Read kirikeni Okunwẹngịapụ 3 Bible Online

Okunwẹngịapụ 3 - kirikeni bible

Okunwẹngịapụ 3

¹Gbọrị ene eneogboin tẹrẹ-a so ḅiri ḅụ Pita ḅe na Jọn ḅe na Oputẹkẹwarị mị ḅie mun mẹ tẹkẹ sịkị mị ḅụ.

²Anịanga Ḍikitọrụgbẹịn Onu ḅọkọ ini nwọ chịn nyọ mị angasịkị gbọrị owuḅọ omi-ẹ, ikeliḅọ-ẹ, oria ḍumo ene mamgba, eneḅeneḅene ini ò deki mun onu ḅọkọ mị angasịkị koroma koromamẹ mịẹse Oputẹkẹwarị mị ḅie sọḅoḅịa apụ ḅara ye ọmgbọḅịa ọkụ.

³Ò Pita ḅe na Jọn ḅe na ḅie sọmun-arị ọkụ nwọ ọrị sịkị, ori ini tẹkẹ se inia ḅara ye ọmgbọmẹ.

⁴Ini gbụkụkụma ò ḍikimẹ se Pita ḅe nwọ ḅẹmẹ, “Wa ḍiki!”

⁵Anị ori ini ḍikiye-ẹ, tọrụ se ini se ọ̀ pịrịḅịaye nwọ ḍikiaḅẹ.

⁶Pita ḅe nwọse ọ̀ ḅẹmẹ, “À goli na seleḅa na nyanakẹ, ọkụma à nyanaye à nwọse ị́ pịrịḅịa: Jizọs Kraịst Nazarẹtḅọ ḅe ẹrẹ ḅụ, à tọn ị́ pịrịaḅẹ, sịsẹ se nwẹngị!”

⁷Anịsịkị ori oria amaḅara ḅụ ori ọlọ se ḅarachụa ò deki chịẹmamẹ. Anị kirikiri nweniḅọ ḅe ḅụọma anda-na iko-na ma kụrọmẹ;

⁸se ḍosi ọ̀ ḅụọma se chịẹmẹ, se sakị nwẹngị kelemaḅẹ. Anịsịkị ori ini na nwẹngị Oputẹkẹwarị mị ḅie sọ mun mẹ, nwẹngị na ḍosi na ḅụ Tamụnọ Ḅe nwọ tokoniaḅẹ.

⁹Anịnyọ sime-a tomonima ori ọrịmẹ, ọ̀ nwẹngịaḅẹ se pịkị Tamụnọ Ḅe tokoniaḅẹ,

¹⁰se ini ḅo ò lekiri na ori mị Oputẹkẹwarị mị angasịkị Ḍikitọrụgbẹịn Onu ḅọkọ mị anga sime ye ọmgbọ-ọmgbọ ḅọ ḅe-ẹ nwọ ḅẹ sịkị, inimgba ḅụgbiripumẹ, se ijira pịkị inia ḅụ saramẹ, ọ̀ ḅụ nwẹngị fịrị mị gose.

¹¹Nweni ḅọ ḅe Pita ḅe na Jọn ḅe na nwọ wẹrịsoka ḅara mị anị tomoni mamgba ḅụ buanmamẹ, se ini mangị ini damamunmẹ, ini Sọlọmọn Iḅoma nwọse chịn anga mị ḅie.

¹²Pita ḅe tomonima ọrị sịkị, ọ̀ nwọ seni ini ḅẹmẹ, “Izrẹlapụ, nde mịn mị gose ọ́mịna ḅụgbiripumarịye, pịkị mị ḅara mgba se wa ḍikiarịye? Ó koroma-o na anị mịna ḅarakuḅu kụrọ-ẹ anịkanịka mịna iḅi mịẹmịẹye ḅụ wa ḅọrọ ḅe ḅọ ḅe mịẹse ọ̀ nwẹngị?

¹³Ebraham ḅe na, Aịzịk ḅe na, Jekọb ḅe na Tamụnọ Ḅe, mịna ḅieju-aḍapụma Tamụnọ Ḅe, oria iḅitẹmẹ ḅe boma mị nwọse oria Fịrịnwẹngịḅọ Jizọs Ḅe pịrịmẹ. Ọkụma ómine ọ̀ ḅọrọma ḅẹrẹtọn apụma pịrịmẹ, pịkị Paịlet ḅe tọrọkọ ọ̀ sịkịmẹ, Paịlet ḅe ḍuko pẹlẹmẹ na ori ọ̀ ḅụḅarasinḅịa nwọ ḅẹ sịkị mị sọnị.

¹⁴Ọ̀ Fịafịa se pịkị iḅimẹ, ọkụma ómine ọ̀ sịkịmẹ, anịnakaraka Paịlet ḅe tọrụ iḅifẹ gose ó ḅimẹ, ò nweniḅaaḅaaḅọ ḅe re ḅụḅarasin ọ́ pịrị-ẹ.

¹⁵Anị ḅara mị ḅụ ó tomoni ḅọrọma mun ḍumo ḅie chuchu ḅọ ḅe nwọ ḅaamẹ, ọkụma Tamụnọ Ḅe fịḅụ ọ̀ sịsẹmasam, se mine wa onyechịẹapụ sọ mịn mị pịrịmẹ.

¹⁶Oria ẹrẹ mị ḅe kụrọ, mị ịnyọ se ḅe ikeliḅọ ḅe pịrịye-ẹ, ómine ọrị pịkị nemiye mị, oria ẹrẹ ḅụ ḅereni nyana mị anị mịẹmẹ. Jizọs Ḅe ḅụ ḅereni nyana mị, anị mị ḅara mị nwọse ómine mgba ọrịarịḅọ ḅe mịẹse ọ̀ ḅụ iḅiye-ẹ.

¹⁷“Se mịọkụ, ị̀ya mịnapụ, à nemimẹ na ómine na ọ́mịna ḅẹrẹtọn apụma na se Jizọs Ḅe mịẹye mị, nemika ḅụ ómine anị mịẹmẹ.

¹⁸Ḅọlọ sịkị ngịsị Tamụnọ Ḅe ḍukopakụmamẹ oria ịkịankoroapụma ḅụ na Mẹsaya Ḅe ọ̀ tọrụsiọrịḅịa, ọ̀ pịkị mịẹse anị ḅara ḅụ ḅo kọkọmaye nwọ sọsam.

¹⁹Anịọkụma, ó vinpịkị, tọrụse Tamụnọ Ḅe da, mịẹse ori ọ́mịna sima ḅụ ḅarasin ọ́ pịrịḅịa ḅara,

²⁰sịkịna sịkịna ḅụ tẹmẹ ḅe kụrọ Nyanaḅọ Ḅe ḅara ḅoḅịa, anịsịkị ò Jizọs Ḅe se ọ́ fịrịmaḅịa anị Mẹsaya Ḅe, ọ̀ gbọtụḅara sẹlẹ ọ́ pịrịsaḅọ ḅe.

²¹Ò soḅie simeḅịa ọkịmun ini ye mamgba nwọ mịẹ ịwọmaḅịa sịkị laḅịa, Tamụnọ Ḅe osiḅụ sime ịkịankoroapụma ḅụ ḅọrọ ḍukopakụma sa ḅara mị, ḅọlọ sịkị ngịsị.

²²Anịatịḅị Moziz ḅe nwọ ḅẹmẹ, ‘Ọ́ Nyana Tamụnọ Ḅe ịkịankoroḅọ se ọ̀ fịrịmaḅịa, ori ị̀ se fịrịma ọkụ mị, ori ọ́mịna tomonima ḅie gbọrịḅọ nwọ sọḅịa, ò ḍuko ọ́ pịrịye goyegoye ọ́ nwọ pokiḅịa.

²³Ori ịkịankoroḅọ ḅe ḍukoye poki ẹkaḅọ goyegoye ini Tamụnọ-a tomonima ḅie iniḅọ sikima se iniḅọ ḅaaḅịa.’

²⁴Kọkọmaye ḅụ ịkịankoroapụma, Samụẹl ḅe se chụa, pịkị ọ̀ ḅụọ ḅọrọ se ḅo apụma na, ini sọ ḍukopakụmaḅẹ enema ḅie mịẹarịaye ma.

²⁵Tamụnọ Ḅe oria ịkịankoroapụma ḅụ ḅọrọ se ḅereni ọ́ pịrịaye ma sime ọ́ pịrịmẹ, ọ́ pịkị Tamụnọ Ḅe ọ́mịna ḅieju-aḍapụma na fị ọḅọkụ ḅụ yeḍia ọkịmẹ. Ò ḍuko Ebraham ḅe pịrị ḅara mị, ‘Ị́ ḅụ pakaḅoḅịa apụma ḅie à ḅọrọ se tomonikiri sime apụ mamgba ḅẹlẹmaḅịa.’

²⁶Anịgose Tamụnọ Ḅe oria Fịrịnwẹngịḅọ Ḅe sẹlẹ ọkị se tatarị ò se ọ́ fịrịmamẹ, ọ́ ḅẹlẹma, mịẹse ọ́mịna ḅie ọrị ḅọḅọ iniḅọ sitịḅị mịẹmịẹaye ma ḅụ vinpịkịḅịa ḅara.”