Read kirikeni Jọn 7 Bible Online

Jọn 7 - kirikeni bible

Jọn 7

¹Mịn mị ḅọrọ sịkị, Jizọs Ḅe ọ̀ Galili ḅie nyọnyọ mun mẹ, ò ḅikẹ ò Judia ḅie nyọnyọmun, anịatịḅị anịanga sime Ju ḅẹrẹtọn apụma ọ̀ ḅaaḅịa ḅara nwọ ḍọkịaḅẹ.

²Ikowarị Alalị mị kpekisam,

³anị Jizọs Ḅe oria owuapụ mịnapụma nwọse ọ̀ ḅẹye-ẹ, “Mịanga mị wẹrịso se so Judia mun, mịẹse ị́ya ọḅụḍukoapụma ị́ nwẹngịarị fịrịma ọrịḅịa ọkụ.

⁴Iniḅọ nwẹngịarị fịrị nwọ ḅọịḅịa gbọrịḅọ sọ ofori-ẹ, ini iḅiọkụ se iniḅọ nemi iniḅọ nwọ ḅiaḅẹ ḅẹḅẹ. Ị́ mayema mịẹ-aḅẹ nwọ ḅẹ sịkị, ye bebe tomonikiri mị ị́ gbolomaye nwọ nemi!”

⁵(Oria owuapụ mịnapụma sọnị ini ò ḅerenikẹ.)

⁶Jizọs Ḅe nwọse ini ḅẹmẹ, “Ị̀ya sịkị mị ma lakẹ. Ọkụma ómine sịkị goyegoye ómine na iḅimẹ.

⁷Tomonikiri mị anị ineda taraka se ọ́ wẹrịma ẹkẹ, ọkụma anị taraka seni ị̀ wẹrịmamẹ, anịatịḅị à sịkịmamgba ḍuko anị pịrịaḅẹ na anịa mịẹmịẹaye ma simẹ.

⁸Ómine pa alalị mị mun. Ị̀rị̀ mị alalị mị à mun ẹkẹ, anịatịḅị ị̀ya sịkị mị ma lakẹ.”

⁹Ori ọkọ ḅẹ se Galili ḅie simemẹ.

¹⁰Oria owuapụ mịnapụma alalị mị mun so sịkị, Jizọs Ḅe sọnị ò mun mẹ, anị simeọkụ simeọkụ sọnị, ọ̀ ḅụpakụmakẹ, ọkụma ọ̀ ḅọịma mun mẹ.

¹¹Ju ḅẹrẹtọn apụma alalị mị ḅie ini Ọ̀ ḍọkịmẹ. Ini nwọ gbelamẹ, “Nde Ori?”

¹²Tomonikpo mị opuma Ò se miniminima ọkwẹịnmẹ. Dapụ nwọ ḅẹmẹ, “Ori iḅi tomoniḅọ-ẹ.” Ísíapụma nwọ ḅẹmẹ, “Ẹn-ẹn,” “Ori oḅori se tomonima chịn aḅẹ.”

¹³Ọkụma ḅelema Ọ̀ ḅụ ḅẹrẹ ḍuko ḅọ ofori-ẹ, anịatịḅị ini Ju ḅẹrẹtọn apụma ḍiki ḅalafamẹ.

¹⁴Kalaye kọnmẹ, alalị mị mun maju gbasị la, anị Jizọs Ḅe sọmun Oputẹkẹwarị mị ḅie sakị yeḍieye-ẹ.

¹⁵Anị opuma Ju ḅẹrẹtọn apụma ḅụgbiripumamẹ, se ini nwọ ḅẹmẹ, “Nde ḅe Tomoniḅọ Ḅe mịẹse opuma ye nemi ọkụ, Ò ḍiriḍawọ warị mun ka sịkị?”

¹⁶Jizọs Ḅe pẹkẹrẹmẹ, “Ị̀ ḅarakuḅuye à nwọ ḍiekẹ, ọkụma Tamụnọ Ḅe anị ị̀ se fịrịma ḅọ ḅe ḅara mị anị ḅo ye-ẹ.

¹⁷Ḅereni se Tamụnọ Ḅe ḅiye mịẹḅịa ḅọ goyegoye nemiḅịa, à ḍiearịye mị Tamụnọ Ḅe ḅara ḅo na, anịkanịka ị̀ ḅarakuḅu kụrọ ḅụ à wẹrị ọkwẹịn-etuḅo.

¹⁸Mịna kụrọ ḅụ wẹrị ọkwẹịn ḍọkịḅọ ḅe, ori ọ̀ ḅarakuḅu boma nwọ ḍọkịaḅẹ. Ò se sẹịnḅọ ḅe boma nwọ ḍọkịarị ḅọ ḅe, ọ̀ karakaramẹ, iruo ò ḅie ofori-ẹ.

¹⁹Moziz ḅe Oloko mị seni ọ́ pịrịmẹ, ori anị seni ọ́ pịrịka? Ọkụma ọ́mịna ḅie gbọrịḅọ sọnị Oloko mị ḍukoye mịẹkẹ. Nde ó gose ị̀ ḅaa ḍọkịarịye?”

²⁰Tomonikpo mị pẹkẹrẹmẹ, “Sitẹmẹ ị́ ḅie omi-ẹ! Tụḅọ ị́ ḅaa ḍọkị-ao?”

²¹Jizọs Ḅe pẹkẹrẹmẹ, “Gbọrị ḅụgbiripumaye à nwọ mịẹmẹ, ómine mgba anị ọ́ ḅụgbiripumamẹ.

²²Anịatịḅị Moziz ḅe tọn ọ́ pịrịmẹ na ómine ọ́mịna owuapụ awọma ḅụ nwọ pẹlẹ (Moziz ḅe kẹ, ọkụma ọ́mịna opu-aḍapụma anị sakịmẹ nwọḅẹ sọnị), ómine Ịnyọsara Ene ḅụ owutọkụ ḅụpẹlẹmẹ.

²³Ini nemikase Ịnyọsara Ene mị ḅụ owutọkụ ḅụpẹlẹmẹ nwọḅẹ ọkụma, mịẹse Moziz Oloko mị kan ẹka ḅara, nde ó gose ị̀ ḍiki ḅụnwọnwọarịye, à ḅọrọ Ịnyọsara Ene mị ḅụ nweni gwọ ọkụma?

²⁴Ọ́ ḅarị tọrụ ḍiki se ḅẹrẹkọnma, ọkụma ọ́ karakaraye mị nwọ ḍiki se ḅẹrẹkọn.”

²⁵Jerusalẹm apụma ḅie dapụ nwọ ḅẹmẹ, “Ḅe anị ḅẹrẹtọn apụma ḅaaḅịa ẹrẹchị ḍọkịarịḅọ ḅe Orika?

²⁶Ḍiki! Ori ama ogbo sime ọkwẹịn aḅẹ, se gbọrịḅọ sọnị yeḍuko ọ̀ pụnụmakẹ! Anị ḅọrọ nwọ paka-ao na ini kọkọma nemisam na ḅe ḅọ ḅe anị Mẹsaya Ḅe-ẹ?

²⁷Se Mẹsaya Ḅe ḅoḅịa sịkị, ọ̀ pakaḅo anga nemiḅịa ḅọ ofori-ẹ. Ọkụma ḅe ḅọ ḅe ḅo anga wa nwọ nemi waraḅẹ.”

²⁸Jizọs Ḅe Oputẹkẹwarị mị ḅie yeḍiearịogbo, ò gele pụkọ ḅụ nwọ ḅẹmẹ, “Ọ́ kọkọma ị̀ nemi se pịkị à wẹrịḅo anga nwọ nemi wara-ao? Ọkụma ị̀rị̀ ngẹrị ị̀ya kụrọ se ḅokẹ. Ị̀ se fịrịmaḅọ ḅe, kọkọmaye mịẹḅọ-ẹ, ómine ò nemikẹ,

²⁹ọkụma ị̀rị̀ ò nemimẹ, anịatịḅị ọ̀ ḅụ à wẹrị ḅomẹ, ori mị ị̀ se fịrịmaye-ẹ.”

³⁰Anịsịkị ini ò kunḅịa ḅara nwọ ḍọkịmẹ, ọkụma gbọrịḅọ sọnị ḅara se ọ̀ lamakẹ, anịatịḅị oria sịkị mị ma lakẹ.

³¹Ọkụma tọn apụ tomonikpo mị ḅie ò ḅereni se nwọ ḅẹmẹ, “Mẹsaya Ḅe ḅoḅịa sịkị, ḅe ḅọ ḅe mịẹsa ḅụgbiripumaye ma nẹngịaye ọ̀ nwọ mịẹ ḅe?”

³²Farisiapụ ma ḅo tomonikpo mị Jizọs Ḅe gbolomaye ḅụ miniminima mayema ọkwẹịn àrị ḅara mị nwọ naa sịkị, ini na tịḅịnị agbamịẹapụma na da nyọkoruapụ nwọse fịrịmamẹ Jizọs Ḅe kunḅịa ẹrẹchị.

³³Jizọs Ḅe nwọse ini ḅẹmẹ, “À kele ómine na sime ḅọlọmaḅịa, anịsịkị à so ị̀ se fịrịma ḅọ ḅe damamunḅịa.

³⁴Ómine ị̀ ḍọkịḅịa, ọkụma ómine ị̀ ọrị ẹkẹ, anịatịḅị ómine ineda à simeḅịa nyọ mị mun ẹkẹ.”

³⁵Ju ḅẹrẹtọn apụma inia ogboku nwọ ḅẹmẹ, “Nde anga ọ̀ nwọ mun ḅe se wa ineda ọ̀ ḍọkịḅo ẹka? Ọ̀ ḅọrọ so Grik apụ amama mun se ye se Grik apụma ḍieḅịa mụnọ, anị mịna ama apụma anga nyọma ḅụ?

³⁶Ọ̀ nwọ ḅẹmẹ, wa ọ̀ ḍọkịḅịa ọkụma wa ori ọrị ẹkẹ, se wa pịkị ineda ò simeḅịa nyọ mị mun ẹkẹ. Anị ò che fie-ao?”

³⁷Alalị mị ḅe kuluma ene mị se pịkị kụrọtẹịn ene mị, anị ene mị ḅụ Jizọs Ḅe sịsẹ chịẹ se gele pụkọ ḅụ nwọ ḅẹmẹ, “Mengi pụkọtarịḅọ goyegoye ị̀ damaḅo se ḅu.

³⁸Fịafịa ḍiri mị ḍuko ḅara mị ḅụ, ‘Ị̀ ḅereni ḅọ goyegoye, ḍumo pịrị ideriarị mengi ò kuḅiemgbọlụ ḅụ sara pakaḅịa.’”

³⁹Jizọs Ḅe Tẹmẹ Ḅe gbolomaye ḅụ mịn mị ḍukomẹ, anị ò ḅereniapụma nyanaḅịa ye mị. Anịsịkị mị ḅụ Tẹmẹ Ḅe ma ini ò se tomonikiri fịrịmakẹ, anịatịḅị Jizọs Ḅe ma ọ̀ fịḅụ sịsẹ mun oria boma mị ḅie sọkẹ.

⁴⁰Tomonikpo mị ḅie sime tọn-apụ mị ò ḍukoye mị naa se nwọ ḅẹmẹ, “Ḅe anị kọkọma Ịkịankoroḅọ ḅe-ẹ!”

⁴¹Inia ḅụ dapụ nwọ ḅẹmẹ, “Mẹsaya Ḅe ori-ẹ!” Ọkụma ísíapụma nwọ ḅẹmẹ, “Mẹsaya Ḅe ọ̀ Galili ḅie pakaḅo ẹkẹ!

⁴²Fịafịa ḍiri mị nwọ ḅẹmẹ, na Mẹsaya Ḅe Amanyanaḅọ Devid furo ḅie mị ọ̀ pakaḅoḅịaye-ẹ, ini pịkị Bẹtlihẹm ḅie ò yiḅịa, Devid ḅe anga ama mị ḅie.”

⁴³Jizọs Ḅe gose, pua tomonima ogboku pakaḅomẹ.

⁴⁴Dapụ ḅimẹ ini ò kun, ọkụma gbọrịḅọ sọnị ḅara seni ọ̀ lamakẹ.

⁴⁵Nyọkoruapụma vinpịkị mun sịkị, tịḅịnị agbamịẹapụma na Farisiapụ ma na nwọse ini gbelamẹ, “Nde ó gose ori ọkị ḅokaye?”

⁴⁶Nyọ koruapụma pẹkẹrẹmẹ, “Jịn sịkị ḅe tomoniḅọ ḅe ọkwẹịn ọkụ ọkwẹịn sa ḅọ ofori-ẹ!”

⁴⁷Farisiapụma nwọse ini gbelamẹ, “Ómine sọnị ori oḅori se ọ́ chịn?

⁴⁸Ḅẹrẹtọn apụma ḅie anịkanịka Farisiapụma ḅie ò ḅereni se ó nemi ḅọ omi?

⁴⁹Mịna tomonima Moziz Oloko mị ini anị nemikẹ, anịgose Tamụnọ worinime sime ini pịrịmẹ!”

⁵⁰Nikodimọs anị Farisiapụma ḅie gbọrịḅọ-ẹ, ḍin se Jizọs Ḅe damamun ḅọ ḅe. Nwọse ísíapụma ḅẹmẹ,

⁵¹“Mịna Oloko sime ḅara ḅụ wa ineda ḅẹrẹkọn tomoniḅọ ḅara sima ẹkẹ ma wa ọ̀ ḅịpị naaka simeogbo, pịkị ọ̀ mịẹye nwọ ḍọkị pakụma ḅo ka simeogbo.”

⁵²Ini ọ̀ pẹkẹrẹmẹ, “Ị́rị́ sọnị Galili ḅọ? Fịafịa ḍiri mị ḍawọ, anị ị́ ḅụ okoroḅịa na ngịsị Galili mị ḅie ịkịankoroḅọ pakaḅo-ẹkẹ.”