Read kirikeni Maịnkarama Oloko 6 Bible Online

Maịnkarama Oloko 6 - kirikeni bible

Maịnkarama Oloko 6

¹“Ma anị Nyanaḅọ ọ́mịna Tamụnọ Ḅe tọn ị̀ pịrị na à se ó telima nwọḅẹ oloko mamgba-ẹ. Ómine àrị koko ó mun sọ ọkị anga-ẹmun-arị ama mị ḅie.

²Ó ḍumo la-ene la-ene, ómine na ọ́mịna awọma na Nyanaḅọ ọ́mịna Tamụnọ Ḅe ọ́ nwọ osi pịkị oria olokoma kokoḅịa anị mịọkụ à se ọ́ pịrịarịaye ma mịẹse ómine anị ama mị ḅie anga ḅọlọḅịa ọkụ.

³Ómine àrị poki, Izrẹlapụ, se pịkị àrị koko! Anịsịkị ye mamgba ómine na iḅiḅịa, ọ́ pịkịḅo opu-kụrọ-sẹ sọḅịa, se anị lọkọlọkọ fịye pakụma ama mị ḅie angaḅịa, anị Nyanaḅọ mịna olomu-aḍapụma Tamụnọ Ḅe yeḅereni wa pịrịsa ḅaraḅụ.

⁴“Izrẹl, mịn mị se ḅiekoroma! Nyanaḅọ Ḅe—pịkị Nyanaḅọ Ḅe kẹngẹ anị mịna Tamụnọ Ḅe-ẹ.

⁵Ị́ kuḅie mgba na, ị́ tẹmẹ mgba na, pịkị ị́ya ịnyọ mgba na nwọse ị́ Nyana Tamụnọ Ḅe ḅẹlẹma.

⁶Mịmgba à nwọse ọ́ pịrịarị olokoma ó se ḅieḅaramama.

⁷Ómine àrị se ọ́mịna awọma telima. Ómine ama sime sịkị na pịkị ó yemun sịkị na ómine àrị go, ómine ịnyọsara àrị sịkị na pịkị ọ́ fịrịnwẹngịarị sịkị sọnị.

⁸Ómine àrị se ọ́ ḅarama ḅụ kpọ, ọ́ pịkị àrị se ọ́ fụḅara ogbo oḅolo koroma se yese ḅiekoroma ḅụ.

⁹Ómine àrị se ọ́mịna warị ḅọkọ ma ḅụ gịẹịn pịkị ọ́mịna nụngọ ḅọkọ ma ḅụ na.” Moziz ḅe pịkị ḍuko Izrẹlapụma pịrịmẹ:

¹⁰“Nyanaḅọ ọ́mịna Tamụnọ Ḅe yeḅereni ọ́mịna olomu-aḍapụ Ebraham ḅe na, Aịzịk ḅe na, pịkị Jekọb ḅe na pịrịmẹ na opuma ḍụḅa lọkọlọkọ ḅụ sime opuamama ọ̀ nwọse ọ́ pịrịḅịa nwọḅẹ ḅaraḅụ, anị ómine pakụmaka amama.

¹¹Warị ma ḅie iḅiaye ḅeinḅịa, ómine se arịa ḅie koromaka aye, ómine sokuka tiḅe ma na, warị anga ozuma na, oliv ozuma na anị ómine ḍipika ayema sime ọ́ pịrịḅịa. Nyanaḅọ Ḅe ómine ọkịḅo mị ama mị ḅie chusịkị se ọ́ fịḅịa aye mamgba ọ́ nwọ nyanamẹ ḅẹḅẹ,

¹²ómine ọrị na Nyanaḅọ Ḅe Ijipt mị ḅie ọ́ ḍụapakụmaḅo ḅọ ḅe ómine ó se ḅieḅaramakẹ, anị ómine omoniapụ sọ sime nyọ mị.

¹³Nyanaḅọ ọ́mịna Tamụnọ Ḅe ómine ò ḍikiḅalafa, ori kẹngẹ nwọ tẹkẹ, pịkị oria ẹrẹ ḅụ kẹngẹ chịẹ sime yeḅereni.

¹⁴Ó jịn-a oru tẹkẹma, nwọ ó gbori kelema apụma oru ma ḅụ gbọrịye sọnị ọ́ tẹkẹma.

¹⁵Ó nemikase oru tẹkẹmẹ ḅẹḅẹ, Nyanaḅọ Ḅe ọ́mịna ḅụ ori ịganị nyanaḅịa se fịnị ye sima ḅara se ọ́ ḅaasinḅịa, anịatịḅị Nyanaḅọ ọ́mịna Tamụnọ Ḅe ori inema nyana orina pikiaye pịrịpịrịkẹ.

¹⁶“Ómine ọ̀ ḍaḍikima Nyanaḅọ ọ́mịna Tamụnọ Ḅe, anị Masa mị ḅụ ọ́ mịẹ ọkụ mị.

¹⁷Ọ́ ḍọkịḅo ọrị na ọ̀ chụa ọ́ pịrị oloko mamgba ọ́ nwọ kokomẹ.

¹⁸Nyanaḅọ Ḅe ḅi iḅimẹ pịkị karakaramẹ nwọḅẹye mị ọ́ nwọ mịẹ, ye mamgba pịkị ómine na iḅiḅịa. Anịsịkị Nyanaḅọ Ḅe ḅereni ọ́mịna olomu-aḍapụma pịrị fịye pakụma amakiri mị ómine ineda anị ọkị nyanaḅịa,

¹⁹ọ́ pịkị ómine na tarakapụma depakụmaḅịa, ò yeḅerenisa ḅaraḅụ.

²⁰“Tọrọkọju ọ́mịna awọma ini ó gbelaḅịa, ‘Cheye ẹrẹchị Nyanaḅọ mịna Tamụnọ Ḅe tọn wa pịrị na wa ma oloko mamgba koko?’

²¹Anịsịkị ó ḍuko ini pịrị, ‘Wa omoniapụ sọ se Ijipt amanyanaḅọ ḅe pịrị simemẹ, se Nyanaḅọ Ḅe oria opu kụrọ mị se wa ḍụapakụma ḅomẹ.

²²Wa mịna tọrụmgbọlụma se ọ̀ nwẹngị ḅụgbiripuma pịkị ḅalafama fịrịma ọrịmẹ Ijipt apụma inia amanyanaḅọ ḅe na pịkị oria fịrịtịḅịnị ma na ḅụ.

²³Ori Ijipt mị ḅie wa ọkị pakụma mịanga ḅo se mị ama mị se wa pịrịmẹ, ò yeḅereni mịna olomu-aḍapụma pịrịsa ḅaraḅụ ọ̀ mịẹḅịa ḅẹye mị.

²⁴Anịsịkị Nyanaḅọ mịna Tamụnọ Ḅe tọn wa pịrịmẹ na wa ma oloko mamgba koko se pịkị osi nyana ọ̀ pịrị. Wa nemikase ọkọ mịẹmẹ ḅẹḅẹ, sịkịmamgba mịna sẹ mị ori anị ḍikiḍiki pịkị mịẹse anị lọkọlọkọḅịa.

²⁵Anịẹrẹchị, wa nemikase kuḅie se ḅụgbana gbẹịn ḅara se Tamụnọ Ḅe chụa wa pịrị oloko goyegoye nwọ kokomẹ ḅẹḅẹ, ọ̀ wa ḍikiḅieḅẹlẹḅịa.’ ”