Read kirikeni Okunwẹngịapụ 21 Bible Online

Okunwẹngịapụ 21 - kirikeni bible

Okunwẹngịapụ 21

¹Ómine iḅiọkụ sime wa nwọse ini ḅẹ se wa somẹ. Wa gbụkụkụma dọkụ saḅa mun Kọs mị lamẹ; anị ḅe eneḅa wa mun Rodis nwọ lamẹ, se anịnyọ wẹrị mun Patara mị lamẹ.

²Anịanga wa Fonisia mun-arị arụ nwọ ọrịmẹ, anị wa anị ḅụkụlọ se dọkụ pakasoye-ẹ.

³Wa ḅo wa ineda Saịprọs mị nwọ ọrịḅịa nyọ nwọ lamẹ, se anịa chukuju ọrụ wẹrị dọkụ mun Siria lamẹ. Wa Taya pọkụ mị ḅie koromẹ, arụ mị anịa ḅie sime ngọma nwọ ji koromaḅịa nyọ mị.

⁴Wa anịnyọ da ḅereniapụ na ịrịamẹ, se sọnọma ḍin nwọse ini na simemẹ. Tẹmẹ Ḅe kụrọ ḅụ ini ḍuko Pọl ḅe pịrịmẹ na Jerusalẹm mị ò mun ma-ẹ.

⁵Ọkụma wa se ini na simeḅịa sịkị mị ḅọrọ sịkị, wa so wa mun-arị anga mị nwọ mun mẹ. Ini na, inia eremeni ma na, inia awọma na nwẹngị mine na ama mị ḅie pakamẹ, mine mgba tọrụ aka mị ḅụ kpẹrẹkị se tẹkẹmẹ.

⁶Wa anịsịkị iḅiọkụ sime nwọse jịnḅọ jịnḅọ ḅẹmẹ, se wa owoin arụ mị ḅụkụlọ so sịkị ini sọnị vinpịkị so inia warịma mun mẹ.

⁷Wa tọrụ mị ḅie mịna nwẹngị mị kọnma mun mẹ, Taya ḅie wa dọkụ mun Tolemas lamẹ, anịanga wa ḅereniapụma kereni se ini na gbọrị ḍin mọnọmẹ.

⁸Anịḅe eneḅa, wa somun Sizaria lamẹ. Anịnyọ Filip, okunwẹngịḅọ ḅe warị mị wa bịanye-ẹ, Jerusalẹm ḅie ini sẹlẹọkị sọnọma apụma ḅie gbọrịḅọ-ẹ.

⁹Ma owuapụ simeka inein-a eremeni awọ ọ̀ nwọ nyanamẹ, Tamụnọ oku mị nwọ ḍukopakụmarịapụ.

¹⁰Anịnyọ wa tọn-a ḍin mọnọsam anị Agabọs nwọ chịn gbọrị ịkịankoroḅọ Judia ḅie wẹrị ḅo laye-ẹ.

¹¹Ò mine damaḅomẹ, Pọl ḅe ḅirikunye mị deki anị se ọ̀ ḅụọma na ọ̀ ḅarama na fịna, se nwọ ḅẹmẹ, “Mị anị Fịafịa Tẹmẹ Ḅe ḅẹ ọkụ-ẹ: Jerusalẹm ḅie sime Juapụma mị ḅara nwọse mị ḅirikunye mị nyanaḅọ ḅe fịnaḅịa pịkị ọ̀ ḅọrọma Jịnsẹapụma pịrịḅịa.”

¹²Wa mị naa sịkị, mine na anịnyọ sime jịn apụ na Pọl ḅe tẹkẹmẹ na Jerusalẹm mị ò mun ma-ẹ.

¹³Ọkụma ọ̀ pẹkẹrẹmẹ, “Mịn cheye ọ́ nwọ mịẹ-ao? Nde ó gose mị ḅara se owu ị̀ kuḅie lọkọmarịye? Jerusalẹm mị ḅie Nyanaḅọ Jizọs Ḅe tịḅị gose fị mị sọnị à ḅụkarakarama anị pịrịsam, papa ị̀ fịna mị kẹngẹkẹ.”

¹⁴Wa ḍuko se ọ̀ ḅụ okoroye oforika sịkị, wa ḅarasin se nwọ ḅẹmẹ, “Ye Nyanaḅọ Ḅe tọnye mị mịẹ.”

¹⁵Wa kele anịnyọ sime so sịkị, wa mịnaye ma nwọ koḅiri se so Jerusalẹm mun mẹ.

¹⁶Sizaria ḅie sime da ọḅụḍukoapụ mịnaḅụ sọ se mun mẹ, se mine ọkị wa simeḅịa warị nyanaḅọ ḅe nwọ damamunmẹ, Nasịn nwọ chịnḅọ, Saịprọs ḅie, aya enema ngịsị ḅereniḅọ-ẹ.

¹⁷Wa ḅo Jerusalẹm lasịkị, mịnapụma iḅiọkụ se wa ọkịmẹ.

¹⁸Anịḅe eneḅa mị ḅụ, Pọl ḅe mine na mun Jems ḅe toluma ò ḍikimẹ pịkị chọchị mị ḅe sẹnịapụ mamgba anịanga omi-ẹ.

¹⁹Pọl ḅe ini kereni se ḅeinma yegoyegoye nwọ ḍuko ini pịrịmẹ, Tamụnọ Ḅe oria fịrị ḅụ ḅọrọ Jịnsẹapụma ogboku mịẹarịye ma.

²⁰Ini ò ḍukoaye ma na so sịkị, ini Tamụnọ Ḅe bomamẹ, anịsịkị nwọse Pọl ḅe ḅẹmẹ, “Mịnaḅọ Pọl, ị́ ineda anị simeọkụ mị nwọ ọrịḅịa, mịna ḅie Juapụ ḅụ mẹndẹ oyiasi fịnjị-fịnjị ḅe tọn-a kiri ḅo ḅereniapụ sọsam, se inimgba ḅakama oloko mị nwọ ḅereni ọkị waraḅẹ.

²¹Ini ị́ gbolomaye nwọ ḍuko ini pịrịsam na ị́ ye se Jịnsẹapụma ḅie sime Juapụma ḍieaḅẹ na ini Moziz Oloko mị nwọ sịkị, ḍuko ini pịrịaḅẹ na ini inia owuapụ awọma ḅụpẹlẹ ma anịkanịka Juapụ ama anganga ḅara nwọ anga ma.

²²Pikipikiye ofori-ẹ ini naaḅịa na ị́ ḅosam. Anịọkụma, nde wa mịẹḅịa ọkụ?

²³Wa ḍuko ị́ pịrịye nwọ mịẹ. Ye ḅerenisa inein-a owuapụ mịnyọ omi-ẹ.

²⁴Ini na mun se inia ḅụ sọ ḅụ mịẹfịafịama mịẹmịẹye mị nwọ mịẹ, se inia tịḅị igbiki ma gbẹịn anịsịkị ini ineda inia tịḅị ma sẹịnḅịa. Mịn ḅara mị ḅụ ḅẹḅọ ḅẹḅọ nemiḅịa na ini ị́ ḅụ ḍukoye ma kọkọmayekẹ, anịnakaraka ị́rị́ sọnị Moziz Oloko mị simeọkụ ị́ nwọ ḍiki ḍumo kọn aḅẹ.

²⁵Ọkụma ḅo ḅereniapụ sọ sa Jịnsẹapụma, wa ḍiri gịẹịn ini sẹịnmasam ḅịpị ogbosọ ḅara ḅụ, ḍuko ini pịrịaḅẹ na ini ini se agbamịẹ oru pịrịsa fịye goyegoye nwọ fị ma, pịkị nama pulo goyegoye taḅa ma, ini pịkị fọngọlọ ḅaa nama goyegoye pẹị ma, pịkị sẹfị ḅụ ini inia ḅụ sin.”

²⁶Anị Pọl ḅe owuapụma ọkị, se anịḅe eneḅa mị ḅụ, ini na ḅụmịẹfịafịama mịẹmịẹye mị mun nwọ mịẹye-ẹ. Se ọ̀ Tamụnọ opu warị mị ḅie mun ḅịpị pịrịmẹ, ḅụmịẹfịafịama mị ọkịḅịa enema laḅịa ọkụ, se ini ḅọḅọ agba mị nwọ mịẹḅịa ḅara.

²⁷Sọnọma ḍinma ḅo kuluma-ẹḅoarị sịkị Esia pẹkẹrẹ mị ḅie sime ḅo da Juapụ Oputẹkẹwarị mị ḅie Pọl ḅe ọrịmẹ. Ini bebe tomonikpo mị nwọ chukuruma se kụrọ ḅara se Pọl ḅe ọlọmẹ.

²⁸Ini olokumẹ, “Izrẹlapụ, ọ̀ ḅarachụa! Ḅe nweniḅọ ḅe-ẹ, nyọ mamgba mun se Izrẹlapụma na Moziz Oloko mị na, pịkị mịn Oputẹkẹwarị mị na tụḅụrụ ḅara nwọse tomoniḅọ goyegoye ḍieaḅẹ. Mịọkụ ọ̀ pịkị Jịnsẹapụma ḅie dapụ ọkịḅo mị fịafịa nyọ mị pụlamasam!”

²⁹(Ini gose mịn mị ḍukoye, anị Ẹfịsọsị ḅie ḅo Trọfimọs ḅe na Pọl ḅe na ama mị ḅie ini nwọ ọrịmẹ se koromamẹ na Pọl ḅe ori ọkị Oputẹkẹwarị mị ḅie ḅomẹ.)

³⁰Bebe ama mị mgba fiemẹ, se tomonima mangị ḅo gbolomamẹ, ini gịsapụma Pọl ḅe pụrụkụ-ọlọ, se Oputẹkẹwarị mị ḅie ọ̀ fọnọ pakụmamẹ. Anịkirikiri ini Oputẹkẹwarị mị ḅe ḅọkọ ma palịmẹ.

³¹Tomonikpo mị Pọl ḅe ḅaa-ẹ tọn-arị sịkị anị oku mun, ọmụtịḅịnịḅọ ḅe laye-ẹ na Jerusalẹm mị ḅie mgba amaowu koroaḅẹ.

³²Anịkirikiri ori owuni na owunitịḅịda apụ na nwọ ọkị se, mangị ini damamunmẹ, iniḅo ḅẹrẹkọn apụma na owunima na ọrịsịkị, ini ḅarị Pọl ḅe fomukẹ.

³³Anịkirikiri ọmụtịḅịnịḅọ ḅe saḅa Pọl ḅe damamunmẹ, ò kun, se tọnmẹ na ini mama ikoli se ori ịkasị. Anị ori ini gbelaye-ẹ, “Ḅe ḅọ ḅe tụḅọ, cheye ọ̀ nwọ mịẹ?”

³⁴Dapụ tomonikpo mị ḅie gbọrịye nwọ olokuarị sịkị, ísíapụma jịnye nwọ olokuaḅẹ. Ye ọrụtọnka so ọkụma, owunitịḅịnịḅọ ḅe ori ineda jokoma pakaye mị nwọ ḍọkịḅokẹ, anị ọ̀ tọn oria tomonima pịrịye-ẹ, na ini Pọl ḅe nwọ ọkị owuni ḅụkikima warị ḅie chu.

³⁵Ini ori na mun ịkpịkpa ma nwọ lasịkị anị owunima ọ̀ pụraye-ẹ anịatịḅị tomonikpo mị opuma owoi ḅara nwọse ye mịẹmẹ.

³⁶Inimgba ọ̀ damaḅo se olokuaḅẹ, “Ọ̀ ḅaa!”

³⁷Ini Pọl ḅe ọkị owuni ḅụkikima warị mị ḅie mun-ẹ tọn-arị sịkị, anị ori ọkwẹịn owunitịḅịnịḅọ ḅe pịrịye-ẹ, “Ị́ ḅereni se àrị ọkwẹịn kọn ị́ pịrị ḅe?” “Ị́ Grik ọkwẹịn kọn ḍin?” Owunitịḅịnịḅọ ḅe ọkọ se ò gbelamẹ.

³⁸“Anịọkụma Ijiptḅọ ḅe ị́rị́kẹ, ḅọrọsa sịkị ḅụ kụrọtịḅịḅie chụa se owuniaye deki kịnị oyi ẹndẹ ma na so piri-ele ḅie mun ḅọ ḅe?”

³⁹Pọl ḅe pẹkẹrẹmẹ, “Ị̀rị̀ Juḅọ-ẹ, Tasọs ḅie ini yi ḅọ, Silisia ḅie, yela opuama ḅie pakaḅo ḅọ-ẹ. Pasisi, ye àrị ọkwẹịn tomonima pịrị.”

⁴⁰Owutịḅịnịḅọ ḅe ḅereni ọ̀ pịrịmẹ, anị Pọl ḅe ịkpịkpa ma ọgọnọ chịẹ se ḅara se tomonima dẹdẹye-ẹ. Ini deinma sime so sịkị, Pọl ḅe Hibru ḅịpị nwọse ọkwẹịn ini pịrịmẹ: