Read kirikeni Okunwẹngịapụ 23 Bible Online

Okunwẹngịapụ 23 - kirikeni bible

Okunwẹngịapụ 23

¹Pọl ḅe gbụkụkụma Ḅẹrẹchiri mị ḍiki se nwọ ḅẹmẹ, “Ị̀ juo Izrẹlapụ! Ị̀ kuḅie ma ḅẹrẹsi kọn ị̀ pịrịkẹ ọkịḅo mịmgba la sọ, à se Tamụnọ Ḅe tọrọkọ ḍumo kọn-arị ḅara mị gbolomaye ḅụ.”

²Ananayas, Gele Agbamịẹḅọ ḅe, tọnmẹ na Pọl ḅe na kpekima chịẹ apụma ini ọ̀ ḅịpị ḅụrọ.

³Pọl ḅe nwọse ọ̀ ḅẹmẹ, “Tamụnọ Ḅe gbarịmaka ḅara ḅụ ị́ ḅụrọḅịa—ị́rị́ ḅịaḅịa agba se ọmbị warị agbagba! Anịnyọ sime Oloko mị ḍiki se ḅẹrẹkọn anị ini se ị́ ḅẹye-ẹ, anị sọ ị́ Oloko mị kansam, se tọnmẹ na ini ị̀ ḅụrọ!”

⁴Pọl ḅe na kpekima sime owuapụma nwọse ọ̀ ḅẹmẹ, “Ị́ Tamụnọ Gele Agbamịẹḅọ ḅe wọlọaḅẹ!”

⁵Pọl ḅe pẹkẹrẹmẹ, “Ị̀ya mịnapụ à nemikẹ ori Gele Agbamịẹḅọ ọkụ. Fịafịa ḍiri mị nwọ ḅẹmẹ, ‘Tịḅịda ḅẹrẹtọn tomonima pịrịarịḅọ ḅe ḅụ, ị́ siye ḍuko ẹkẹ.’”

⁶Pọl ḅe ori na koḅirima mị ḅie sime dapụ Sadusiapụ na Farisiapụ na-ẹ, nwọ ḅẹ sịkị, ọ̀ Ḅẹrẹchiri mị ḅie olokumẹ, “Ị̀ juo Izrẹlapụ ị̀rị̀ Farisiḅọ-ẹ, Farisiapụ tọkụ-ẹ. À ḅẹrẹkọn ḅie omi-ẹ, anịatịḅị à tọrụ se ḍikimẹ na fịapụ sịsẹ se ḍumoḅịa!”

⁷Ọ̀ mịn mị nwọ ọkwẹịn kirikiri, Farisiapụ ma na Sadusiapụ ma na sakị kamụsọmẹ se koḅirima mị puamẹ.

⁸(Anịsịkị Sadusiapụ ma nwọ ḅẹmẹ, na tomoni fịḅụ sịsẹ ẹkẹ, ini pịkị nwọ ḅẹmẹ, na enjẹlapụ na tẹmẹ na ofori-ẹ; ọkụma Farisiapụ ma tẹrẹ mamgba nwọ ḅerenimẹ.)

⁹Olokutịḅị mị pịkị geletẹịnmẹ, se Oloko ḍieapụma ḅe dapụ, Farisiapụ ma ḅie sime apụma sịsẹ chịẹ se kụrọma mịn mị na tụḅụrụmẹ: “Ḅe tomoniḅọ ḅe ḅụ wa ineda ḍọkịḅoḅịa si ofori-ẹ! Ḅụtimaka tẹmẹ anịkanịka enjẹlḅọ kọkọma ọkwẹịn ọ̀ pịrịmẹ!”

¹⁰Ḅẹrẹ jinea mị owoi so ọkụma owuni ḅẹrẹtọnḅọ ḅe ọ̀ ḅalafamẹ nwọfa ini Pọl ḅe kanị kọsịmaḅịa etuḅo. Anị ọ̀ tọn oria owunima pịrịye-ẹ na ini koro tomonikpo mị damamun se inia ḅie Pọl ḅe ọkịpakụmaḅo, se ori ọkịmun owuni ḅụkikima warị mị ḅie koroma.

¹¹Anị ḍukoma ḍin mị ḅie Nyanaḅọ Ḅe Pọl ḅe anga chịẹ sime se nwọ ḅẹmẹ, “Ḅalafama! Ị́ mịnyọ Jerusalẹm ḅie onyechịẹ ị̀ pịrịsam, ị́ pịkị Rom ḅie anị gbọrịye mị nwọ mịẹḅịa.”

¹²Anịḅe eneḅa dede ḅie da Juapụ ḅo gboloma se ḅẹrẹḅiamẹ. Ini ye karịfịmẹ na ini gbọrịye sọnị fị ẹkẹ pịkị mengi sọ ḅu ẹkẹ ini Pọl ḅe nwọ ḅaaka simeogbo.

¹³Ini nweni-a mesi nwọ nẹngịye lamẹ, gboloma se mị ḅẹrẹḅia apụma.

¹⁴Anịsịkị ini tịḅịnị agbamịẹapụma na sẹnịapụma na damamun se nwọ ḅẹmẹ, “Wa gboloma yekarịfịsam na gbọrịye sọnị wa fị ẹkẹ wa Pọl ḅe ḅaaka simeogbo.

¹⁵Anịẹrẹchị ómine na Ḅẹrẹchiri mị na epele ḅara ḅụ ḅịpị se Rom Owuni ḅẹrẹtọnḅọ ḅe fịrịma se ọ̀ Pọl ḅe se ọ́ sẹịnma, ómine iḅiọkụ ò gbolomaye nemi ḅimẹ nwọ ḅẹ ḅara ḅụ. Ọkụma mine wa ḅụkarakaramamẹ ọ̀ ḅaa, ma ò ḅo mịnyọ laka simeogbo.”

¹⁶Ọkụma Pọl nụmbụrarọ ma tọkụ ḅe ini ḅia ye mị nwọ naasam; anị ò so owuni ḅụkikima warị ḅie mun se anị ḍuko Pọl ḅe pịrịye-ẹ.

¹⁷Anịsịkị Pọl ḅe owunima ḅie gbọrị tịḅịdaḅọ chịn se nwọse ọ̀ ḅẹmẹ, “Ḅe asẹmẹnịḅọ ḅe ọkị owuni ḅẹrẹtọnḅọ ḅe damamun, ò ḍuko ọ̀ pịrịḅịaye omi-ẹ.”

¹⁸Owunitịḅịdaḅọ ḅe ori ọkị ọ̀ ḅọrọma mun owuni ḅẹrẹtọnḅọ ḅe pịrị, se nwọ ḅẹmẹ, “Pọl, ikoliḅọ ḅe ị̀ chịnmẹ, se ị̀ ḅẹmẹ, à ḅe asẹmẹnịḅọ ḅe nwọ ọkịḅo ị́ pịrị, anịatịḅị ò ḍuko ị́ pịrịḅịaye omi-ẹ.”

¹⁹Owuni ḅẹrẹtọnḅọ ḅe ḅara ḅụ ori ọkị sikima ngẹrị ọ̀ ḅụ pịrị, se ò gbelamẹ, “Cheye ị́ nwọ nyana se ị́ ḍuko ị̀ pịrị ḅe?”

²⁰Ọ̀ nwọ ḅẹmẹ, “Ju ḅẹrẹtọn apụma ḅịpị se ogbo chụasam, ḅa ini ị́ ḅara Pọl ḅe nwọ ḅi se ò se ḅẹrẹchiri mị munḅịa, ini iḅiọkụ ò gbolomaye nwọ ḍọkị nemi ḅiaḅẹ nwọ ḅẹ ḅara ḅụ.

²¹Ọkụma ini poki ma, anịatịḅị owuapụ-a mesi nẹngịmaye ḅọị ò koruḅịa. Ini ye karịfịsam na ini yefị ẹkẹ pịkị mengi sọ ḅu ẹkẹ ini ọ̀ ḅaaka simeogbo. Mịọkụ ini ḅụkarakaramasam anị mịẹḅịa ẹrẹchị se ị́ ḍukoḅịaye nwọ koruaḅẹ.”

²²Owuni ḅẹrẹtọnḅọ ḅe nwọ ḅẹmẹ, “Ḍuko gbọrịḅọ sọnị pịrị ma na mịn mị ị́ ḍuko ị̀ pịrịsam, nwọ ḅẹye mị.” Se ori asẹmẹnịḅọ ḅe ḅẹ se ò somẹ.

²³Anịsịkị owuni ḅẹrẹtọnḅọ ḅe oria owunitịḅịdapụ ma ḅie mama apụ chịn se nwọ ḅẹmẹ, “Owuni oyiasi ọ̀ nwọ karakarama Sizaria munḅịa apụ, asụn se nwẹngịḅịa owuni-a tesioyifịnjị se chụa, pịkị sụḅa ọlọ owuni oyiasi na se chụa, se ḅụkarakarama, esenia-a so ḅiri mị ḍin.

²⁴Pọl ḅe se nwẹngịḅịa asụn ọ̀ pịkị nwọ karakarama, se deinma ò se mun Gọvịna Fẹliks ḅe pịrị.”

²⁵Anịsịkị owuni ḅẹrẹtọnḅọ ḅe mị ḅara mị sime ḍiri nwọ gịẹịnmẹ:

²⁶“Klọdiọs Lisias ḅe, se Osi nyana, Gọvịna Fẹliks ḅe sẹịnma kereni ḅịpị.

²⁷Juapụma, ḅe tomoniḅọ ḅe kunmẹ, se ọ̀ ḅaa-ẹ tọnmẹ. À naamẹ na ori Rom furotọkụ-ẹ, se àrị ị̀ya owunima na mun se ọ̀ ḍụapakụma ḅomẹ.

²⁸Ini se ọ̀ pụnụmaye à nwọ nemi ḍọkịmẹ, anịẹrẹchị àrị ori ọkị inia Ḅẹrẹchiri mị mun mẹ.

²⁹À ḍọkịḅomẹ na ò se fịḅụ chu gbẹịnye ọ̀ nwọ mịẹkẹ, anịkanịka ò se ikoli ḅie chuḅịaye, ini se ọ̀ pụnụmaye anị inia ḅarakuḅu oloko na gbolomaye-ẹ.

³⁰Se ini ḍuko ị̀ pịrịmẹ na da Juapụ ḅẹrẹ ḅia ọ̀ pịrịaḅẹ nwọ ḅẹ sịkị à tọnpẹlẹmẹ ò se kirikiri ị́ fịrịma. À ḍuko ḅẹrẹ seni ọ̀ pụnụmarị apụma pịrịsam na ini ị́ tọrọkọ ḅo se ini se ọ̀ pụnụmarịye ma ḍuko.”

³¹Owuni ma ini tọn ini pịrịsa ḅara mị nwọ mịẹmẹ. Anị ḍin, mị ini Pọl ḅe ọkị se ori na mun Antipatris mị laye-ẹ.

³²Anịḅe eneḅa mị ḅụ, ḅụọ se nwẹngị owunima vinpịkị ḅo owuni ḅụkikima warị mị lamẹ, se ọ̀ ḅụ ḅarasin se nwẹngịapụma pịrịmẹ ini ò se mun mẹ.

³³Ini ò se mun Sizaria lamẹ, se gịẹịn ḍiri mị se gọvịna ḅe pịrị, se Pọl ḅe saḅama ọ̀ pịrịmẹ.

³⁴Gọvịna ḅe ḍiri mị gomẹ se Pọl ḅe ḅo pẹkẹrẹ nwọse ò gbelamẹ. Ọ̀ ḍọkịḅo ọrị na Silisia ḅie ò ḅomẹ nwọ ḅẹ sịkị,

³⁵ọ̀ nwọ ḅẹmẹ, “Àrị ị́ ḍukoḅịaye naaḅịa, ḅẹrẹ se ị́ pụnụmapụ ma ḅo lasịkị.” Anịsịkị ọ̀ kụrọ pịrịmẹ na ini Pọl ḅe se ò koruḅịa apụ chuku ḅie koroma gọvịna odo ḅie.