Read kirikeni Okunwẹngịapụ 20 Bible Online

Okunwẹngịapụ 20 - kirikeni bible

Okunwẹngịapụ 20

¹Ama mị fie ḅọrọ sịkị Pọl ḅe ḅereniapụma chịn koḅirimamẹ, kuḅie kụrọma ọkwẹịn kọn ini pịrị se ḅaḅa se ini ḅẹmẹ. Anịsịkị re ori ini koroma so Masidonia nwọ mun mẹ.

²Ori àrị irima tolu ḅọrọ se tomonima kuḅie kụrọmamẹ tọn-a ọkwẹịn ḅụ, anịsịkị ò so Gris nwọ mun mẹ,

³anịanga tẹrẹ akalụ ọ̀ nwọ simemẹ. Ọ̀ ḅụkarakarama Siria mun-ẹtọn ogbo anị ọ̀ ḍọkịḅo ọrịye-ẹ na Juapụma ini si ḅẹrẹ ḅia ọ̀ pịrịaḅẹ; anị ò kuḅie ḅụ ọ̀ tọn pẹlẹye-ẹ na ọ̀ Masidonia ḅụ ḅọrọ vinpịkị soḅịa.

⁴Biria ḅie ḅo Paịrọs ya, Sopata ḅe, ori na mun mẹ; anị gbọrị ḅara ḅụ anị Tẹsalonaịkapụ ma Arịstakọs ḅe na Sẹkọndọs ḅe na inia ḅụ sọmun ọkụ-ẹ, Dabi ḅie ḅo Gaịọs ḅe na pịkị Esia sẹ ḅie ḅo Tikikọs ḅe na Trọfimọs ḅe na, pịkị Timoti ḅe na.

⁵Ini ma tọrọkọ mun Troas ḅie sime wa korumẹ.

⁶Wa Filipaị ḅie wẹrị dọkụ pakamẹ. Suka Fịturu Alalị mị ḅo ḅọrọ sịkị, anị ḅe sọnọ-a ḍin karama ene, wa mun Troas ḅie ini lamẹ se ini na gbọrị wiki nwọ simemẹ.

⁷Chọchị sonio-a ḍin ene saso ḅiri ḅụ; wa koḅirimamẹ gboloma fịye mị fịḅịa ẹrẹchị, Pọl ḅe ọkwẹịn tomonima pịrịmẹ, se ọkwẹịn mun karakarama ḍin-ogbo nwọ lamẹ, ori anịḅe eneḅa ini koroma soḅịa gose.

⁸Wa koḅirima sime ọgọnọ warị mị ḅie tọn-a tọnjie kọrịaḅẹ.

⁹Pọl ḅe ọkwẹịnma mun-arị sịkị, Yutikọs nwọ chịn gbọrị asẹmẹnị tọkụ pẹlẹḅọkọ ọgọnọ sime mọnọaḅẹ. Mọnọ mị ḅo opuma gbun sịkị ò sime tẹrẹ karama deki mị ọgọnọ ò sokoro koromẹ. Ini mun ò deki sịkị ọ̀ fịsam.

¹⁰Ọkụma Pọl ḅe koro mun oria ọgọnọ ḅọlọlọ se ori apuramẹ. Ọ̀ nwọ se ini ḅẹmẹ, “Ómine ọ́ ḅụ ḅalaḅalamama, ọ̀ pa ḍumo waraḅẹ.”

¹¹Anịsịkị ò vinpịkị iwo ọgọnọju mun se fịturu pu se fịmẹ. Pọl ḅe ini na ḅọlọ sịkị se ọkwẹịn mun epepe paka sịkị la se somẹ.

¹²Ini ḍumo ḅụ asẹmẹnịḅọ ḅe ọkị warị mun mẹ, se anị opuma inia kuḅie kụrọmamẹ.

¹³Wa tọrọkọ mun owoin arụ mị lamẹ se anịju arụ sin Asọs mun mẹ, anị wa mun Pọl ḅe se arụ ḅie sẹịnḅịa nyọ mị. Ò ḍuko wa pịrịsam na wa mị ḅara mị nwọ mịẹ, anịatịḅị ò kiri ọgọnọ ḅọrọ anịnyọ mị nwọ mun aḅẹ.

¹⁴Asọs ḅie ò mine na ịrịa sịkị, wa ọ̀ sẹịn se ori na Mitilini mun mẹ.

¹⁵Wa anịnyọ arụ sin se dọkụ mun Kaịọs mị ḅọrọmẹ anị ḅe eneḅa ḅụ. Gbọrị ene ḅo ḅọrọ sịkị wa ḅo Samọs mị lamẹ, se anị ḅe eneḅa wa mun Militọs lamẹ.

¹⁶Pọl ḅe ò kuḅie ḅụ ḍukopẹlẹmẹ na ori Ẹfịsọsị mị agbaka ḅara ḅụ ḅọrọ munḅịa, mịẹse Esia pẹkẹrẹ ḅụ ọ̀ sịkị fama ẹka ḅara. Ọ̀ Pẹntikọst ene mị ḅụ ḅo Jerusalẹm laḅịa ḅara gose ò beaḅẹ, anị nemikase sarasaraḅịa ọkụma.

¹⁷Pọl ḅe Militọs ḅie sime oku se Ẹfịsọsị fịrịmamẹ, ḅiaḅẹ na chọchị mị ḅie sẹnịapụma ḅo ori na ịrịa.

¹⁸Ini ḅo lasịkị ọ̀ nwọse ini ḅẹmẹ, “Ómine sọnị nemimẹ na à tatarị Esia pẹkẹrẹ mị la ene, bebe ene mị mgba à nwọse ómine na simemẹ.

¹⁹Ḅụiderima na owutọrụsara na ḅụ mị àrị ị̀ya fịrịma nwẹngịye-ẹ, Nyanaḅọ Ḅe fịrịnwẹngịḅọ ḅara ḅụ, mịn sịkị mị ḅụ à ḅakama ḍaḍiki nyanamẹ, Juapụma ḅia ị̀ pịrịarị ḅẹrẹ ma gose.

²⁰Ó nemimẹ na ḅarachụa ọ́ pịrịḅịaye ḅụ à se ọ́ ḅọịma gbọrị kalaye sọnị ofori-ẹ, à nwọ amaogbo na pịkị ọ́mịna warịma ḅie Tamụnọ ḅẹrẹ mị ḍukoarị sịkị ḅụ.

²¹Anị gbọrị ḅara mị anị à se tetema se Juapụma na Jịnsẹapụma na pịrị ọkụ-ẹ, na ini inia sima ḅụ vinpịkị Tamụnọ Ḅe da, se wa Nyanaḅọ Jizọs Kraịst Ḅe ḅereni.

²²Se mịọkụ, Fịafịa Tẹmẹ Ḅe ḅịpị poki ḅụ, à so Jerusalẹm mun aḅẹ, anịnyọ ị̀ ḅụ pakaḅịaye nwọ nemika ḅụ.

²³À nemiye kẹngẹ anị, ama goyegoye ḅie Fịafịa Tẹmẹ Ḅe ori ị̀ ḅeri jinesam na, ikoli na ḅụfụka na sime ị̀ koruaḅẹ.

²⁴Ọkụma àrị ị̀ ḍumo mị nwọse yelakaye kịẹnmamẹ; mịẹse à kọn-arị nwẹngị mị kọn karama pịkị ị̀ya fịrị nwọ nwẹngị karamaḅịa ḅara; Nyanaḅọ Jizọs Ḅe se ị̀ pịrị mịẹ nwọ ḅẹye mị, anị Tamụnọ Ḅe oria ḍikiḅụgerere Iḅi Ḅẹrẹ mị nwọ ḍukopakụma mị-ẹ.

²⁵“Àrị ómine mgba ogboku nwẹngị kelema, Tamụnọ Amanyanakiri ḅẹrẹ mị ḍukosam. Se mịọkụ à nemimẹ na ọ́mịna ḅie gbọrịḅọ sọnị ḅarị jịn sịkị se ị̀ ọrị ẹkẹ.

²⁶Anịgose mịmgba, à ḅelema ḍuko ọ́ pịrịaḅẹ na nemikase ọ́mịna ḅie faḅịa ḅọ omi-ẹ ḅẹḅẹ, anị ị̀rị̀ mịẹkẹ.

²⁷Anịatịḅị Tamụnọ Ḅe tọn koroma se à ḍuko ọ́ pịrịka se ọlọchịẹmaye ofori-ẹ.

²⁸Anịgose ọ́ tọrụ se ọ́mịna ḅụ wẹrị, pịkị Fịafịa Tẹmẹ Ḅe se ọ́mịna ḅarachụa anana ogbo mị na. Anana ḍikiḍikiapụ ọ́ nwọ sọ oria chọchị mị pịrị anị, oria Tọkụ Ḅe fịḅụ mịẹ agba mị.

²⁹À nemimẹ na à sosa ḅẹḅẹ owoi-owoi piri obirima àrị ḅo ọ́mịna ḅie sọḅịa, àrị pịkị anana ogbo mị wẹrịso ẹkẹ.

³⁰Sịkị ḅoḅịa ọ́mịna ḅie pakaḅoḅịa dapụ iruoaye ḍukoḅịa se ḅereniapụma fọnọ inia ḅụ ma pịrịḅịa ẹrẹchị.

³¹Anịgose ómine ọbị, ọ́ pịkị se ḅiekoroma na tẹrẹ-a kụra ḅụ ḍin na enekaka na ḅụ ye se ó ḍie ḅụ à ḅarasinkẹ, owumengi pịkị ị̀ tọrụ saramẹ ọ́ tịḅị gose.

³²“Se mịọkụ àrị ó se Tamụnọ Ḅe ḅarachụamẹ, pịkị oria ḍikiḅụgerere oku mị ḅara ḅụ na, anị ineda ọ́ namachịẹma pịkị ò se oria tomoni mamgba wẹrịma ḅẹlẹma mị seni ọ́ pịrịḅịaye mị.

³³Ma à gbọrịḅọ sọ seleḅa, anịkanịka goli, anịkanịka ḅụchụaye nwọ ḍikipụkọsolikẹ.

³⁴Ómine sọnị ḅara na nemimẹ na ị̀ ḅarama anị à se ị̀rị̀ na nwẹngịapụma na ị̀rị̀ na ḅụpalịmaye ma nwọ nyanaḅoye-ẹ.

³⁵Ye mamgba à se ó ḍiesam na mị ḅara mị nwọse kụrọma fịrịnwẹngị ḅụ wa ineda ḅarachụa ịnyọ ḅụ oforika apụma pịrịḅịa, Nyanaḅọ Jizọs Ḅe na mịnaḅụ na nwọ ḅẹmẹ, ‘Ye ḍie nweni pịrị mị ḅẹlẹma nyanatẹịn ye daọkị mị nẹngịmẹ.’”

³⁶Pọl ḅe ori ọkwẹịn so sịkị, ori ini na kpẹrẹkị se tẹkẹmẹ.

³⁷Inimgba ini owuaḅẹ, ini ori oḅolo pịkị ọ̀ ḅịpị nọnjụ se ḅaḅa seni ọ̀ ḅẹarị sịkị.

³⁸Anịeso, anị ini kururumamẹ na ini ḅarị jịn sịkị se ori ọrị ẹkẹ. Anị ini ọ̀ ḅọrọma mun owoin arụ mị ḅie sẹịnye-ẹ.