Read kirikeni Jọn 10 Bible Online

Jọn 10 - kirikeni bible

Jọn 10

¹Jizọs Ḅe nwọ ḅẹmẹ, “À kọkọmaye ḍuko ọ́ pịrịaḅẹ: na ḅọkọ mị ḅụ wẹrị ananama simearị nyọ sọka, se jịn nyọ ḅụ wẹrị tanjị sọ ḅọ ḅe, ori furuḅọ-ẹ, pịkị angarafịḅọ-ẹ.

²Ḅọkọ mị ḅụ wẹrị sọ ḅọ ḅe ori mị ananaḍikiḍikiḅọ ḅe-ẹ.

³Odoḅọkọ koru ḅọ ḅe ḅọkọ mị finji ọ̀ pịrịmẹ, ori ẹrẹ se oria ananama chịn sịkị, àrị ọ̀ pụkọ naamẹ, se ori arịa tọrọkọ ịsụn pakamẹ.

⁴Ori àrị ọkịpakụmaḅo sịkị, ori arịa tọrọkọ ịsụnmẹ se ananama ò ḍukomẹ, anịatịḅị àrị ọ̀ pụkọ nemimẹ.

⁵Àrị jịnḅọ ḍuko ḍụkụ ẹkẹ anịkanịka, àrị iniḅọ ḍiki mangịḅịa, anịatịḅị àrị iniḅọ pụkọ nemikẹ.”

⁶Jizọs Ḅe mị kaḅo mị kọn ini pịrịmẹ, ọkụma ò ḍuko ini pịrịarịye mị ini kaịnḅokẹ.

⁷Anị Jizọs Ḅe pịkịna nwọḅẹye-ẹ, “Kọkọmaye à nwọ ḍuko ọ́ pịrịaḅẹ: ị̀rị̀ anị ananama arịa ḅọkọ mị-ẹ.

⁸Ma à ḅoka se tatarị ḅo apụ mamgba furuapụ na angarafịapụ na-ẹ, ọkụma ananama àrị ini pokikẹ.

⁹Ị̀rị̀ anị ḅọkọ mị-ẹ. Ị̀ ḅụ ḅọrọ ḅie sọ ḅọ goyegoye iniḅọ ḍụaḅọrọma nyanaḅịa; ọ̀ sọ ḅo se pịkị pakaḅịa, se fịfịye nwọ ḍọkị ọrịḅịa.

¹⁰Furuḅọ ḅe furu kẹngẹ mị ò gose ḅo ye-ẹ, ḅaa na, yesima na. Ị̀rị̀ à ḅomẹ mịẹse ó ḍumo nyanaḅịa ḅara—ḍumo mị anịḅe nyanaḅakama ḅụ.

¹¹“Ị̀rị̀ iḅi ananaḍikiḍikiḅọ ḅe-ẹ, anị ḅereni se fị ananama pịrịḅịa ḅọ ḅe.

¹²Ini ọkọḅọ ḅe, ori ananaḍikiḍikiḅọkẹ, ori pịkị ananama nyanakẹ, ò piri obiri ḅoarị ọkụ nwọ ọrị sịkị, ori ananama wẹrịso se mangị somẹ, anịgose piri obiri ḅe ananama kun se àrị galagalamamẹ.

¹³Ini ọkọḅọ ḅe ọ̀ mangị somẹ, anịatịḅị ori, ini ori ọkọmẹ, ọ̀ pịkị ananama abalakẹ.

¹⁴Ị̀rị̀ anị iḅi ananaḍikiḍikiḅọ ḅe-ẹ.

¹⁵Ḍaḅọ Ḅe nwọ ị̀ nemi, ị̀rị̀ sọnị nwọ Ḍaḅọ Ḅe nemi ḅara mị, anị gbọrị ḅara mị à nwọse ị̀ya ananama nemimẹ, ị̀ya ananama pịkị ọkọ se ị̀ nemimẹ. À pịkị ḅimẹ à fị àrị pịrị.

¹⁶Sime ị̀ pịrị jịn anana pịkị omi-ẹ, mị anana ogbo mị ḅie oforikaye. À pịkị àrị sọnị ọkịḅoḅịa àrị ị̀ pụkọ pokiḅịa, àrị pịkị ḅo gbọrị anana ogbo nwọ sọḅịa se gbọrị ananaḍikiḍikiḅọ àrị ḍikiḍikiḅịa.

¹⁷“Ḍaḅọ Ḅe ori ị̀ ḅẹlẹmamẹ anịatịḅị à ḅerenimẹ ị̀ ḍumo nwọ pịrị mịẹse à pịkị anị nyana ọkịḅịaye gose.

¹⁸Ị̀ ḅara ị̀ ḍumo nwọ ọkị gbọrịḅọ sọ ofori-ẹ. Ị̀rị̀ ngẹrị ḅereni se anị pịrịmẹ, à kụrọ nyanamẹ anị pịrị, à pịkịna kụrọ nyanamẹ anị ọkị. Mịn mị anị ị̀ Ḍaḅe tọn ị̀ pịrị mịẹ nwọḅẹye mị-ẹ.”

¹⁹Pua pịkị Juapụma ogboku pakaḅomẹ ma ọkwẹịn ma gose.

²⁰Tọn apụ inia ḅie nwọ ḅẹaḅẹ, “Sitẹmẹ ò ḅie omi-ẹ! Ọ̀ nọmụaḅẹ! Nde ó gose ò pokiarịye?”

²¹Ọkụma ísíapụma nwọ ḅẹaḅẹ, “Sitẹmẹ ḅie ḅụ simeḅọ ineda ḅe ḅọ ḅe ọkwẹịn àrị ḅara mị se ọkwẹịn ẹkẹ! Nde sitẹmẹ ineda tọrụmgbọlụ pụn apụ tọrụmgbọlụma nwọ finjiḅịa ọkụ?”

²²Fọngụ sịkị mị ḅụ, ini Jerusalẹm mị ḅie Oputẹkẹwarị mị Mịẹfịafịama Alalị nwọ fịaḅẹ.

²³Jizọs Ḅe Oputẹkẹwarị mị ḅie ini Sọlọmọn Iḅoma nwọse chịn nyọ ḅie nwẹngịma ḅọrọaḅẹ,

²⁴tomonima anịsịkị Ò gbori kelema se nwọ ḅẹmẹ, “Ị́ ḅifie wa pịrịka mun nde sịkị laḅe? Kọkọmaye ḍuko wa pịrị Mẹsaya Ḅe ị́rị́?”

²⁵Jizọs Ḅe pẹkẹrẹmẹ, “À ḍuko ọ́ pịrị ḅọrọsam, ọkụma ómine ị̀ ḅereni ḍụkụkẹ. Ị̀ Ḍaḅe kụrọ ḅụ à wẹrị nwẹngị fịrịma ị̀ tọrụ ḍinma ọkwẹịn-aḅẹ,

²⁶ọkụma ó ḅereni ḍụkụkẹ, anịatịḅị ómine ị̀ya ananakẹ.

²⁷Ị̀ya ananama àrị ị̀ pụkọ pokimẹ; ị̀rị̀ àrị nemimẹ, àrị pịkị ị̀ ḍukomẹ.

²⁸À simegbaso ḍumo se àrị pịrịmẹ, àrị pịkị ngịsị fị ẹkẹ. Ị̀ ḅara ḅie àrị kun ọkịḅịa ḅọ ofori-ẹ.

²⁹Ị̀ Ḍaḅe se ị̀ pịrịsaye mị ḍụḅa ye mamgba nẹngịmẹ, se ineda Ḍaḅọ Ḅe ḍikiḍikiarịye kun ọkịḅịa ḅọ ofori-ẹ.

³⁰Ḍaḅọ Ḅe na ị̀rị̀ na gbọrịye-ẹ.”

³¹Anịsịkị tomonima pịkịna imgbele deki ò gbinḅịa ẹrẹchị ḍọkịmẹ.

³²Jizọs Ḅe nwọse ini ḅẹmẹ, “Ḍaḅọ Ḅe se ị̀ pịrị nwẹngị nwọḅẹ tọn-a iḅi-a fịrị ọ́mịna ogboku à nwọ nwẹngịsam, fịrịma ḅụ nde ye gose ómine imgbele se ị̀ gbin-e tọn-ao?”

³³Ini pịkị ọ̀ pẹkẹrẹmẹ, “Wa iḅi-a fịrị gose imgbele se ị́ gbin-e tọnkẹ, ọkụma ị́ wẹrị Tamụnọ Ḅe wọlọarị ḅara mị gose-ẹ! Ị́rị́ tomoniḅọ-ẹ, ọkụma ị́ ḅụ ị́ nwọse Tamụnọ mịẹ-aḅẹ!”

³⁴Jizọs Ḅe pẹkẹrẹmẹ, “Ọ́mịna Oloko ḅie gịẹịn waraḅẹ na Tamụnọ Ḅe nwọḅẹmẹ, ‘Ómine tamụnọ-ẹ.’

³⁵Wa nemimẹ na fịafịa ḍiri mị ḍukoye mị kọkọmaye sọ gbasomẹ se Tamụnọ Ḅe oru nwọse ini chịnmẹ, ini oria oku mị se fịrịma apụma.

³⁶Ị̀rị̀ ọkụma, Ḍaḅọ Ḅe ị̀ sẹlẹ se ị̀ se tomonikiri mị fịrịmamẹ. Nde anịọkụma, ómine ineda ḅẹḅịa ọkụ na à Tamụnọ Ḅe wọlọmẹ, anịatịḅị à nwọḅẹmẹ, ị̀rị̀ Tamụnọ Tọkụ-ẹ?

³⁷Anịọkụma ómine ị̀ ḅereni ma, à nemikase ị̀ Ḍaḅe fịrịma nwọ nwẹngịkẹ ḅẹḅẹ.

³⁸Ómine ị̀ ḅerenikẹ nwọḅẹ sọnị, ị̀ya fịrịma ọ́ nwọ ḅereni mịẹse anị ọ́ ḅụ okoroḅịa ḅara na Ḍaḅọ Ḅe ori ị̀ ḅie omi-ẹ, ị̀rị̀ sọ pịkị Ḍaḅọ Ḅe ḅie omi-ẹ.”

³⁹Ini pịkị jịn sịkị se ò kun ḍọkịmẹ, ọkụma ori inia ḅara pẹlẹma somẹ.

⁴⁰Jizọs Ḅe vinpịkị Jọdan Tọrụ mị saḅa Jọn ḅe mengi se nweni sara sime nyọ mị mun mẹ, se anịnyọ simemẹ.

⁴¹Tọn apụ ọ̀ damaḅomẹ, ini nwọḅẹmẹ, “Jọn ḅe ọ̀ ḅụgbiripuma fịrị nwẹngịkẹ, ọkụma ò ḅe tomoniḅọ ḅe ḅụ ḍukoye goyegoye kọkọmaye-ẹ.”

⁴²Se anịnyọ tọn apụ ò ḅerenimẹ.