Read kirikeni Jọn 19 Bible Online

Jọn 19 - kirikeni bible

Jọn 19

¹Anịsịkị Paịlet ḅe Jizọs Ḅe ọkị se ò fomumẹ.

²Owuni ma ịga se amanyanaḅọchu nwọ ḍori se ò chiramẹ; ini awụwụ koroḅụchụaye nwọse ọ̀ chụamẹ

³se ọ̀ damaḅo se nwọ ḅẹmẹ, “Juapụ amanyanaḅọ ḍumo ḅọlọma!” Se ini mun ọ̀ tọrụ ḅụrọmẹ.

⁴Paịlet ḅe pịkị gbọrị sịkị se pakamun se nwọse tomonikpo mị ḅẹmẹ, “Ḍiki, àrị ọ̀ pakụmaḅo ọ́ pịrịḅịa, mịẹse ó nemi na à gose ḅẹrẹsi pẹlẹ ọ̀ pịrịḅịaye à nwọ ọrịkẹ.”

⁵Anị Jizọs Ḅe nụngọ pakaye-ẹ, ịgaga amanyanaḅọchu mị chira se pịkị awụwụ koroḅụchụaye mị nwọ chụa waraḅẹ. Paịlet ḅe nwọse ini ḅẹmẹ, “Ḍiki! Ḅe tomoniḅọ ḅe-ẹ!”

⁶Tịḅịnị agbamịẹapụma na Oputẹkẹwarị koruapụma na Ori ọrị sịkị, ini olokumẹ, “Ò se mgbẹsẹchịn ḅụ ḅakụḅaa! Ò se mgbẹsẹchịn ḅụ ḅakụḅaa!” Paịlet ḅe nwọse ini ḅẹmẹ, “Anịọkụma ómine Ori ọkị se Ò se mgbẹsẹchịn ḅụ ḅakụḅaa. À gose ḅẹrẹsi pẹlẹ Ọ̀ pịrịḅịaye àrị ọrịkẹ.”

⁷Tomonikpo mị nwọse ọ̀ pẹkẹrẹmẹ, “Ọ̀ fị gbẹịnmẹ nwọ ḅẹ gbọrị oloko wa nwọ nyanamẹ, anịatịḅị Ọ̀ nwọ ḅẹmẹ, na Ori Tamụnọ Tọkụ-ẹ.”

⁸Paịlet ḅe mịn mị naa sịkị, anị pịkị ọ̀ ḅalafamatẹịnmẹ.

⁹Ò vinpịkị amanyanaḅọ warị ḅie mị mun mẹ, se Jizọs Ḅe gbelamẹ, “Nde anga Ị́ ḅo?” Ọkụma Jizọs Ḅe ọ̀ pẹkẹrẹkẹ.

¹⁰Paịlet ḅe nwọse Ọ̀ ḅẹmẹ, “Ị́ ọkwẹịn ị̀ pịrị ẹka? Se ḅiekoroma, à kụrọ nyanamẹ, Ị́ ḅụ ḅarasin, pịkị mịẹse ini Ị́ se mgbẹsẹchịn ḅụ ḅakụḅaa.”

¹¹Jizọs Ḅe pẹkẹrẹmẹ, “Ị́ ị̀ ḅụ kụrọ nyanamẹ anịatịḅị Tamụnọ Ḅe anị seni ị́ pịrịmẹ. Anịẹrẹchị ị̀ ḅọrọma ị́ pịrị tomoniḅọ ḅe mị sitẹịn si nwọ mịẹsaye-ẹ.”

¹²Paịlet ḅe mịn mị naa sịkị, ọ̀ ḅọkọ ḍọkịmẹ Jizọs Ḅe ḅụ ḅarasinḅịa ẹrẹchị. Ọkụma tomonikpo mị ḅarị olokumẹ, “Ị́ nemikase Ọ̀ ḅụ ḅarasinmẹ ḅẹḅẹ, anị mị fiemẹ na ị́rị́ Sẹdaḅọ ḅe ikiaḅọkẹ! Amanyanaḅọ nwọse mịnaḅụ chịnḅọ goyegoye iniḅọ nyana ḅereni Sẹdaḅọ ḅe pịrịkẹ!”

¹³Paịlet ḅe mà ọkwẹịn ma naa sịkị, ò Jizọs Ḅe ọkị nụngọ pakamẹ se ḅẹrẹkọnḅọ ḅe ịkasịe ọgọnọ simemẹ, amanyanaḅọ warị mị ḅie ini “Ḍụparị se mịẹ Mọnịmọnị nyọ nwọse chịn nyọ mị.” (Hibru ọkwẹịn ḅụ ini nwọse anị chịnmẹ “Gabata.”)

¹⁴Anịsịkị anị mun karakarama eneogboin la-ẹ tọn aḅẹ, Saḅaḅọrọ Alalị mị fịḅịa ene mị ḍukoma ene mị ḅụ. Paịlet ḅe nwọse tomonima ḅẹmẹ, “Ọ́mịna amanyanaḅọ Ḅe, Ḅe Ori-ẹ!”

¹⁵Ini pịkịna olokumẹ, “Ọ̀ ḅaa! Ọ̀ ḅaa! Ò se mgbẹsẹchịn ḅụ ḅakụḅaa!” Paịlet ḅe nwọse ini gbelamẹ, “Ó ḅi àrị ọ́mịna amanyanaḅọ Ḅe se mgbẹsẹchịn ọgọnọ ḅakụḅaa?” Tịḅịnị agbamịẹapụma pẹkẹrẹmẹ, “Wa jịn amanyanaḅọ nyanakẹ Sẹdaḅọ ḅe sikima ọkụma!”

¹⁶Anịsịkị Paịlet ḅe Jizọs Ḅe ḅọrọma ini pịrịmẹ, ini Ò se mgbẹsẹchịn ọgọnọ ḅakụḅaaḅịa ẹrẹchị. Anị ini Jizọs Ḅe ọkị inia ḅara wẹrịye-ẹ.

¹⁷Ọ̀ paka mun oria mgbẹsẹchịn mị nwọ pụra mun “Kukure Nyọ,” mị lamẹ, ini se anị chịn ḅara. (Hibru ọkwẹịn ḅụ “Gọlgọta” anị anịa ẹrẹ-ẹ.)

¹⁸Anịnyọ ini ò se mgbẹsẹchịn ọgọnọ ḅakụḅaamẹ se ini pịkị jịn mama apụ se mgbẹsẹchịn ma ọgọnọ ḅakụḅaamẹ, anga anga ḅụ, anịsịkị Jizọs Ḅe inia ogboku simemẹ.

¹⁹Paịlet ḅe ye gịẹịn mgbẹsẹchịn mị ḅụ oḅolomẹ, mị ọ̀ gịẹịn oḅoloye mị-ẹ: “Jizọs Nazarẹtḅọ Ḅe, Juapụ Amanyanaḅọ Ḅe.”

²⁰Tọn apụ mịn mị kịẹnmẹ, anịatịḅị ini Jizọs Ḅe se mgbẹsẹchịn ọgọnọ ḅakụḅaa nyọ mị opuama mị na sasakẹ. Gịẹịnye mị Hibru na, Latịn na, pịkị Grik ọkwẹịn ḅịpị ḅụ na anị omi-ẹ.

²¹Juapụ tịḅịnị agbamịẹapụma nwọse Paịlet ḅe ḅẹmẹ, “Juapụ Amanyanaḅọ nwọ gịẹịn ma, anịnakaraka, ḅe ḅọ ḅe nwọ ḅẹmẹ, ‘Ị̀rị̀ Juapụ Amanyanaḅọ-ẹ.’”

²²Paịlet ḅe pẹkẹrẹmẹ, “À gịẹịnsaye mị À gịẹịnsam.”

²³Owuni ma Jizọs Ḅe se mgbẹsẹchịn mị ọgọnọ ḅakụḅaa so sịkị, ini oria ḅụchụayema ọkị se àrị se pẹkẹrẹ pẹkẹrẹ ḅụ inein-a pẹkẹrẹ nwọ ḍiamẹ, gbọrị owuniḅọ gbọrị pẹkẹrẹ gbọrị pẹkẹrẹ nwọ ọkịmẹ. Ini pịkị koroḅụchụaye mị ọkịmẹ, gbọrị ḅụ ḍori ḅịtẹ ini nwọse gbin ḅụchụaye mị, chụrọma nyọ anịa ḅụ ofori-ẹ.

²⁴Owuni ma nwọse jịnḅọ jịnḅọ ḅẹmẹ, “Ó ye wa anị kan ma; ó ye wa ịkịan wakị se anị nyanaḅịa ḅọ nwọ nemi.” Mịn mị pakamẹ mịẹse fịafịa ḍiri mị ḅo kọkọmaye sọḅịa ḅara: “Ini ị̀ya ḅụchụayema nwọ ḍiama ọkịmẹ inia ogboku ḅụ, se ị̀ya koroḅụchụaye mị gose ịkịan wakịmẹ.” Mịn mị anị owunima mịẹye-ẹ.

²⁵Jizọs Ḅe na kpekima mgbẹsẹchịn mị anga chịẹ apụma, anị nyọngọrọma na, nyọngọrọ nụmbụrarọ ma na, Kilopas ta Meri ma na, pịkị Meri Magdalin ma na-ẹ.

²⁶Jizọs ḅe nyọngọrọma na ọ̀ ḅẹlẹma ọḅụḍukoḅọ ḅe na anịnyọ chịẹ simeọkụ nwọ ọrịmẹ, anị ọ̀ nwọse nyọngọrọma ḅẹye-ẹ, eremeniḅọ, “Ḅe ị́ nịa ḅe-ẹ.”

²⁷Anịsịkị ọ̀ nwọse ọḅụḍukoḅọ ḅe ḅẹmẹ, “Ma ị́ nyengi ma-ẹ.” Anịsịkị mị ḅụ sakị ọḅụḍukoḅọ ḅe árị ọkị se mun oria warị angamẹ.

²⁸Jizọs Ḅe ò nemimẹ na anị ḅo nwọ lasasịkị, yegoyegoye karasam; mịẹse fịafịa ḍiri mị ḅo kọkọmaye sọḅịaye gose Ọ̀ nwọ ḅẹmẹ, “Ị̀ pụkọ samịnasam.”

²⁹Gbọrị bọlị anịnyọ simemẹ, yelaka iru ḅie ḅeinmẹ, ini sapo nwọ chịnye se iru mị ḅie sumẹ, anị se hisọp chịn ịkpangị ḅụ sụka, se anị deki chịẹma Ọ̀ ḅịpịpẹkẹrẹ ma lamamẹ.

³⁰Jizọs Ḅe iru mị ḅu se nwọ ḅẹmẹ, “Fasam!” Anịsịkị Ori Ọ̀ tịḅịtu se fịmẹ.

³¹Anịsịkị Ju ḅẹrẹtọn apụma Paịlet ḅe ḅara ḅimẹ na ò ḅereni ini pịrị ini mgbẹsẹchịn mị ọgọnọ ḅakụḅaasa apụma ḅụọma nwọ anyịma, se mgbẹsẹchịn ma ọgọnọ ini sin koroma. Mịn mị ini nwọ mịẹmẹ, anịatịḅị anị ene mị ḅeketuḅo sọnọ-a ḍin ene-ẹ, ini ḅikẹ ojuma mgbẹsẹchịn ma ọgọnọ sime mun Ịnyọsara Ene mị la, ḅoarị Ịnyọsara Ene mị nwọ sosikima fịafịamẹ nwọ ḅẹ warasịkị.

³²Anị owunima mun tatarịḅọ ḅe ḅụọma anyịmaye-ẹ, pịkị ísí ḅọ ḅe ḅụọma na, ini se chụa Jizọs Ḅe na gbọrị ḅụ mgbẹsẹchịn ọgọnọ ḅakụḅaa apụma.

³³Ọkụma ini ḅo Jizọs Ḅe lasịkị ini ọrịmẹ na Ọ̀ fịḅọrọsam, anị ini ḅarị Ọ̀ ḅụọma nwọ anyịmakaye-ẹ.

³⁴Anị simeọkụ simeọkụ sọnị, owunima ḅie gbọrịḅọ oria ḅẹkẹrẹ nwọse Jizọs Ḅe agaga temi chumẹ, se anị kirikiri pulo na mengi na sara pakaḅomẹ.

³⁵(Mịn mị paka ọkụ ọrịḅọ ḅe anị ḍukomẹ mịẹse ómine sọnị anị ḅereniḅịa ọkụ. Ò ḍukoye mị kọkọmaye-ẹ, ọ̀ pịkị nemimẹ na kọkọmaye mị ò ḍukoye-ẹ.)

³⁶Mịn mị mịẹmẹ, mịẹse fịafịa ḍiri mị ḅo kọkọmaye sọḅịa ḅara: “Oria ịmgbema ḅụ gbọrịye sọnị anyị ẹkẹ.”

³⁷Fịafịa ḍiri mị pịkị jịnye nwọ ḍukomẹ, “Tomoni Ò ḍikiḅịa, ini ḅẹkẹrẹ se temi ḅọ Ḅe.”

³⁸Mịn mị ḅọrọ sịkị Josẹf, Arịmatia ḅụ ḅo ḅọ ḅe, Paịlet ḅe ḅara ḅimẹ nwọfa, ori ineda Jizọs Ḅe oju mị nwọ ọkịḅịa otuḅo. (Josẹf ḅe Jizọs ọḅụḍukoḅọ-ẹ, ọkụma kikima ḅụ-ẹ, anịatịḅị ò Ju ḅẹrẹtọn apụ nwọ ḍikiḅalafamẹ.) Paịlet ḅe ḍuko ọ̀ pịrịmẹ na ori ineda oju mị ọkịḅịa, anị Josẹf ḅe mun se anị ọkị soye-ẹ.

³⁹Nikodimọs ḍin se gbọrị sịkị Jizọs Ḅe damamun ḅọ ḅe Josẹf ḅe ḅụ sọ mun mẹ, Naịra oyiasi pembe ye laḅịa ye kụnụma olo ọ̀ nwọ ọlọ chụa mun mẹ, maah na alọis na gwaye.

⁴⁰Mama owuapụma Jizọs Ḅe oju mị ọkị se lọkọ ḅịtẹ nwọse anị fangalamẹ ye kụnụma olo mị na, anịatịḅị mị ḅara mị anị Juapụma ḍipiḅịa ojumịnị nwọ tẹlịma tẹlịma ọkụ-ẹ.

⁴¹Ini Jizọs Ḅe ḅaa nyọ mị ḅụ ozu omi-ẹ, anịa ḅie ịwọma mịẹ iḍupu omi-ẹ, ma ini anịa ḅie jịn sịkị nweni ḍipikaye.

⁴²Juapụma Ịnyọsara Ene mị ḍukoma ene-ẹ nwọ ḅẹ warasịkị, anịatịḅị iḍupu mị pịkị kpeki waraḅẹ nwọ ḅẹ sịkị, ini Jizọs Ḅe oju mị seni anịa ḅie ḍipimẹ.