Read kirikeni Jọn 1 Bible Online

Jọn 1 - kirikeni bible

Jọn 1

¹Tomonikiri mị ma tẹmẹka sịkị ngịsị, Ọkwẹịn Ḅe Ori omi-ẹ; Ọ̀ Tamụnọ Ḅe na omi-ẹ, Tamụnọ Ḅe na Ori na pịkị gbọrịye-ẹ.

²Anịḅe sakị mị ngịsị Ọkwẹịn Ḅe Tamụnọ Ḅe na omi-ẹ.

³Ọ̀ ḅụ ḅụ Tamụnọ Ḅe ḅọrọ ye mamgba tẹmẹmẹ; tẹmẹye mamgba Ọ̀ sọka se tẹmẹ gbọrịye sọ ofori-ẹ.

⁴Ọkwẹịn Ḅe anị ḍumo mị ḅe chuku-ẹ, se mịn ḍumo mị enekuḅu ọkị ḅo tomoni mamgba pịrịmẹ.

⁵Enekuḅu mị kanakana mị ḅie ḅịapakamẹ, se kanakana mị ma ngịsị anị binmakẹ.

⁶Tamụnọ Ḅe oria okunwẹngịḅọ ḅe nwọ seni fịrịmamẹ, Jọn nwọ chịnḅọ ḅe,

⁷ḅo enekuḅu mị gbolomaye nwọ ḍuko tomoni pịrịḅịa ẹrẹchị ḅo ḅọ ḅe, mịẹse inimgba oku mị naa se ḅereniḅịa ḅara.

⁸Ori na ọ̀ ḅụ na enekuḅu mịkẹ; ò ḅo enekuḅu mị gbolomaye nwọ ḍuko-ẹ ḅomẹ.

⁹Mịn anị kọkọma enekuḅu mị-ẹ—tomonikiri mị ḅie sọ ḅo enekuḅu mị, se ḅịa tomoni mamgba ọgọnọ saramaye mị,

¹⁰Ọkwẹịn Ḅe anịsịkị mị ḅụ tomonikiri mị ḅie omi-ẹ, Tamụnọ Ḅe Ọ̀ ḅụ ḅọrọ pịkị tomonikiri mị tẹmẹmẹ nwọḅẹ sọnị tomonikiri mị Ò nemikẹ.

¹¹Ori Oria ama nwọ ḅomẹ, ọkụma Oria ama apụma ini Ori ọkịkẹ.

¹²Anị simeọkụ simeọkụ sọnị, dapụ kọkọma Ori ọkị seni Ò ḅerenimẹ; ini mị Ọ̀ kụrọ se pịrịye-ẹ ḅo Tamụnọ awọ nwọ sọ.

¹³Tomoni yemịẹmịẹḅara ḅụ ini wẹrị ḅo Tamụnọ awọ nwọ sọkẹ, ḍaḅọ tomonikiri awọ yiyi ḅaraḅụkẹ; Tamụnọ Ḅe na mịnaḅụ na anị inia Ḍa-ẹ.

¹⁴Ọkwẹịn Ḅe ḅo tomoniḅọ sọmẹ, se ḍikiḅụgerere na kọkọmaye na Ọ̀ ḅụ ḅeinmẹ, Ọ̀ pịkị mịna ogboku mine na angamẹ. Wa Oria boma mị ọrịmẹ, Ọ̀ mịn boma mị ọkịmẹ anị Ḍaḅọ Ḅe ngẹrị Tọkụ ḅara ḅụ.

¹⁵Jọn ḅe Ò gbolomaye nwọ ḍukomẹ. Ori oloku pakụmamẹ, “Ḅe anị àrị Ò gbolomaye nwọ ḍuko ọ́ pịrị sime Ḅọ ḅe-ẹ, à mị ḅara mị nwọ ḍuko sịkị, na ‘Ori ị̀ya ọḅụju ḅoaḅẹ, ọkụma Ori opusọtẹịn ị̀ nẹngịmẹ, anịatịḅị Ọ̀ tatarị simearịogbo ini ị̀ yimẹ.’”

¹⁶Oria opu ḍikiḅụgerere ḅụ Ò mine mgba ḅẹlẹmamẹ, ḍukoma ḍukoma ḅẹlẹma Ọ̀ nwọse wa pịrịmẹ.

¹⁷Tamụnọ Ḅe Moziz ḅe ḅụ ḅọrọ Olokoma pịrịmẹ, ọkụma ḍikiḅụgerere na kọkọmaye mị na Jizọs Kraịst Ḅe ḅụ ḅọrọ ḅomẹ.

¹⁸Jịn sịkị Tamụnọ Ḅe ọrịsa ḅọ ma ofori-ẹ. Oria gbọrị Tọkụ Ḅe kẹngẹ-ẹ, anị Tamụnọ Ḅe sime ọkụ nwọ sime Ḅọ ḅe pịkị Ḍaḅọ Ḅe anga sịkị sime Ḅọ ḅe, ori mị mịẹse ini Ọ̀ nemisaye-ẹ.

¹⁹Jerusalẹm ḅie sime Ju ḅẹrẹtọn apụma na agbamịẹapụ na, Livaịapụ ma na, nwọse Jọn ḅe fịrịmamẹ se ò gbelamẹ, “Ị́rị́ tụḅọ?”

²⁰Jọn ḅe ọ̀ pẹkẹrẹ ḍụkụkẹ nwọḅẹ yekẹ, ọkụma ò ḅelema ḍuko inia tọrụ finjimẹ, na, “Mẹsaya Ḅe ị̀rị̀kẹ.”

²¹Ini nwọ gbelamẹ, “Anịọkụma, Ị́rị́ tụḅọ? Ịlaịja ḅe ị́rị́?” Jọn ḅe nwọ pẹkẹrẹmẹ, “Ẹn-ẹn, Ị̀rị̀kẹ.” Ini nwọ gbelamẹ, “Ịkịankoroḅọ ḅe ị́rị́?” Ọ̀ nwọ pẹkẹrẹmẹ, “Ẹn-ẹn.”

²²Ini nwọ ḅẹmẹ, “Anịọkụma ḍuko wa pịrị.” “Wa Pẹkẹrẹḅịpị se mun wa fịrịma apụma pịrịḅịa ḅara. Ị́ gbolomaye ḅụ cheye ị́ nwọ ḅẹ?”

²³Jọn ḅe pẹkẹrẹ ḅụ Aịzaya ịkịankoroḅọ ḅe ḍukoye mị nwọ ḍukomẹ: “Ị̀rị̀ anị eleogbo olokuarịḅọ ḅe pụkọ mị-ẹ: gonogono ateli mịẹ Nyanaḅọ Ḅe pịrị ọ̀ ḅọrọḅịa ḅara!”

²⁴Farisiapụma se fịrịma okunwẹngịapụma,

²⁵anịsịkị Jọn ḅe gbelamẹ, “Ị́rị́ nemikase Mẹsaya Ḅe kẹ anịkanịka Ịlaịja ḅe kẹ, pịkị Ịkịankoroḅọ kẹ nwọḅẹ ọkụma, nde ị́ gose mengi se nweni sararịye?”

²⁶Jọn ḅe pẹkẹrẹmẹ, “Mengi mị à se ọ́ saraye-ẹ, ọkụma ọ́mịna ogboku ó nemika gbọrịḅọ chịẹ sime waraḅẹ.

²⁷Ori ị̀ya ọḅụju ḅoaḅẹ, ọkụma ọ̀ ḅụọ akpakama ḍiki finma sọnị ị̀ gbẹịnkẹ.”

²⁸Bẹtani ḅie maye mamgba pakamẹ, Jọdan Tọrụ mị ḅụ ịrụapakapaka nyọ mị anị Jọn ḅe mengi sararị nyọ mị-ẹ.

²⁹Anịḅe ene ḅa Jọn ḅe, Jizọs Ḅe ọ̀ damaḅo àrị ọkụ ọrị se nwọ ḅẹmẹ, “Ḅe Tamụnọ Anana Tọkụ Ḅe-ẹ, tomonikiri mị ḅe sima dekisin Ḅọ ḅe!

³⁰Ḅe anị à ḅẹrẹ ḅẹ Ḅọ ḅe-ẹ à nwọḅẹ sịkị na, ‘Gbọrịḅọ ị̀ya ọḅụju ḅoaḅẹ, ọkụma Ori opusọtẹịn ị̀ nẹngịmẹ, anịatịḅị Ọ̀ tatarị simearịogbo ini ị̀ yimẹ.’

³¹Ò ḅo sọḅịaye à nemikẹ, ọkụma à ḅo mengi se nweni saraḅẹ mịẹse Izrẹlapụma Ò nemiḅịa ḅara.”

³²Mịn anị Jọn ḅe chịẹ onye mị-ẹ: “À Tẹmẹ Ḅe ọrịmẹ, okuku ḅara nwọse soḅie koroḅo, se Oria ọgọnọ chịẹmẹ.

³³À pa pịkị ma nemikẹ na Ori-ẹ, ọkụma Tamụnọ Ḅe, ị̀ fịrịma na à mengi se nweni sara nwọḅẹ Ḅọ ḅe, nwọse ị̀ ḅẹmẹ, ‘Tẹmẹ Ḅe koroḅo iniḅọ ọgọnọ chịẹḅịa ḅọ ị́ nwọ ọrịḅịa Ori mị Fịafịa Tẹmẹ Ḅe nwọse mengi se nweni saraḅịaye-ẹ.’

³⁴Àrị anị ọrịsam, se à ḍuko ọ́ pịrịaḅẹ na, Ori anị Tamụnọ Tọkụ Ḅe-ẹ.”

³⁵Anịḅe ene ḅa, Jọn ḅe na oria ọḅụḍuko mama apụ na pịkị anịanga omi-ẹ,

³⁶ò Jizọs Ḅe ọrịmẹ Ọ̀ nwẹngị ḅọrọarị sịkị. Se ọ̀ nwọ ḅẹmẹ, “Ḅe Tamụnọ Anana Tọkụ Ḅe-ẹ!”

³⁷Mama ọḅụḍukoapụma ọ̀ mịn mị ḍuko ọkụ nwọ naase Jizọs Ḅe ḍukomẹ.

³⁸Jizọs Ḅe vinpịkị ini ò ḍukoarị ọkụ ọrị se ini gbelamẹ, “Ó che ḍọkị-ao?” Ini nwọse Ọ̀ pẹkẹrẹmẹ, “Nde nyọ Ị́ anga, Yeḍieḅọ?” (Mị ọkwẹịn mị fieaye, “Yeḍieḅọ.”)

³⁹Ọ̀ nwọ pẹkẹrẹmẹ, “Ó ḅo ḍiki.” Anị ini ọ̀ ḅụ sọ ori anga nyọ mun ye-ẹ, se ene mị ḅụ kọn sịkị mị nwọse ori na simemẹ. (Anị pa inein-a so pembe ye nwọ lasam eneogboin ḅụ.)

⁴⁰Jọn ḅe ḍukoye mị naase Jizọs Ḅe ḅụ sọmun mama apụma ḅie gbọrịḅọ anị Andru ḅe-ẹ, Saịmọn Pita numbireowu ḅe.

⁴¹Anịkirikiri Andru ḅe numbireowu Saịmọn ḅe ọrị se ḍuko ọ̀ pịrịmẹ, “Mẹsaya Ḅe wa Ori ọrịsam.” (Mẹsaya fiearịye anị “Kraịst.”)

⁴²Anịsịkị mị ọ̀ Saịmọn ḅe ọkịmun Jizọs Ḅe Pịrịye-ẹ. Jizọs Ḅe ò ḍiki se nwọ ḅẹmẹ, “Ị́ya ẹrẹ anị Saịmọn Jọn yaḅe, ọkụma ini nwọse ị́ chịnḅịa Kifas.” (Mị na Pita na gbọrịye-ẹ, anị fiearịye “Ḍụparị.”)

⁴³Anịḅe ene ḅa Jizọs Ḅe tọn pẹlẹmẹ na ọ̀ Galili munḅịa. Ò Filip ḅe ọrịmẹ se nwọse ọ̀ ḅẹmẹ, “Ị́rị́ na ḅo!”

⁴⁴(Filip ḅe Bẹtsaịda ḅọ-ẹ, Andru ḅe na Pita ḅe na anga ama mị.)

⁴⁵Filip ḅe Natanịẹl ḅe ọrị se ḍuko ọ̀ pịrịmẹ, “Moziz ḅe Oloko ḍiri mị ḅie Ọ̀ ḅụ ye gịẹịn, pịkị ịkịankoroapụma Ò gbolomaye gịẹịnḅọ ḅe, wa Ori ọrịsam. Ori anị Jizọs, Josẹf ya Nazarẹt ḅọ Ḅe-ẹ.”

⁴⁶Natanịẹl ḅe nwọ gbelamẹ, “Nazarẹt ama mị ḅie sọnị iḅiye pakaḅo ḅe?” Filip ḅe ọ̀ pẹkẹrẹmẹ, “Ḅo ḍiki.”

⁴⁷Jizọs ḅe Natanịẹl ḅe ọ̀ damaḅoarị ọkụ nwọ ọrị sịkị, ori ò gbolomaye ḅụ nwọ ḅẹmẹ, “Ḅe kọkọma Izrẹlḅọ-ẹ; ò ḅie iruo ofori-ẹ!”

⁴⁸Natanịẹl ḅe ò gbelamẹ, “Nde ị̀ nemi ọkụ?” Jizọs Ḅe pẹkẹrẹmẹ, “Ị́ figi chịn mị chuku simearị sịkị àrị ị́ ọrịmẹ, Filip ḅe ma ị́ chịnka sịkị.”

⁴⁹“Yeḍieḅọ,” Natanịẹl ḅe nwọ pẹkẹrẹmẹ, “Ị́rị́ Tamụnọ Tọkụ Ḅe-ẹ! Ị́rị́ Izrẹl Amanyanaḅọ Ḅe-ẹ!”

⁵⁰Jizọs Ḅe nwọ ḅẹmẹ, “Ị́ ḅerenisa anị figi chịn mị chuku ị́ sime sịkị àrị ị́ ọrịmẹ à nwọse ị́ ḅẹye gose? Ị́ iḅiọkụ mà nẹngị aye ọrịḅịa!”

⁵¹Se ọ̀ nwọse ini ḅẹmẹ, “À kọkọmaye ḍuko ọ́ pịrịaḅẹ: ómine ọrịḅịa so mị finjiḅịa se Tamụnọ enjẹlapụ Tomoniḅọ Tọkụ Ḅe ọgọnọ iwo na ideri na ḅịa ọkụ.”