Read kirikeni Jọn 5 Bible Online

Jọn 5 - kirikeni bible

Jọn 5

¹Mịn mị ḅọrọ se so, Jizọs Ḅe gbọrị Tamụnọ alalị gose Jerusalẹm mun mẹ.

²Jerusalẹm ḅie, Anana Ḅọkọ mị kpekima nyọ ḅụ gbọrị sọnọ-a iḅoma nyana ḍapa omi-ẹ, Hibru ḅịpị ḅụ ini nwọse anị chịnmẹ Bẹtzata.

³Obiapụ kpo iḅoma ma ḅie sara sime waraḅẹ tọrụmgbọlụ pụn apụ na ikeliapụ na pịkị ḅụọ na ḅara na fịapụ na. [Ini mengi mị jikeḅịa sịkị koruaḅẹ,

⁴anịatịḅị sịkị na sịkị na Nyanaḅọ Ḅe enjẹlḅọ koromun ḍapa mị ḅie mengi mị pikiri pikirimẹ. Tatarị mun pikiri mengi mị ḅie koro obiḅọ goyegoye iniḅọ kọn obi kọn obi gwọmẹ.]

⁵Gbọrị owuḅọ anịanga simemẹ maịnfa kụra mesi ọ̀ nwọse obisam.

⁶Jizọs Ḅe ori anịanga ḅọlọlọ simearị ọkụ ọrịmẹ, ọ̀ pịkị nemimẹ na ḅe ḅọ ḅe ori obi ḅọlọ sịkị lasam anị ọ̀ nwọse ọ̀ ḅẹye-ẹ, “Ị́ gwọ ḅi-ao?”

⁷Obi ḅọ ḅe pẹkẹrẹmẹ, “Sẹnịḅọ, mengi mị pikiri sịkị, ị̀ se mun anịa ḅie koromaḅịa ḅọ à nyanakẹ; à ḅụkụrọma mun anịa ḅie koro-e mun-arị sịkị, jịnḅọ tatarị ị̀ ḅọrọ mun anịa ḅie korosam.”

⁸Jizọs Ḅe nwọse ọ̀ ḅẹmẹ, “Sịsẹ chịẹ, ị́ya etera deki se nwẹngị so.”

⁹Anịkirikiri tomoniḅọ ḅe ḅụ iḅimẹ; ori oria etera mị deki se nwẹngị somẹ. Mịn mị mịẹ ene mị Ịnyọsara Ene-ẹ,

¹⁰anị Ju ḅẹrẹtọn apụma ḍuko ini gwọ ḅọ ḅe pịrịye-ẹ, “Mị Ịnyọsara Ene-ẹ, anị mịna Oloko na kurakẹ ị́ ị́ya etera nwọ deki.”

¹¹Ọ̀ pẹkẹrẹmẹ, “Ị̀ mịẹ seni ị̀ ḅụ iḅi ḅọ ḅe nwọse ị̀ ḅẹmẹ, àrị ị̀ya etera deki se nwẹngị so.”

¹²Ini ò gbelamẹ, “Ị́ya etera deki se nwẹngị so nwọse ị́ ḅẹ ḅọ ḅe tụḅọ?”

¹³Ọkụma ḅụ iḅisa ḅọ ḅe ò Jizọs Ḅe nemikẹ, anịatịḅị tomoni ogbo anịanga omi-ẹ, se Jizọs Ḅe deinma inia ogboku paka somẹ.

¹⁴Mịn mị ḅọrọso sịkị, Jizọs Ḅe Oputẹkẹwarị mị ḅie ori ọrịmẹ, se nwọse ọ̀ ḅẹmẹ, “Poki, mịọkụ ị́ ḅụ iḅisam; ḅarị jịn simịẹ ma anịka ọkụma sitẹịnye ị́ ḅụ pakaḅịa.”

¹⁵Anịsịkị tomoniḅọ ḅe somun ḍuko Ju ḅẹrẹtọn apụma pịrịmẹ na Jizọs Ḅe mị ọ̀ gwọye-ẹ.

¹⁶Mịn mị ẹrẹchị ini sakị ḅụọ se Jizọs Ḅe chụamẹ, anịatịḅị ori Ịnyọsara Ene ḅụ, ḅụ gwọ fịrịnwẹngịmẹ.

¹⁷Jizọs Ḅe ini pẹkẹrẹmẹ, “Ị̀ Ḍaḅe ọ̀ sịkịmamgba fịrịnwẹngịaḅẹ, ị̀rị̀ sọnị à fịrịnwẹngịḅịa.”

¹⁸Mị ọkwẹịn mị gose Ju ḅẹrẹtọn apụma pịkị ọ̀ ḅaaḅịa ọkụ nwọ ḍọkịtẹịnmẹ, ori Ịnyọsara Ene mị ḅe Oloko mị nwọ kanmẹ nwọḅẹye kẹngẹkẹ, ọkụma ọ̀ pịkị nwọ ḅẹmẹ, na Tamụnọ Ḅe Ḍawu-ẹ, se mị ḅara mị ḅụ ọ̀ ḅụ se Tamụnọ Ḅe otomasam.

¹⁹Anị Jizọs Ḅe ini pẹkẹrẹye-ẹ, “À kọkọmaye ḍuko ọ́ pịrịaḅẹ: Tọkụ Ḅe ori ineda ngẹrị ọ̀ ḅarakuḅuye mịẹ ẹkẹ, Ḍawu Ḅe mịẹse ori ọrịye kẹngẹ mị ọ̀ mịẹarịye-ẹ. Ḍaḅọ Ḅe mịẹye, mị Tọkụ Ḅe sọnị mịẹarịye-ẹ.

²⁰Anịatịḅị Ḍaḅọ Ḅe Tọkụ Ḅe ḅẹlẹmamẹ, se ḅarana ọ̀ mịẹarịye mamgba seni Tọkụ Ḅe ḍiemẹ. Ọ̀ pịkị ọ̀ mịẹḅịa ḍụḅatẹịn mị nẹngịaye nwọse ò ḍieḅịa, se anị ijira se ómine mgba ḅụ saraḅịa.

²¹Ḍaḅọ Ḅe fịapụma sịsẹma, se ḍumo seni ini pịrị ọkụ mị, anị Tọkụ Ḅe sọnị pịkị ḍumo se ori anị se pịrị ḅi apụma pịrịḅịa ọkụ-ẹ.

²²Ḍaḅọ Ḅe ḅarana ḅẹrẹkọn pịrịarị gbọrịḅọ sọnị ofori-ẹ. Ọ̀ ḅẹrẹkọn kụrọ mị mgba seni oria Tọkụ Ḅe pịrịsam,

²³mịẹse tomoni mamgba osi seni Tọkụ Ḅe pịrịḅịa ḅara anị ini osi seni Ḍaḅọ Ḅe pịrị ọkụ mị. Osi seni Tọkụ Ḅe pịrịkaḅọ goyegoye pịkị osi seni Ḍaḅọ Ḅe pịrịkẹ, anị ò se sẹịnḅọ ḅe.

²⁴“Kọkọmaye à nwọ ḍuko ọ́ pịrịaḅẹ: ị̀ya ọkwẹịnma naa, se ị̀ se fịrịmaḅọ ḅe ḅereniḅọ goyegoye simegbaso ḍumo nyanamẹ. Ini ḅẹrẹsi kọn iniḅọ pịrị ẹkẹ, ọkụma iniḅọ fị ḅụ ḅọrọ mun ḍumo ḅie sọsam.

²⁵Kọkọmaye à nwọ ḍuko ọ́ pịrịaḅẹ: sịkị mị anị ḅoaḅẹ—sịkị mị anị ḅosam—fịapụ ma Tamụnọ Tọkụ Ḅe pụkọ naaḅịa sịkị mị, se anị naa apụma ini ḍumoḅịa.

²⁶Ḍaḅọ Ḅe na mịnaḅụ na anị ḍumo pịrịḅọ-ẹ, anị gbọrị ḅara ḅụ, ọ̀ pịkị mịẹse oria Tọkụ Ḅe sọnị pịkị ḍumo pịrịḅọ sọsam.

²⁷Ọ̀ pịkị ḅẹrẹkọn kụrọ mị seni Tọkụ Ḅe pịrịsam na ọ̀ ḅẹrẹkọn, anịatịḅị ori anị Tomoniḅọ Tọkụ Ḅe-ẹ.

²⁸Ye mịn mị ọ́ ḅụ gbiripumama; sịkị mị anị ḅoaḅẹ iḍupuma ḅie sime fịapụ mamgba ọ̀ pụkọ naaḅịa sịkị mị

²⁹se ini inia iḍupuma ḅie pakaḅoḅịa: iḅiye mịẹapụ sịsẹ mun ḍumogbamaso ḅie sọḅịa, se siye mịẹapụ ma sịsẹ se ini ḅẹrẹsi pẹlẹ ini pịrịḅịa.

³⁰“Àrị ineda ị̀ ḅarakuḅu kụrọ se mịẹḅịaye ofori-ẹ; Tamụnọ Ḅe ḍuko ị̀ pịrị ḅara mị ḅụ kẹngẹ mị à wẹrị ḅẹrẹkọn àrị ye-ẹ, anịẹrẹchị ị̀ya ḅẹrẹkọn mị karakaramẹ, anịatịḅị ị̀ ḅụḅẹlẹye à nwọ mịẹ ḍọkịkẹ, ọkụma ị̀ se fịrịmaḅọ ḅe ḅiye kẹngẹ-ẹ.

³¹“À nemikase ngẹrị onyechịẹ ị̀ ḅụ pịrị ọkụma, à ḍukoye mị kọkọmaye-ẹ nwọḅẹ ḅara ini nwọse anị ọkị ẹkẹ.

³²Ọkụma jịnḅọ omi-ẹ onyechịẹ ị̀ pịrịarịḅọ, à pịkị nemimẹ na ori ị̀ ḅụ ḍukoarịye mị kọkọmaye-ẹ.

³³Ọ́mịna okunwẹngịapụ ma ọ́ nwọse Jọn ḅe fịrịmamẹ, se ori onyechịẹ kọkọmaye mị pịrịmẹ.

³⁴Anị ḅẹkẹ na tomoniḅọ onyechịẹ ị̀ pịrịka ọkụma, à mịn mị ḍukomẹ mịẹse ọ́ pa ḍụaḅọrọma nyanaḅịa ḅara.

³⁵Jọn ḅe, kọrị se pịkị ḅiarị tọnjie simeọkụ anị ò simeọkụ-ẹ, boka kala sịkị ḅụ ó ḅimẹ ómine ò ḅie sime enekuḅu mị gose ḅieḅẹlẹ.

³⁶Ọkụma onyechịẹ ị̀ pịrịḅọ à nwọ nyanamẹ, ḍụḅatẹịn Jọn ḅe chịẹ onye mị nẹngịḅọ: à nwẹngịarị fịrịma, ị̀ Ḍaḅe se ị̀ pịrị nwẹngị nwọ ḅe-a fịrịma onyechịẹ ị̀ pịrịmẹ na ị̀ Ḍaḅe mị ị̀ fịrịmaye-ẹ.

³⁷Ori ị̀ se fịrịma Ḍaḅọ Ḅe ngẹrị pịkị onyechịẹ ị̀ pịrịmẹ. Ọ̀ pụkọ ngịsị ma ọ́ naakẹ, ọ̀ tọrụkuḅu sọ ngịsị ma ọ́ pịkị ọrịkẹ,

³⁸ma ọ́ pịkị oria ọkwẹịn mị seni ọ́mịna kuḅiemgbọlụma ḅie wẹrịkẹ, anịatịḅị ò seni fịrịmaḅọ ḅe ómine ò ḅerenikẹ.

³⁹Ọ́ Fịafịa ḍiri ma ḍawọmẹ, anịatịḅị ó koromamẹ na arịa ḅie mị ó ḍumogbaso mị nyanaḅịaye-ẹ. Mà gbọrị Fịafịa ḍiri ma sọnị pịkị ị̀ ḅụ ḅẹrẹ ḍukomẹ!

⁴⁰Anị sọnị ó ḅereni se ị̀ damaḅo ḍụkụkẹ, mịẹse ó ḍumo nyanaḅịa ḅara.

⁴¹“Tomoni ị̀ tokoni à nwọ ḍọkịkẹ.

⁴²Ọkụma ó simeọkụ à nwọ nemimẹ, à pịkị nemimẹ na ọ́mịna kuḅie ḅụ ọ́ Tamụnọ ḅẹlẹmakẹ.

⁴³Ị̀ Ḍaḅe ẹrẹ na kụrọ na à nwọse ḅomẹ, ọkụma ómine ị̀ ọkịkẹ; nemikase jịnḅọ iniḅọ ẹrẹ na kụrọ na se ḅo ọkụma, ómine iniḅọ ọkịḅịa.

⁴⁴Nde ómine ineda ị̀ ḅereniḅịa ọkụ, ọ́ nwọ jịnḅọ jịnḅọ ḅara tokoni na osi na nyanaḅịa ọkụ ḍọkịarị sịkị, ọkụma ori gbọrị Tamụnọ Ḅe ḅara ḅo tokoni ọ́ nwọ ḍọkịkẹ.

⁴⁵Anị simeọkụ simeọkụ sọnị, ó koroma ma na à ḅẹrẹ seni ọ́ pụnụmaḅịa ị̀ Ḍaḅe tọrọkọ. Moziz ḅe mị ḅẹrẹ se ọ́ pụnụmaḅịa ḅọ ḅe-ẹ, anị ó kuḅie se ḅụgbanaḅọ ḅe.

⁴⁶Ó nemikase kọkọma Moziz ḅe ḅerenimẹ nwọḅẹ ọkụma, ị̀rị̀ sọnị mgbọkụ ómine ị̀ ḅerenisam, anịatịḅị ori ị̀ gbolomaye nwọ gịẹịnmẹ.

⁴⁷Ọkụma ọ̀ nwọ gịẹịnye mị ọ́ nwọ ḅerenika sịkị, nde ómine ineda à ḍukoye mị ḅereniḅịa ọkụ?”