Read kirikeni Okunwẹngịapụ 26 Bible Online

Okunwẹngịapụ 26 - kirikeni bible

Okunwẹngịapụ 26

¹Agiripa ḅe nwọse Pọl ḅe ḅẹmẹ, “À ḅereni ị́ pịrịsam ị́ ị́ya ḅẹrẹkọn.” Anị Pọl ḅe ọ̀ ḅarama ịsụn se sakị ọkwẹịnye-ẹ:

²“Amanyanaḅọ Agiripa! Àrị ị̀ ḅụ se iḅifụḅara nyanaḅọ kịẹnmamẹ na àrị ị́ tọrọkọ ị̀ ḅịpị ḍukoḅịa Juapụma se ị̀ pụnụmaye mamgba ḅụ.

³Mịn mị sosikima kọkọmaye nwọ sọmẹ anịatịḅị ị́ iḅiọkụma Juapụma mịẹmịẹye na inia ḅẹrẹ ma na nwọ nemimẹ. Anị mịẹse àrị ị́ ḅara ḅiaḅẹ ị́ iḅiọkụ se ị̀ poki.

⁴“Àrị asẹ ḅụ sime sịkị ngịsị Juapụ mamgba nemimẹ à ḅara wẹrịma ị̀ ḍumo kọn ọkụ. Sakị mị ngịsị, ini nemimẹ àrị ị̀ya bebe ḍumo mị mgba nwọse ị̀ya ama na Jerusalẹm mị na ḅie anga ọkụ.

⁵Ini sịkịmamgba nemimẹ, ini ḅereni se ḍukopakụmaḅịa ọkụma, na tatarị mị ngịsị kụrọtẹịn Tamụnọ tẹkẹ ogbo mị ḅie à simemẹ, anị Farisiapụ ma-ẹ.

⁶Se mịọkụ à mịnyọ chịẹ se ini ḅẹrẹkọn ị̀ pịrịaḅẹ, anịatịḅị à tọrụ se Tamụnọ Ḅe ḅereni mịna ḅieju-aḍapụma pịrịye mị nwọ ḍikiaḅẹ—

⁷anị gbọrị ḅereniye mị, mị mịna oyimaịn furo fịnjịma tọrụ se ḍikiarịye-ẹ, anị nyanaḅịa ẹrẹchị, ini ḍin na enekaka na nwọse Tamụnọ Ḅe tẹkẹarịye mị ḅụ. Pịkị tọrụ se mịn mị nwọ ḍiki gose, Ị́ya Amanyanaḅọ osi mị ḅụ, mị anị Juapụma gose ḅẹrẹ se ị̀ pụnụmarịye-ẹ!

⁸Nde anị gose ómine mịanga simeapụma ḅụfụkamarịye, ḅereni na Tamụnọ Ḅe ọ̀ fịapụ sịsẹma sịsẹmamẹ?

⁹“Ị̀rị̀ sọ à koromamẹ na àrị ineda ị̀ya ịnyọ la-ọkụ mịẹse Jizọs Nazarẹtḅọ ḅe na tụḅụrụḅịa.

¹⁰Anị mị à nwọ mịẹmẹ Jerusalẹm ḅie. À kụrọ ọkịmẹ tịḅịnị agbamịẹapụma ḅara se tọn-a Tamụnọ-a tomoni se ikoli ḅie chụamẹ se ini ḅaa ḅẹrẹpẹlẹ ini pịrị sịkị, ị̀rị̀ sọnị anị mịẹkụrọmamẹ.

¹¹Tọn-a sịkị à nwọse ḅụfụka se ini pịrịsam tẹkẹwarịma ḅie, se ḅụkụrọma mịẹse ini inia ḅereni nwọ pikimẹ. Àrị owoi ini dapaka so-ọkụma, à pịkị igoni amama ḅie mun se inia tọrụsiọrịmẹ.

¹²“Mịn gbọrịye mị gose à Damaskọs nwọ mun mẹ, tịḅịnị agbamịẹapụma kụrọ se ị̀ pịrị pịkị tọn ị̀ pịrị ḅara ḅụ.

¹³Ị́ya osiḅụ, eneogboin ḅiri ḅụ, ateliogbo, ḅịa ịrụa mị nẹngị enekuḅu à nwọ ọrịmẹ, soḅie koroḅo ḅịa ị̀rị̀ na, ị̀rị̀ na mun-arịapụ ma na kelemamẹ.

¹⁴Mine mgba ḅịkị kiri koromẹ, se à pụkọ naamẹ nwọse Hibru ọkwẹịn ḅie ị̀ ḅẹmẹ, ‘Sọl! Sọl! Cheye gose ị́ ị̀ ḅụfụkama-ao? Ị́ ye se ị́ ḅụ lamaḅịa! Ị́ ḅụọ se ḍụparị tẹịn ọkụma.’

¹⁵‘Nyanaḅọ, ị́rị́ tụḅọ?’ à nwọ gbelamẹ. Se Nyanaḅọ Ḅe nwọ ḅẹmẹ, ‘Ị̀rị̀ Jizọs Ḅe-ẹ, ị́ ḅụfụka se pịrịarịḅọ ḅe.

¹⁶Ọkụma sịsẹ chịẹ, àrị ị̀ ḅụ se ị́ ḍiemẹ, ị́ se ị̀ya fịrịnwẹngịḅọ nwọ mịẹḅịa ẹrẹchị. Mịmgba ị́ ị̀ ḅụ ọrịye ị́ nwọ ḍuko jịn apụ pịrịḅịa, à pịkị se tọrọkọju ị́ ḍieḅịaye na.

¹⁷Àrị ị́ se fịrịmaḅịa Izrẹlapụma na pịkị Jịnsẹapụma na ḅara ḅie, àrị ị́ ḍụaḅịa.

¹⁸Ị́ inia tọrụmgbọlụma finjiḅịa, se kanakana mị ḅie ini pịkị enekuḅu mị ḅie chuḅịa, pịkị Oru ḅe kụrọ ḅie ini ọkịḅo Tamụnọ Ḅe pịrịḅịa, mịẹse ini ị̀ ḅụ nyana ḅereni ḅụ ini siḅụ-ḅarasin nwọ nyanaḅịa se, Tamụnọ Ḅe sẹlẹ sa tomonima ḅie inia kiri nwọ ọkịḅịa ọkụ!’

¹⁹“Anịgose, Amanyanaḅọ Agiripa, à ḅịpịpokikaḅọ sọ se soḅie ḅo elekima mị pịrịkẹ.

²⁰Tatarịye, Damaskọs mị ḅie na, pịkị Jerusalẹm mị ḅie na, pịkị Judia mị ḅie mgba na pịkị Jịnsẹapụma ogboku na, à Tamụnọ ḅẹrẹ mị ḍukomẹ na ini inia sima ḅụ vinpịkị Tamụnọ Ḅe da, se ini vinpịkịsam nwọ ḅẹye ḍiepakụmaḅịaye nwọ mịẹ.

²¹Mịn mị gose anị Juapụma ị̀ kunye-ẹ àrị Oputẹkẹwarị mị ḅie simearịogbo, se ị̀ ḅaaḅịa ẹrẹchị ḍọkịarịye-ẹ.

²²Ọkụma ọkịḅo mịmgba ene mị nwọ la sọ, Tamụnọ Ḅe ọ̀ ḅarachụa ị̀ pịrịmẹ, anị mịẹse à mịnyọ chịẹ sime onyechịẹ nweni mgba pịrịaḅẹ, opu ḅọ na kala ḅọ na gbọrị ḅara mị ḅụ. À ḍukoye mị anị ịkịankoroapụma na Moziz ḅe na ḍuko sime na pakaḅịa nwọ ḅẹ gbọrịye mị-ẹ.

²³Na Mẹsaya Ḅe ọ̀ tọrụsiọrịḅịa, se tatarị fịḅụ sịsẹ ḅọ nwọ sọḅịa, se ḍụaḅọrọma enekuḅu mị ḍukopakụma Juapụ na Jịnsẹapụ na pịrịḅịa.”

²⁴Pọl ḅe mị ḅara se ọ̀ ḅịpị ḍukoarị sịkị, Fẹstọs ḅe ọ̀ tịḅị olokumẹ, “Pọl, ị́ nọmụsam, ị́ya opu ḍawọye mị ị́ mịẹse ị́ nọmụaḅẹ!”

²⁵Pọl ḅe pẹkẹrẹmẹ, “À nọmụkẹ, ị́ya opu kiri ḅụ! À kọn àrị ọkwẹịnma kọkọmaye ḅoju-ẹ.

²⁶Amanyanaḅọ Agiripa! Àrị ineda kuḅie kụrọma ọkwẹịn ị́ pịrịḅịa, anịatịḅị mayema gbolomaye ị́ nemimẹ, à nemi kpaịnmamẹ na ị́ arịa ḅie yegoyegoye ḅụ elekima chụa waraḅẹ, anịatịḅị mị ye mịanga mịẹye kẹ.

²⁷Amanyanaḅọ Agiripa, ịkịankoroapụma ị́ ini ḅereni? À nemimẹ ị́ kọkọma ini ḅerenimẹ!”

²⁸Agiripa ḅe nwọ seni Pọl ḅe ḅẹmẹ, “Mịn boka sịkị mị ḅụ ị́ chịn ḅara ị́ ị̀ mịẹse à Kraịst Ḅe ḍukoḅọ sọ ḅe?”

²⁹Pọl ḅe pẹkẹrẹmẹ, “Anị ḅọrọ boka sịkị-o, pịkị ḅọlọ sịkị-o, à tẹkẹ se Tamụnọ Ḅe ḅara ḅiarịye anị ị́rị́ na kiri kọn se ị̀ pokiarịapụ mamgba mịmgba ene mị ḅie pịkị ḅo à sime sa ọkụ nwọ sime, ikoli ma sikima ọkụma!”

³⁰Anịsịkị amanyanaḅọ ḅe na, gọvịna ḅe na, Banaịsị ma na, pịkị ísíapụ mamgba na sịsẹ chịẹmẹ.

³¹Se ini soarị sịkị nwọse jịnḅọ jịnḅọ ḅẹmẹ, “Ḅe ḅọ ḅe ọ̀ mịẹse fị anịkanịka ikoli sọ gbẹịnye ofori-ẹ!”

³²Se Agiripa ḅe nwọse Fẹstọs ḅe ḅẹmẹ, “Mgbọkụ ini ḅe owuḅọ ḅe ḅụ ḅarasinsam ò nemikase mị ḅẹrẹ mị seni Siza ḅe nwọ sua ḅọrọka ọkụma.”