Read kirikeni Okunwẹngịapụ 6 Bible Online

Okunwẹngịapụ 6 - kirikeni bible

Okunwẹngịapụ 6

¹Sịkị ḅo kele ḅọrọ sịkị, ọḅụḍukoapụma ḅe kịẹnḅịpị sẹnịma mun mẹ, kamụ koromẹ, Grik ọkwẹịn kọn-arị Juapụma na jokoma Juapụma na ogboku. Grik ọkwẹịn kọn-arị Juapụma nwọ ḅẹmẹ, na inia ḅie deapụ fịsa eremeni ma ini nwọ ḍikitọrụsinsam ini ene ene ḅe igbiki nwọ ḍiarị sịkị mị ḅụ.

²Se oyimaịn okunwẹngịapụ fịnjịma ọḅụḍukoapụ kpo mị chịn koḅirima se nwọ ḅẹmẹ, “Anị karakarakẹ wa Tamụnọ ọkwẹịn ḍuko mị ḅụ tọrụsin se mun igbiki ḅẹrẹ nwọ jinea.

³Anị-ẹ nwọ ḅẹ sịkị, mịnapụ, ómine ọ́mịna ḅie sọnọma owuapụ nwọ sẹlẹ pakụmaḅo ó nemi na Fịafịa Tẹmẹ Ḅe na pịkị nemi na ḅie ḅụ ḅein waraḅẹ nwọ ḅẹ apụ, se wa mị ḅẹrẹ mị nwọ seni inia ḅara chụaḅịa.

⁴Mine na mịnaḅụ na, anịsịkị tọrụ seni ḅeinma tẹkẹ na Tamụnọ ḅẹrẹ ḍuko na ḅụ wẹrịḅịa.”

⁵Bebe koḅiria mị mgba okunwẹngịapụ ma tọnpakụmaye mị nwọ ḅereni ọkịmẹ ḅieḅẹlẹ ḅụ, anị ini Stivin ḅe sẹlẹọkịye-ẹ, ḅereni na Fịafịa Tẹmẹ Ḅe na ḅụ ḅein ḅọ ḅe, Filip ḅe na, Prokorọs ḅe na, Naịkanọ ḅe na, Taịmọn ḅe na, Pamenas ḅe na, pịkị Nikolas ḅe na, ori anị Antiọk ḅie ḅo Jịnsẹḅọ-ẹ, anị pịkị ḅo Juapụ Tamụnọ ḅereni mị ḅụ sọsaḅọ-ẹ.

⁶Koḅirima mị ini ọkịpakụmaḅo okunwẹngịapụ ma ḍiemẹ, ini tẹkẹ ini pịrị se inia ḅarama nwọ seni inia ọgọnọ gbanamẹ.

⁷Se Tamụnọ ọkwẹịn mị pa wasamama mun mẹ. Ọḅụḍukoapụma ḅe kịẹnḅịpị mị Jerusalẹm ḅie suma suma mun mẹ, se agbamịẹapụma ḅie opu pẹkẹrẹ ḅereni mị ọkịmẹ.

⁸Stivin, Tamụnọ Ḅe iḅiọkụ se ḅẹlẹmasa ḅọ ḅe kụrọ pịkị ọ̀ ḅụ ḅeinmẹ, opu ḅụgbiripumaye na ḅụbuamaye na ọ̀ nwọ mịẹmẹ tomonima ogboku.

⁹Ọkụma Ngẹrị mịnaḅụ nyanasa owuapụ ini nwọse chịn tẹkẹwarị mị ḅie dapụ na, Saịrini na Alẹkzandria na ḅie ḅo Juapụma na ori na tụḅụrụmẹ. Ini na pịkị Silisia na Esia na sẹma ḅie ḅo Juapụma na Stivin ḅe na ḅẹrẹjineamẹ.

¹⁰Ọkụma Tẹmẹ Ḅe seni Stivin ḅe pịrị nemi mị ẹrẹchị ori ọkwẹịn ọkụma ini ineda ọ̀ dakẹ.

¹¹Anị ini da owuapụ na ọḅụfịye-ẹ na ini nwọ ḅẹ-ẹ, “Wa naamẹ ò Moziz ḅe na Tamụnọ Ḅe na fiesimarị sịkị!”

¹²Mịn ḅara mị anị ini se tomonima na sẹnịapụma na, Oloko ḍieapụma na nwọ chukuruma ọkụ-ẹ. Ini Stivin ḅe damaḅo se ò kun se ò se Ḅẹrẹchiri mị tọrọkọ ḅomẹ.

¹³Anịsịkị ini da owuapụ nwọ ọkị ḅie sọ mun mẹ, iruo kọn ọ̀ pụnụmaḅịa ẹrẹchị. Ini nwọ ḅẹmẹ, “Ḅe ḅọ ḅe ọ̀ sịkịmamgba tụḅụrụ ọkwẹịn kọnkọnmẹ, mịna osiḅụ sime Oputẹkẹwarị mị na Moziz Oloko mị na ḅụ.

¹⁴Wa pịkị naamẹ ọ̀ nwọ ḅẹarị sịkị na, Ḅe Jizọs Nazarẹtḅọ Ḅe ori Oputẹkẹwarị mị kan koroma se Moziz ḅe ḅara ḅọrọ ḅo ama mịẹmịẹaye mamgba nwọ ḍinmaḅịa!”

¹⁵Ḅẹrẹchiri mị ḅie sime apụ mamgba inia tọrụmgbọlụ mamgba nwọse Stivin ḅe ḅụ gbanamẹ se ọrịmẹ na ọ̀ tọrụkuḅu enjẹlḅọ tọrụkuḅu simeọkụ simemẹ.