Read kirikeni Maịnkarama Oloko 7 Bible Online

Maịnkarama Oloko 7 - kirikeni bible

Maịnkarama Oloko 7

¹Moziz ḅe pịkị ḍuko Izrẹlapụma pịrịmẹ: “Nyanaḅọ ọ́mịna Tamụnọ Ḅe ori ómine ọkịḅo ó mun ọkị anga-ẹmun-arị ama mị ḅie chuḅịa, se anịa ḅie tọn-a sẹ ọ̀ nwọ depakụmaḅịa. Ọ́ nwẹngị sọmun-arị sịkị, sọnọma sẹ, ḍụḅa pịkị kụrọ ọ́ nẹngịaye ọ̀ nwọ depakụmaḅịa: Hitaị apụma na, Gagashaị apụma na, Amọraị apụma na, Kenan apụma na, Pẹrizaị apụma na, Hivaị apụma na, pịkị Jebus apụma na.

²Nyanaḅọ ọ́mịna Tamụnọ Ḅe mịna apụ mamgba se ọ́mịna kụrọ chukuḅie koroma se ini nẹngịmasa ḅẹḅẹ, inimgba ómine ini ḅaafama. Ómine ini na ḅịpịogbosọ nyanama, ọ́ pịkị ini ḍikitịḅịfoinma.

³Iniaḅụ gbọrịḅọ sọnị ómine ọkị simema, ọ́ pịkị ḅereni ọ́mịna awọma pịrị se ini iniaḅụ gbọrịḅọ sọnị sime,

⁴anịatịḅị ini ọ́mịna awọma dairimaḅịa Nyanaḅọ Ḅe ḅụ, se mun jịn-a oru tẹkẹḅịa. Anị ọkọ pakamẹ ḅẹḅẹ, Nyanaḅọ Ḅe ori ọ́mịna ḅụ ịganị nyana se pịkị ọ́ ḅaasinḅịa anị gbọrị sịkịḅụ.

⁵Anịẹrẹchị, inia agbamịẹ ẹbẹ ma ọ́ kansara, ini pike chịẹma se tẹkẹ àrị osi nyana ḍụparịma ọ́ ḅaakọsịma, inia eremeni oru Ashera lụgụ ma tọrụ ma ọ́ pẹlẹ gbin, pịkị inia oru mamgba ọ́ dọkịmasin.

⁶Ómine ọkọ mịẹ anịatịḅị ó sime Nyanaḅọ ọ́mịna Tamụnọ Ḅe pịrịmẹ. Bebe sẹkiri mị ḅie sime sẹsẹ mamgba ogboku, ori ọ́ sẹlẹ ọkị se oria jokoma tomoni nwọ mịẹmẹ.

⁷“Nyanaḅọ Ḅe, ómine ḅakatẹịn ísí apụma nẹngịmẹ nwọḅẹye ẹrẹchị ori ọ́ ḅẹlẹma se ọ́ sẹlẹ ọkịkẹ; bebe sẹkiri mị ḅie mgba ómine anị bokatẹịn apụ-ẹ.

⁸Ọkụma Nyanaḅọ Ḅe ori ọ́ ḅẹlẹmamẹ, ọ̀ pịkị ḅimẹ ò ḅereni ọ́mịna olomu-aḍapụma pịrịye mị ọ̀ nwọ mịẹ ḅeinma. Anịẹrẹchị ori oria opu kụrọ ḅụ ómine omoniapụ sọ Ijipt amanyanaḅọ ḅe pịrị sịkị ori ómine ḍụapakụmamẹ.

⁹Ó se ḅiekoroma na Nyanaḅọ ọ́mịna Tamụnọ Ḅe kẹngẹ anị Tamụnọ Ḅe-ẹ, pịkị kuḅie se ọ̀ ḅụgbana gbẹịnmẹ. Oria ọḅọkụ mị ọ̀ nwọ koko pịkị oria simegbaso ḅẹlẹma mị ḍiepakụma mun ḅụọ-a ẹndẹ ẹndẹ nwọ laḅịa, anị ọ̀ ḅẹlẹma se oria olokoma koko apụ ma-ẹ,

¹⁰ọkụma taraka se ọ̀ wẹrịma apụma fomuḅara se ini pịrị ḅụ ọ̀ dachịẹma nyana-ẹkẹ.

¹¹Anịẹrẹchị, mịọkụ à se ómine telimasaye mamgba ọ́ nwọ koko; mịmgba à chụa ọ́ pịrịsa oloko mamgba ó koko.” Moziz ḅe pịkị ḍuko Izrẹlapụma pịrịmẹ:

¹²“Ó nemikase ma olokoma poki se kuḅie se ḅụgbana gbẹịn ḅara se àrị kokomẹ ḅẹḅẹ, Nyanaḅọ ọ́mịna Tamụnọ Ḅe ómine na fị ọḅọkụ mị ori anị koko gbaso pịkị ọ́mịna ḅụ oria simegbaso ḅẹlẹma mị ḍiepakụmaḅịa, ò ḅereni ọ́mịna olomu-aḍapụma pịrịsa ḅaraḅụ.

¹³Ori ọ́ ḅẹlẹma pịkị ḅẹlẹma se ọ́ pịrịḅịa, mịẹsosịkị ó suḅịa ọkụ kịẹnḅịpị ḅụ, ọ́ pịkị tọn-a awọ yiḅịa; ori ọ́mịna ozuma ḅẹlẹmaḅịa se ómine ịpịamgba na ere iru na, pịkị oliv pulo na nyanaḅịa; ọ̀ pịkị ọ́ ḅẹlẹma se tọn-a nambulo na anana na se ọ́ pịrịḅịa. Ọ̀ ma ḅẹlẹma mamgba se ọ́ pịrịḅịa ò ḅereni ọ́mịna olomu-aḍapụma pịrị na ò se ọ́ pịrịḅịa nwọḅẹ ama mị ḅie.

¹⁴Tomonikiri mị mgba ọ́mịna ḅẹlẹma ḅaka la-ọkụ la ḅẹlẹma nyanaḅịa apụ ofori-ẹ. Ọ́mịna ḅie anịkanịka ọ́mịna namama ḅie yi ẹka wu ofori-ẹ.

¹⁵Nyanaḅọ Ḅe ọ́mịna ḅụ obi mamgba ò dekisinḅịa, ọ̀ pịkị ḅereni ẹkẹ Ijipt mị ḅie ó nemisa si obi ma ḅụ gbọrịye sọnị ọ́ sarama, ọkụma ori àrị seni ómine na taraka apụ mamgba ọgọnọ gbanaḅịa.

¹⁶Nyanaḅọ ọ́mịna Tamụnọ Ḅe se ọ́mịna ḅara dẹrịsa sẹ mamgba ọ́ ḅaafama, ó ḍikitịḅịfoin nyana ini pịrịma. Inia oru ma ómine àrị tẹkẹma, anịatịḅị anị opu fa ọkịḅo ọ́ pịrịḅịa.

¹⁷“Ngịsị ọ́ ḅẹ ma na mịna apụma ini ḅaka ọ́ nẹngịmẹ anịẹrẹchị ómine ineda ini depakụma ẹkẹ.

¹⁸Ómine ini ḍikiḅalafama; Nyanaḅọ ọ́mịna Tamụnọ Ḅe se Ijipt amanyanaḅọ ḅe na oria tomonima na mịẹye mị ọ́ nwọse ḅiekoroma.

¹⁹Ómine ḅarana ọ́ tọrụmgbọlụma se ọrị ḅalafama si obi ma na, ḅụgbiripuma pịkị ḅụbuama ayema na, pịkị Nyanaḅọ ọ́mịna Tamụnọ Ḅe opu kụrọ na ịnyọ na se ọ́ pọkọ pakụmaḅo ọkụ mị na ọ́ nwọse ḅiekoroma. Ọ̀ nwọ Ijipt apụma ḅaasin ọkụ mị anị ọ̀ pịkị mịọkụ ó ḍikiḅalafarị apụ mamgba ḅaasinḅịa ọkụ mị-ẹ.

²⁰Ọ̀ bẹkẹma ḅalafa se inia ḅie chuḅịa, ọ̀ pịkịna mangị so mun ḅọị apụma ḅaaḅịa.

²¹Anịẹrẹchị mịnapụma ómine ini ḍikiḅalafama. Nyanaḅọ ọ́mịna Tamụnọ Ḅe ori ómine na omi-ẹ; ori opu Tamụnọ-ẹ, tomoniḅọ ḍikiḅalafaḅịa ḅọ-ẹ.

²²Kelekelema ọ̀ mịna sẹma depakụmaḅịa ọ́ sọ mun-arị sịkị. Ómine ineda inimgba ḅaasin ẹkẹ gbọrị kirikiri, ó nemikase ọkọ mịẹ ọkụma, piri ḅie owoi-a namama arịa kịẹnḅịpị suḅịa se àrịḅo ọ́mịna ḅalafamaye sọḅịa.

²³Nyanaḅọ Ḅe ori ómine na taraka apụma ḅọrọma ọ́ pịrịḅịa, se bẹkẹma ḅalafa se inia ḅie chu ọkịmun ómine ini ḅaafama sịkị laḅịa.

²⁴Ori inia amanyanapụma se ọ́mịna ḅara dẹrịḅịa. Se ómine ini ḅaaḅịa se tomoni ini seni ḅieḅaramaḅịa. Ineda ómine dachịẹmaḅịaḅọ ofori-ẹ; ó tomoni goyegoye ḅaafamaḅịa.

²⁵Inia oru ma ọ́ dọkịma. Arịaḅụ sime seleḅa ma na goli ma na ómine àrị ọkịḅịa koroma ọ́ kọnma, ọ́ pịkị àrị ọkị ọ́mịna ḅụ pịrịma, ómine ọkọ mịẹ ọkụma anị fa ọkịḅoḅịa, anịatịḅị Nyanaḅọ Ḅe oru tẹkẹ mị ọ̀ taraka se anị wẹrịmamẹ.

²⁶Mịna oru ma ḅụ gbọrịye sọnị ómine ọkịḅo ọ́mịna warịma ḅie chuma, anị ofori arịa ọgọnọ gbana gbọrị worinime mị pịkị ọ́mịna ọgọnọ gbanaḅịa. Mịẹka mịẹka ḅaraḅụ mịna oru ma ọ́ taraka se àrị wẹrịma pịkị àrị ḍikisima, anịatịḅị Nyanaḅọ Ḅe worinime arịa ọgọnọ gbana waraḅẹ.