Read kirikeni Jọn 9 Bible Online

Jọn 9 - kirikeni bible

Jọn 9

¹Jizọs Ḅe nwẹngịma mun-arịogbo, ọ̀ tọrụmgbọlụ pụn ḅụ yi gbọrị owuḅọ nwọ ọrịmẹ.

²Oria ọḅụḍukoapụma ò gbelamẹ, “Yeḍieḅọ, tụḅọ mịẹ si ḅụ ini tọrụmgbọlụ pụn ḅụ ḅe owuḅọ ḅe yi? Oria si mụnọ anịkanịka ò yiapụ ma ḅe si?”

³Jizọs Ḅe pẹkẹrẹmẹ, “Oria tọrụmgbọlụ pụn mị anị oria si na mịẹgboloma nyanakẹ, pịkị ò yiapụ ma si sọnị ọ̀ tọrụmgbọlụma pụnmakẹ. Ọkụma ọ̀ tọrụmgbọlụma pụnmẹ, mịẹse Tamụnọ kụrọ mị ọ̀ ḅụ anịa fịrị nwọ nwẹngịḅịa ḅara-ẹ.

⁴Anị pa enekaka ḅụ omi-ẹ nwọḅẹ sịkị, wa ị̀ se fịrịmaḅọ ḅe fịrị mị nwọ nwẹngịḅịa, ḍin ḅoaḅẹ gbọrịḅọ sọ ineda fịrịnwẹngị ẹka sịkị.

⁵À tomonikiri simearị sịkị, ị̀rị̀ tomonikiri mị ḅe enekuḅu-ẹ.”

⁶Jizọs Ḅe mịn mị nwọ ḍuko so sịkị, Ọ̀ fụla se kiri saramẹ, anị se aḅaịn mị na wọlọmamẹ se anị seni tomoniḅọ ḅe tọrụmgbọlụma aḅakalamẹ

⁷se nwọse ọ̀ ḅẹmẹ, “Mun Saịloam Ḍapa mị ḅie ị̀ tọrụ sịkịrị.” (Mị ẹrẹ mị fieaye “Fịrịma.”) Anị tomoniḅọ ḅe mun ye-ẹ, ọ̀ tọrụ sịkịrị, se ye ọrị ḅụ vinpịkị soye-ẹ.

⁸Anịsịkị ori na kpekima anga apụma na ḅọrọsa sịkị ò ye ọmgbọ-ọmgbọ ḅara ḅụ ori ọrịrị apụma na gbelamẹ, “Ḅe ḅọ ḅe sime ye ọmgbọ-ọmgbọ ḅọ ḅe orika?”

⁹Dapụ nwọ ḅẹmẹ, “Ori ḅọ ḅe ori-ẹ,” ọkụma ísíapụma nwọ ḅẹmẹ, “Ẹn-ẹn, ọrịkẹ; ọ̀ papa ori na kịkịnamẹ.” Anị tomoniḅọ ḅe ḅẹye-ẹ, “Ị̀rị̀ anị tomoniḅọ ḅe-ẹ.”

¹⁰Ini ò gbelamẹ, “Nde ị́ tọrụmgbọlụma mịẹse finji ọkụ?”

¹¹Ọ̀ pẹkẹrẹmẹ, “Jizọs ini nwọse chịn gbọrị owuḅọ aḅaịn wọlọma seni ị̀ tọrụmgbọlụma aḅakalamẹ, se nwọse ị̀ ḅẹmẹ à Saịloam mun se ị̀ tọrụ sịkịrị. Anị à mun ye-ẹ, se àrị ị̀ tọrụ sịkịrị so kirikiri à yeọrịmẹ.”

¹²Ini nwọ gbelamẹ, “Nde ori?” Ọ̀ nwọ pẹkẹrẹmẹ, “À nemikẹ.”

¹³Anịsịkị ini ḅọrọsa sịkị tọrụmgbọlụ pụn ḅọ ḅe nwọ ọkị mun Farisiapụ ma pịrịmẹ.

¹⁴Jizọs Ḅe aḅaịn wọlọma se nweni ḅọ ḅe tọrụmgbọlụma finji ene mị Ịnyọsara Ene-ẹ.

¹⁵Farisiapụ ma anịsịkị pịkị tọrụmgbọlụ finji ḅọ ḅe gbelamẹ, ọ̀ mịẹse ọ̀ tọrụmgbọlụ finji ọkụ mị. Ò ḍuko ini pịrịmẹ, “Ori aḅaịn se ị̀ tọrụmgbọlụma aḅakalamẹ anịeso, àrị ị̀ tọrụ sịkịrịmẹ, se mịọkụ à yeọrịsam.”

¹⁶Farisiapụ ma ḅie dapụ nwọ ḅẹmẹ, “Mịn mị nwọ mịẹḅọ ḅe Tamụnọ ḅụ ḅo ḅọkẹ, anịatịḅị ori Ịnyọsara Ene ḅe oloko mị kokokẹ.” Anị simeọkụ simeọkụ sọnị, ísíapụma nwọ ḅẹmẹ, “Nde siye mịẹḅọ ineda nwọ sime ḅụgbiripuma elekima nwọ mịẹḅịa ọkụ?” Se pua inia ogboku pakaḅomẹ.

¹⁷Anị Farisiapụma pịkị kpoto nweniḅọ ḅe gbelaye-ẹ, “Ị́ nwọ ḅẹmẹ, na ori mị ị́ tọrụmgbọlụma finjiye-ẹ—iḅimẹ, nde ò gbolomaye ḅụ ị́ ḍukoarịye?” Tomoniḅọ ḅe nwọ pẹkẹrẹmẹ, “Ori ịkịankoroḅọ-ẹ.”

¹⁸Ọkụma, Ju ḅẹrẹtọn apụma ini ḅereni ḍụkụkẹ na ini tọrụmgbọlụ pụn ḅụ wẹrị ò yimẹ, se mịọkụ ọ̀ pịkị yeọrịaḅẹ nwọḅẹye mị, ọkịmun ini ò yiapụ ma chịnḅo sịkị lamẹ

¹⁹se nwọse ini gbelamẹ, “Ḅe ọ́mịna tọkụ? Tọrụmgbọlụ pụn ḅụ ómine ò yimẹ ọ́ nwọḅẹ, nde ọ́ mịẹse mịọkụ ò yeọrị ọkụ?”

²⁰Ò yiapụ ma pẹkẹrẹmẹ, “Wa nemimẹ na ori mịna tọkụ-ẹ, wa pịkị nemimẹ na tọrụmgbọlụ pụn ḅụ wa ò yimẹ.

²¹Ọkụma ọ̀ mịẹse ọ̀ mịọkụ ḅara wẹrịma yeọrịarị ọkụ wa nemikẹ; ọ̀ tọrụmgbọlụma finji ḅọ sọnị wa pịkị nemikẹ. Ómine ò gbela ori ogu lasam, ori ineda ḅarana pẹkẹrẹḅịa!”

²²Ò yiapụ ma mịn mị nwọ ḍukomẹ, anịatịḅị ini Ju ḅẹrẹtọn apụma ḍikiḅalafamẹ, anị ḅịpịogbosọ ḅọrọsa apụma, na ò ḅereni se ḅẹ na ori Mẹsaya Ḅe-ẹ nwọḅẹ ḅọ goyegoye ini iniḅọ depakụmaḅịa tẹkẹwarị mị ḅie.

²³Anị mị ò yiapụ ma gose ḅẹye-ẹ, na “Ori ogu lasam ómine ò gbela!”

²⁴Ini mama sịkị karama tọrụmgbọlụ pụn ḅụ ini yi ḅọ ḅe chịn se nwọse ọ̀ ḅẹmẹ, “Tamụnọ Ḅe tọrọkọ ḅereni na ị́ kọkọmaye ḍukoḅịa! Wa nemimẹ na ḅe nwọ ị́ gwọ ḅọ ḅe simịẹḅọ-ẹ.”

²⁵Nweniḅọ ḅe nwọ pẹkẹrẹmẹ, “Ori simịẹḅọ-o simịẹḅọka-o à nemikẹ. Ị̀rị̀ nemi gbọrịye anị: ị̀ tọrụmgbọlụ pụn simemẹ, se mịọkụ à yeọrịaḅẹ.”

²⁶Ini ò gbelamẹ, “Nde ò se ị́ mịẹ ọkụ? Nde ị́ya tọrụmgbọlụ pụn obi mị ọ̀ nwọ gwọ ọkụ?”

²⁷Ọ̀ pẹkẹrẹmẹ, “À ḍuko ọ́ pịrị ḅọrọsam anịsọ ó poki ḍụkụkẹ. Nde ó gose pịkị anị naa ḍọkịarịye? Ọbịasi, ómine sọnị Oria ọḅụḍukoapụ sọ nwọ ḅiaḅẹ?”

²⁸Ini fụla se ọ̀ pịrị se nwọ ḅẹmẹ, “Ị́rị́ anị Ori ḅọ Ḅe ọḅụḍukoḅọ-ẹ, ọkụma mine anị Moziz ọḅụḍukoapụ-ẹ.

²⁹Wa nemimẹ na Tamụnọ Ḅe ọkwẹịn Moziz ḅe pịrịmẹ ori ḅọ ḅe ọkụma, ò ḅo anga sọnị wa nemikẹ!”

³⁰Tomoniḅọ ḅe pẹkẹrẹmẹ, “Mịn ye mị kịrịye sọ ḅara ḍiki! Ò ḅo anga ó nemikẹ, ọkụma ori ị̀ tọrụmgbọlụma finjimẹ!

³¹Wa nemimẹ na Tamụnọ Ḅe ò simịẹapụ naanaakẹ; ọkụma kọkọma ori osi se ò ḅiye mịẹapụ ma ori ini naanaamẹ.

³²Tomonikiri mị sakị sịkị ngịsị nweni ma naakẹ na tọrụmgbọlụ pụn ḅụ ini yiḅọ, na gbọrịḅọ iniḅọ tọrụmgbọlụ nwọ finjimẹ.

³³Ḅe ḅọ ḅe Tamụnọ ḅụ wẹrị ḅo ka ọkụma ori ineda gbọrịye sọ mịẹ ẹkẹ.”

³⁴Ini pẹkẹrẹmẹ, “Ị́rị́ jokoma si ḅie ini yi pịkị ḍikiḍiki pakụmaḅo ḅọ-ẹ—ị́rị́ re ye se wa ḍie ḍọkị-ao?” Anị ini tẹkẹwarị mị ḅie ò depakụmaye-ẹ.

³⁵Jizọs Ḅe pakaye mị naa sịkị, ọ̀ nweniḅọ ḅe ḍọkịmẹ, ọ̀ ḅo ori ọrị sịkị ọ̀ nwọse nweniḅọ ḅe gbelamẹ, “Tomoniḅọ Tọkụ Ḅe ị́ ò ḅereni?”

³⁶Nweniḅọ ḅe pẹkẹrẹmẹ, “Yeḍieḅọ, ḍuko ọkọmụ ori tụḅọ, mịẹse àrị ò ḅereniḅịa ḅara!”

³⁷Jizọs Ḅe nwọse ọ̀ ḅẹmẹ, “Ị́ ori ọrị ḅọrọsam, ori mị mịọkụ ị́rị́ na ọkwẹịn àrị ḅọ ḅe-ẹ.”

³⁸Nweniḅọ ḅe nwọ ḅẹmẹ, “À ḅerenimẹ, Nyanaḅọ!” Se Jizọs Ḅe tọrọkọ kpẹrẹkị koromẹ.

³⁹Jizọs Ḅe nwọ ḅẹmẹ, “À ḅo mị tomonikiri ḅẹrẹkọn-ẹ ḅomẹ, mịẹse tọrụmgbọlụ pụn apụma yeọrịḅịa ḅara, se yeọrịapụ ma ye ọrị ẹka ḅara.”

⁴⁰Ori na anịanga sime Farisiapụma ḅie dapụ ori ọkwẹịn ye mị nwọ naa se ò gbelamẹ, “Kọkọma ḅụ ị́ ḅẹkẹ na mine sọnị, mịna tọrụmgbọlụma pụnmẹ?”

⁴¹Jizọs Ḅe pẹkẹrẹmẹ, “Ọ́mịna tọrụmgbọlụma nemikase pụnmẹ nwọḅẹ ọkụma, ḅẹrẹ mgbọkụ ọ́mịna ḅarasi ẹkẹ, ọkụma ọ́ nyọ ọrịmẹ ọ́ nwọ ḅẹ sịkị, anị mị fieaḅẹ na ọ́ pa ḅẹrẹḅarasi ḅie omi-ẹ.”