Read kirikeni Okunwẹngịapụ 5 Bible Online

Okunwẹngịapụ 5 - kirikeni bible

Okunwẹngịapụ 5

¹Ọkụma Ananayas nwọ chịn gbọrị owuḅọ omi-ẹ, pịkị tarọ Safaịra ma na, inia kiri ini nwọ dẹrịmẹ,

²ọkụma igbiki mị ḅụ pẹkẹrẹ nwọse ọ̀ ḅụ wẹrịmamẹ, tarọ ma sọ nemi ḅara ḅụ, se kọn pẹkẹrẹ mị nwọ ḅọrọma okunwẹngịapụ ma pịrịmẹ.

³Pita ḅe nwọse ọ̀ ḅẹmẹ, “Ananayas, nde ị́ gose ḅereni oru ḅe pịrị se ori ị́ kuḅiemgbọlụ nwọ ọkị nyanaye, se ị́ mịẹse ị́ iruo kọn Fịafịa Tẹmẹ Ḅe pịrịye, ị́ ọkị igbiki mị ḅe pẹkẹrẹ nwọ seni ị́ ḅụ wẹrịma?

⁴Ị̀ nyanaye mị ma ị́ nwọ dẹrịka sịkị anị sime ị́ pịrịmẹ, ị́ pịkị anị dẹrịso sịkị sọnị igbiki mị sime ị́ pịrịmẹ. Nde anịsịkị ị́ gose ị́ kuḅiemgbọlụ ḅie ḍuko pẹlẹye na ị́ nwọ simeye nwọ mịẹḅịa? Ị́ iruo kọn tomoni pịrịkẹ—Tamụnọ Ḅe mị ị́ iruo kọn pịrịye-ẹ!”

⁵Ananayas ḅe mịn mị nwọ naa kirikiri ọ̀ ḅịkị koro se fịmẹ se anị gbolomaye naa apụ mamgba opu ḅalafa inia ḅie sọmẹ.

⁶Asẹmẹnị ma sọ ḅo, se ḅịtẹ se oria oju fịna se ò deki paka mun ḍipimẹ.

⁷Tẹrẹ-a so pembe ye ḅọrọ sịkị, tarọ ma sọ ḅomẹ, ọkụma pakasaye mị á nemikẹ.

⁸Pita ḅe nwọse á ḅẹmẹ, “Ḍuko ị̀ pịrị mịn mị anị ị́ de ḅe na ị́rị́ na ọ́ nyanaye mị ḅụ ọ́ dẹrịḅoye mị bebema la igbiki ḅịpị?” Á nwọ pẹkẹrẹmẹ, “Iin, anị bebe igbiki ḅịpị mị-ẹ.”

⁹Anị Pita ḅe nwọse á ḅẹye-ẹ, “Nde ị́rị́ na ị́ de ḅe na gose ḅia se Nyanaḅọ Ḅe Tẹmẹ mị nwọ ḍaḍikiye? Ị́ de ḅe ḍipi owuapụma ḅọkọ ḅụ ini omi-ẹ mị gbọrị sịkị mị ḅụ ini pịkị ị́rị́ sọnị deki pakaḅịa!”

¹⁰Anị kirikiri árị ọ̀ ḅụọ chuku ḅịkị koro se fịmẹ. Asẹmẹnị ma sọ ḅo se ọrịmẹ na á fịsam, anị ini á deki paka se á se dewu ḅe anga sịkị ḅụ ḍipiye-ẹ.

¹¹Bebe chọchị mị na anị naa apụ mamgba na opu ḅalafa inia ḅie sọmẹ.

¹²Tọn-a ḅụgbiripumaye na ḅụbuamaye na okunwẹngịapụ ma nwọ mịẹmẹ tomonima ogboku. Ḅereniapụ mamgba ḅo Sọlọmọn Iḅoma mị ḅie koḅirimamẹ.

¹³Ogbo mị ḅie oforika se dadama inia ḅie sọ mun gbọrịḅọ sọ ofori-ẹ, tomonima ḅakama ini ḍuko gololomamẹ nwọ ḅẹ sọnị.

¹⁴Ọkụma tọn-a tomoni ḅo koḅirima mị ḅie sọmẹ kpo ḅụ ama na ere na, anị Nyanaḅọ Ḅe ḅereniapụma.

¹⁵Okunwẹngịapụ ma mịẹarịaye ma gose, ini obi apụma pụra pakụma ini se mọnọaye na etera na ọgọnọ gbana se ini se opu ateli ma anga sịkị koromamẹ, mịẹse Pita ḅe nwẹngị ḅọrọḅịa sịkị, anị simeọkụ simeọkụ sọnị ọ̀ tẹmẹ mun inia ḅie dapụ ḅụ saramaḅịa ḅara.

¹⁶Se tọn-a tomonikpo Jerusalẹm mị kelema amama ḅie sime ḅomẹ, inia obi apụma na sitẹmẹ ḅie sime apụma na nwọ ọkịḅo se ini inimgba gwọmẹ.

¹⁷Anịsịkị Gele Agbamịẹḅọ ḅe na oria ogboapụ ma na, pịkị Sadusiapụ ma ḅie sime kpekima anga apụma na, gbọtụḅara okunwẹngịapụ ma ḍikipụkọsoli so ọkụma, ini tọnpẹlẹmẹ na ini ye se ini mịẹḅịa.

¹⁸Ini okunwẹngịapụ ma kunmẹ, se ini seni ama ikoli warị mị ḅie chu koromamẹ.

¹⁹Ọkụma anị ḍin mị ḅie Nyanaḅọ Ḅe enjẹlḅọ ikoli warị onu ḅọkọ ma finji, okunwẹngịapụ ma ḅọrọma pakụmamẹ, se nwọse ini ḅẹmẹ,

²⁰“Ó mun Oputẹkẹwarị mị ḅie chịẹsime, se mị ịwọ ḍumo mị na gbolomaye mamgba nwọ ḍuko tomonima pịrị.”

²¹Okunwẹngịapụ ma ḅịpị poki ḅụ, ḅaso se Oputẹkẹwarị mị ḅie sọ mun se sakị yeḍiemẹ. Gele Agbamịẹḅọ ḅe na oria ogboapụ ma na Ju ama sẹnịapụ mamgba nwọ chịn koḅirimamẹ, opu Ḅẹrẹchiri ọlọḅịa ẹrẹchị, anịsịkị ini tọn ikoliwarị mị sẹịnmamẹ na ini okunwẹngịapụ ma ọkị inia tọrọkọ ḅo.

²²Ọkụma fịrịtịḅịnị ma mun lasịkị, ikoli warị mị ḅie okunwẹngịapụ ma ini ḅarị ini ọrịkẹ; anị ini pịkị ḅo anị ḍuko Ḅẹrẹchiri mị pịrịye-ẹ,

²³“Wa mun ikoliwarị mị lasịkị, wa ọrịmẹ na anịa ḅọkọ mị ịkasị waraḅẹ, nyọ koruapụ mamgba pịkị onu ḅọkọ mị anga sịkị koruaḅẹ; ọkụma wa ḅọkọ ma finji sịkị, gbọrịḅọ sọnị ḅie wa ọrịkẹ!”

²⁴Oputẹkẹwarị mị koruapụma inia tịḅịnịḅọ ḅe na agbamịẹ tịḅịnịma na mịn mị nwọ naa sịkị, anị inia ḅụbuamamẹ, okunwẹngịapụ ma ḅụ mịẹye mị.

²⁵Anịsịkị gbọrị owuḅọ sọ ḅomẹ se nwọ seni ini ḅẹmẹ, “Ó poki! Ó seni ikoli ḅie chu apụma ini Oputẹkẹwarị mị ḅie chịẹsime ye se tomonima ḍieaḅẹ!”

²⁶Anị fịrịtịḅịnịḅọ ḅe oria tomonima na pakaye-ẹ, se okunwẹngịapụ ma nwọ ọkị vinpịkị ḅomẹ, ini kụrọye se ini mịẹkẹ, anịatịḅị inia ḅalafamẹ, ḅofa tomonima ḍụparị se ini gbinḅịa-ẹ tuḅo.

²⁷Ini okunwẹngịapụ ma nwọ ọkị warị ḅie chumẹ, se ini Ḅẹrẹchiri mị tọrọkọ chịẹmẹ, se Gele Agbamịẹḅọ ḅe ḅẹrẹ se ini gbelamẹ.

²⁸“Wa kụrọma oloko chụa ọ́ pịrịmẹ na ḅe ḅọ ḅe ẹrẹ ó se yeḍie ma,” ọ̀ nwọ ḅẹmẹ, “ọkụma ọ́ mịẹye mị ọ́ nwọ ọrị! Ómine ọ́mịna ḍieye nwọse Jerusalẹm ḅie mgba wasamasam, pịkị ḅiaḅẹ mine mịẹse ọ̀ fịmẹ nwọ ḅẹ apụ sọ!”

²⁹Pita ḅe na ísí okunwẹngịapụ ma na ini pẹkẹrẹmẹ, “Tamụnọ Ḅe ḍukoye mị wa mịẹḅịaye-ẹ, tomoniḅọ ḍukoye kẹ.

³⁰Mịna ḍapụma Tamụnọ Ḅe, fịḅụ Jizọs Ḅe sịsẹmamẹ, ómine ò se mgbẹsẹchịn ọgọnọ ḅakụḅaa sịkị ḅụ.

³¹Tamụnọ Ḅe ọ̀ sịsẹma oria amaḅara anga koromamẹ Tọrọkọ Ịsụnḅọ na Ḍụaḅọrọmaḅọ na ḅara ḅụ, ẹmbẹ seni Izrẹlapụma pịrị ini vinpịkị se siḅụ-ḅarasin pịrị nwọ nyanaḅịa ḅara.

³²Mayema, mine arịa onyechịẹapụ-ẹ—mine na Fịafịa Tẹmẹ Ḅe na, anị Tamụnọ ḍiepịrịye sọ ọ̀ ḅịpị poki apụma pịrịpịrịḅọ ḅe.”

³³Ḅẹrẹchiri mị ḅie apụma mịn mị nwọ naa sịkị anị opuma ini ịganịmamẹ se ini ḍukopẹlẹmẹ na ini okunwẹngịapụ ma ḅaaḅịa.

³⁴Ọkụma inia ḅie gbọrịḅọ, Farisiḅọ-ẹ, Gamaliẹl nwọ chịnḅọ, Oloko ḍieḅọ-ẹ, ini pịkị opuma osi se pịrịḅọ-ẹ, Ḅẹrẹchiri mị ḅie sịsẹ chịẹmẹ. Ọ̀ tọnmẹ na ini okunwẹngịapụ ma pakụma nụngọ pịrị,

³⁵anịsịkị nwọse Ḅẹrẹchiri mị ḅẹmẹ, “Ị̀ juo Izrẹlapụ, ó se mịna tomonima mịẹḅịa ẹrẹchị ḍọkịarịye mị ḅụ ómine ọ́mịna ḅụ ma ọbị.

³⁶Ḅọrọsa sịkị Tiodas ḅe ọ̀ ḅụ ḍiepakụmamẹ, ḍuko simemẹ na ori opu ḅọ-ẹ se nweni ẹndẹ pembeye ọ̀ ḅụ sọmẹ. Ọkụma ini ọ̀ ḅaamẹ, oria ọḅụḍukoapụ mamgba galagalamẹ, se oria ogbo mị pịkị fa ḅọrọmẹ.

³⁷Anị mị ḅọrọ seso, Judas, Galiliḅọ ḅe tolupakamẹ, tomoni kịẹn sịkị mị ḅụ ori sọnị tomonikpo nwọ jine ọ̀ ḅụ pịrịmẹ, ọkụma ini pịkị ori sọnị nwọ ḅaamẹ, oria ọḅụḍukoapụma pịkị galagalamẹ.

³⁸Anị mịọkụ mị ḅẹrẹ mị pịkị simeọkụ-ẹ, à ḍuko ọ́ pịrịaḅẹ, ọ́ gbọrịye sọnị se mịna owuapụma mịẹ ma. Ọ́ sarama inia ḅụḅarasin! Anịatịḅị mịna owuapụma tọn se pịkị nwẹngịarị fịrị mị tomoni ḅaraye-ẹ ḅẹḅẹ anị faḅịa.

³⁹Ọkụma anị nemikase Tamụnọ ḅara ḅomẹ ḅẹḅẹ, ómine ineda sarasarama ini nẹngịma ẹkẹ. Ómine ọ́mịna ḅụ ma ḍọkịḅoḅịa na ómine owu se Tamụnọ Ḅe paka aḅẹ!” Ḅẹrẹchiri mị Gamaliẹl ḅe pịrị tetema mị nwọ ọkịmẹ.

⁴⁰Ini okunwẹngịapụ ma chịn warị ḅie chumẹ, ini fomu, pịkị tọn ini pịrịmẹ na ini ḅarị jịn sịkị se Jizọs ẹrẹ go ḅẹrẹ ḍuko ma, anịsịkị ini inia ḅụḅarasinmẹ.

⁴¹Okunwẹngịapụ ma Ḅẹrẹchiri mị wẹrịsoarị sịkị, inia ḅieḅẹlẹmẹ, anịatịḅị Tamụnọ Ḅe ini ọkịsam na Jizọs Ḅe ẹrẹ mị gose ini ḅụgererema ḅara nwọse tọrụsiọrị gbẹịnmẹ.

⁴²Se eneḅeneḅene Oputẹkẹwarị mị ḅie na tomoni-a warịma ḅie na kunoka ḅara ḅụ ini Jizọs Mẹsaya Ḅe Iḅi Ḅẹrẹ mị ḍuko se pịkị anị se yeḍie ma ḅọrọmẹ.