Read kirikeni Okunwẹngịapụ 11 Bible Online

Okunwẹngịapụ 11 - kirikeni bible

Okunwẹngịapụ 11

¹Okunwẹngịapụ ma na Judia mgba kelema mịnapụ mamgba naamẹ na Jịnsẹapụma sọnị Tamụnọ ọkwẹịn mị nwọ ọkịsam.

²Pita ḅe Jerusalẹm mun sịkị, Jịnsẹapụma sọnị ḅụpẹlẹ nwọ ḅẹye ḅereni apụma, Pita ḅe ḍukoye ḅerenikẹ. Se ini nwọse ọ̀ ḅẹmẹ,

³“Ḅụpẹlẹka Jịnsẹapụma ogboku ị́ igoni mun mẹ, ị́ pịkị ini na yefị gbolomamẹ!”

⁴Anị Pita ḅe pakaye ma nwọ ḍuko ini pịrịye-ẹ, anịḅe sakị sịkị ngịsị ọkịḅo anịsịkị mị la:

⁵“À Jọpa opuama mị ḅie tẹkẹarị sịkị à ịkịan ọrịmẹ. Soḅie opu agbanị simeọkụ simeye koroḅo se ị̀ya anga sịkị ḅụ dachịẹmẹ.

⁶À kweinma anịa ḅie ḍiki sịkị, à warị ḅie anga nama na piri ḅie anga nama na, ikirikiri nama na pịkị piri ḅie anga feni na nwọ ọrịmẹ.

⁷Anịsịkị à gbọrị pụkọ nwọ naamẹ, se nwọse ị̀ ḅẹaḅẹ, ‘Pita, Sịsẹ; ḅaa se pẹị!’

⁸Ọkụma à nwọ ḅẹmẹ, ‘Ngịsị ọkọ pakakẹ, Nyanaḅọ! Pụla anịkanịka fịafịaka fịye jịn ene ngịsị ị̀ ḅịpị ḅie ma sọkẹ.’

⁹Pụkọ mị pịkị soḅie ọkwẹịnmẹ, ‘Tamụnọ Ḅe mịẹfịafịamasaye fịafịakaye se anị chịnma.’

¹⁰Mịn mị tẹrẹ-a sịkị se mịẹmẹ, se anịḅe kuluma ini bebe ye mị mgba nwọ jine iwo soḅie mun mẹ.

¹¹Anị gbọrị sịkị Sizaria ḅie ini se ị̀ fịrịma tẹrẹ-a owuapụ ḅo à bịan mun warị mị lamẹ.

¹²Tẹmẹ Ḅe nwọse ị̀ ḅẹmẹ à sịkị fama ma, àrị ini na mun. Mịn Jọpa ḅie ḅo sonio-a mịnapụ ị̀ ḅụ sọ se Sizaria mun ye-ẹ, se mine mgba so Kọnịliọs ḅe warị ḅie sọye-ẹ.

¹³Ọ̀ ḅara wẹrịma oria warị ḅie chịẹsime enjẹlḅọ ḅe nwọ ọrị ọkụ nwọ ḍuko wa pịrịmẹ, enjẹlḅọ ḅe nwọse ọ̀ ḅẹmẹ, ‘Nweni se Jọpa fịrịma, mun Saịmọn Pita nwọ chịnḅọ ḅe chịn.

¹⁴Ori ọkwẹịn kọn ị́ pịrịḅịa, anị ị́rị́ na ị́ furo mgba na ḅọrọmaḅịaye.’

¹⁵Se à sakị ọkwẹịn sịkị, Fịafịa Tẹmẹ Ḅe koroḅo inia ọgọnọ gbanamẹ anị mịna ọgọnọ gbana ọkụ mị sakị mị ngịsị.

¹⁶Anịsịkị à Nyanaḅọ Ḅe ḍukoye mị nwọse ḅiekoromamẹ na, ‘Jọn ḅe mengi se nweni saramẹ, ọkụma ini Fịafịa Tẹmẹ Ḅe se mengi se ọ́ saraḅịa.’

¹⁷Anị lelemẹ na Tamụnọ Ḅe wa Nyanaḅọ Jizọs Kraịst Ḅe nwọ ḅereni sịkị se wa pịrị gbọrị ḍiepịrịye mị, pịkị nwọse ini Jịnsẹapụma nwọ pịrịsam anịọkụma, ị̀rị̀ ḅọrọ tụḅọ, se, mun Tamụnọ Ḅe kiki ḅe!”

¹⁸Ini mịn mị naa sịkị, ini ọ̀ ḅụ ḍuko-ẹtọn siye ma ini nwọ wẹrị somẹ, se Tamụnọ Ḅe tokoni se nwọ ḅẹaḅẹ, “Anịọkụma Tamụnọ Ḅe ọ̀ sịkị se Jịnsẹapụma pịrị se ini inia sima ḅụ vinpịkị se ḍumoḅịa!”

¹⁹Ḅereniapụ ma ini galagalamẹ ini se ini chụarị ḅụọma gose anị ini Stivin ḅe ḅaa sịkị ḅụ. Inia ḅie dapụ Fonisia na Saịprọs na pịkị Antiọk ama irima nwọ mun oku mị ḍuko Juapụma kẹngẹ pịrị simemẹ.

²⁰Ọkụma ḅereniapụma ḅie dapụ Saịprọs na Saịrini amama ḅie sime ḅo apụma Antiọk nwọ mun mẹ, Nyanaḅọ Jizọs Ḅe Iḅi Ḅẹrẹ mị ḍuko Jịnsẹapụma pịrị simemẹ.

²¹Nyanaḅọ Ḅe kụrọ mị ini na omi-ẹ, ḅaka tomoni ḅerenimẹ se vinpịkị Nyanaḅọ Ḅe damaḅomẹ.

²²Mịn mị gboloma ḅẹrẹ ḅo Jerusalẹm ḅie sime chọchị mị lamẹ, anị ini Banabas ḅe nwọse Antiọk fịrịmaye-ẹ.

²³Ò mun la se Tamụnọ Ḅe ini ḅẹlẹma ḅara nwọ ọrị sịkị, ò ḅieḅẹlẹmẹ, se kụrọma ọkwẹịn ini pịrịmẹ na ini kuḅie se ḅụgbana gbẹịn apụ na kọkọma apụ na nwọ sọ Nyanaḅọ Ḅe pịrị inia kuḅiemgbọlụ mamgba se Ọ̀ ḅụgbana ḅụ.

²⁴Banabas ḅe iḅi ḅọ-ẹ, Fịafịa Tẹmẹ Ḅe na ḅereni na ḅie ḅein ḅọ-ẹ se, tọn-a tomoni ini nwọ ọkịḅo Nyanaḅọ Ḅe pịrịmẹ.

²⁵Anịsịkị Banabas ḅe Tasọs mun Sọl ḅe ḍọkịḅo-ẹmunmẹ.

²⁶Ori ọ̀ ḍọkịḅo sịkị, ori ori ọkị Antiọk ḅomẹ. Gbọrị kụra na gbasịye ini nwọse chọchị mị ḅie apụma na sime se ye se inia ḅụ tọn-a apụ ḍiemẹ. Antiọk ḅie mị ini tatarị Kraịst Ḅe ḅereniapụma Kristẹn se ini chịnye-ẹ.

²⁷Anịsịkị mị ḅụ da ịkịankoroapụ Jerusalẹm ḅie so Antiọk mun mẹ.

²⁸Inia ḅie gbọrịḅọ, Agabọs nwọ chịnḅọ, sịsẹ chịẹ, Tẹmẹ Ḅe kụrọ ḅụ wẹrị ịkịankoro, se nwọ ḅẹmẹ, na, ḅọlọka sịkị ḅụ opu ḅuruḅaa ḅo tomonikiri ọgọnọ gbanaḅịa. (Klọdiọs sẹdaḅọ ḅe ḅụọ ḅụ anị mịn mị mịẹye-ẹ.)

²⁹Ọḅụḍukoapụma ḍukopẹlẹmẹ na ḅọḅọ inia ḅie iniḅọ ịnyọ laḅara nwọse ḅarachụa se inia mịnapụ, Judia ḅie anga apụma nwọ sẹịnmaḅịa.

³⁰Mịn mị ini nwọ mịẹmẹ, se igbiki se chọchị sẹnịapụma sẹịnmamẹ Banabas ḅe na Sọl ḅe na ḅara ḅụ.