¹Moziz ḅe pịkị ḍuko Izrẹlapụma pịrịmẹ: “Mịmgba à chụa ọ́ pịrịarị oloko mị opuma ḅụfụkamakẹ anịkanịka ómine ineda mịẹ ẹka ḅara sime kẹ.

¹²Soḅie anị ofori-ẹ. Ó gbela ẹkẹ, ‘Tụḅọ ḅọrọ iwo mun anị ọkị koromaḅo wa pịrịḅe; mịẹse wa naa se anị kokoḅịa ọkụ?’

¹³Anịkanịka abaji mị ḅụ ísí pẹkẹrẹ anị omi-ẹ. Ó gbela ẹkẹ, ‘Tụḅọ mun abaji mị saḅakoro se anị ọkịḅo wa pịrịḅe; mịẹse wa anị naa se anị fieye mị mịẹḅịa ọkụ?’

¹⁴Ẹn-ẹn, anị mịanga ómine na omi-ẹ. Ómine anị nemimẹ, pịkị ineda anị sime anga goḅịa, anịẹrẹchị mịọkụ ómine anị koko.”

¹⁵Moziz ḅe pịkị ḍuko Izrẹlapụma pịrịmẹ: “Mịmgba ọ́ sẹlẹọkịḅịaye à nwọ ḍuko ọ́ pịrịaḅẹ, iḅi na si na ḅụ, ḍumo na fị na ḅụ.

¹⁶Ó nemikase Nyanaḅọ ọ́mịna Tamụnọ Ḅe olokoma kokomẹ ḅẹḅẹ, anị mịmgba à chụa ọ́ pịrị ayema, ómine ọ̀ ḅẹlẹma, ọ̀ ḅịpịpoki, se oria oloko mamgba kokomẹ ḅẹḅẹ, anịọkụma ọ́ lọkọlọkọ pịkị ḅakama tomoni nyana sẹ nwọ sọḅịa. Nyanaḅọ ọ́mịna Tamụnọ Ḅe ọ̀ ḅẹlẹmaḅịa ó mun ọkị anga-ẹmun-arị ama mị ḅie.

¹⁷Ọkụma ó nemikase ḅịpịpokikẹ pịkị ḍukoye na ka, se mun jịn-a oru ma tẹkẹmẹ ḅẹḅẹ,

¹⁸mịọkụ àrị ó ḅerijine aḅẹ na ọ́ fịfamaḅịa. Jọdan mị ọ́ nwọ saḅamun la se ọkị anga-ẹmun-arị ama mị ḅie ómine anga ḅọlọsịkị la-ẹkẹ.

¹⁹Ḍumo na fị na ḅụ ọ́ sẹlẹọkịḅịaye à nwọse koroma ọ́ pịrịaḅẹ, Tamụnọ Ḅe ḅẹlẹma mị na pịkị worinime mị na ḅụ, à pịkị so mị na kiri mị na chịnmẹ na àrị onyechịẹ ọ́ sẹlẹọkịḅịaye mị pịrị mịmgba. Ó ḍumo mị sẹlẹọkị mịẹse ómine na ọ́mịna awọma na ḍumoḅịa ọkụ.

²⁰Nyanaḅọ ọ́mịna Tamụnọ Ḅe ọ́ nwọ ḅẹlẹma, ọ́ ḅịpịpoki se kuḅie se ḅụgbana gbẹịn apụ sọ ọ̀ pịrị, anịsịkị ómine na ọ́mịna awọma na ó ḍumo ḅọlọsịkị laḅịa anị ò ḅereni ọ́mịna olomu-aḍapụma Ebraham ḅe na, Aịzịk ḅe na, pịkị Jekọb ḅe na pịrị ama mị ḅie.”