Read kirikeni Jọn 11 Bible Online

Jọn 11 - kirikeni bible

Jọn 11

¹Bẹtani ḅie anga sime gbọrị owuḅọ, Lazụrọs nwọ chịnḅọ, obimẹ. Bẹtani mị anị Meri ma na nụmbụrarọ Mata ma na anga ama mị-ẹ.

²(Ma Meri ma anị yela kụnụ olo se Jizọs Ḅe ḅụọma ḅụ sara se á tịḅị inime se àrị gurosinḅọ ma-ẹ, numbireowu Lazụrọs ḅe mị obiye-ẹ.)

³Eremeni mịnapụma oku seni Jizọs Ḅe fịrịmamẹ: “Nyanaḅọ, ị́ ḅụ yela ikiaḅọ ḅe ori obiaḅẹ.”

⁴Jizọs Ḅe anị naa sịkị ọ̀ nwọ ḅẹmẹ, “Mịn obi mị ḅe kuluma mị anị Lazụrọs ḅe fị nwọ sọ ẹkẹ; mịn mị gose pakaye anị boma ọkịḅo Tamụnọ Ḅe pịrịḅịa ẹrẹchị-ẹ, Tamụnọ Tọkụ Ḅe pịkị anịa ḅụ ḅọrọ boma nyanaḅịa.”

⁵Jizọs Ḅe ọ̀ Mata ma na nụmbụrarọ ma na pịkị Lazụrọs ḅe na nwọ ḅẹlẹmamẹ.

⁶Lazụrọs ḅe obiaḅẹ nwọ ḅẹ ḅẹrẹ ḅo ọ̀ lasịkị, ò sime nyọ mị ḅụ mama ene ọ̀ nwọ gbanama simemẹ.

⁷Mị anịsịkị ọ̀ nwọse ọḅụḍukoapụma ḅẹye-ẹ, “Ó ye wa vinpịkị Judia mun.”

⁸Ọḅụḍukoapụma pẹkẹrẹmẹ, “Yeḍieḅọ ma ḅọlọka sịkị ḅụ Juapụma imgbele se ị́ gbin-ẹtọnmẹ; ị́ pịkị vinpịkị anịnyọ mun-ẹtọn-ao?”

⁹Jizọs Ḅe nwọ ḅẹmẹ, “Gbọrị ene mị oyimaịn so finji nwọ nyanamẹ, anịka? Anịẹrẹchị tomoniḅọ nemikase enekaka fịafịa ogbo ḅụ nwẹngịaḅẹ ḅẹḅẹ, ọ̀ ḅụọ tọmbụlọ ẹkẹ, anịatịḅị ọ̀ mị tomonikiri mị ḅe enekuḅu mị nwọ ọrị waraḅẹ.

¹⁰Ọkụma ò nemikase ḍin ḅụ nwẹngịaḅẹ ḅẹḅẹ ọ̀ ḅụọ tọmbụlọḅịa, anịatịḅị enekuḅu ò ḅie ofori-ẹ.”

¹¹Jizọs Ḅe mịn mị nwọ ḍuko se pịkị nwọ ḅẹmẹ, “Mịna ikiaḅọ, Lazụrọs ḅe ọ̀ ḅọlọlọ mọnọsam, ọkụma à mun ò wosịsẹmaḅịa.”

¹²Ọḅụḍukoapụma pẹkẹrẹmẹ, “Nyanaḅọ, ò nemikase mọnọaḅẹ ḅẹḅẹ ọ̀ ḅụ iḅiḅịa.”

¹³Ọkụma Jizọs Ḅe fieaye anị Lazụrọs ḅe ọ̀ fịsam, ọkụma ini nwọ koromamẹ na jokoma mọnọ ḅẹrẹ ọ̀ nwọ ḍukomẹ.

¹⁴Anị Jizọs Ḅe ḅelema ḍuko ini pịrịye-ẹ na, “Lazụrọs ḅe ọ̀ fịsam,

¹⁵ọkụma ọ́mịna tịḅị gose ị̀ ḅieḅẹlẹmẹ na àrị ori na ofori-ẹ, mịẹse ó ḅereniḅịa ḅara. Ye wa ọ̀ damamun.”

¹⁶Tọmọs (ini maịn-ịkpatụ awọ se chịnḅọ ḅe) nwọse ò juo ọḅụḍukoapụma ḅẹmẹ, “Ye mine mgba Yeḍieḅọ Ḅe na mun, se wa Ọ̀ ḅụ sọ se Ori na fịḅịa ḅara!”

¹⁷Jizọs Ḅe ḅo nyọ mị lasịkị, ọ̀ ḍọkịḅo ọrịmẹ na ini Lazụrọs ḅe ḍipi inein-a ḍin ḅọrọsam.

¹⁸Bẹtani ḅụ ọkịmun Jerusalẹm la kalaye kẹngẹ kọnmẹ anị mama tombi la,

¹⁹se tọn-a Juapụ Mata ma na Meri ma na nwọ damaḅomẹ inia kuḅie kụrọmaḅịa ẹrẹchị ini numbireowu ḅe kọn fị mị ḅụ.

²⁰Mata ma naamẹ na Jizọs Ḅe ò ḅoaḅẹ nwọ ḅẹ sịkị, á paka mun ori na ịrịa-ẹmumẹ, ọkụma Meri ma warị ḅie á simemẹ.

²¹Mata ma nwọse Jizọs Ḅe ḅẹmẹ, “Nyanaḅọ, ị́ nemikase mịanga simemẹ nwọ ḅẹ ọkụma mgbọkụ ị̀ mbire ḅe ọ̀ fị ẹkẹ!

²²Ọkụma à ḅerenimẹ na mịọkụ sọ Tamụnọ Ḅe ị́ ọ̀ ḅara ḅi ye goyegoye ò se ị́ pịrịḅịa.”

²³Jizọs Ḅe nwọse á ḅẹmẹ, “ị́ mbire ḅe ọ̀ sịsẹḅịa.”

²⁴À nwọse ọ̀ pẹkẹrẹmẹ, “À nemimẹ na ọ̀ sịsẹḅịa kuluma ene mị ḅụ.”

²⁵Jizọs Ḅe nwọse á ḅẹmẹ, “Ị̀rị̀ mị fịḅụsịsẹ mị na ḍumo mị na-ẹ. Ị̀ ḅereniḅọ goyegoye iniḅọ ḍumoḅịa, iniḅọ fịmẹ nwọ ḅẹ sọnị,

²⁶se ḍumo sime se ị̀ ḅereniḅọ goyegoye ngịsị iniḅọ ḅarị fị ẹkẹ. Mịn mị ị́ ḅereni?”

²⁷À nwọse ọ̀ pẹkẹrẹmẹ, “Iin, Nyanaḅọ! À kọkọma ḅerenimẹ na ị́rị́ anị Mẹsaya Ḅe-ẹ, Tamụnọ Tọkụ Ḅe, tomonikiri mị ḅoḅịa nwọ ḅẹ ḅọ ḅe-ẹ.”

²⁸Mata ma mịn mị ọkwẹịn so sịkị, á vinpịkị mun nụmbụrarọ Meri ma chịnmẹ, ḅọịma ḅụ. Á nwọ ḍuko á pịrịmẹ, “Yeḍieḅọ Ḅe Ọ̀ mịanga omi-ẹ, Ori ị́ gbelaḅẹ.”

²⁹Meri ma mịn mị naa sịkị, á be sịsẹ se mun ori na ịrịamẹ.

³⁰(Jizọs Ḅe ma Ò ḅo ịwọama mị lakẹ, Ọ̀ pa pịkị Mata ma ḅo Ori na ịrịa nyọ mị ḅụ omi-ẹ.)

³¹Meri ma na warị ḅie sime á kuḅie kụrọma sime apụma á ḍukomẹ, ini á sịsẹ se jua pakarị ọkụ ọrị sịkị, ini nwọ chịnmẹ na á mun iḍupu mịanga sịkị sime owu-ẹmun-aḅẹ.

³²Meri ma mun Jizọs Ḅe sime nyọ mị lase ori ọrị kirikiri, árị ọ̀ ḅụọ chuku ḅịkị koromẹ. Se nwọ ḅẹmẹ, “Nyanaḅọ, ị́ nemikase mịanga simemẹ nwọ ḅẹ ọkụma mgbọkụ ị̀ mbire ḅe ọ̀ fị ẹkẹ!”

³³Jizọs Ḅe árị owuarị ọkụ mị nwọ ọrịmẹ, ọ̀ pịkị árị na sime apụma kọn-arị owu ma sọ nwọ ọrị sịkị anị opuma ọ̀ ḅụ la mẹ, se pịkị ọ̀ tịḅịfoinmamẹ.

³⁴Ori ini gbelamẹ, “Nde nyọ ómine ò ḍipi?” Ini nwọse ọ̀ pẹkẹrẹmẹ, “Ḅo ḍiki Nyanaḅọ.”

³⁵Jizọs-Ḅe owumẹ.

³⁶Anị tomonima nwọ ḅẹye-ẹ, “Ori ọ̀ ḅẹlẹma la-ọkụ ḍiki!”

³⁷Inia ḅụ dapụ nwọ ḅẹmẹ, “Ọ̀ tọrụmgbọlụpụn ḅọ ḅe tọrụmgbọlụma nwọ finjimẹ, Ọ̀ mịẹ ka? Ori ineda Lazụrọs ḅe ḍụa ẹka fị ḅụ?”

³⁸Anịḅo pịkị gbunma ò jike sịkị, Jizọs Ḅe so iḍupu mị sime anga mun mẹ, iḍupu mị pokolo-ẹ ini ḍụparị se anịa ḅọkọ mị gbẹịnmẹ.

³⁹Jizọs Ḅe nwọse ini ḅẹmẹ, “Ọ́ ḍụparị mị dekisin!” Mata ma, fịḅọ ḅe nụmbụrarọ ma, pẹkẹrẹmẹ, “Nyanaḅọ anị siḅara se fụrụḅịa. Ini ò ḍipi inein-a ḍin lasam!”

⁴⁰Jizọs Ḅe nwọse á ḅẹmẹ, “À ḍuko ị́ pịrịka na ị́ nemikase ḅerenimẹ ḅẹḅẹ ị́ Tamụnọ Ḅe boma nwọ ọrịḅịa?”

⁴¹Ini ḍụparị mị nwọ dekisinmẹ. Jizọs Ḅe ọgọnọ ḍiki se nwọ ḅẹmẹ, “Ḍaḅọ, à mịẹḅaka se ị́ ḅẹmẹ na ị́ ị̀ naasam.

⁴²À nemimẹ na ị́ sịkịmamgba ị̀ naanaamẹ, ọkụma mịanga sime apụma gose mị à mịn mị ḍukoye-ẹ, mịẹse ini ḅereniḅịa ḅara na, ị́rị́ ị̀ se fịrịmamẹ.”

⁴³Ọ̀ mịn mị ḍuko so sịkị, ò gele pụkọ ḅụ olokumẹ, “Lazụrọs, pakaḅo!”

⁴⁴Fịḅọ ḅe sịsẹ pakaḅomẹ, ala ḅirima ḅịtẹma ọ̀ ḅarama na ọ̀ ḅụọma na fịnamẹ, ḅịtẹ pịkị ọ̀ tọrụ fịna kelemamẹ. Jizọs Ḅe nwọse ini ḅẹmẹ, “Ómine ò fịnma se ò so.”

⁴⁵Ḅo Meri ma la-ẹ ḅo tọn-a tomoni Jizọs Ḅe mịẹye mị ọrịmẹ, se ò ḅerenimẹ.

⁴⁶Ọkụma inia ḅụ dapụ vinpịkị Farisiapụma damamun se Jizọs Ḅe mịẹye mị ḍuko ini pịrịmẹ.

⁴⁷Anị Farisiapụma na tịḅịnị agbamịẹapụma na mun Ḅẹrẹchiri mị na ịrịa se nwọ ḅẹye-ẹ, “Nde wa mịẹḅịa-ọkụ? Ḅe tomoniḅọ ḅe nwẹngịarị ḅụgbiripuma fịrịma ḍiki!

⁴⁸Wa nemikase ọ̀ ḅụ ḅarasin se ò mị ḅara mị mịẹ ma mun aḅẹ nwọ ḅẹḅẹ, tomoniḅọ goyegoye ò ḅereniḅịa se Rom ḅẹrẹtọn apụma ini ḅo mịna Oputẹkẹwarị mị ḅụ na pịkị mịna sẹ mị ḅụ na kụrọkọn, se àrị famaḅịa!”

⁴⁹Inia ḅụ gbọrịḅọ, Kayafas anị ori ẹrẹ-ẹ, ori anị, anị kụra mị ḅụ Gele Agbamịẹḅọ ḅe-ẹ, ọ̀ nwọ ḅẹmẹ, “Ómine nde nde sime oḅoriapụ!

⁵⁰Ó nemika na ọ́mịna ḅụ anị iḅitẹịn mẹ, gbọrịḅọ fị tomoni mamgba pịrị mị, bebe sẹ mị mgba fa nakaraka?”

⁵¹Kọkọmaye ḅụ ọ̀ kọn ọkwẹịn mị, ọ̀ ḅarakuḅu ọkwẹịn ọ̀ nwọ kọnkẹ; anịnakaraka anị kụra mị ḅie Gele Agbamịẹḅọ ḅara ḅụ ori ịkịankoroaḅẹ, na Jizọs Ḅe Ọ̀ fị Juapụma pịrịḅịa,

⁵²pịkị ini kẹngẹkẹ, ọkụma galagala sime Tamụnọ Ḅe awọ mamgba Ọ̀ nwọ koḅirima gbọrịye mịẹḅịa.

⁵³Anị ene mị ḅụ ọkị tọrọkọ mun Ju ḅẹrẹtọn apụma Jizọs Ḅe ḅaaḅịa ḅara nwọ ḍọkịmẹ.

⁵⁴Anị mịẹse Jizọs Ḅe Ọ̀ ḅarị ḅụpakụma Judia mị ḅie nyọnyọmunkẹ, ọkụma Ò so mun eleogbo na kpeki nyọ ḅụ simemẹ, Ifrem nwọ chịn ama mị ḅie Oria ọḅụḍukoapụma na Ori na.

⁵⁵Saḅaḅọrọ Alalị sịkị mị kpekisam tọn-apụ ama mị ḅie paka so Jerusalẹm mun mẹ, mun ḅụmịẹfịafịama mịẹmịẹye nwọ mịẹḅịa ẹrẹchị alalị mị ma laka simeogbo.

⁵⁶Ini Jizọs Ḅe nwọ ḍọkị simemẹ, se ini Oputẹkẹwarị mị ḅie koḅirima sịkị ini jịnḅọ jịnḅọ gbelamẹ, “Cheye ọ́ nwọ koroma-ao? Pikipikiye ofori-ẹ alalị mị ò ḅo ẹkẹ, ò ḅo ḅe?”

⁵⁷Tịḅịnị agbamịẹapụma na Farisiapụma na tọnsam na Jizọs Ḅe sime nyọ nemiḅọ nemiḅọ iniḅọ gbarịmaka ḅara ḅụ anị ḍuko, mịẹse ini ineda Ò kunḅịa ḅara.