Read kirikeni Okunwẹngịapụ 7 Bible Online

Okunwẹngịapụ 7 - kirikeni bible

Okunwẹngịapụ 7

¹Gele Agbamịẹḅọ ḅe Stivin ḅe gbelamẹ, “Mịn mị kọkọma ọkọ paka?”

²Stivin ḅe pẹkẹrẹmẹ, “Mịnapụ na ḍapụ na, ómine ị̀ poki! Boma nyana Tamụnọ Ḅe ọ̀ ḅụ se mịna ḅieju-ḍaḅọ Ebraham ḅe ḍiemẹ ò Mẹsopotemịa ḅie simearị sịkị, ma ò mun Heran ḅie angaka sịkị,

³se nwọse ọ̀ ḅẹmẹ, ‘Ị́ furo na ị́ya ama na nwọ wẹrịso se à se ị́ ḍieḅịa ama mị mun.’

⁴Anị ọ̀ Kaldia ama mị nwọ wẹrịso se mun Heran ḅie angaye-ẹ. Ebraham ḍaḅe fị ḅọrọ sịkị, Tamụnọ Ḅe ò mịẹse ọ̀ pakaḅo mị ama ḅie angamẹ, anị mịọkụ ómine angarị ama mị.

⁵Tamụnọ Ḅe ori anịsịkị mị ḅụ, se sosikima Ebraham ḅe oria ye ḅara ḅụ se ọ̀ pịrị gbọrị pẹkẹrẹ sọ ofori-ẹ anịa ḅie. Gbọrị ḅụọ na gbasị kiri sọnị ò se ọ̀ pịrịkẹ, ọkụma Tamụnọ Ḅe ò ḅereni ọ̀ pịrịmẹ na ori anị seni ọ̀ pịrịḅịa, na anị sime ọ̀ pịrịḅịa, se ọ̀ ḅarị ofori ẹka sịkị anị sime ò furoḅie pakaḅoḅịa apụma pịrịḅịa. Tamụnọ Ḅe mị ḅereni Ebraham ḅe pịrị sịkị ma ori awọ nyanakẹ.

⁶Tamụnọ Ḅe nwọse ọ̀ ḅẹmẹ, ‘Ị́ furoḅie pakaḅoḅịa apụma jịn sẹ ḅie ini angaḅịa, anị ini omoni sọ se ini pịrị, siḅara se ini na angaḅịa nyọ-ẹ kụra ẹndẹ ḅie.

⁷Ọkụma à ḅẹrẹpẹlẹ ini fịrịnwẹngị pịrịḅịa apụma pịrịḅịa Tamụnọ Ḅe nwọ ḅẹmẹ, anị mị ḅọrọ so, ini anị ama mị ḅie pakaḅoḅịa, se mịanga ị̀ tẹkẹḅịa.’

⁸Anịsịkị Tamụnọ Ḅe ḅụpẹlẹ mịẹmịẹye mị nwọ seni Ebraham ḅe pịrịmẹ ọḅọkụ mị ḅe elekima ḅara ḅụ. Anị Ebraham ḅe Aịzịk ḅe ḅụpẹlẹye-ẹ ini ò yi nine-a ḍin karama ene ḅụ, Aịzịk ḅe Jekọb ḅe ḅụpẹlẹmẹ, se Jekọb ḅe mịna oyimaịn ḍapụ fịnjịma ḅụpẹlẹmẹ.

⁹“Ḍapụ ma Josẹf ḅe ḍiki pụkọsolimẹ, ò se omoniḅọ ḅara ḅụ Ijipt apụ dẹrịmẹ. Ọkụma Tamụnọ Ḅe ori na simemẹ,

¹⁰se deinma ḅụ oria ḅụfụka mamgba ḅie ọ̀ pakụmaḅomẹ. Josẹf ḅe ḅo Fẹro, Ijipt amanyanaḅọ ḅe tọrọkọ lasịkị, Tamụnọ Ḅe ḍikiḅieḅẹlẹ ye mịẹ ḅara na nemi na nwọse ọ̀ pịrịmẹ. Fẹro ḅe Josẹf ḅe se gọvịna mịẹ Ijipt sẹ mị pịrịmẹ, pịkị amanyana furo mị na.

¹¹Anịsịkị bebe Ijipt na Kenan na ḅie mgba ḅuruḅaa omi-ẹ, opu tọrụsiọrị anị nwọ deki ḅomẹ. Mịna ḅieju-aḍapụma ini ineda fịaye nyana ḅokẹ,

¹²se Jekọb ḅe naamẹ na ịpịamgba Ijipt ḅie omi-ẹ nwọ ḅẹ sịkị, ori oria owuapụ awọma nwọse fịrịmamẹ, mịna ḅieju-aḍapụma, anị ini ḅe tatarị mun anịnyọ la mị-ẹ.

¹³Maịn karama anịnyọ mun mị ḅụ Josẹf ḅe mịẹse oria mịnapụma ò lekirimẹ, se Fẹro ḅe pịkị Josẹf ḅe furo na gbolomaye nwọ nemimẹ.

¹⁴Anị Josẹf ḅe oku se ḍawu Jekọb ḅe fịrịmaye-ẹ, na ori na pịkị bebe furo mị mgba na ini Ijipt ḅo, inimgba kịẹnḅịpị laye sọnọfa kịnị iniasi.

¹⁵Anịsịkị Jekọb ḅe so Ijipt nwọ mun mẹ, ori na mịna ḅieju-aḍapụma na sime se fị nyọ mị.

¹⁶Ini inia fịsa ojuma deki so Shẹkẹm mun mẹ, anịanga ini ini se Ebraham ḅe Hamọ sẹ apụma ḅara fẹ iḍupu mị ḅie ḍipimẹ.

¹⁷“Tamụnọ Ḅe ḅereni Ebraham ḅe pịrị na ọ̀ mịẹḅịa nwọ ḅẹ ye mị ḅo kpeki sịkị, mịna tomonima ḅe kịẹnḅịpị Ijipt ḅie iḅi ḅara nwọse ḅakatẹịnmẹ.

¹⁸Anịḅe kuluma, Josẹf ḅe nemika amanyanaḅọ Ijipt ḅie ḅo ḅẹrẹtọnmẹ.

¹⁹Ori epele se mịna ḅieju-aḍapụma ti, se si ḅara se ini na angamẹ, kụrọ ḅara se ini mịẹse ini inia warịma ḅie inia ḍọkọḍọkọ awọma nwọ ọkị pakụmamẹ, mịẹse ini fịḅịa ḅara.

²⁰Mịn sịkị mị ḅụ mị ini Moziz ḅe yiye-ẹ, opuma iḅi tọkụ-ẹ. Tẹrẹ-a akalụ ini nwọse warị ḅie ò ḍikiḍikimẹ,

²¹se ini oria warị mị ḅie ori ọkịpakụmaḅo sịkị, Fẹro ada ma ori ọkị árịa tọkụ mịẹmẹ, se árịa tọkụ ḅara se ò ḍikiḍiki pakụmaḅomẹ.

²²Ini Ijipt apụ nemi mamgba nwọse ò ḍiemẹ, se ò ḅo opu tomoniḅọ sọmẹ ọkwẹịn ḅụ na mịẹmịẹaye ḅụ na.

²³“Moziz ḅe ḅo kụra mesi nwọ lasịkị ọ̀ ḍọkịḅo ọrịmẹ oria tomoni Izrẹlapụma ini nwọ mịẹ simarị ḅara.

²⁴Ori inia ḅie gbọrịḅọ ọrịmẹ, Ijiptḅọ siye se ọ̀ mịẹarị anga, anị ò mun ḅarachụa ọ̀ pịrị-emunye-ẹ, ò sowu ḅi, se Ijiptḅọ ḅe nwọ ḅaamẹ.

²⁵(Ò koromamẹ na oria ama apụma ini nemiḅịa na Tamụnọ Ḅe ọ̀ ḅụ ḅọrọ ini ḍụaḅọrọmaḅịa, ọkụma ini kaịnḅokẹ.)

²⁶Anịḅe eneḅa, owusọarị mama Izrẹlapụ ọ̀ nwọ ọrịmẹ, se ori inia ogboku deinma mịẹḅịa ọkụ ḍọkịmẹ. ‘Owuapụ, ó poki,’ ọ̀ nwọ ḅẹmẹ, ‘ómine Izrẹlapụ-ẹ, nde ó gose jịnḅọ jịnḅọ mịẹ simarịye?’

²⁷Ọkụma ísíḅọ ḅe mịẹ simaḅọ ḅe Moziz ḅe suma anga pịrịmẹ. Se gbelamẹ, ‘Tụḅọ ị́ se ḅẹrẹtọnḅọ na ḅẹrẹkọnḅọ na nwọ mịẹ wa pịrị?

²⁸Ị́ ḅia Ijiptḅọ ḅe ị́ nwọ ḅaa ọkụ mị, ị́ nwọse ị̀ ḅaa ḍọkị-ao?’

²⁹Moziz ḅe mịn mị naa sịkị ori Ijipt ḅie mangị so se mun sakị Midia ama mị ḅie angamẹ. Anịnyọ mama owuapụ awọ ọ̀ nwọ yimẹ.

³⁰“Kụra mesi ḅọrọ sịkị enjẹlḅọ ọ̀ ḅụ se Moziz ḅe ḍiemẹ piri ḅie kọrịarị fịnị ḅie eleogbo Saịnaị Tụndụ mị na kpeki nyọ ḅụ.

³¹Moziz ḅe ori ọrịye mị ijira se ọ̀ ḅụ saramẹ, se ọ̀ nwẹngị piri mị kpekima mun mẹ, kweinma ori ọrịye mị nwọ ḍikiḅịa ẹrẹchị. Ọkụma ọ̀ Nyanaḅọ Ḅe pụkọ nwọ naamẹ:

³²‘Ị̀rị̀ ị́ya ḅieju-aḍapụma Tamụnọ Ḅe-ẹ, Ebraham na, Aịzịk na, pịkị Jekọb na Tamụnọ Ḅe-ẹ.’ Moziz ḅe ḅalafa se ḅụgeregeremẹ, ọ̀ ḅarị dadama anị ḍikikẹ.

³³Nyanaḅọ Ḅe nwọse ọ̀ ḅẹmẹ, ‘Ị́ ḅụọ akpakama sin, anịatịḅị ị́ nwọ chịẹsime anga mị osiḅụ sime kiri-ẹ.

³⁴Ini kụrọ tọrụsiọrị se ị̀ya tomonima pịrịarị ọkụ à nwọ ọrịsam Ijipt ḅie, àrị inia tọrụsiọrị ma ḅe owu pụkọ naasam, à koroḅo ini ḍụaḅọrọma-ẹ ḅosam. Mịọkụ ḅo àrị ị́ se Ijipt fịrịmaḅịa.’

³⁵“Ḅe Moziz ḅe anị Izrẹlapụma sịkịḅọ ḅe-ẹ. ‘Tụḅọ ị́ se ḅẹrẹtọnḅọ na ḅẹrẹkọnḅọ na nwọ mịẹ wa pịrị?’ Ini nwọse gbela ḅọ ḅe-ẹ. Ori mị Tamụnọ Ḅe se fịrịma ḅọ ḅe-ẹ ḅẹrẹtọnḅọ na ḍụaḅọrọmaḅọ na ḅara ḅụ, kọrịarị piri mị ḅie mịna ḅụ se ò ḍie enjẹlḅọ ḅe ḅarachụa ḅụ.

³⁶Ori mị Ijipt ḅie ini ọkị pakụmaḅoye-ẹ, ḅụgbiripumaye na ḅụbuamaye na Ijipt ḅie ọ̀ nwọ mịẹmẹ, pịkị Awụwụ Tọrụ mị ḅie na, pịkị ele mị ḅie na, kụra mesi na gbasịye ḅụ.

³⁷Moziz ḅe anị nwọse Izrẹlapụma ḅẹye-ẹ, ‘Tamụnọ Ḅe ori ịkịankoroḅọ se ọ́ fịrịmaḅịa, anị ọ̀ nwọ ị̀ fịrịma ọkụ mị, ọ́mịna ḅie mị ọ̀ pakaḅoḅịaye-ẹ.’

³⁸Ori anị Izrẹlapụma na eleogbo koḅirima sime ḅọ ḅe-ẹ; mịna ḅieju-aḍapụma na ori na simemẹ pịkị Saịnaị Tụndụ mị ọgọnọ ọkwẹịn ọ̀ pịrị enjẹlḅọ ḅe na, ọ̀ pịkị Tamụnọ ḍumo oku mị da ọkịmẹ anị ḅọrọma wa pịrịḅịa ẹrẹchị.

³⁹“Ọkụma mịna ḅieju-aḍapụma ini ọ̀ ḅịpị poki ḍụkụkẹ; ini ò suma anga pịrị, se ḅimẹ ini vinpịkị so Ijipt mị mun.

⁴⁰Anịgose ini nwọse Erọn ḅe ḅẹmẹ, ‘Tọrọkọ ịsụn wa pịrịḅịa oru ma nwọ tẹmẹ wa pịrị. Ori Moziz ḅe ọkụma, cheye ọ̀ la-ẹtuḅo wa nemikẹ, anị Ijipt ḅie wa ọkịpakụmaḅo ḅọ ḅe.’

⁴¹Anịsịkị mị ḅụ anị ini posa nambulo kịkẹma oru tẹmẹ koroma, agbamịẹ anị pịrị se alalị fị se ini ḅarana tẹmẹ koromaye mị pịrịye-ẹ.

⁴²Anị Tamụnọ Ḅe ọḅụ pịkị ini gbin, se inia ḅụḅarasin sotọrụ lolia ma na tẹkẹ mị pịrịye-ẹ, anị Ịkịankoroapụ ḍiri ma ḅie gịẹịn ḅara ḅụ. ‘Izrẹlapụ! Kụra mesi na gbasịye eleogbo ḅie ọ́ ḅaa se agbamịẹ namama ó se mịẹ ị̀ pịrịkẹ.

⁴³Mọlẹk oru mị ḅe ikowarị mị anị ó dekiye-ẹ, ini kara Rifan oru mị, ọ́mịna lolia oru mị na; mama anị ómine ọ́ tẹkẹḅịa ẹrẹchị mịẹ oru-ẹ. Anịgose àrị ó de Babilọn mị saḅakoro nyọ ḅụ sẹịnḅịa.’

⁴⁴“Mịna ḅieju-aḍapụma Tamụnọ Ḅe tọrụkuḅu sime Ikowarị eleogbo mị ḅie ini na simemẹ. Tamụnọ Ḅe ḍuko Moziz ḅe pịrị ḅara anị ini se anị ịkasị ọkụ-ẹ, ori anị se Moziz ḅe ḍiemẹ na anị sime nwọ ḅẹ ḅara mị.

⁴⁵Ọḅụkọ, mịna ḅieju-aḍapụma, inia ḍapụma ḅara ikowarị mị daọkị sịkị ini anị se chụa Jọsụwa ḅe na mun mẹ, ini mun-arị sịkị Tamụnọ Ḅe desinsa sẹma ḅara inia amama ọkịmẹ se anị sime ọkịmun Devid ḅe ḅụọ sọ lamẹ.

⁴⁶Ọ̀ Tamụnọ Ḅe tọrụkuḅu iḅi nyana ḅomẹ, anịgose ọ̀ Tamụnọ Ḅe ḅara ḅimẹ na ò ḅereni ọ̀ pịrị ori anga nyọ nama Jekọb Tamụnọ Ḅe pịrị.

⁴⁷Ọkụma Sọlọmọn ḅe anị warị mị nama ọ̀ pịrịye-ẹ.

⁴⁸“Ọkụma Geletẹịn Tamụnọ Ḅe tomoni nama warị ḅie ori anga angakẹ ịkịankoroḅọ ḅe ḅẹ ḅara ḅụ.

⁴⁹‘So mị anị ị̀ya amanyanaḅọ ngada-ẹ, Nyanaḅọ Ḅe ọkọ ḅẹmẹ, se tomonikiri mị anị ị̀ya ḅụọgbana ịkasịe-ẹ. Ndende sime warị ọ́ nwọ nama ị̀ pịrị ḅe? Nde à sọ angaḅịa nyọ?

⁵⁰Maye mamgba ị̀rị̀ tẹmẹka?’ ”

⁵¹Stivin ḅe pịkị nwọ ḅẹmẹ, “Ma ómine ininachịn la-ọkụ ḍiki! Ọ́mịna kuḅiemgbọlụma oru mịẹmịẹaye ḅụ sime la-ọkụ ḍiki, ó ḅeri inikima Tamụnọ oku mị pịrị la-ọkụ ḍiki! Ọ́mịna ḅieju-aḍapụma simeọkụ anị ó simeọkụ-ẹ; ómine sọ sịkịmamgba ọ́ Fịafịa Tẹmẹ Ḅe na tụḅụrụmẹ!

⁵²Ọ́mịna ḅieju-aḍapụma ḅụfụka se pịrịka gbọrị ịkịankoroḅọ omi? Ini Tamụnọ fịrịnwẹngịapụma nwọ ḅaamẹ, ḅọlọ sịkị ngịsị oria karakaraye mịẹ Fịrịnwẹngịḅọ ḅe ḅoaḅẹ nwọ ḅẹye mị ḍukopakụma apụma. Se mịọkụ ómine ò se ịbafị pịkị ọ̀ ḅaasam.

⁵³Ómine anị Tamụnọ oloko mị nwọ ọkị apụ ma-ẹ, enjẹlapụma saḅama wa pịrịye mị—anị sọnị ómine anị ḍukoye mịẹkẹ!”

⁵⁴Ḅẹrẹchiri mị ḅie apụma Stivin ḅe poki sime sịkị, inia ḅie opuma ọfịrịmẹ, se ini inia aka ma farị ọ̀ damẹ ịganị ḅụ.

⁵⁵Ọkụma Stivin ḅe, Fịafịa Tẹmẹ Ḅe ò ḅie ḅein ḅụ, tọrụ deki so ḍiki se Tamụnọ Ḅe boma mị ọrịmẹ, pịkị Jizọs Ḅe na ọrịmẹ Tamụnọ Ḅe amaḅara anga chịẹsime waraḅẹ.

⁵⁶Ọ̀ nwọ ḅẹmẹ, “Ḍiki! À so mị ọrịmẹ, anị finji waraḅẹ, se Tomoniḅọ Tọkụ Ḅe Tamụnọ Ḅe amaḅara anga ḅụ chịẹsime waraḅẹ!”

⁵⁷Ḅẹrẹchiri mị ḅie apụma gelema oloku se inia ḅarama se inia ḅeri ma gbẹịnmẹ. Anịsịkị inimgba gboloma mangị ọ̀ damamunmẹ anị kirikiri,

⁵⁸se ama mị ḅie ọ̀ fọnọ pakụma se ḍụparịma se ò gbinmẹ. Onyechịẹapụ ma inia ḅụchụayema sin gbọrị asẹmẹnịḅọ Sọl nwọ chịnḅọ ḅara chụamẹ.

⁵⁹Ini ḅarasinkẹ Stivin ḅe gbin ḅụ, ori ọ̀ Nyanaḅọ Ḅe nwọ chịn-arị sịkị, “Nyanaḅọ Jizọs, ị̀ tẹmẹ mị ọkị!”

⁶⁰Ọ̀ kpẹrẹkị koro se gele pụkọ se olokumẹ, “Nyanaḅọ! Mị si ḅụ ḅarasin ini pịrị!” Mịn mị ọ̀ nwọ ḅẹ se fịmẹ.