Read kirikeni Jọn 15 Bible Online

Jọn 15 - kirikeni bible

Jọn 15

¹“Ị̀rị̀ kọkọma vaịn mị-ẹ, ị̀ Ḍaḅe pịkị ozu kọrịḅọ ḅe-ẹ.

²Ori ị̀ ḅụ sime mgbọlụ chụaka ịkpangị goyegoye nwọ pẹlẹ sinmẹ, anịsịkị mgbọlụ chụa ịkpangị ma mịẹse àrị fịafịamẹ mịẹse àrị ḅakatẹịn mgbọlụ nwọ chụaḅịa ḅara.

³Ini gbọtụḅara ọ́ mịẹ fịafịamasam à se ọ́ pịrịsa ḍieye mị ḅụ.

⁴Ómine ị̀rị̀ na gboloma sime, ị̀rị̀ sọnị pịkị ómine na gboloma simeḅịa. Ịkpangị ngẹrị sikima sime mgbọlụ chụa ẹkẹ anị ineda ọkọ mịẹḅịa anị vaịn mị ḅụ sime waraḅẹ ḅẹḅẹ. Anị gbọrịḅara ḅụ ómine ineda mgbọlụ chụa ẹkẹ ómine ị̀ ḅụ simekẹ ḅẹḅẹ.

⁵“Ị̀rị̀ vaịn mị-ẹ, ómine ịkpangị ma-ẹ. Ị̀ ḅie simeḅọ goyegoye, ị̀rị̀ pịkị iniḅọ ḅie simeḅọ goyegoye, ḅakama mgbọlụ chụaḅịa anịatịḅị ómine ineda mịẹḅịaye ofori-ẹ, ị̀ ḅụ ḅụ sikima ọkụma.

⁶Ị̀ ḅie simeka ḅọ goyegoye ini iniḅọ se gbin wokumasam ịkpangị ḅara ḅụ, anị pịkị samịnasam ọkọ sime ịkpangị ma ini àrị koḅirima, se àrị se fịnị mị ḅie gbin chu se àrị dọkịmaḅịa.

⁷Ó nemikase ị̀ ḅie simemẹ ḅẹḅẹ, ị̀ya ọkwẹịnma pịkị ọ́mịna ḅie simemẹ ḅẹḅẹ, anịsịkị ọ́ ḅụḅẹlẹye goyegoye ọ́ nwọ ḅiḅịa, se ọ́ pịkị anị nyanaḅoḅịa.

⁸Ómine ḅe ḅakama mgbọlụ chụa mị ị̀ Ḍaḅe boma mị ḍiepakụmaḅịa se mị ḅara mị ḅụ mị ó ḅo ị̀ya ọḅụḍukoapụ nwọ sọ saye-ẹ.

⁹Ị̀ Ḍaḅe ị̀ ḅẹlẹma ọkụ mị à nwọse ọ́ ḅẹlẹmamẹ ómine ị̀ya ḅẹlẹma mị ḅie sime.

¹⁰Ó nemikase ị̀ya olokoma ḍukoye mịẹmẹ ḅẹḅẹ, ómine ị̀ya ḅẹlẹma mị ḅie simeḅịa, ị̀rị̀ sọnị ị̀ Ḍaḅe olokoma ḍukoye mịẹse oria ḅẹlẹma ḅie simeọkụ mị.

¹¹“À mịn mị nwọ ḍuko ọ́ pịrịsam mịẹse ị̀ya ḅieḅẹlẹ mị ọ́mịna ḅie simeḅịa ḅara, se ọ́mịna ḅieḅẹlẹ mị ḅeinma ọ́mịna ḅie simeḅịa ḅara.

¹²Ị̀ya oloko mị anị-ẹ: ọ́ jịnḅọ jịnḅọ ḅẹlẹma, anị àrị ọ́ ḅẹlẹma ọkụ mị.

¹³Tomoniḅọ nyanatẹịn se iniḅọ ikiapụ pịrịḅịa ḅẹlẹma anị iniḅọ ḍumo nwọ fama ini pịrị-ẹ.

¹⁴Ómine ị̀ya ikiapụ-ẹ, ó nemikase à tọn ọ́ pịrịye mịẹmẹ ḅẹḅẹ.

¹⁵À ḅarị fịrịnwẹngịapụ se ọ́ chịn ẹkẹ, anịatịḅị fịrịnwẹngịḅọ ḅe ọ̀ nyanaḅọ ḅe mịẹarịye nwọ nemikẹ. Anịnakaraka, ikiapụ à nwọse ọ́ chịnmẹ, anịatịḅị ị̀ Ḍaḅe ḅịpị à naaye goyegoye à ḍuko ọ́ pịrịsam.

¹⁶Ómine ị̀ sẹlẹkẹ; ị̀rị̀ mị ọ́ sẹlẹye-ẹ, se ọ́ tọn sẹịnmẹ, na ó mun se ḅakama mgbọlụ chụa, sime ma munḅịa mgbọlụ ḅara. Anị gose Ḍaḅọ Ḅe ḅara ó ḅiye goyegoye ò seni ọ́ pịrịḅịa ị̀ya ẹrẹ ḅụ.

¹⁷Mịn à gose tọn ọ́ pịrịye-ẹ nwọ ḅẹ na ọ́ jịnḅọ jịnḅọ ḅẹlẹma.

¹⁸“Tomonikiri mị taraka se ọ́ wẹrịmamẹ ḅẹḅẹ, ó se ḅiekoroma na anị tatarị seni ị̀ wẹrịma ḅọrọsam.

¹⁹Ó nemikase sime tomonikiri mị pịrịmẹ nwọ ḅẹ ọkụma, anịsịkị tomonikiri mị anị ọ́ ḅẹlẹmaḅịa ómine anịaye-ẹ nwọ ḅẹ ḅara ḅụ. Ọkụma à tomonikiri mị ḅie ọ́ sẹlẹ pakụmaḅomẹ, ọ́ ḅarị pịkị sime anị pịrịkẹ; mịn mị gose tomonikiri mị taraka se ọ́ wẹrịma mẹ.

²⁰À ḍuko ọ́ pịrịye ọ́ nwọse ḅiekoroma: ‘Ḍụḅa iniḅọ nyanaḅọ nẹngị omoniḅọ ofori-ẹ.’ Ini nemikase ị̀ tọrụsiọrịmamẹ ḅẹḅẹ, ini ómine sọnị ọ́mịna tọrụsiọrịmaḅịa ini nemikase ị̀ya oku ḍukoye mịẹmẹ ḅẹḅẹ, ini pịkị ọ́mịnaye sọ nwọ mịẹḅịa.

²¹Ọkụma ini maye mamgba nwọse ọ́ mịẹḅịa, anịatịḅị ómine ị̀ya tomoni-ẹ anịatịḅị ị̀ se fịrịmaḅọ ḅe ini ó nemikẹ.

²²Ini si mịẹmẹ nwọ ḅẹ ḅẹrẹḅarasi mgbọkụ ini nwọ nyana ẹkẹ, à nemikase ḅo se ọkwẹịn ini pịrịka ọkụma mịọkụ anị simeḅara, ini nyana se inia sima ḅụ inia ḅụ ḍụaḅịaye ofori-ẹ.

²³Taraka se ị̀ wẹrịmaḅọ goyegoye pịkị taraka se ị̀ Ḍaḅe sọnị wẹrịmamẹ.

²⁴Nemikase jịn sịkị gbọrịḅọ sọ ma nwẹngịka fịrị inia ogboku à nwọ nwẹngịka ọkụma, mgbọkụ ini si mịẹmẹ nwọ ḅẹ ḅẹrẹḅarasi ini nwọ nyana ẹkẹ ọkụma mịọkụ, anị simeḅara ḅụ, ini à nwẹngị fịrịma ọrị fama se, taraka se ị̀rị̀ na ị̀ Ḍaḅe na nwọ wẹrịmamẹ.

²⁵Mịn mị, pa ọkọ pakaḅịa, anị simeọkụ simeọkụ sọnị, mịẹse inia Oloko mị ḅie gịẹịnsaye mị ḅo kọkọmaye sọḅịa ḅara: ‘Ini taraka se ị̀ wẹrịmamẹ ḅẹrẹtịḅị sọnị ngịsị oforika ḅụ.’

²⁶“Ḅarachụaḅọ Ḅe ò ḅoḅịa—Tẹmẹ Ḅe, anị Tamụnọ Ḅe ḅụ kọkọmaye mị ḍieḅelemarịḅọ ḅe, anị pịkị Ḍaḅọ Ḅe ḅụ ḅo ḅọ Ḅe. Ḍaḅọ Ḅe ḅara ḅụ à wẹrị ò seni ọ́ fịrịmaḅịa, ọ̀ pịkị ị̀ gbolomaye ḍukoḅịa.

²⁷Ómine sọnị, pịkị Ị̀ gbolomaye nwọ ḍukoḅịa, anịatịḅị ómine Ị̀rị̀ na omi-ẹ sakị mị ngịsị.