Read kirikeni Jọn 17 Bible Online

Jọn 17 - kirikeni bible

Jọn 17

¹Jizọs Ḅe mịn mị ḍuko so sịkị, ọ̀ tọrụ deki so ḍiki se nwọ ḅẹmẹ, “Ḍaḅọ, sịkị mị lasam. Boma se ị́ya Tọkụ Ḅe pịrị, mịẹse Tọkụ Ḅe boma se ị́ pịrịḅịa ḅara.

²Anịatịḅị ị́ kụrọ seni ọ̀ pịrịsam tomoni ḅaraḅara mamgba ḅụ, mịẹse ò simegbaso ḍumo seni ị́ se ọ̀ pịrịapụ mamgba pịrịḅịa ḅara.

³Simegbaso ḍumo fiearịye anị ị́rị́ kẹngẹ, kọkọma Tamụnọ Ḅe nemi, pịkị Jizọs Kraịst ị́ se fịrịmaḅọ ḅe na nemi mị-ẹ.

⁴À sẹkiri ị́ya boma mị ḍiepakụmasam; ị́ se ị̀ pịrị nwẹngị nwọ ḅẹ fịrịma à nwẹngị sosam.

⁵Ḍaḅọ! Boma se ị́ tọrụkuḅu ḅụ ị̀ pịrị mịọkụ, àrị ị́rị́ na nyana gbọrị boma mị, tomonikiri mị ma tẹmẹka sịkị ngịsị.

⁶“Tomonikiri mị ḅie ị́ se ị̀ pịrịapụ ma à mịẹse ini ị́ nemisam. Ị́rị́ ini nyanamẹ, se ị́rị́ ini seni ị̀ pịrịmẹ. Ini ị́ya ọkwẹịn mị ḍukoye nwọ mịẹsam,

⁷se mịọkụ ini nemisam na ị́ se ị̀ pịrịye goyegoye ị́ ḅara ḅụ anị ḅomẹ.

⁸Ị́ se ị̀ fịrịma oku à daḅọrọma ini pịrịsam, se ini anị ọkịsam ini nemimẹ na kọkọmaye-ẹ àrị ị́ ḅụ ḅụ ḅomẹ, ini pịkị ḅerenimẹ na ị́rị́ ị̀ se fịrịmamẹ.

⁹“À tẹkẹ ini pịrịmẹ. À tẹkẹ tomonikiri mị pịrịkẹ, ọkụma ị́ seni ị̀ pịrịapụ ma-ẹ, anịatịḅị ị́rị́ ini nyanamẹ.

¹⁰À nyanaye mamgba ị́yaye-ẹ, pịkị ị́ nyanaye mamgba ị̀yaye-ẹ, ị̀ya boma mị pịkị inia ḅie anịa ḅụ ḍiepakụmasam.

¹¹Se mịọkụ àrị ị́ damaḅoaḅẹ; à ḅarị mịọkụ tomonikiri mị ḅie ofori-ẹ, ọkụma ini tomonikiri mị ḅie ini omi-ẹ. Fịafịa Ḍaḅọ! Ị́ya ẹrẹ mị ḅe kụrọ ḅụ ini kụrọma anị ị́ seni ị̀ pịrị ẹrẹ mị, mịẹse ini gbọrịḅụ simeḅịa ḅara, ị́rị́ na ị̀rị̀ na gbọrịḅụ simeọkụ mị.

¹²Àrị ini na sime sịkị, ị́ya ẹrẹ mị ḅe kụrọ ḅụ gbọrịye sọ ini laka ḅara ḅụ àrị ini kokomẹ, anị ị́ se ị̀ pịrị ẹrẹ mị-ẹ. Àrị ini ḍikiḍikimẹ, anị gose gbọrịḅọ sọ inia ḅie fakẹ, ori fa gose ḅo ḅọ ḅe sikima ọkụma—mịẹse fịafịa ḍiri mị ḍukoye mị ḅo kọkọmaye sọḅịa ọkụ.

¹³Se mịọkụ àrị ị́ damaḅoaḅẹ, à pịkị tomonikiri mị ḅie mayema nwọ ḍukoaḅẹ mịẹse ini inia kuḅiemgbọlụma ḅie ị̀ya ḅieḅẹlẹ nwọ nyana ḅeinmaḅịa ḅara.

¹⁴Ị́ya oku mị à nwọse ini pịrịmẹ, se tomonikiri mị taraka se ini wẹrịmamẹ, anịatịḅị ini sime tomonikiri mị pịrịkẹ, ị̀rị̀ sọ sime tomonikiri mị nwọ pịrịka ọkụ mị.

¹⁵Àrị ị́ ḅara ḅikẹ na ị́ tomonikiri mị ḅie ini ọkịso, ọkụma à kọkọma ḅimẹ na ḅereni ma Si Ḅọ Ḅe ye se ini lama.

¹⁶Ị̀rị̀ à nwọ sime tomonikiri mị pịrịka ḅara mị, anị ini sọnị pịkị sime tomonikiri mị pịrịka ọkụ-ẹ.

¹⁷Kọkọmaye mị nwọse ini mịẹfịafịama ị́ ḅụ pịrị; ị́ya ọkwẹịn mị anị kọkọmaye mị-ẹ.

¹⁸Àrị ini seni tomonikiri mị fịrịmasam, ị́ ị̀ seni tomonikiri mị fịrịma ọkụ mị.

¹⁹Se ini gose àrị ị̀ ḅụ mịẹfịafịama ị́ pịrịmẹ, mịẹse ini sọnị kọkọma inia ḅụ mịẹfịafịama ị́ pịrịḅịa ọkụ.

²⁰“À tẹkẹ ini kẹngẹ nwọ pịrịkẹ, à pịkị tẹkẹ inia oku ḅụ ḅọrọ se ị̀ ḅereniḅịa apụma sọnị nwọ pịrịmẹ.

²¹À tẹkẹmẹ na inimgba gbọrịḅụ sime. Ḍaḅọ! Ye ini mịna ḅie sime, ị́rị́ ị̀ ḅie sime ị̀rị̀ pịkị ị́ ḅie simeọkụ mị. Ye ini gbọrịḅụ sime, mịẹse tomonikiri mị ḅereniḅịa ḅara na ị́rị́ ị̀ seni fịrịmamẹ.

²²Ị́ se ị̀ pịrị gbọrị boma mị à nwọse ini pịrịmẹ, mịẹse ini gbọrịḅụ simeḅịa ḅara, anị ị́rị́ na ị̀rị̀ na nwọ gbọrịḅụ simeọkụ mị:

²³Ị̀rị̀ inia ḅie omi-ẹ, ị́rị́ pịkị ị̀ ḅie omi-ẹ, mịẹse ini ḅeinma gbọrịḅụ simeḅịa ọkụ, mịẹse tomonikiri mị nemi na ị́rị́ ị̀ se fịrịmamẹ, na ị́ pịkị ini ḅẹlẹmamẹ, ị́ ị̀ ḅẹlẹma ọkụ mị.

²⁴“Ḍaḅọ! Ị́rị́ mị ini seni ị̀ pịrịsaye-ẹ, se à ḅimẹ ini à sime anga ḅụ pịkị sime, mịẹse ini ị̀ya boma mị ọrịḅịa ḅara, ị́ se ị̀ pịrị boma mị; anịatịḅị ị́ ị̀ ḅẹlẹmamẹ tomonikiri mị ma pakaka sịkị ngịsị.

²⁵Karakaraye mịẹmịẹ Ḍaḅọ! Tomonikiri mị anị ị́ nemikẹ, ọkụma àrị ị́ nemimẹ, mịna apụma pịkị nemimẹ na ị́rị́ ị̀ se fịrịmamẹ.

²⁶À mịẹse ini ị́ nemisam, à pịkị ọkọ mịẹma munḅịa, mịẹse ị́ nyana ị̀ pịrị ḅẹlẹma mị inia ḅie simeḅịa ḅara, ị̀rị̀ sọnị pịkị inia ḅie simeḅịa ọkụ.”