Read kirikeni Okunwẹngịapụ 12 Bible Online

Okunwẹngịapụ 12 - kirikeni bible

Okunwẹngịapụ 12

¹Mịn sịkị mị ḅụ Amanyanaḅọ Hẹrọd ḅe sakị ḅụọchụa se da chọchị apụ nwọ dapaka simemẹ.

²Ori okola-agiji nwọse Jems, Jọn numbireowu ḅe nwọ gbogbo ḅaamẹ.

³Ò ḅo ọrị na mịn mị Juapụma ḅieḅẹlẹmamẹ nwọ ḅẹ sịkị, ori anị mịẹ tọrọkọ mun mẹ se Pita ḅe nwọ kunmẹ. (Mịn mị paka sịkị anị Suka Fịturu Alalị sịkị mị-ẹ.)

⁴Ini Pita ḅe kun so sịkị ini ò se ikoli ḅie chumẹ, anịju ḅụ anị ini ọ̀ ḅọrọma owuni inein-a kiri nwọ pịrịye-ẹ, gbọrị kiri inein-a owuni inein-a owuni sime nyọ. Hẹrọd ḅe tọnmẹ na Saḅaḅọrọ Alalị mị ḅọrọ sịkị ori amaogbo ḅẹrẹkọn ọ̀ pịrịḅịa.

⁵Anị ini Pita ḅe se ikoli ḅie chuye-ẹ, ọkụma chọchị apụma kụrọma ọ̀ tịḅị gose Tamụnọ Ḅe tẹkẹmẹ.

⁶Hẹrọd ḅe ikoli ḅie ọ̀ pakụmaḅo tomonima pịrịḅịa ḍin mị ḅie, Pita ḅe mama ḍin koruapụ ogboku mọnọ simemẹ. Ini mama ikoli seni ori ịkasịmẹ, mama ḍin koruapụ pịkị ikoliapụ onu ḅọkọ omi-ẹ.

⁷Ḅụgbiripumaḅara ḅụ Nyanaḅọ Ḅe enjẹlḅọ anịanga chịẹ simemẹ, se enekuḅu ikoli warị mị ḅie ḅịapakamẹ. Enjẹlḅọ ḅe aba ḅụ wẹrị Pita ḅe jikemẹ, se ò wosịsẹma se nwọ ḅẹmẹ, “Sarama! Sịsẹ chịẹ!” Anịkirikiri ikoli ma Pita ḅe ḅụ wọrọ saramẹ.

⁸Anịsịkị enjẹlḅọ ḅe nwọ ḅẹmẹ, “Ị́ya ḅirikunye mị kpọ kụrọma, pịkị ị́ya akpaka ḍiki ma kpọ.” Pita ḅe ọkọ mịẹmẹ, se enjẹlḅọ ḅe nwọ ḅẹmẹ, “Ị́ya ọgọnọ gbana ḅụchụaye mị se ị́ ḅụ apura se ị̀ ḍukoḅo.”

⁹Pita ḅe ò ḍuko ikoliwarị mị ḅie pakamẹ. Ò nemikẹ, enjẹlḅọ ḅe mịẹarịye mị kọkọmaye ọkụ, ọ̀ nwọ chịnmẹ na ọ̀ ḍawọaḅẹ.

¹⁰Ini tatarị ḅọkọ mị ḅọrọmẹ, pịkị maịn karamaye mị na, se anị ḅe kuluma ini ḅo ikulele onu ḅọkọ mị nwọ lamẹ, anị ḅọrọ mun opuama mị ḅie sọḅịa ḅọkọ mị. Mị ḅọkọ mị ngẹrị anịa ḅụ finji ini pịrị se ini pakasomẹ. Ini nwẹngị gbọrị opu ateli ḅie sọmẹ, se ḅụnemika ḅụ enjẹlḅọ ḅe Pita ḅe koroma somẹ.

¹¹Pita ḅe ọ̀ ḅụ mịẹye mị ḅo ọ̀ ḅụ okoro sịkị, ọ̀ nwọ ḅẹmẹ, “Mịọkụ mị à nemiye-ẹ na mịẹye mị kọkọmaye-ẹ! Nyanaḅọ Ḅe oria enjẹlḅọ fịrịmamẹ, se ḅo Hẹrọd kụrọ na pịkị Juapụma tọrụse ḍiki na ị̀ ḅụ mịẹḅịa nwọ ḅẹye ma ḅara ḅie ị̀ ḍụapakụmamẹ.”

¹²Ò ḅo ọ̀ ḅụnemi sịkị, ọ̀ nwẹngị Meri, Jọn Mak nyengima warị mun mẹ. Tọn-a apụ anịanga koḅirima se tẹkẹaḅẹ.

¹³Pita ḅe nụngọ da ḅọkọ mị nwọ gbolomẹ, se Roda nwọ chịn fịrịnwẹngị eremeni tọkụ ḅo anị chịn ḅịpị mị nwọ ḅerenimẹ.

¹⁴À Pita ḅe pụkọ mị nwọ lekiri ḅo sịkị, á ḅọkọ mị finji ka ḅụ, ḅieḅẹlẹ se vinpịkị mun ḍuko ini pịrịmẹ na Pita ḅe ọ̀ nụngọ chịẹ sime waraḅẹ.

¹⁵Ini nwọse á ḅẹmẹ, “Ị́ nọmụaḅẹ!” Ọkụma á kụrọma ḍukomẹ na kọkọmaye-ẹ. Anị ini pẹkẹrẹye-ẹ na, “Oria enjẹlḅọ-ẹ.”

¹⁶Anịsịkị, Pita ḅe pa ḅọkọ mị gboloaḅẹ. Anịḅe kuluma iniḅo ḅọkọ mị finji se ori ọrị sịkị inia ḅụgbiripumẹ.

¹⁷Ori ọ̀ ḅara se ini fọngụmamẹ, ini ḅẹmẹ ini deinma sime. Se ò ḅelema ḍuko ini pịrịmẹ Nyanaḅọ Ḅe ikoli ḅie ori ọkịpakụmaḅo ọkụ mị. “Ó mun ḍuko Jems ḅe na kọn mịnapụma na pịrị,” ọ̀ nwọ ḅẹmẹ; anịsịkị ori ini koroma so jịn anga mun mẹ.

¹⁸Anị ḅo dede lasịkị, ḅịpịogbosọka nyọ koruapụma ogboku pakamẹ—cheye Pita ḅe ḅụ pakasa?

¹⁹Hẹrọd ḅe tọnmẹ na ini ọ̀ ḍọkị, ọkụma ini ineda ori ọrịkẹ. Anị mịẹse ini ḅẹrẹ se nyọ koruapụma gbelamẹ se tọnmẹ na ini ini ḅaa. Mịn mị ḅọrọ sịkị Hẹrọd ḅe Judia mị wẹrịso mun Sizaria ḅie kele simemẹ.

²⁰Taya na Saịdọn ama apụma opuma Hẹrọd ḅe ịganịmamẹ, anị ini ogbo chụa ọ̀ damamunye-ẹ. Tatarịye ini Blastọs, amanyanaḅọ warị ḍikiḍikiarị ḅọ ḅe nwọ nyana inia ḅụ pịrịmẹ na ọ̀ ḅarachụa ini pịrị-ẹ. Anịsịkị anị ini so Hẹrọd ḅe damamun se ori na deinma mịẹ ḍọkịye-ẹ, anịatịḅị inia ama apụma, amanyanaḅọ ḅe ama apụma ḅara ḅọrọ fịye nyana nyanamẹ.

²¹Ini tọn koroma gbọrị ene ḅụ, Hẹrọd ḅe oria amanyanaḅọ ḅiriaye ma nwọ ḅiri se oria amanyanaḅọ ngada ọgọnọ kpọnjị simemẹ, se ọkwẹịn kọn tomonima pịrịmẹ.

²²“Tomoniḅọ mà ọkwẹịnma nwọ kọnkẹ, ọkụma tamụnọ-ẹ!” ini nwọ olokumẹ.

²³Anịkirikiri, Nyanaḅọ Ḅe enjẹlḅọ Hẹrọd ḅe fomu gbinmẹ, ori osi se Tamụnọ Ḅe pịrịkaye gose. Ọ̀ ḅụ ngule saramẹ se ọ̀ fịmẹ.

²⁴Tamụnọ ọkwẹịn mị pa wasama pịkị sẹnịma mun mẹ.

²⁵Banabas ḅe na Sọl ḅe na ini mun fịrị mị nwọ nwẹngị fama so sịkị ini vinpịkị Jerusalẹm mun se Jọn Mak ḅe nwọ ọkị inia ḅụ chụamẹ.