Read kirikeni Jọn 21 Bible Online

Jọn 21 - kirikeni bible

Jọn 21

¹Mịn mị ḅọrọ sịkị, Jizọs Ḅe pịkịna gbọrị sịkị se ọ̀ ḅụ se oria ọḅụḍukoapụma ḍiemẹ, Taịberias Ḍapa mị ḅụ. Mị ọ̀ wẹrị anị mịẹ ọkụ-ẹ.

²Saịmọn Pita ḅe na, Tọmọs (Maịn ịkpatụ awọ ini nwọse chịnḅọ ḅe) na, Natanịẹl (anị Kana Galili sẹ ḅọ ḅe na), Zẹbidi owuapụ awọma na pịkị jịn mama Jizọs Ḅe ọḅụḍukoapụ na inimgba koḅirima simemẹ.

³Saịmọn Pita ḅe nwọse ísí ọḅụḍukoapụma ḅẹmẹ, “À kọn mun aḅẹ.” Ini nwọse ọ̀ ḅẹmẹ, “Wa ị́rị́ na munḅịa.” Anị ini mun gbọrị arụ ḅụkụlọ se pakụmaye-ẹ, ọkụma anị bebe ḍin mị mgba gbọrịye sọnị ini kunkẹ.

⁴Ịrụa mị pakarị sịkị, Jizọs Ḅe mengi aka sịkị ḅụ chịẹsimemẹ, ọkụma Jizọs Ḅe ori ọkụ ọḅụḍukoapụma ini nemikẹ.

⁵Anịsịkị ọ̀ nwọse ini ḅẹmẹ, “Asẹmẹnị, ómine inji nyana?” Ini nwọ pẹkẹrẹmẹ, “Wa inji nyanakẹ.”

⁶Ọ̀ nwọse ini ḅẹmẹ, “Ómine arụ mị ḅụ amaḅara anga ọ́mịna ịgbọ mị nwọ koroma, se ọ́ tọn-a ye kunḅịa.” Anị ini ịgbọ mị nwọ koromaye-ẹ, se ḅarị ineda anị jine arụ mị ḅie sẹịnkẹ, anịatịḅị ini tọn-a inji nwọ kunmẹ.

⁷Jizọs Ḅe ḅẹlẹma ọḅụḍukoḅọ ḅe nwọse Pita ḅe ḅẹmẹ, “Nyanaḅọ Ḅe ori-ẹ!” Pita ḅe naamẹ na Nyanaḅọ Ḅe ori-ẹ nwọ ḅẹ sịkị, ori oria ọgọnọ gbana ḅụchụaye mị nwọse ọ̀ ḅụ gbẹịnmẹ (anịatịḅị ọ̀ papaḅụ sinmẹ,) se fuku mengi mị ḅie koromẹ.

⁸Ísí ọḅụḍukoapụma arụ mị se ḅo anga lamẹ se inji ḅie ḅein ịgbọ mị nwọ fọnọ simemẹ. Ini kiri mị na opuma sasakẹ, kuḅu-a sọnọasi pembe ye ini nwọse anị wẹrị sikimamẹ.

⁹Ini koroḅo kiri ọgọnọ ḅụọ chịẹma sịkị, ini ḅụrọ ọrịmẹ anịnyọ ḅụ inji na fịturu na anịa ọgọnọ omi-ẹ.

¹⁰Anịsịkị Jizọs Ḅe nwọse ini ḅẹmẹ, “Mịọkụ ó kun injima ḅụ ọ́ daye se ḅo.”

¹¹Saịmọn Pita ḅe arụ mị ḅụkụlọmẹ se inji ḅein ịgbọ mị jine mun anga lamẹ. Arịmgba inji-a sọnọmasi oyi finji na tẹrẹ-a inji lamẹ; àrị mị ḅara mị se ḅakamẹ nwọ ḅẹ sọnị, ịgbọ mị kankẹ.

¹²Jizọs Ḅe nwọse ini ḅẹmẹ, “Ó ḅo yefị.” Anịsịkị ọḅụḍukoapụma ḅụ gbọrịḅọ sọnị dadama Ò gbelakẹ, “Ị́rị́ tụḅọ?” anịatịḅị ini nemimẹ na Nyanaḅọ Ḅe ori-ẹ.

¹³Se Jizọs Ḅe saḅa mun, fịturu mị ọkị, se anị seni ini pịrịmẹ; anị inji mị ḅụ sọnị ọ̀ mịẹ ọkụ-ẹ.

¹⁴Mịn anịọkụma tẹrẹ karama sịkị mị-ẹ Jizọs Ḅe ọ̀ ḅụ seni oria ọḅụḍukoapụma ḍie ini fịḅụ ọ̀ sịsẹma so sịkị.

¹⁵Ini ye mị fị ḅọrọ so sịkị, anị Jizọs Ḅe nwọse Saịmọn Pita ḅe ḅẹye-ẹ, “Saịmọn Jọn ya, ị́ ị̀ ḅẹlẹmatẹịn mịnapụma ị̀ ḅẹlẹma ḅara nẹngị?” Ọ̀ nwọ pẹkẹrẹmẹ, “Iin Nyanaḅọ, ị́ nemimẹ na àrị ị́ ḅẹlẹmamẹ.” Jizọs Ḅe nwọse ọ̀ ḅẹmẹ, “Ị̀ya anana awọma ḍikiḍiki.”

¹⁶Maịn karama sịkị ḅụ Jizọs Ḅe pịkị nwọse ọ̀ ḅẹmẹ, “Saịmọn Jọn ya, ị́ ị̀ ḅẹlẹma?” Ọ̀ nwọ pẹkẹrẹmẹ, “Iin Nyanaḅọ, ị́ nemimẹ na àrị ị́ ḅẹlẹmamẹ.” Jizọs Ḅe nwọse ọ̀ ḅẹmẹ, “Ị̀ya anana awọma ḍikiḍiki.”

¹⁷Tẹrẹ karama sịkị ḅụ Jizọs Ḅe nwọ ḅẹmẹ, “Saịmọn Jọn ya, ị́ ị̀ ḅẹlẹma?” Pita ḅe anị ò ḅieḅẹlẹmakẹ Jizọs Ḅe tẹrẹ karama ò gbelaye gose, “Ị́ ị̀ ḅẹlẹma nọ?” se ọ̀ nwọse ọ̀ ḅẹmẹ, “Nyanaḅọ, ị́ ye mamgba nemimẹ; ị́ nemimẹ na àrị ị́ ḅẹlẹmamẹ!” Jizọs Ḅe nwọse ọ̀ ḅẹmẹ, “Ị̀ya anana awọma ḍikiḍiki.

¹⁸Karakaraye karakaraye, à nwọ ḍuko se ị́ pịrịaḅẹ: ị́ asẹ ḅụ sime sịkị ị́ ḅụ karakarama se ị́ mun ḍọkị nyọ goyegoye nwọ mun mẹ, ọkụma ị́ ḅo olomu sịkị, ị́ ḅarama ị́ nwọ ịsụn pakụmaḅoḅịa, se jịnḅọ ye se ị́ kakaḅịa se ị́ se ị́ mun ḍọkịka nyọ nwọ munḅịa.”

¹⁹(Mịn mị ḍuko ḅụ, Jizọs Ḅe ḍiepakụmaḅẹ Pita ḅe ḅọrọ fị se boma ọkịḅo Tamụnọ Ḅe pịrịḅịa ḅara mị.) Anịsịkị Jizọs Ḅe nwọse ọ̀ ḅẹmẹ, “Ị̀ ḍuko!”

²⁰Pita ḅe nyọ ḍiki kelema se oria ọḅụju ḅụ ísí ọḅụḍukoḅọ ḅe ọrịmẹ anị Jizọs Ḅe ḅẹlẹmaḅọ ḅe—fịye fị sịkị mị ḅụ, Jizọs Ḅe ḅụ sẹrẹrẹ se ò gbelaḅọ ḅe, “Nyanaḅọ, tụḅọ ị́ se ịbafị ḅe?”

²¹Pita ḅe ori ọrị sịkị, ọ̀ nwọse Jizọs Ḅe ḅẹmẹ, “Nyanaḅọ, ḅe ḅọ ḅe kwanị?”

²²Jizọs Ḅe ọ̀ pẹkẹrẹmẹ, “À nemikase ḅimẹ na ò ḍumo sime mun à ḅoḅịa sịkị la nwọ ḅẹ ọkụma, anị mị ị́ ḅụ cheye? Ị̀ ḍuko!”

²³Anị ọkwẹịn mị wasamamẹ Jizọs ọḅụḍukoapụma ogboku ḅụ na, ḅe ọḅụḍukoḅọ ḅe ọ̀ fị ẹkẹ. Ọkụma Jizọs Ḅe ọ̀ ḅẹkẹ na ọ̀ fị ẹkẹ, ọ̀ ḅẹye anị, “À nemikase ḅimẹ na ò ḍumo sime mun à ḅoḅịa sịkị la nwọ ḅẹ ọkụma, anị mị ị́ ḅụ cheye?”

²⁴Ori anị mayema ḍuko ọḅụḍukoḅọ ḅe-ẹ, pịkị àrị gịẹịn koroma ḅọ ḅe-ẹ, wa pịkị nemimẹ na ò ḍukoye mị kọkọmaye-ẹ.

²⁵Mịọkụ, tọn-a jịn aye Jizọs Ḅe nwọ mịẹmẹ. Ini nemikase àrịmgba gbọrịye gbọrịye nwọ gịẹịn koromamẹ nwọ ḅẹ ọkụma, à koromamẹ na bebe tomonikiri mị ineda gịẹịnḅịa ḍiri ma nwọ deki ẹkẹ.