Read kirikeni Okunwẹngịapụ 8 Bible Online

Okunwẹngịapụ 8 - kirikeni bible

Okunwẹngịapụ 8

¹Sọl ḅe ḅara pụnụ Stivin ḅe niniḅaa mị pịrịmẹ. Anị gbọrị ene mị ḅụ Jerusalẹm ḅie sime chọchị mị sakị opu tọrụsiọrị ḅie sọmẹ. Okunwẹngịapụ ma sikima ọkụma, ḅereniapụ mamgba galagala Judia na Sameria na irima la-ọkụ la-ọkụ ḅie sọmẹ.

²Ḅereni ḅie sime iḅi kuḅie nyana dapụ Stivin ḅe ḍipimẹ, oloku owu se ḍụẹịn ḍin ọ̀ pịrịmẹ.

³Ọkụma Sọl ḅe chọchị mị famaḅịa ọkụ ḍọkịmẹ; mun warị warị ḅie sọ, se ḅereniapụma fọnọfọnọ pakụmaḅomẹ, owuapụ na eremeni na, se ini se ikoli ḅie chumẹ.

⁴Ḅereniapụ ma galagala nyọ mamgba mun se oku mị ḍuko wasamamẹ.

⁵Filip ḅe so Sameria opuama mị ḅie mun se Mẹsaya Ḅe ḅẹrẹ ḍuko ini pịrịmẹ.

⁶Tomonikpo mị kuḅie chịẹ-chịẹ-chịẹ ḅụ iḅi ḅeri se Filip ḅe pokimẹ, se ọ̀ mịẹ ḅụgbiripumaye ma ọrịmẹ.

⁷Sitẹmẹ oloku pụkọ se tọn-a apụ ḅie pakaḅomẹ, tọn-a oju ḅụ gbọrị pẹkẹrẹ fịapụ na ikeliapụ na ọ̀ nwọ gwọmẹ.

⁸Anịgose opu ḅieḅẹlẹ Sameria mị ḅie sọmẹ.

⁹Saịmọn nwọ chịnḅọ anị opuama mị ḅie omi-ẹ, majik mịẹse tomonima tọrụ irima-irimamẹ Sameria mị ḅie. Ori ọ̀ ḅụ se opuḅọ mịẹmẹ,

¹⁰se ama mị ḅie sime kala na opu na tọrụ se ò ḍikimẹ. Ini nwọ ḅẹmẹ, “Ori anị Tamụnọ kụrọ mị-ẹ, ‘Opu kụrọ ini nwọse chịnye mị.’”

¹¹Ori oria majik nwọse ḅọlọ sịkị ngịsị inia tọrụ irimamẹ anị mịẹse ini tọrụ se ò ḍikiye-ẹ.

¹²Ọkụma ini Filip ḅe oku mị nwọ ḅereni sịkị, Tamụnọ Amanyanakiri mị gboloma Iḅi Ḅẹrẹ mị na pịkị Jizọs Kraịst ẹrẹ mị gbolomaye mị na ḅụ, ini mengi se ini saramẹ, owuapụ na eremeni na.

¹³Saịmọn ḅe sọnị ò ḅerenimẹ se ò mengi sara so sịkị, ọ̀ ḅụ se Filip ḅe kpekimamẹ, anị ọ̀ ḅụbuamamẹ ò Filip ḅe mịẹarị ḅụbuamaye ma na ḅụgbiripumaye ma na nwọ ọrị sịkị.

¹⁴Jerusalẹm ḅie sime okunwẹngịapụ ma naamẹ na Sameria apụma Tamụnọ ọkwẹịn mị ọkịsam nwọ ḅẹ sịkị, ini Pita ḅe na Jọn ḅe na nwọse ini fịrịmamẹ.

¹⁵Ini mun lasịkị, ini tẹkẹ ḅereniapụma pịrịmẹ mịẹse ini Fịafịa Tẹmẹ Ḅe nyanaḅoḅịa ḅara.

¹⁶Anịatịḅị Fịafịa Tẹmẹ Ḅe koroḅo ḅụgbana sa ḅọ ma ofori-ẹ; Jizọs Ḅe ẹrẹ ḅụ kẹngẹ mị ini mengi se ini sarasaye-ẹ.

¹⁷Anịsịkị Pita ḅe na Jọn ḅe na inia ḅarama se inia tịḅị ọgọnọ gbanamẹ, se ini Fịafịa Tẹmẹ Ḅe nwọ nyanaḅomẹ.

¹⁸Saịmọn ḅe ọrịmẹ na ini Tẹmẹ nwọse ḅereniapụma pịrịsam, okunwẹngịapụ ma inia ḅarama nwọse inia ọgọnọ gbana sịkị. Anị ori igbiki ḅereni Pita ḅe na Jọn ḅe na pịrịye-ẹ,

¹⁹se nwọ ḅẹmẹ, “Ọ́ mị kụrọ mị se ị̀rị̀ sọnị nwọ pịrị, mịẹse àrị ị̀ ḅara se ḅụgbana ḅọ goyegoye Fịafịa Tẹmẹ Ḅe nwọ nyanaḅịa ḅara.”

²⁰Ọkụma Pita ḅe ọ̀ pẹkẹrẹmẹ, “Ye ị́rị́ na ị́ya igbiki na fịfa-a, ị́ nwọ koromarị sịkị na ị́ igbiki se Tamụnọ ḍiepịrịye fẹḅịa nwọ ḅẹ sịkị!

²¹Mịna fịrị ḅụ ị́ nyana se ḍia ọkịḅịa pẹkẹrẹ ofori-ẹ, anịatịḅị ị́ kuḅiemgbọlụ Tamụnọ Ḅe tọrụkuḅu karakarakẹ.

²²Mịn ị́ tọn-arị siye mị ḅụ vinpịkị, se Nyanaḅọ Ḅe tẹkẹ, mịẹse ò si ḅụ ḅarasin ị́ pịrịḅịa ḅara, nwọ simeye ị́ nwọse ḅiekoromarịye gose.

²³Anịatịḅị àrị ọrịmẹ na ị́ opuma akụ ḍikitọrụfụka nwọ nyanamẹ, ị́rị́ pịkị si mị ḅie ikoliḅọ-ẹ.”

²⁴Saịmọn ḅe nwọse Pita ḅe na Jọn ḅe na ḅẹmẹ, “Pasisi ọ́ Nyanaḅọ Ḅe tẹkẹ ị̀ pịrị, mịẹse ó ḍukoarịye ma ḅụ gbọrịye sọnị paka ị̀ pịrị ẹka ḅara.”

²⁵Ini inia onyechịẹ ọkwẹịn ma nwọ kọn so sịkị, se Nyanaḅọ Ḅe oku mị ḍuko se so, Pita ḅe na Jọn ḅe na vinpịkị so Jerusalẹm mun mẹ. Ini mun-arị sịkị ini Iḅi Ḅẹrẹ mị nwọ ḍukomẹ tọn-a Sameria kala amama ḅie.

²⁶Nyanaḅọ Ḅe enjẹlḅọ nwọse Filip ḅe ḅẹmẹ, “Ị́ ḅụ karakarama, se Jerusalẹm ḅie ḅọrọ Gaza ama mị munḅịa ateli ḅụ chukuda nyọ mị ḅie sọmun.” (Mịn ateli mị tomoni ḅarị anịa ḅie nwẹngịkẹ mịọkụ.)

²⁷Anị Filip ḅe ḅụkarakarama se munye-ẹ. Mịọkụ ḅụposa gbọrị Itiopiaḅọ so oria ama nwọ mun aḅẹ. Ḅe owuḅọ ḅe opuma yela anị Amanyana-eremeniḅọ ma pịrị fịrịnwẹngịḅọ-ẹ, ori árịa ngọ koko ḅọ-ẹ, ò mun Jerusalẹm ḅie Tamụnọ tẹkẹ se vinpịkị ḅoaḅẹ oria kirinwẹngị arụ ḅie. Ọ̀ dọkụma mun-arị sịkị, ori Aịzaya ịkịankoroḅọ ḅe ḍiri nwọ go-aḅẹ.

²⁹Fịafịa Tẹmẹ Ḅe nwọse Filip ḅe ḅẹmẹ, “Saḅa ísí pẹkẹrẹ mun se anị kirinwẹngị arụ mị na kpekima sime.”

³⁰Filip ḅe mangị saḅa mun se ori Aịzaya ḍiri ḅie simeye go-arị ọkụ mị nwọ naamẹ; anị ò gbelaye-ẹ, “Ị́ go-arị ḍiri mị ị́ anị kaịnḅo?”

³¹Fịrịnwẹngịḅọ ḅe pẹkẹrẹmẹ, “Nde àrị ineda kaịnḅoḅịa ọkụ, jịnḅọ anị ḍuko ḅelema ị̀ pịrịka simeogbo?” Se ò Filip ḅe chịnmẹ, na ọ̀ tanjị iwo mun ori na kirinwẹngị arụ mị ḅie sime.

³²Ò go sime Fịafịa ḍiri tọrụ mị, anị mị mị-ẹ, “Ini se mun ḅaa-ẹmun anana simeọkụ, ini oria oju ichuka ma kịrịsin-arị sịkị gboinma sime anana tọkụ simeọkụ. Gbọrị ọkwẹịn sọ ọ̀ kọnkẹ.

³³Ini ọ̀ ḅụgereremamẹ, ini karakara ḅẹrẹkọn ọ̀ pịrịkẹ. Ineda ọ̀ wẹrị pakaḅo ḅara ḍukoḅịa gbọrịḅọ sọ ofori-ẹ, anịatịḅị oria ḍumo tomonikiri kulumasam.”

³⁴Fịrịtịḅịnịḅọ ḅe nwọse Filip ḅe gbelamẹ, “Ḍuko ọkọmụ tụḅọ ḅụ ḅẹrẹ ịkịankoroḅọ ḅe nwọ ḍuko-ao? Ọ̀ ḅụ ḅẹrẹ mụnọ se jịnḅọ ḅụ ye?”

³⁵Se Filip ḅe sakị ọkwẹịnmẹ, mịn Fịafịa ḍiri tọrụ mị ḅụ ọ̀ sakị, Jizọs Ḅe gboloma Iḅi Ḅẹrẹ mị nwọ ḍuko ọ̀ pịrịmẹ.

³⁶Ini anị ateli mị ḅie dọkụma mun-arị sịkị, iniḅo mengi sime nyọ nwọ lamẹ, se fịrịtịḅịnịḅọ ḅe nwọ ḅẹmẹ, “Mịn mengi-ẹ. Cheye kikichụa ị̀ pịrị ḅe mengi sara ḅụ?”

³⁷[Filip ḅe nwọse ọ̀ ḅẹmẹ, “Ini ineda mengi se ị́ saraḅịa ị́ nemikase ị́ kuḅiemgbọlụ mgba se ḅereni mẹ ḅẹḅẹ.” “Iin, à ḅerenimẹ,” fịrịtịḅịnịḅọ ḅe nwọ pẹkẹrẹmẹ; “À ḅerenimẹ na Jizọs Kraịst Ḅe ori Tamụnọ Tọkụ-ẹ.”]

³⁸Fịrịtịḅịnịḅọ ḅe tọnmẹ na kirinwẹngị arụ mị dachịẹ, se Filip ḅe na fịrịtịḅịnịḅọ ḅe na koro mengi ḅie mun mẹ, anịsịkị Filip ḅe mengi se ọ̀ saramẹ.

³⁹Ini mengi mị ḅie pakaḅo sịkị, Tamụnọ Tẹmẹ Ḅe Filip ḅe ọkị somẹ. Fịrịtịḅịnịḅọ ḅe ḅarị ori ọrịka sịkị, ḅieḅẹlẹ ò ḅie ḅein ḅụ ò mun-arị nyọ ọ̀ nwọ mun mẹ.

⁴⁰Filip ḅe Azotọs ḅie ọ̀ ḅụ ḍọkịḅo ọrịmẹ; ò so mun Sizaria lamẹ, se ateliogbo ò mun-arị sịkị amama ḅie ori Iḅi Ḅẹrẹ mị ḍukoma mun mẹ.