Read kirikeni Okunwẹngịapụ 14 Bible Online

Okunwẹngịapụ 14 - kirikeni bible

Okunwẹngịapụ 14

¹Anị gbọrị ḅara mị anị Aịkonịọm ḅie sọ anị paka ọkụ-ẹ: Pọl ḅe na Banabas ḅe na tẹkẹwarị mị ḅie mun mẹ, se ọkwẹịn so ọkụma tọn-a Juapụ na Jịnsẹapụ na pịkị ḅo ḅereniapụ sọmẹ.

²Ọkụma Juapụma ḅie ḅereni ḍụkụka apụma, Jịnsẹapụma nwọ kpẹịnmamẹ mịẹse ini mịna apụma na tụḅụrụmẹ.

³Okunwẹngịapụ ma anịnyọ sime ḅọlọ sịkị lamẹ. Ini kuḅie kụrọma Nyanaḅọ Ḅe gboloma ọkwẹịn mị kọnmẹ, ò kụrọ se ini pịrị, ini se tọn-a ḅụgbiripumaye na ḅụbuamaye na nwọ mịẹmẹ, se ḍiepakụmamẹ na oria ḍikiḅụgerere oku mị kọkọmaye-ẹ.

⁴Opuama mị ḅie sime tomonima ini puamẹ: dapụ Juapụma ḅụ sọmẹ, ísíapụma okunwẹngịapụ ma ḅụ sọmẹ.

⁵Anịsịkị Jịnsẹapụma na Juapụma na ḅo tịḅịnịma na ḅịpịogbo sọmẹ se sitọrụ se ini ḍiki se imgbele se ini gbinmẹ.

⁶Okunwẹngịapụ ma ḅo anị mị nwọ nemi sịkị ini mangị Listra na Dabi na mun mẹ, Laịkaonịa ḅie sime amama pịkị anị kelema nyọma ḅie na.

⁷Anịnyọ ini Iḅi Ḅẹrẹ mị ḍukomẹ.

⁸Listra ḅie gbọrị ikeliḅọ omi-ẹ, ikeli ḅụ ini wẹrị ò yimẹ, ini ò yi sịkị ngịsị ma ọ̀ nwẹngịkẹ.

⁹Ori anịnyọ kpọnjị sime se Pọl ḅe ọkwẹịn ma nwọ poki simemẹ. Pọl ḅe ọrịmẹ na ò ḅereni nyanamẹ ọ̀ pịkị ineda gwọḅịa, anị Pọl ḅe gbụkụkụma ò ḍikiye-ẹ,

¹⁰se gele pụkọ ḅụ nwọse ọ̀ ḅẹye-ẹ, “Sịsẹ chịẹ!” Nweniḅọ ḅe ḍosi chịẹ se sakị nwẹngị nyọ kelemamẹ.

¹¹Tomonima Pọl ḅe mịẹye mị nwọ ọrị sịkị, ini sakị inia ama ọkwẹịn Laịkaonịa ḅịpị ḅụ olokumẹ, “Oru ma àrị tomoni tọrụ nwọse koro wa damaḅosam!”

¹²Ini nwọse Banabas ḅe chịnmẹ Zụs, pịkị nwọse Pọl ḅe chịnmẹ Hẹmis, anịatịḅị ori mị ọkwẹịn ḅụ tịḅịdaḅọ-ẹ.

¹³Zụs orualaḅọ ḅe, oria oruwarị ama mị tọrọkọ sime ḅọ ḅe, owoi nambulo na ngwengwe na nwọse ama mị ḅie nụngọ ḅọkọ ḅomẹ, se tomonikpo mị ḅimẹ ini agba mịẹ okunwẹngịapụ ma pịrị.

¹⁴Banabas ḅe na Pọl ḅe na ini mịẹḅịa ẹrẹchị ḍọkịarịye nwọ naa sịkị ini inia ḅụchụayema nwọ jine kanmẹ, se mangị tomonikpo mị ḅie sọ, se olokuaḅẹ,

¹⁵“Cheye gose ọ́ mun mịn mị mịẹ ḍọkị-ao? Mine ma ọ́mịna juo-a tomoni-ẹ! Wa mịnyọ ḅomẹ Iḅi Ḅẹrẹ mị ḍuko ọ́ pịrịḅịaye gose, mà ye ḅụ sọkaye ma ḅụ ọ́ pịkị se so ḍumo Tamụnọ Ḅe daḅịa ẹrẹchị anị so mị na, sẹkiri mị na, tọrụ mị na, ḅo pịkị arịa ḅie simeye ma nwọ tẹmẹ ḅọ ḅe.

¹⁶Ḅọrọsa sịkị mị ò ḅereni tomoni mamgba pịrịmẹ na ini inia ḅụḅẹlẹ ateli ma nwọ nwẹngị.

¹⁷Ọkụma ọ̀ sịkịmamgba oria sime ḅara nwọ ḍiepakụma-pakụmamẹ, ọ̀ mịẹarị iḅiaye ma ḅụ ḅọrọ soḅie ene seni ọ́ pịrịmẹ, pịkị chịnmgbọlụ na arịa karakara sikima ḅụ ò fịye se ọ́ pịrịmẹ pịkị ḅieḅẹlẹ se ọ́mịna kuḅie ḅeinmamẹ.”

¹⁸Mà ọkwẹịn ma ini nwọ kọn ini pịrịaḅẹ nwọ ḅẹ sọnị anị sarasara okunwẹngịapụ ma pịrịkẹ tomonikpo mị kiki, agbamịẹ ini pịrị ḅụ.

¹⁹Da Juapụ Pisidia sẹ mị ḅie sime Antiọk na Aịkonịọm ḅie na sime ḅomẹ se tomonikpo mị fẹ inia ḅụ pịrịmẹ, ini imgbele se Pọl ḅe gbin se ama mị ḅie ọ̀ fọnọ pakụmamẹ, ini nwọ chịnmẹ na ọ̀ fịsam.

²⁰Ọkụma ḅereniapụma koḅirima ò kelema sịkị, ọ̀ sịsẹmẹ, se vinpịkị so ama mị ḅie mun mẹ. Anịḅe ene ḅa mị ḅụ ori na Banabas ḅe na so Dabi mun mẹ.

²¹Pọl ḅe na Banabas ḅe na Dabi mị ḅie Iḅi Ḅẹrẹ mị ḍukomẹ, se tọn-a ọḅụḍukoapụ nwọ nyana ḅomẹ. Anịsịkị ini vinpịkị so Listra na Aịkonịọm na pịkị Pisidia ḅie sime Antiọk na mun mẹ.

²²Ini ịnyọ se ḅereniapụma ḅụ chụa se inia kuḅie kụrọmamẹ mịẹse ini kọkọma ḅara nwọse ḅereni ḅụ simeḅịa ọkụ. “Wa tọn-a tọrụsiọrị ḅie ḅọrọ mun Tamụnọ Amanyanakiri mị ḅie sọḅịa,” ini nwọse ini ḍiemẹ.

²³Chọchị goyegoye ḅie ini tịḅịdapụ tọn koroma ini pịrịmẹ tẹkẹ ḅụ na ḅuruseḅụḅaama ḅụ na, se ini ini ḅọrọma Nyanaḅọ Ḅe ḅara chụamẹ, ini inia kuḅie se ḅụgbanasa Ḅọ ḅe.

²⁴Ini Pisidia sẹ mị ḅọrọ sịkị ini tolu mun Pamfilia lamẹ.

²⁵Ini Pẹga ḅie oku mị ḍukomẹ, se anịsịkị so Atalia mun mẹ,

²⁶se anịnyọ wẹrị tọrụ ḅụ ḅọrọ Antiọk mun mẹ, ini ini seni Tamụnọ Ḅe ḍikiḅụgerere ḅarama ḅie chụa nyọ mị anị ini mịọkụ nwẹngị karamasa fịrị mị gose.

²⁷Ini ḅo Antiọk ḅie lasịkị ini chọchịapụ ma koḅirima se Tamụnọ Ḅe ini se mịẹye mamgba nwọ ḍuko ini pịrịmẹ, ọ̀ pịkị ateli finji Jịnsẹapụma pịrị se ini ọkwẹịn mị ḅereni ḅara mị na.

²⁸Ini ḅereniapụma na sime ḅọlọ sịkị lamẹ.