Read kirikeni Jọn 6 Bible Online

Jọn 6 - kirikeni bible

Jọn 6

¹Mị ḅọrọso sịkị, Jizọs Ḅe Galili (anịkanịka Taịberias nwọ chịn Ḍapa mị saḅa ísí pẹkẹrẹ mun mẹ).

²Ḅaka tomonikpo ò ḍukomẹ, anịatịḅị ini oria ḅụgbiripuma fịrịma nwọ ọrịmẹ, obiapụ gwọ ḅụ.

³Jizọs Ḅe gbọrị chịngị ọgọnọ tanjị mun se oria ọḅụḍukoapụma na kpọnjị simemẹ.

⁵Jizọs Ḅe ọ̀ nyọ ḍiki kelemamẹ, se ọrịmẹ na ḅaka tomonikpo ọ̀ damaḅoaḅẹ, ọ̀ nwọ seni Filip ḅe ḅẹmẹ, “Nde anga wa ineda mịna tomoni mamgba karaḅịa fịye nwọ fẹḅo ḅe?”

⁶(Ọ̀ mịn mị nwọ ḍukomẹ se Filip ḅe ḍakaḍikiḅịa ẹrẹchị ò jokoma mịẹḅịaye ò nemi waraḅẹ.)

⁷Filip ḅe pẹkẹrẹmẹ, “Ḅọḅọ kalaye kẹngẹ nwọ ọkịḅịa sọ, anị igbiki ḅụ, kọbọ oyiasi se fẹḅịa fịturu nwọ nẹngịḅịa.”

⁸Ọḅụḍukoapụma ḅie gbọrịḅọ Andru, Saịmọn Pita numbireowu ḅe nwọ ḅẹmẹ,

⁹“Gbọrị owutọkụ mịanga omi-ẹ, sọnọ-a bali fịturu okpokpo na mama inji awọ na ọ̀ nwọ nyanamẹ. Ọkụma àrị ḅọrọ nde anga laḅe, nwọ sime tomonikpo ḅụ.”

¹⁰Jizọs Ḅe nwọ ḅẹmẹ, “Ó tomonima mịẹse ini kpọnjị sime.” (Anịanga tọn-a osuein omi-ẹ.) Anị tomoni mamgba kpọnjị simeye-ẹ, ini pa ineda oyimẹndẹ fịnjị na kịnị oyiasi nwọ laḅịa.

¹¹Jizọs Ḅe ò fịturu mị ọkịmẹ, mịẹḅaka seni Tamụnọ Ḅe ḅẹ, se anị ḍie se anịnyọ sime apụma pịrịmẹ. Ọ̀ pịkị anị ḅara mị se injima ḍiemẹ, se inimgba ini na iḅi ḅara nwọ ọkịmẹ.

¹²Inimgba ḅụlọ ḅein sịkị, ọ̀ nwọse oria ọḅụḍukoapụma ḅẹmẹ, “Ọ́ kọn-a pumburoma gbala; ó ye wa gbọrị kalaye sọnị nwọ igweinma ma.”

¹³Anị ini àrịmgba gbala se àrị seni oyimaịn kana fịnjị nwọ ḅeinmaye-ẹ, anị tomonima bali sọnọ-a fịturu okpokpo ma ḅụ fịkọnma pumburoma-ẹ.

¹⁴Anịanga sime apụma Jizọs Ḅe nwẹngị ḅụgbiripuma fịrịma ọrị se nwọ ḅẹmẹ, “Pikipikiye ofori-ẹ, ḅe anị tomonikiri mị ḅoḅịa nwọ ḅẹ Ịkịankoroḅọ ḅe-ẹ!”

¹⁵Jizọs Ḅe nemimẹ na ini ḅo kụrọḅara se ò kun-e tọn aḅẹ ò se amanyanaḅọ mịẹḅịa ẹrẹchị; anị ọ̀ ḅarana ngẹrị pịkị sikima so chịngịma ọgọnọ mun ye-ẹ.

¹⁶Saso sọ sịkị Oria ọḅụḍukoapụma ideri koro ḍapa mị sime nyọ mun mẹ,

¹⁷arụ mị ḅie ḅụkụlọ, se dọkụ ḍapa mị saḅa Kapanịọm nwọ daḅẹ. Ene pụla pụlaḅẹ se Jizọs Ḅe pa pịkịḅo ini lakẹ.

¹⁸Anịsịkị mị ḅụ, kụrọ fọrụ mịẹse ambura pakaḅo mengi mị pikirimẹ.

¹⁹Ọḅụḍukoapụma tẹrẹ anịkanịka inein-a tombi pembe ye nwọ dọkụsam, ini Jizọs Ḅe mengi ọgọnọ nwẹngị arụ mị kpekimarị ọkụ nwọ ọrị sịkị inia ḅalafamẹ.

²⁰Jizọs Ḅe nwọse ini ḅẹmẹ, “Ọ́ ḅalafama, Ị̀rị̀-ẹ!”

²¹Ini ḅimẹ ini ori ọkị arụ mị ḅie sẹịn, ọkụma anị kirikiri arụ mị mun ini mun-arị pọkụ mị ḅie sọmẹ.

²²Anịḅe ene ḅa, ḍapa mị ḅụ ísí pẹkẹrẹ sime tomonikpo mị ọrịmẹ, na gbọrị arụ kẹngẹ mị anịanga simeye-ẹ. Ini nemimẹ na Jizọs Ḅe ma ori arụ mị ḅụkụlọ se ọḅụḍukoapụma na sokẹ, ọkụma ini ò koroma somẹ.

²³Taịberias ḅụ jịn arụ ḅo pọkụ mị ḅie sọmẹ, anị Nyanaḅọ Ḅe mịẹḅaka ḅẹ so sịkị, tomonikpo mị fịturu fị anga mị na kpeki nyọ ḅụ.

²⁴Tomonikpo mị ḅo ọrị na, Jizọs Ḅe na oria ọḅụḍukoapụma na anịanga ini ḅarị ofori-ẹ nwọḅẹ sịkị, ini àrị arụ ma ḅụkụlọ se Kapanịọm mun ọ̀ ḍọkịmẹ.

²⁵Tomonima ḍapa mị ḅụ ísí pẹkẹrẹ ḅụ Jizọs Ḅe ḍọkịḅo ọrị sịkị ini nwọse ọ̀ ḅẹmẹ, “Yeḍieḅọ, nde sịkị ị́ ḅo mịanga la?”

²⁶Jizọs Ḅe pẹkẹrẹmẹ, “À kọkọmaye mị ḍuko ọ́ pịrịaḅẹ: ómine ị̀ ḍọkịaḅẹ anịatịḅị ó fịturu fị pịkị ó ḅiye mamgba nwọ nyanaḅomẹ nwọḅẹye gose-ẹ, ómine à nwẹngị ḅụgbiripuma fịrịma kaịn ḅomẹ nwọḅẹye gosekẹ.

²⁷Ọ́ fịrịnwẹngị siḅịa fịye nwọ pịrịma, anịnakaraka, ọ́ fịrịnwẹngị simegbaso ḍumo fịye mị nwọ pịrị. Mị fịye mị anị Tomoniḅọ Tọkụ Ḅe se ọ́ pịrịḅịaye-ẹ, anịatịḅị Tamụnọ Ḍaḅọ Ḅe, ori ọ̀ tọnmẹ nwọḅẹ elekima seni ọ̀ ḅụ chụasam.”

²⁸Anị ini ò gbelaye-ẹ, “Nde wa mịẹse Tamụnọ Ḅe ḅi na wa nwẹngị-ẹ nwọ ḅe-a fịrịma nwọ nwẹngịḅịa ọkụ?”

²⁹Jizọs Ḅe ini pẹkẹrẹmẹ, “Mị anị Tamụnọ Ḅe ḅi na ọ́ mịẹ nwọḅẹye mị-ẹ, ò seni ọ́ fịrịma ḅọ ḅe ọ́ nwọ ḅereni.”

³⁰Ini pẹkẹrẹmẹ, “Che ḅụgbiripumaye ị́ nwọ mịẹ ḅe mịẹse wa ọrị se ị́ ḅereniḅịa ọkụ? Cheye ị́ nwọ mịẹ ḅe?

³¹Mịna opu-aḍapụma eleogbo ḅụ mana nwọ fịmẹ, fịafịa ḍiri mị ḍuko ḅara ḅụ, ‘Ò soḅie ḅo fịturu nwọse ini pịrị se ini fịmẹ.’”

³²Jizọs Ḅe nwọ ḅẹmẹ, “À kọkọmaye ḍuko ọ́ pịrịaḅẹ, Moziz ḅe se ọ́ pịrịye mị soḅie ḅo fịturukẹ; ị̀ Ḍaḅe mị kọkọma soḅie ḅo fịturu mị nwọse ọ́ pịrịye-ẹ.

³³Anịatịḅị Tamụnọ Ḅe pịrị fịturu mị anị ori-ẹ, soḅie koroḅo se, pịkị ḍumo seni tomonikiri mị pịrị ḅọ Ḅe-ẹ.”

³⁴Ini ọ̀ ḅara ḅimẹ, “Nyanaḅọ, mị fịturu mị se sịkịmamgba wa pịrị.”

³⁵Jizọs Ḅe nwọ ḍuko ini pịrịmẹ, “Ị̀rị̀ anị ḍumo fịturu Ḅe-ẹ, ị̀ damaḅo ḅọ goyegoye ḅuru ḅarị iniḅọ tarị ẹkẹ; ị̀ ḅereni ḅọ goyegoye iniḅọ pụkọ ḅarị samịna ẹkẹ.

³⁶Mịọkụ, à ḍuko ọ́ pịrịsam, na ómine ị̀ ọrịsam, ọkụma ó ḅereni ḍụkụkẹ.

³⁷Ị̀ Ḍaḅe seni ị̀ pịrị ḅọ goyegoye ị̀ damaḅoḅịa. Àrị ngịsị ị̀ damaḅo ḅọ nwọ desin ẹkẹ,

³⁸anịatịḅị à soḅie koroḅomẹ ị̀ se fịrịma ḅọ ḅe ḅiye nwọ mịẹḅịa ẹrẹchị, ị̀rị̀ ḅi ḅarakẹ.

³⁹Mịn ị̀ se sẹịn ḅọ ḅe ḅiọkụ-ẹ, na ò se ị̀ pịrị apụ mamgba ḅụ à gbọrịḅọ sọnị fama ma, ọkụma na àrị inimgba sịsẹma-ẹ kuluma ene mị ḅụ.

⁴⁰Anịatịḅị mị ị̀ Ḍaḅe ḅi ọkụ mị-ẹ na Tọkụ Ḅe ọrị se ò ḅereni apụ mamgba simegbaso ḍumo nwọ nyana. À pịkị na fị ḅụ ini sịsẹmaḅịa kuluma ene mị ḅụ.”

⁴¹Tomonima ò gose sakị mbụrụmbụrụmẹ, anịatịḅị ọ̀ nwọ ḅẹmẹ na, “Ị̀rị̀ anị soḅie ḅo fịturu mị-ẹ.”

⁴²Anị ini nwọḅẹye-ẹ, “Ḅe Jizọs Josẹf yaḅe ori ka? Ḍawu na nyọngọrọ na wa ini lekirimẹ. Nde mịọkụ ò gose nwọḅẹye na, ò soḅie koroḅomẹ?”

⁴³Jizọs Ḅe pẹkẹrẹ se nwọse ini ḅẹmẹ, “Ọ́ ḅarị ọ́mịna ogboku mbụrụmbụrụma.

⁴⁴Gbọrịḅọ sọnị ineda ị̀ damaḅo ẹkẹ ị̀ se sẹịnḅọ ḅe ḅarana iniḅọ jineḅo ị̀ pịrịka simeogbo, à pịkị fị ḅụ iniḅọ sịsẹmaḅịa kuluma ene mị ḅụ.

⁴⁵Ịkịankoroapụma gịẹịnmẹ, ‘Tamụnọ Ḅe ò ye seni tomoni mamgba telimaḅịa.’ Ḍaḅọ Ḅe ḍukoye naa seni ọ̀ ḅara ye ḍawọ ḅọ goyegoye ị̀ damaḅomẹ.

⁴⁶Mịn mị anị fiekẹ na Ḍaḅọ Ḅe ọrịsa ḅọ omi-ẹ, Tamụnọ Ḅe sime nyọ ḅụ ḅo ḅọ ḅe ori kẹngẹ mị Ḍaḅọ Ḅe ọrịsaye-ẹ.

⁴⁷À kọkọmaye ḍuko ọ́ pịrịaḅẹ: ḅereni ḅọ goyegoye simegbaso ḍumo nyanamẹ.

⁴⁸Ị̀rị̀ ḍumo fịturu ḅe-ẹ.

⁴⁹Ọ́mịna opu-aḍapụma eleogbo ḅụ mana nwọ fịmẹ, ọkụma ini fịmẹ.

⁵⁰Ọkụma soḅie koroḅo fịturu mị sime ḅara, anị fị ḅọ goyegoye fị ẹkẹ.

⁵¹Ị̀rị̀ anị soḅie ḅo ḍumo fịturu ḅe-ẹ. Mị fịturu mị fị ḅọ sime sime, iniḅọ ḍumo gbasoḅịa. À seni iniḅọ pịrịḅịa fịturu mị anị ị̀ya ojumịnị mị-ẹ, mịẹse tomonikiri mị ḍumoḅịa ẹrẹchị.”

⁵²Mịn mị ịganị na ḅẹrẹjinea na inia ogboku nwọ deki ḅomẹ. Anị ini jịnḅọ jịnḅọ gbelaye-ẹ “Nde ḅe ḅọ ḅe oria ojumịnị se wa pịrị se wa fịḅịa ọkụ?”

⁵³Jizọs Ḅe nwọse ini ḅẹmẹ, “À kọkọmaye ḍuko ọ́ pịrịaḅẹ na: ó nemikase Tomoniḅọ tọkụ Ḅe ojumịnị mị se fịye mịẹ fị ka pịkị oria pulo mị ḅu ka ọkụma, ó ḍumo nyana ẹkẹ ọ́mịna ḅie ḅụ.

⁵⁴Ị̀ya ojumịnị mị seni fịye mịẹ fị, pịkị pulo mị ḅu ḅọ goyegoye simegbaso ḍumo nwọ nyanamẹ, à pịkị kuluma ene ḅụ iniḅọ sịsẹma se iniḅọ mun ḍumo ḅie sọḅịa.

⁵⁵Anịatịḅị ị̀ya ojumịnị mị anị kọkọma fịye mị-ẹ; ị̀ya pulo mị pịkị kọkọma ḅuḅuye-ẹ.

⁵⁶Ị̀ya ojumịnị mị se fịye mịẹ fị, pịkị ị̀ya pulo mị ḅu ḅọ goyegoye, ị̀ ḅie ḅụ ḍumo waraḅẹ, ị̀rị̀ sọnị pịkị iniḅọ ḅie ḍumo waraḅẹ.

⁵⁷Ḍumo gbaso Ḍaḅọ Ḅe ị̀ se fịrịmamẹ, se ò gose à pịkị ḍumo waraḅẹ. Anị gbọrị ḅara mị ḅụ, ị̀ se fịye mịẹ fị ḅọ goyegoye ị̀ gose pịkị ḍumoḅịa.

⁵⁸Anịọkụma, mị anị soḅie koroḅo fịturu mị-ẹ; anị ḅarị ọ́mịna opu-aḍapụma fịturu mị simeọkụ simekẹ, ini fị, se pịkị fị ye mị. Mị fịturu mị fịḅọ iniḅọ ḍumo gbasoḅịa.”

⁵⁹Jizọs Ḅe mịn mị nwọ ḍukomẹ ọ̀ Kapanịọm ḅie, tẹkẹwarị mị ḅie yetelimarị ogbo.

⁶⁰Oria ọḅụḍukoapụma ḅie tọn apụ mịn mị naa se nwọḅẹmẹ, “Mị ḍieye mị opuma kụrọmẹ. Tụḅọ ineda anị poki ḅe?”

⁶¹Ḍuko ọ̀ pịrịka ḅụ, Jizọs Ḅe nemimẹ na ini mịn mị gose mbụrụmbụrụaḅẹ, anị ọ̀ nwọse ini ḅẹye-ẹ, “Mịn mị anị ọ́ mịẹse ómine ịganị-ao?

⁶²Anịọkụma, ọ́ ḅọrọ nemikase Tomoniḅọ Tọkụ Ḅe pịkịso iwo ò sime se ḅo nyọ mị munḅịa ḅẹye mị ọrị ọkụma nde ọ́mịna ḅụ anị simeḅịa ọkụ?

⁶³Tamụnọ Tẹmẹ mị anị ḍumo pịrịarịye mị-ẹ, ngịsị tomoniḅọ kụrọ mị anị ye ḅụ ofori-ẹ. À ḍuko ọ́ pịrịsa ọkwẹịnma anị ḍumo pịrị Tamụnọ Tẹmẹ mị ọkịḅoarịye-ẹ.

⁶⁴Anị sọnị ọ́mịna ḅụ dapụ ḅerenikẹ.” (Anịḅe sakị mị ngịsị, Jizọs Ḅe ḅerenika apụma ori ini nemimẹ, pịkị ò seni ịbafịḅịa ḅọ ḅe na.)

⁶⁵Ọ̀ pịkị ḅarị ḍuko ini pịrịmẹ, “Mịn mị à gose nwọse ọ́ ḅẹye-ẹ na, ị̀ damaḅoḅịa gbọrịḅọ sọ ofori-ẹ Ḍaḅọ Ḅe anị mịẹ sarasarama iniḅọ pịrịka simeogbo.”

⁶⁶Mịn mị gose, oria ọḅụḍukoapụma ḅie tọn apụ vinpịkị se ḅarị jịn sịkị seni ò ḍuko nwẹngịkẹ.

⁶⁷Anị Jizọs Ḅe nwọse oyimaịn ọḅụḍukoapụ fịnjịma ḅẹye-ẹ, “Ómine sọnị—ó so ḅe?”

⁶⁸Saịmọn Pita ḅe pẹkẹrẹmẹ, “Nyanaḅọ, wa so tụḅọ damamun ḅe? Ị́rị́ mị simegbaso ḍumo pịrịpịrị ọkwẹịnma nyanaḅọ Ḅe-ẹ.

⁶⁹Se mịọkụ wa ḅereni pịkị nemisam na ị́rị́ anị Tamụnọ Ḅe sime nyọ ḅụ ḅo Fịafịa Ḅọ Ḅe-ẹ.”

⁷⁰Jizọs Ḅe ini pẹkẹrẹmẹ, “Ị̀rị̀ ómine oyimaịn-apụ fịnjịma nwọ sẹlẹka? Anị sọnị ọ́mịna ḅụ gbọrịḅọ oru-ẹ!”

⁷¹Judas ḅe gbolomaye anị ò ḍukoarịye-ẹ, Saịmọn Ịskarịọt yaḅe. Anịatịḅị Judas ḅe, ori oyimaịn-apụ fịnjịma ḅie gbọrịḅọ-ẹ nwọḅẹ sọnị, ori mị Ò seni ịbafịḅịa ḅọ ḅe-ẹ.