Read kirikeni Okunwẹngịapụ 18 Bible Online

Okunwẹngịapụ 18 - kirikeni bible

Okunwẹngịapụ 18

¹Mịn mị ḅọrọ sịkị, Pọl ḅe ori Atẹns koroma so Kọrịnt nwọ mun mẹ.

²Anịnyọ ọ̀ gbọrị Ju owuḅọ na ịrịamẹ, Akwila nwọ chịnḅọ, Pọntọs ama ḅie ini yi ḅọ, ma ḅọlọka sịkị ḅụ ori Itili ḅie sime ḅomẹ tarọ Prisila ma na, anịatịḅị Sẹdaḅọ Klọdiọs ḅe tọnmẹ na Juapụ mamgba Rom mị nwọ koroma so. Pọl ḅe ò mun ini ọrịmẹ,

³se ini na anga, pịkị fịrịnwẹngị gbolomamẹ, anịatịḅị ikowarị namaye ḍori kọnfịye ḅụ mị ọ̀ wẹrị ḍumoarịye-ẹ, ini sọnị mị gbọrị kọnfịye mị nyana ọkụ mị.

⁴Ịnyọsara Ene goyegoye ori ini na tẹkẹwarị mị ḅie yeḍawọ gboloma-gbolomamẹ, mịẹse anị pa Juapụma na Grik apụma na ḅụokoroḅịa ḅara.

⁵Saịlas ḅe na Timoti ḅe na Masidonia ḅie ḅo lasịkị, Pọl ḅe oria sịkị mị mgba nwọse Tamụnọ ḅẹrẹ mị ḍukomẹ, ò ḍuko ḅelema Juapụma pịrịaḅẹ na Jizọs Ḅe ori anị Mẹsaya Ḅe-ẹ.

⁶Ini ori na tụḅụrụ se ọ̀ ḅụ siaye ḍuko sịkị, ò ḅereni ini pịrịkẹ, ori oria ḅụchụayema ḅụ sime fọn ma nwọ gugusin se ini ḅẹmẹ, “Ó nemikase famẹ ḅẹḅẹ ọ́mịna ḅara mị anị ḅoye-ẹ! Ị̀rị̀ mịẹ ka-o. Mịọkụ ọkị tọrọkọ mun, à Jịnsẹapụma damamunḅịa.”

⁷Anị ori ini wẹrịsoye-ẹ se sọmun ini Taịtọs Jọstọs nwọse chịn Jịnsẹḅọ ḅe warị ḅie angaye-ẹ, ori anị Tamụnọ tẹkẹtẹkẹḅọ-ẹ; oria warị mị na tẹkẹwarị mị na kpekimẹ.

⁸Krispọs, tẹkẹwarị tịḅịnịḅọ ḅe Nyanaḅọ Ḅe ḅerenimẹ, ori na ò furo mị mgba na; tọn-a jịn apụ na pịkị Kọrịnt mị ḅie oku mị naamẹ, ini anị ḅereni se pịkị mengi saramẹ.

⁹Gbọrị ḍin ḅie Pọl ḅe ịkịan ọrịmẹ, anịa ḅie Nyanaḅọ Ḅe nwọse ọ̀ ḅẹmẹ, “Ḅalafa nyana ma, ọkụma pa ọkwẹịnma mun, ḅarasin ma,

¹⁰anịatịḅị àrị ị́rị́ na omi-ẹ. Ineda ye se ị́ lamaḅịa gbọrịḅọ ofori-ẹ, anịatịḅị mị ama mị ḅie sime tọn apụ ị̀ya tomoni-ẹ.”

¹¹Anịgose Pọl ḅe gbọrị kụra na pẹkẹrẹ na nwọse anịnyọ simemẹ, Tamụnọ ọkwẹịn mị nwọse tomonima ḍieaḅẹ.

¹²Romapụ ma Galio ḅe seni Akaya sẹ mị ḅie gọvịna nwọ mịẹ sịkị, Juapụma koḅirimamẹ, Pọl ḅe kun, se ò se ḅẹrẹkọn warị mun mẹ.

¹³Ini nwọ ḅẹmẹ, “Ḅe ḅọ ḅe mịna oloko na kuraka ḅara ọ̀ nwọse ye se tomoni ḍieaḅẹ Tamụnọ tẹkẹ ḅụ!”

¹⁴Pọl ḅe ọkwẹịn-ẹtọn sịkị, Galio ḅe nwọse Juapụma ḅẹmẹ, “Mịn ḅẹrẹ mị mgbọkụ mịẹ na kuraka ḅe siye-ẹ nwọ ḅẹ ọkụma, anịkanịka sisa ḅe mịẹmịẹye-ẹ nwọ ḅẹ ọkụma, anị ḅụgbẹịnḅịa àrị inema nyana ómine Juapụma na anị pokiḅịa.

¹⁵Ọkụma anị nwọ ọkwẹịn na, ẹrẹ na, ọ́mịna oloko na ḅe ḅẹrẹjinea-ẹ ḅẹ sịkị, ómine ngẹrị mun anị kọn pẹlẹ. Àrị ọkọ simeaye ḅẹrẹkọnḅọ nwọ sọ ẹkẹ!”

¹⁶Se ọ̀ ḅẹrẹkọn warị mị ḅie ini depakụmamẹ.

¹⁷Inimgba Sọstẹnịs, tẹkẹwarị mị ḅie tịḅịnịḅọ ḅe nwọ pụrụkụmẹ, se ḅẹrẹkọn warị mị tọrọkọ ò fomumẹ. Ọkụma Galio ḅe ori anị se yechịnkẹ.

¹⁸Pọl ḅe tọn-a ḍin se ḅereniapụma na Kọrịnt ḅie simemẹ, anịsịkị ori ini wẹrịso se Prisila ma na Akwila ḅe na ḅụ sọ se dọkụ paka Siria mun mẹ. Ma ọ̀ Sẹnkiria ḅie dọkụ pakaka simeogbo ò ye ḅereni Tamụnọ pịrịmẹ se ori ọ̀ tịḅịsẹịn sinmẹ.

¹⁹Iniḅo Ẹfịsọsị nwọ lamẹ, Pọl ḅe Prisila ma na Akwila ḅe na nwọ wẹrịso nyọ mị. Ọ̀ tẹkẹwarị mị ḅie sọ se Juapụma na ọkwẹịnmẹ.

²⁰Ini ḅimẹ ori ini na sime ḅọlọ sịkị la, ọkụma ò ḅereni ini pịrịkẹ.

²¹Anịnakaraka, ọ̀ nwọ ḍuko ini pịrịmẹ, ori ini koromasoarị sịkị, “Tamụnọ Ḅe ọkọ ḅerenimẹ ḅẹḅẹ, à vinpịkị ọ́ damaḅoḅịa.” Anị ori Ẹfịsọsị ḅie dọkụ pakaye-ẹ.

²²Ò ḅo Sizaria lasịkị, ò so Jerusalẹm mun mẹ se chọchị mị kereni, se so Antiọk mun mẹ.

²³Ò kele anịnyọ sime so sịkị, ò somẹ se Galesia na Frijia na nyọma ọ̀ nwọ tolu ḅọrọ, ịnyọ se ḅereniapụ mamgba pịrịmẹ.

²⁴Anịsịkị mị ḅụ Alẹkzandria ḅie ini yi gbọrị Juḅọ, Apọlọs nwọ chịnḅọ Ẹfịsọsị ḅomẹ. Ori ọkwẹịn ḍinmẹ, se pịkị iḅiọkụ se Fịafịa ḍiri mị nemimẹ.

²⁵Nyanaḅọ Ḅe Ateli mị ḅie ini ye se ò ḍiesam, opu kuḅie ọ̀ nwọse Jizọs Ḅe gboloma ọkwẹịn kọn, se pịkị karakara ḅara se anị ḍieaḅẹ. Anịẹḅẹsọ, Jọn ḅe mengisara mị kẹngẹ anị ò nemiye-ẹ

²⁶Ọ̀ sakị tẹkẹwarị mị ḅie ọkwẹịnmẹ ḅalafa nyanaka ḅara ḅụ. Prisila ma na Akwila ḅe na ò ḍukoye naa sịkị, ini ori ọkị inia ḅụ chụa se so warị mun mẹ, se iḅiọkụ Tamụnọ Ateli mị nwọ ḍuko karama ọ̀ pịrịmẹ.

²⁷Apọlọs ḅe anịsịkị tọn pẹlẹmẹ na ori Akaya munḅịa, anị Ẹfịsọsị ḅie sime ḅereniapụma ḅarachụa ọ̀ pịrị se ḍiri gịẹịn Akaya ḅie sime ḅereniapụma pịrịye-ẹ, na ini iḅiọkụ se ori ọkị-ẹ. Ò mun lasịkị ori opuma ḅarachụaḅọ nwọ sọ Tamụnọ ḍikiḅụgerere ḅụ ḅerenisapụ ma pịrịmẹ.

²⁸Anịatịḅị oria kụrọ ọkwẹịn ḅụ, ò ḍuko ori na amaogbo ḅẹrẹpikia Juapụma nẹngịmamẹ, anị Fịafịa ḍiri mị ḅie ḅelema ḍiepakụmamẹ na Jizọs Ḅe anị Mẹsaya Ḅe-ẹ.