Read kirikeni Maịnkarama Oloko 34 Bible Online

Maịnkarama Oloko 34 - kirikeni bible

Maịnkarama Oloko 34

¹Moziz ḅe Moab mị ḅe sẹrẹrẹ nyọ ḅụ ori iwo Nebo Tụndụ mị tanjị mẹ, Jẹriko ḅụ ịrụapakapaka nyọ daọrụ ḅụ mun Pisga Tụndụ mị ḅịpị okolo lamẹ, se anịnyọ ḅụ Nyanaḅọ Ḅe bebe ama mị mgba seni ò ḍiemẹ: Giledị nyọ mị ḅụ ọkịmun Danị ama mị ḅụ ọgọnọju la;

²Naftalaị pẹkẹrẹ mị mgba; Ifrem pẹkẹrẹ na Manasẹ pẹkẹrẹ mị na; Juda pẹkẹrẹ mị na ọkịmun Mẹditirenia Mengi mị Tọrụ ḅụ ịrụasọsọ nyọ daọrụ la;

³Juda ḅụ chuku daọrụ mị; pịkịna Zoa ḅụ mun Jẹriko ḅụ sẹrẹrẹ nyọ mị la, anị enemi kọrọ opuama mị.

⁴Anịeso Nyanaḅọ Ḅe nwọse Moziz ḅe ḅẹmẹ, “Mịn anị à ḅereni na à seni Ebraham ḅe na Aịzịk ḅe na Jekọb ḅe na furo ḅie awọma pịrịḅịa nwọḅẹ amakiri mị-ẹ. À ḅereni ị́ pịrịmẹ na ị́ anị ọrị, ọkụma à ḅereni ị́ pịrị ẹkẹ ị́ anịju mun.”

⁵Anịḅụ Moziz, Nyanaḅọ Ḅe oria fịrịnwẹngịḅọ ḅe anịju, Moab ama mị ḅie ḅụ fịmẹ, anị Nyanaḅọ Ḅe ḍuko na ọ̀ mịẹḅịa ḅẹ ḅara mị.

⁶Nyanaḅọ Ḅe, Moab ḅie sime gbọrị pẹsịkiri ḅie ò ḍipimẹ Bẹt Piọ ama mị na ḍikia-ḍikia nyọ ḅụ, ọkụma ḅo mịmgba la sọnị, oria ḍipi nyọ mị nemi gbọrịḅọ sọnị ofori-ẹ.

⁷Moziz ḅe kụra sonioasi ọ̀ nwọ lase ọ̀ fịmẹ; ọ̀ kụrọ kpoinkpoinmẹ, ọ̀ tọrụmgbọlụma sọ pa gịọngịọn waraḅẹ.

⁸Izrẹlapụma ḍin soi ini nwọse kururu ọ̀ pịrịmẹ Moab sẹrẹrẹ kiri mị ḅụ, anịsịkị re owu na ngịrị na ḅo kuluma mẹ.

⁹Jọsụwa Nọn yaḅe, nemi ori na ḅeinmẹ, anịatịḅị Moziz ḅe ọ̀ tọn se oria kiri ḍinmasam. Izrẹlapụma Jọsụwa ḅe ḅịpị ini pokimẹ pịkịna Nyanaḅọ Ḅe Moziz ḅe ḅụ ḅọrọ chụa ini pịrị olokoma kokomẹ.

¹⁰Izrẹl mị ḅie ḅụ Moziz ḅe na kịkịna ịkịankoroḅọ ngịsị ma pakaḅokẹ; Nyanaḅọ Ḅe tọrụ se ori na dama ọkwẹịnmẹ.

¹¹Jịn ịkịankoroḅọ ma ọkọ sime ḅụgbiripumaye na ḅụbuamaye na mịẹkẹ anị Nyanaḅọ Ḅe Moziz ḅe fịrịma se ò se Ijipt amanyanaḅọ ḅe na, oria fịrịnwẹngịapụma na, pịkị bebe sẹ mị mgba na mịẹaye ma kịkẹ aye.

¹²Moziz ḅe Izrẹlapụ mamgba ogboku ḅụ nwẹngịsa opu fịrịma na pịkị ḅalafamaye ma na mịẹsa gbọrị ịkịankoroḅọ sọnị ofori-ẹ.