Read kirikeni Jọn 20 Bible Online

Jọn 20 - kirikeni bible

Jọn 20

¹Chọchị ene dede funfun ḅụ, enema finjika simeogbo, Meri Magdalin ma so iḍupu mị damamunmẹ, se ọrịmẹ na, anịa ḅọkọ sime ḍụparị mị ini mbimbilesinsam.

²Á mangị Saịmọn Pita ḅe na pịkị ísí ọḅụḍukoḅọ, anị Jizọs Ḅe ḅẹlẹmaḅọ ḅe na damamun se ḍuko ini pịrịmẹ, “Ini iḍupu mị ḅie Nyanaḅọ Ḅe dekisinsam, ini ò se koroma anga wa nemikẹ!”

³Anịsịkị Pita ḅe na pịkị ísí ọḅụḍukoḅọ ḅe na paka iḍupu mị damamunmẹ.

⁴Ini mama apụma mangị ma mun mẹ, ọkụma ísí ọḅụḍukoḅọ ḅe mangị Pita ḅe ḅọrọ se tatarị mun iḍupu mị lamẹ.

⁵Ò tu ḅie ḍiki se lọkọ ḅịtẹma ọrịmẹ, ọkụma ori anịa ḅie sọ munkẹ.

⁶Saịmọn Pita ḅe oria ọḅụju ḅụ ḅomẹ se dada iḍupu mị ḅie sọ mun mẹ. Se lọkọ ḅịtẹma anịnyọ sara simeọkụ nwọ ọrịmẹ

⁷pịkị ini se Jizọs Ḅe tịḅị fịna ḅịtẹ mị na anị lọkọ ḅịtẹma na gbọrị anga simekẹ, ọkụma sikima ngẹrị kpo sime waraḅẹ.

⁸Anịsịkị ísí ọḅụḍukoḅọ ḅe, tatarị ḅo iḍupu mị laḅọ ḅe sọnị ḅie sọmun, ọrị se pịkị ḅerenimẹ.

⁹(Ini pa pịkị Fịafịa ḍiri mị ḍukoye mị kaịnḅokẹ na ọ̀ fị ḅụ sịsẹḅịa.)

¹⁰Anị ọḅụḍukoapụma vinpịkị warị mun ye-ẹ.

¹¹Meri ma iḍupu mị anga ḅụ chịẹsime se owuaḅẹ. Á pa owuarịogbo, á tu iḍupu mị ḅie ḍikimẹ

¹²se anịnyọ mama enjẹlapụ á nwọ ọrịmẹ, ḅịaḅịa ḅụchụaye ini nwọ chụamẹ, Jizọs Ḅe oju mị sime anga ḅụ kpọnjị sime waraḅẹ, gbọrịḅọ tịḅịju ḅụ, ísíḅọ ḅe pịkị ḅụọchuku ḅụ.

¹³Ini nwọse á gbelamẹ, “Eremeniḅọ, ị́ che gose owu-ao?” Á pẹkẹrẹmẹ na, “Ini ị̀ Nyanaḅọ Ḅe nwọ dekisinsam, ini Ò se koroma nyọ à nemikẹ!”

¹⁴Anịsịkị, á vinpịkị kelema Jizọs Ḅe anịnyọ chịẹ simeọkụ nwọ ọrịmẹ, ọkụma á nemikẹ Jizọs Ḅe Ori ọkụ.

¹⁵Jizọs Ḅe nwọse á gbelamẹ, “Eremeniḅọ, nde ị́ gose owuarịye? Ị́ tụḅọ ḍọkị-ao?” Á koromamẹ na ori ozu mị ḍikiḍikiarịḅọ ḅe-ẹ, anị á nwọse ọ̀ ḅẹye-ẹ, “Sẹnịḅọ, ị́rị́ nemikase ò deki sinmẹ ḅẹḅẹ, ị́ ò se koroma nyọ mị ḍuko ọkọmụ, se à mun Ori ọkị soḅịa.”

¹⁶Jizọs Ḅe nwọse á ḅẹmẹ, “Meri!” Á pịkị Ọ̀ da se nwọ ḅẹmẹ, Hibru ọkwẹịn ḅịpị ḅụ, “Rabonaị!” (Mịn mị fiearịye “Yeḍieḅọ.”)

¹⁷Jizọs Ḅe nwọse á ḅẹmẹ, “Ḅara se ị̀ lamama anịatịḅị ma à vinpịkị iwo Ḍaḅọ Ḅe damamunkẹ. Ọkụma ị̀ya owuapụ mịnapụma damamun se ḍuko ini pịrị na à vinpịkị iwo Ḍaḅọ Ḅe damamun-aḅẹ, ị̀ Ḍa pịkị inia Ḍaḅe, ị̀ Tamụnọ pịkị inia Tamụnọ Ḅe.”

¹⁸Anị Meri Magdalin ma so mun ḍuko ọḅụḍukoapụma pịrịye-ẹ, na á Nyanaḅọ Ḅe ọrịmẹ, se ò ḍuko á pịrịye nwọ ḍuko ini pịrịmẹ.

¹⁹Anị Chọchị ene mị ḅe saso ḅiri, enesan ḅịpị ḅọrọ, ọḅụḍukoapụma pịkị koḅirima se ḅọkọ ma palị inia ḅụ ma pịrịmẹ, anịatịḅị Ju ḅẹrẹtọn apụma inia ḅalafamamẹ. Anịsịkị Jizọs Ḅe sọ ḅo inia ogboku chịẹsime, se nwọ ḅẹmẹ, “Deinma sime ọ́ pịrị.”

²⁰Ọ̀ mịn mị ḅẹ so sịkị, ori ọ̀ ḅarama na oria agaga na nwọse ini ḍiemẹ. Ọḅụḍukoapụma ḅieḅẹlẹ inia ḅie ḅeinmẹ Nyanaḅọ Ḅe nwọ ọrị ḅụ.

²¹Jizọs Ḅe pịkị nwọse ini ḅẹmẹ, “Deinma sime ọ́ pịrị. Ḍaḅọ Ḅe nwọ ị̀ se fịrịma ḅara mị, anị àrị ó se fịrịmarị ọkụ mị-ẹ.”

²²Ori ọwụ se inia ọgọnọ sara se nwọ ḅẹmẹ, “Ọ́ Fịafịa Tẹmẹ Ḅe ọkị.

²³Ó tomoni-a si ḅụ ḅarasin ini pịrịmẹ ḅẹḅẹ, ini ḅarasin ini pịrịsam, ọ́ ḅarasin ini pịrịkẹ ḅẹḅẹ, ini ḅarasin ini pịrịkẹ.”

²⁴Oyimaịn ọḅụḍukoapụ finji ma ḅie gbọrịḅọ, Tọmọs (Maịn ịkpatụ awọ ḅụ pakaḅo ḅọ ḅe), ori ini na ofori-ẹ Jizọs Ḅe ḅo sịkị.

²⁵Anị ísí ọḅụḍukoapụma ḍuko ọ̀ pịrịye-ẹ, “Nyanaḅọ Ḅe wa ori ọrịsam!” Tọmọs ḅe nwọse ini ḅẹmẹ, “Ọ̀ ḅarama ini churu ma se ḅakụ nyọma à nwọ ọrị, ị̀ ḅaratụmgbalị se arịa ḅie chuka simeogbo, pịkị oria agaga ḅie na, à ḅereni ẹkẹ.”

²⁶Sọnọma ḍin ḅọrọ sịkị, ọḅụḍukoapụma pịkị koḅirima se ḅọkọ palị inia ḅụ ma pịrịmẹ, Tọmọs ḅe ini na omi-ẹ. Ọkụma Jizọs Ḅe ḅo inia ogboku chịẹ se nwọ ḅẹmẹ, “Deinma sime ọ́ pịrị.”

²⁷Anị Jizọs Ḅe nwọse Tọmọs ḅe ḅẹye-ẹ, “Ị́ ḅaratụmgbalị se mịnyọ chu, se ị̀ ḅarama ḍiki; anịsịkị ị́ ḅara ịsụn pakụma se anị se ị̀ya agaga ḅie chu. Ḅarị ḅẹrẹpikima, ọkụma ḅereni nyana.”

²⁸Tọmọs ḅe ọ̀ pẹkẹrẹmẹ, “Ị̀ Nyanaḅọ, pịkị ị̀ Tamụnọ!”

²⁹Jizọs Ḅe nwọse ọ̀ ḅẹmẹ, “Tọmọs ị́ ḅerenisa, ị́ ị̀ ọrịye gose? Inia ḅieḅẹlẹarị ọkụ ḍiki, ḅẹlẹma sime ị̀ ọrịka se ị̀ ḅereni apụma pịrị!”

³⁰Jizọs Ḅe tọn-a jịn-a ḅụgbiripuma fịrị ọ̀ nwọ nwẹngịmẹ oria ọḅụḍukoapụma tọrụkuḅu ḅụ, anị mị ḍiri mị ḅie gịẹịnkaye.

³¹Ọkụma mayema gịẹịnmẹ, mịẹse ó ḅereniḅịa ḅara na Jizọs Ḅe ori anị Mẹsaya Ḅe-ẹ, Tamụnọ Tọkụ Ḅe-ẹ, mịẹse ọ́ nyana ḅereni mị ḅụ ọ́ ḅọrọ ḍumo nyanaḅịa ḅara.