Read kirikeni Jọn 3 Bible Online

Jọn 3 - kirikeni bible

Jọn 3

¹Juapụ gbọrị tịḅịnịḅọ omi-ẹ oria ẹrẹ anị Nikodimọs, ori Farisiapụma ḅie gbọrịḅọ-ẹ.

²Gbọrị ene ḍin ḅụ ò Jizọs Ḅe damamun se nwọ seni Ọ̀ ḅẹmẹ, “Yeḍieḅọ, wa nemimẹ na ị́rị́ Tamụnọ Ḅe se fịrịma Yeḍieḅọ-ẹ. Ị́ nwẹngịarị ḅụgbiripuma fịrịma ineda nwọ nwẹngịḅịa ḅọ ofori-ẹ Tamụnọ Ḅe iniḅọ na simeka simeogbo.”

³Jizọs Ḅe pẹkẹrẹmẹ, “Kọkọmaye mị à nwọ ḍuko ị́ pịrịaḅẹ: ineda Tamụnọ Amanyanakiri mị ọrịḅịa ḅọ ofori-ẹ, ini kpoto iniḅọ yika simeogbo.”

⁴Nikodimọs ḅe gbelamẹ, “Nde sẹnịsaḅọ ini ineda kpoto nwọ yiḅịa ọkụ? Ọ̀ ḅarị ineda mun nyọngọrọma furo ḅie sọ se árị maịn karama ò yi ẹka sịkị!”

⁵Jizọs Ḅe pẹkẹrẹmẹ, “Kọkọmaye mị à nwọ ḍuko ị́ pịrịaḅẹ, na gbọrịḅọ sọnị ineda Tamụnọ Amanyanakiri mị ḅie sọ ẹkẹ, ini mengi na Tẹmẹ Ḅe na ḅụ iniḅọ yika simeogbo.

⁶Tomoniḅọ mị ojumịnị ḅụ ini iniḅọ yisam, ọkụma Tẹmẹ ḅụ ini pịkị iniḅọ yiḅịa.

⁷Anị ị́ ḅụ gbiripumama na à nwọse ị́ ḅẹmẹ na ini kpoto ị́ yiḅịa.

⁸Fọrụ mị anị fie anịa ḅụḅẹlẹ anga nwọ damẹ, anị ḅe fie mị ị́ naamẹ, ọkụma anị wẹrịḅo nyọ na anị mun-arị nyọ na ị́ nemikẹ. Anị gbọrị ḅara mị anị sime Tẹmẹ ḅụ yiḅọ goyegoye pịrị ọkụ-ẹ.”

⁹“Nde mịn mị ineda mịẹḅịa ọkụ?” Nikodimọs ḅe nwọ gbelamẹ.

¹⁰Jizọs Ḅe pẹkẹrẹmẹ, “Ị́rị́ Izrẹl ḅie opu yeḍieḅọ-ẹ, se mịn mị ị́ nemika?

¹¹À kọkọmaye ḍuko ị́ pịrịaḅẹ: wa nemiye wa nwọ ḍukomẹ, pịkị ọrịsaye nwọ ḍukomẹ, anị sọnị ọ́mịna ḅụ gbọrịḅọ sọnị oku mị nwọ ọkịkẹ.

¹²Ị́ ị̀ ḅerenikẹ à mị sẹkiri mị ḅe aye nwọ ḍuko ị́ pịrị sịkị; nde ị́ wẹrị ị̀ ḅereniḅịa ọkụ, à nemikase soḅie aye nwọ ḍuko ị́ pịrị ọkụma?

¹³Iwo soḅie munsa gbọrịḅọ sọ ma ofori-ẹ, soḅie koroḅo Tomoniḅọ Tọkụ Ḅe sikima ọkụma.”

¹⁴Eleogbo Moziz ḅe chịn ọgọnọ alapẹlẹka se mịẹ oruwu ḅe dekichịẹma ḅara mị, anị gbọrị ḅara anị ini seni Tomoniḅọ Tọkụ Ḅe dekichịẹmaḅịa ọkụ-ẹ,

¹⁵mịẹse ò ḅereniḅọ goyegoye sime gbaso ḍumo nwọ nyanaḅịa ḅara.

¹⁶Anịatịḅị Tamụnọ Ḅe tomonikiri mị ḅẹlẹma so ọkụma, ori oria gbọrị Tọkụ Ḅe se fịrịmamẹ, mịẹse ò ḅereniḅọ goyegoye fị ẹka ḅara, ọkụma sime gbaso ḍumo nwọ nyanaḅịa ọkụ.

¹⁷Anịatịḅị Tamụnọ Ḅe oria Tọkụ Ḅe se tomonikiri mị fịrịmamẹ na Ò ḅo ḅẹrẹpẹlẹḅọ sọ-ẹ, ọkụma Ò ḅo anị ḍụaḅọrọmaḅọ nwọ sọ-ẹ.

¹⁸Tọkụ Ḅe ḅereniḅọ goyegoye ini ḅẹrẹpẹlẹ iniḅọ pịrị ẹkẹ, ọkụma Ò ḅerenikaḅọ goyegoye ini ḅẹrẹpẹlẹ iniḅọ pịrị ḅọrọsam, anịatịḅị ọ̀ Tamụnọ ngẹrị Tọkụ Ḅe nwọ ḅerenikẹ.

¹⁹Mị ḅẹrẹpẹlẹ fịrị mị nwẹngị ọkụ-ẹ: enekuḅu mị tomonikiri mị ḅie ḅomẹ, ọkụma tomoni kanakana mị re nwọ ḅẹlẹmatẹịn enekuḅu mị nẹngịmẹ, anịatịḅị inia mịẹmịẹaye ma siaye-ẹ.

²⁰Siaye mịẹḅọ goyegoye taraka se enekuḅu mị wẹrịmamẹ, se enekuḅu mị nwọ damaḅo ẹkẹ, anịatịḅị ò ḅi ẹkẹ oria si mịẹmịẹaye ma ḅelepaka.

²¹Ọkụma kọkọmaye mị nwọ mịẹarịḅọ goyegoye enekuḅu mị ḅie sọ ḅomẹ, mịẹse enekuḅu mị ḍiepakụmaḅịa ḅara na Tamụnọ Ḅe ḅịpị poki ḅụ anị ori oria fịrị nwọ nwẹngịye-ẹ.

²²Mịn mị ḅọrọ sịkị Jizọs Ḅe na Oria ọḅụḍukoapụma na so Judia pẹkẹrẹ mun mẹ, ori anịanga kele ini na simemẹ se mengi se ini saramẹ.

²³Jọn ḅe sọnị Aịnọn mị ḅie mengisara simemẹ, Salim na kpeki nyọ ḅụ, anịatịḅị mengi opuma anịnyọ ḅakamẹ. Tomoni ọ̀ damamun se ò mengi se ini saramẹ.

²⁴(Anị ma ini Jọn ḅe se ikoli ḅie chuka sịkị-ẹ.)

²⁵Jọn ọḅụḍukoapụma ḅie dapụ gbọrị Juḅọ na piki-a simemẹ, Tamụnọ nemi ḅụ mengi se ḅụ mịẹfịafịama na gbolomaye ḅụ.

²⁶Anị ini Jọn ḅe damamun se nwọse ọ̀ ḅẹye-ẹ na, “Yeḍieḅọ, ị́ se ḅiekoromaka ịrụapakapaka pẹkẹrẹ Jọdan ḅụ ị́rị́ na simeḅọ ḅe ị́ ọ̀ ḅụ iḅi ḅẹrẹ nwọ ḍuko simeḅọ ḅe? Mịọkụ ori sọnị ò mengi se nweni saraḅẹ, nwenimgba ọ̀ damamun-aḅẹ!”

²⁷Jọn ḅe pẹkẹrẹmẹ, “Tomoniḅọ nyanaḅịaye ofori-ẹ, anị Tamụnọ Ḅe ḅara ḅoka simeogbo.

²⁸Ómine na mịnaḅụ na ị̀ya onyechịẹapụ-ẹ na à nwọ ḅẹmẹ na, ‘Ị̀rị̀ Mẹsaya ḅekẹ, ọkụma ini ị̀ seni ọ̀ tọrọkọ pẹlẹma fịrịmamẹ.’

²⁹Eremeniḅọ ma nyanaḅọ ḅe anị ereyaḅọ ḅe-ẹ; ereyaḅọ ikiaḅọ ḅe ò kpekima chịẹmẹ, se ḅeri se pokimẹ, ò ḅie pịkị ḅẹlẹmẹ ori ereyaḅọ ḅe pụkọ nwọ na sịkị. Mịn ḅara mị, mị ị̀ya ḅieḅẹlẹ mị wẹrị kara ọkụ mị-ẹ.

³⁰Ori ḅo yesọtẹịnḅịa, anịsịkị ị̀rị̀ à ḅarị opuma yesọ ẹkẹ.”

³¹Ọgọnọju ḅụ ḅo Ḅọḅe Ori opusọtẹịn nweni mamgba nẹngịmẹ. Sẹkiri ḅụ ḅo Ḅọḅe ò sime sẹkiri mị pịrịmẹ, pịkị sẹkiri ḅe-a ḅẹrẹ nwọ ḍukoḅịa, ọkụma soḅie ḅo ḅọ ḅe ò nwenimgba nẹngịmẹ.

³²Ori ọrịsaye na ọ̀ naasaye na mị ò ḍukoye, ọkụma oria oku ọkịḅo ofori-ẹ.

³³Ọkụma oria oku ọkịḅọ goyegoye anị mị ḅụ ḅọrọ ḍiepakụmamẹ na Tamụnọ Ḅe kọkọmaye ḍukomẹ.

³⁴Tamụnọ Ḅe seni fịrịmaḅọ ḅe Tamụnọ Ḅe ọkwẹịnma nwọ ḍukomẹ, anịatịḅị Tamụnọ Ḅe ọ̀ Tẹmẹ Ḅe se ọ̀ pịrị ḅeinmamẹ.

³⁵Ḍaḅọ Ḅe oria Tọkụ Ḅe ḅẹlẹmamẹ, se yelayelaye nwọse Oria kụrọ ḅụ wẹrịsam.

³⁶Tọkụ Ḅe ḅereniḅọ goyegoye simegbaso ḍumo nyanamẹ; Tọkụ Ḅe ḍukoye mịẹkaḅọ goyegoye ngịsị ḍumo nyana ẹkẹ, ọkụma Tamụnọ ịganị iniḅọ ọgọnọ gbana gbasoḅịa.