Read kirikeni Okunwẹngịapụ 27 Bible Online

Okunwẹngịapụ 27 - kirikeni bible

Okunwẹngịapụ 27

¹Ini ḍukopẹlẹmẹ na wa arụ ḅụkụlọ Itili mun-ẹ nwọ ḅẹ sịkị, ini Pọl ḅe na jịn ikoliapụ na nwọ ḅọrọma Juliọs ḅe pịrịmẹ, ori owunitịḅịdaḅọ-ẹ Romapụ ọmụ mị ḅie ini “Ọgọstọs Owukụlọ nwọse chịn ọmụogbo mị.”

²Wa Adramịtịọm ḅie owoin arụ ḅụkụlọmẹ, anị ḅụkarakarama Esia sẹ mị ḅe tọrụaka mị ḅie sime amama mun ḍọkịarị arụ mị, se wa arụ sinmẹ. Arịstakọs, Tẹsalonaịka ḅie ḅo Masidoniaḅọ ḅe sọnị ómine na omi-ẹ.

³Anịḅe eneḅa wa ḅo Saịdọn lamẹ. Juliọs ḅe ori iḅi se Pọl ḅe mịẹmẹ, se ḅereni ọ̀ pịrị se ò mun oria ikiapụ ma ọrịmẹ, ini ọ̀ ḅụpalịmaye seni ọ̀ pịrịḅịa ḅara.

⁴Anịnyọ, wa dọkụma mun mẹ, se fọrụ mị fie tụḅụrụma wa daye gose, wa Saịprọs chọ mị ḅụ kikima agbagba mị aka wẹrị dọkụma mun mẹ.

⁵Wa Silisia na Pamfilia na ḅụ wẹrị sikima se tọrụ mị saḅa ḅo Lisia sẹ mị ḅie Mira mị lamẹ.

⁶Anịnyọ, owunitịḅịnịḅọ ḅe, Alẹkzandria ḅọrọ Itili mun-arị owoin arụ nwọ ọrịmẹ, anị ò mine se anịa ḅie sẹịnye-ẹ.

⁷Wa tọn-a ene nwọse deindeinma anị dọkụmẹ, pịkị opu ḅụakụ ḅụ, anịḅe kuluma wa ḅo Knidọs nwọ chịn ama mị ḅe sikima nyọ nwọ lamẹ. Fọrụ mị ngịsị ḅereni wa pịrịkẹ wa anị pẹkẹrẹ mị dọkụma mun, anịgose, wa ideri mun Krit chọ mị ḅe ọpọ mị nwọ dọkụmẹ, anị Salmọn nwọse chịn Sonju mị agbagba wa wẹrị ḅọrọmẹ.

⁸Wa tọrụaka wẹrị kpekima ḅọrọmẹ, se opu ḅụfụka ḅụ ḅo ini Ḅụḅọrọma Pọkụ nwọ chịn nyọ mị lamẹ, anị Lasia nwọ chịn ama mị na sasakẹ.

⁹Wa sime ḅọlọ sịkị lamẹ anịnyọ, ọkịmun tọrụ dọkụ mị ḅo ḅalafama sịkị la, anịatịḅị mị sịkị mị ḅụ Ḅuruseḅụḅaama Ene mịẹmịẹye mị ḅọrọsam. Anịgose Pọl ḅe mị tetema mị se ini pịrịmẹ:

¹⁰“Owuapụ, àrị ọrịmẹ mịna tọrụdọkụ, mịnyọ ọkịmun mị, fa ọkịḅoḅịa, ngọma àrị opuma siḅịa, pịkị arụ mị na, ḍumo sọnị pịkị faḅịa.”

¹¹Ọkụma owunitịḅịnịḅọ ḅe, arụkụlọ-daḅọ ḅe na arụ nyanaḅọ ḅe na ḍukoye ma ọ̀ ḅụokorotẹịn Pọl ḅe ḍukoye mị nẹngịmẹ.

¹²Arụ mị agba pọkụ mị oḅoku sịkị ḅie sime na gbẹịn nyọkẹ, anị mịẹse anị owuapụma ḅe tọn apụ ḅụḅẹlẹmẹ ini arụ mị da sikima tọrụ ogbo pịrị, se ḅụkụrọma mun Foniks mị nwọ la mị, sarasaramẹ ḅẹḅẹ. Foniks mị anị arụ agbagba pọkụ-ẹ Krit ḅie, anị tọrụ se ịrụasọsọ nyọ mị ḅe chuku na ọgọnọ na da waraḅẹ, ini pịkị ineda oḅoku sịkị mị se anịanga simeḅịa.

¹³Chuku fọrụ sakị mẹmẹma fieye gose, anị owuapụma koromaye-ẹ na ini tọnsa ọkụ mị ini nwọ mịẹḅịa anị ini ḅo lịmọ mị jine owoin arụ mị ḅie sẹịnye-ẹ, se ini inedaḅịa ḅara nwọse Krit agbagba mị ḅụ dọkụma mun mẹ.

¹⁴Ọkụma ḅọlọka sịkị ḅụ, ọgọnọ fọrụ kụrọma Krit chọ mị ḅie fie pakaḅomẹ.

¹⁵Anị owoin arụ mị dekimẹ, se iniḅo ọrịmẹ na ini ḅarị ineda fọrụ mị ḅie dadama mun ẹka ẹrẹchị, ini ḅarasin fọrụ mị pịrịmẹ se anị owoin arụ mị deki nwẹngịmẹ.

¹⁶Wa kikima nyọ nyanamẹ wa Koda chọ tọkụ mị chuku ọrụ mị lasịkị. Anịanga opu tọrụsiọrị ḅụ wa ineda owoin arụ mị ḅie kala arụ mị ọfọịn pakụmaḅomẹ.

¹⁷Ini anị jine owoin arụ mị ḅie sẹịnmẹ, se ḍiki se gagama anị se owoin arụ mị ḅụ kpọmẹ. Inia ḅalafamẹ ḅofa fọrụ mị ini jine mun Libya mị ḅe saḅama anga ḅụmọ mị ḅụ fomuḅịa etuḅo! Anịgose ini ịvala mị sin se owoin arụ mị ḅụ ḅarasin fọrụ mị pịrị se anị ini suma mun mẹ.

¹⁸Ḍiki ọkụma, opu irisi mị pa fieaḅẹ, anịgose, anịḅe eneḅa mị, ini owoin arụ mị ḅie sime da ngọ deki tọrụ mị ḅie gbinmẹ,

¹⁹se anị ḍukoma ene mị ḅụ ini owoin arụ mị ḅie fịrịnwẹngịaye ma ḅụ daye pịkị nwọ deki tọrụ mị ḅie gbinmẹ.

²⁰Tọn-a ene wa ḅarị ịrụa mị anịkanịka loliama ọrịkẹ, fọrụ mị pịkị kpọma gagama fieaḅẹ, anịḅe kuluma, wa ḍumoḅịa nwọ ḅẹ kuḅie sọ mịna ḅie famẹ.

²¹Tomonima ḅọlọ sịkị ḅụ fịye fịka ḅụ simearịogbo, Pọl ḅe inia tọrọkọ chịẹsime se nwọ ḅẹmẹ, “Owuapụ, mgbọkụ ómine ị̀ pokisam, se Krit ḅụ arụ sin ẹkẹ, se maye sima na fa na ḅie pọkọ pakasam.

²²Ọkụma mịọkụ àrị ọ́ tẹkẹmẹ, ó kuḅie kụrọma! Gbọrịḅọ sọnị ọ́mịna ḅie iniḅọ ḍumo nwọ fama ẹkẹ, arụ mị kẹngẹ mị faḅịaye-ẹ.

²³Anịatịḅị nwọ ḅọrọsa ḍin mị ḅie à sime pịrị pịkị tẹkẹarị Tamụnọ Ḅe enjẹlḅọ ị̀ damaḅomẹ,

²⁴se ọ̀ nwọse ị̀ ḅẹmẹ, ‘Ḅalafama, Pọl! Mịẹse Siza ḅe tọrọkọ ị́ chịẹ ẹkaye ofori-ẹ. Tamụnọ Ḅe ori iḅi mịẹ ḅara ḅụ ị́ gose, ị́rị́ na arụ mị ḅie sime apụ mamgba ḍumo nyanasam.’

²⁵Anịẹrẹchị owuapụ ó kuḅie kụrọma! Anịatịḅị à kuḅie se Tamụnọ Ḅe ḅụgbanamẹ na ò ḍuko ị̀ pịrịsa ḅara mị anị nwọ pakaḅịa.

²⁶Ọkụma anị mine fọnọ mun gbọrị chọ ḅụ jiaḅịa.”

²⁷Oyi inein-a ḍin fịnjị karama ḍin mị ḅie, irisi mị Mẹditirenia tọrụ mị ḅie wa fọnọma mun mẹ. Karakara ḍin ogbo pembe sịkị ḅụ arụ mị ḅie sime fịrịnwẹngịapụma tọrụsekịẹnmamẹ na wa mun anga kpekiaḅẹ.

²⁸Anị ini kiritọn ḍiki se gbin koromaye-ẹ anịa ḅụ sime lịmọ mị na, se ḍọkịḅo ọrịmẹ na anị ḅe gbun mị si kuḅu lamẹ; ini pịkị kele mun se tọn ḍikimẹ, se ḍọkịḅo ọrịmẹ na anị ḅo jie-a kuḅu lasam.

²⁹Inia ḅalafamẹ nwọfa owoin arụ mị anị mun ịkụma ọgọnọ gbanaḅịa etuḅo. Anị ini owoin arụ mị ḍukuno ḅụ inia lịmọ mị nwọ gbin koromaye-ẹ, se tẹkẹmẹ na ene mị pa ḅa.

³⁰Arụ mị ḅie fịrịnwẹngịapụma ḅụkụrọma arụ mị ḅie koro soḅịa ḅara nwọ ḍọkịmẹ. Ini arụ tọkụ mị sin mengi ọgọnọ koromamẹ, se ini epeleti mun onwoin arụ kụlọ lịmọ mị koroma-ẹ mun aḅẹ nwọ ḅẹ ḅara mịẹmẹ.

³¹Ọkụma Pọl ḅe nwọse ọmụtịḅịnịḅọ ḅe na owunima na ḅẹmẹ, “Mịn arụ mị ḅie fịrịnwẹngịapụma nemikase arụ mị ḅie simekẹ ḅẹḅẹ ó ḍumo ẹkẹ.”

³²Anị owunima ini se kala arụ mị kpọ ḍiki ma pẹlẹsin se anị tẹịnye-ẹ.

³³Ene ḅa-ẹ tọn aḅẹ, se Pọl ḅe inimgba tẹkẹmẹ na ini yefị-ẹ: “Mịọkụ, oyi inein-a ḍin fịnjị ọ́ nwọse korusam, ma sịkịmamgba gbọrịye sọ ọ́ fịkẹ.

³⁴Anịgose àrị ọ́ tẹkẹmẹ, ó yefị mịẹse ómine ịnyọ nyanaḅịa ọkụ. Ọ́mịna tịḅị sime gbọrị inime sọnị fa ẹkẹ.”

³⁵Ọ̀ mị ḍuko so sịkị, Pọl ḅe fịturu ọkị inimgba tọrọkọ ḅụ mịẹḅaka se Tamụnọ Ḅe ḅẹ, anị pu, se sakị anị fịmẹ.

³⁶Ini inia kuḅie kụrọmamẹ, inia ḅụ ḅọḅọ pịkị ye fịmẹ.

³⁷Arụ mị ḅie sime apụma mine mgba, nweni oyiasi na ineinfa kịnị iniasi fịnjị nwọ lamẹ.

³⁸Nweni mgba ye fị ḅụlọ ḍụḅamaso sịkị, ini owoin arụ mị ḅie sime ịpịamgba ma nwọ tan tọrụ mị ḅie saramẹ, anị foinḅịaye gose.

³⁹Ene mị ḅa sịkị tọrụ dọkụapụ ma ini tọrụ kọngọ mị nemikẹ, ọkụma ini pọkụ nyana ọpọ nwọ ọrịmẹ, se ini tọnmẹ na anị iḅiḅịa ọkụma ini owoin arụ mị dọkụ mun anịnyọ gbanaḅịa.

⁴⁰Anị ini lịmọ ma nwọ pẹlẹsin, se àrị ḅileye-ẹ, anị gbọrị sịkị mị ḅụ, ini ḍukuno fẹ jụọịn ma ọlọ ḍiki ma nwọ fimasinmẹ. Se ini arụ kụlọ da ịvala mị nwọ dekichịẹmamẹ mịẹse fọrụ mị arụ mị suma tọrọkọ mun anga lamaḅịa ḅara.

⁴¹Ọkụma arụ mị gbọrị ḅụmọ bịan se gbanamẹ; kụlọ mị mun ḍipi se ḅarị jikekẹ, anịsịkị ambura ma ḅe kụrọ mị ḍukuno mị fomu kanmẹ.

⁴²Owuni ma tọn wẹrịmẹ na ini ikoliapụ mamgba nwọ ḅaaḅịa, mịẹse inia ḅie gbọrịḅọ sọnị oki anga la se so ẹka ọkụ.

⁴³Ọkụma owunitịḅịnịḅọ ḅe ḅimẹ ọ̀ Pọl ḅe ḍụaḅọrọma anị ori ini kikiye-ẹ na mịn mị ini mịẹ ma. Anịnakaraka, ọ̀ tọn ineda okiḅịa apụ mamgba pịrịmẹ na ini tatarị arụ mị ḅie fukukoro se oki mun anga la;

⁴⁴kọn apụma ini ḍuko se ḍụpọma anịkanịka arụ pẹkẹrẹ ma na ọlọ okima mun mẹ. Mịn ḅara mị ḅụ mine mgba deinma ḅụ mun anga lamẹ.